Monthly Archives: August 2016

Tinreng Feature : Mizoramah naupang bo awm lo; Nu leh pa awmna hriatloh 6

Aizawl: Child Protection Society, Social Welfare Department leh Police tangkawp in naupang bo an awm leh awm loh an zirchianna ah Mizoramah naupang bo an awm lo a, chutih lai chuan naupang nu leh pa an awm na hriat loh mi 6 an awm.

Child Protection Society, Social Welfare Department leh Police tangkawp te hian July & August, 2016 chhung khan Operation Muskaan II an nei a, he operation an neih chhan chu Mizoram chhungah naupang bo an awm leh awm loh zirchianna turin a ni.

Zirchianna hi Mizoram chhunga naupang enkawlna hmun 46 ah neiin, he zirchianna an neihah hian naupang 1000 te chu thu an zawtfiah.
Chung home hrang hrang a tanga an zirchiannaah chuan naupang bo an awm lo a, amaherawhchu an nu leh pate hriat theih loh naupang 6 an hmu chhuak thung.

Home bakah hian hmun ualau deuh, kawng kam bakah bus leh sumo stand 95 ah te zirchianna te hi an nei tel bawk a, chung zingah chuan naupang bo engmah an hmu chhuak lo a ni.

Facebooktwittergoogle_plusredditpinterestlinkedinmail

Hindi zirtirtute hlawh pek thuai beisei a ni

Aizawl: Parliamentary Se-cretary (Education) Jo-seph Lalhimpuia chuan CSS hnuaia Hindi zirtirtute hlawh chu pek thuai an beisei tih Zalen a hrilh a. Hlawh pek har an nih chhan chu Central in budget ah an hlawh daih tur a dah loh vang niin a sawi.

Zalen palaiin a biak naah Parliamentary Secretary chuan CSS Hindi zirtirtute hian January 2016 atangin hlawh an la tawh lo tih a sawi a. Hindi zirtirtute hlawh hi Financial year khat chhung zel atan siam thin a ni tih sawiin kum hmasa lam 2015-2016 khan an hlawh daih tur hi budget ah dah a nih loh avangin January & February, 2016 hlawh tur chu HRD Ministry ah an dil leh nia sawiin Ministry lamin an hlawh daih tur a pek theihloh avangin harsatna an tawk ta tih a sawi.

Mahima chuan Hin-di zirtirtute chu sawr-karin a ngaihsak tih sawiin an hlawh chung-chang hi Education Minister, Secretary leh Director te pawhin vawi tam tak thuneitu sang hnenah an thlen bakah Delhi a Mizoram sawrkar aiawh Resident Commissioner Ar-vind Ray leh a nupui, HRD Ministry a Additional Secretary hna chelh mekte pawh theihtawp chhuah turin an ngen tih a sawi a, thla hnih (January & February) hlawh chu reilote ah a chhuah an beisei tih Zalen a hrilh.

Parliamentary Secretary chuan Hindi zirtirtute thla hnih hlawh hi hmuh anih veleh audited statement leh utilization certificate siam nghalin a dang March-August hlawh pawh buaipui nghal a ni dawn nia sawiin Mi-nistry lam pawh an inhawng hle niin a sawi. CSS Hindi zirtirtute chu kum 2017 a tawp tur an ni chungin an thawh chhunzawm zel theihnan Chief Minister leh Department lam pawhin hma an la tih a sawi a, “Chief Minister in tum hnih Prime Minister hnenah chhunzawm tura ngenna a thlen tawh a, beiseina sang tak kan nei a ni,” a ti bawk.

RMSA leh SSA hnuaia zirtirtute hlawh lak hun tur Zalen zawhna chhangin Parliamentary Secretary chuan, “Mizoram sawrkarin a tum ve tur matching share tihfel a ni tawh a, sum hi account ah a luh veleh central in an chanpual tur min rawn pe ve ang a, chumi zawhah kan pek thuai kan beisei,” a ti bawk.

SSA leh RMSA sum hi hmarchhak state te tan 90:10 in Central leh State ten an intumsem a ni.

Facebooktwittergoogle_plusredditpinterestlinkedinmail

Bawlhhlawh sawngbawl zirhona khawmpuiah AMC?Councillor 4 tel

AIZAWL: August ni 16-19, 2016 chhung khan India ram pum huap bawlhhlawh paih leh sawngbawl, vantlang faina leh hriselna khawmpui, ‘Waste and Sanitech India Conference 2016’ chu United Business Media (UBM)  huaihawtin Pragati Maidan, Delhi-ah neih a ni a, Aizawl Municipal Corporation aiawhin Councillor pali Laltlanzova Khiangte, H. Zonunsanga, Zonunsangi Fanai leh Zodingpuii te an tel.

Khawmpuiah hian India ram hmun hrang hranga Municipal ten  bawlhhlawh an khawn khawm dan leh an sawngbawl dante ngaihthlaka zirho a nih bakah Ministry of Urban Development atanga scheme siam-dan, India ram tihfai hna thawhna scheme, Swach Bharat Mission hmang leh anmahni sum hmangin khawpuia faina tura hma an laknate ngaihthlak a ni.

AMC aiawhte chuan Mizoram sawr-karin Swach Bharat Mission-ah pawisa a pek ve loh avang leh he Mission hi a rim a ra an hriat ve loh avangin rualawh thlak an tih thu an sawi.

India sawrkarin North East khawpuite hmasawnna tur scheme a kalpui mek, North East Region Urban Development Programme (NERUDP) sum hmanga khawpui bawlhhlawh sawngbawlna tur buaipuinaah  pawh Mizoram sawrkarin AMC hmang lova SIPMIU a hmang chu Municipal danga thawkten mak an tih thu an sawi nia thudawn a ni.

AMC Councillor-te hi Hotel Taj Palace, New Delhi-ah August ni 19 & 20 a chenna in leh infrastructure lama India ram hmasawnna tur sawihona khawmpui, ‘India is Future Ready-Housing and Infrastructure’ khawmpuiah an tel bawk a. Hetah hian India ram mipui zawng zawngte tan chenna in tha, concrete in leh ek in tha, thianghlim nei vek tura hma a laknate sawiho a ni. Housing and Infrastructure khawmpui hi Information & Technology Minister Ravi Shankar Prasad bakah Union Minister engemaw zatin an hmanpui a ni. He hunah hian AMC Councillor te chuan Mizoram sawrkarin Housing for All Scheme hnuaia mi harsa, in hmun nei si, sakna tur neilo te tan insak tanpuina nuai 1.5 dawn theihna ah AMC atangin dilna 3067an dawn thu an sawi bawk a ni.

Facebooktwittergoogle_plusredditpinterestlinkedinmail

Mizoram ah JE la hmu lo

Aizawl: Hmarchhak state thenkhata leng mek Japanese Encephalitis chu Mizoram ah vei an la awmlo a, Health department chu engemaw thleng palh thut thei lakah an inring reng.

Japanese Encephalitis vang hian Manipur ah damlo leh thi an awm avangin Health Department chuan tunhnai khan Manipur ramri dep, Sakawrdai leh a chhevelah thil awmdan enfiah tur leh JE vei an awmleh awmloh enfiah turin IDSP nodal officer Dr. Pachuau Lalmalsawma hovin mi 13 an tir a, tun thlengin he natna vei hi an la awmlo nia an hriat thu Dr. Pachuau Lalmalsawma chuan Zalen a hrilh.

Sub Centre hrang hrang te chu JE vei rinhlelh an neih chuan a rang thei ang bera report turin an hriattir tih a sawi bawk.

Facebooktwittergoogle_plusredditpinterestlinkedinmail

Rajiv piancham pualin seminar

Aizawl: Nimin khan Mizoram Pradesh Youth Congress Committee chuan Congress Thalai Headquarter office, Congress Bhavan-ah India Prime Minister fam ta Rajiv Gandhi piancham vawi 72-na denchhenin “Seminar on role of Politics” tih thupui hmangin seminar an nei.

Seminar thupui sawi hawngtu Congress Thalai Headquarters Treasurer, F. Lalhmangaiha chuan India ram Prime Minister lo ni tawh leh Congress hruaitu ropui Pu Rajiv Gandhi’n ram tana a hnathawh pawimawh tak India rama Panchayati Raj leh Municipal dinna atana sulsutu anih thute; India ram hmasawnna tura Information Technology leh Science & Technology lama a hnathawh ropui takte a sawifiah a. India ram-ah thalai tam zawkin ram rorelnaa vote an neih theih nana vote nei thei kum 21 ni thin tihniama, kum 18-a bithliah anih tak thu bakah State puitling Mizoram min petu anih thute leh a mimal nuna zir chhuah tur pawi-mawh hrang hrang a tarlang bawk.

Nimin Bhavan a seminar ah hian Congress Thalai President Vanlalawmpuii Chawngthu, MLA thu-ziak Rajiv Gandhi hmalakna leh thalaite tana a hnathawh chung-chang zirho a ni bawk.

Rajiv Gandhi piancham vawi 72-na denchhena “Seminar on role of Politics” hmanna pui ber hi Mumbai ah Indian Youth Congress President Amarinder Singh Raja Brar hovin hman a ni a, a hmanna ah hian MPYCC President Vanlalawmpuii Chawngthu pawh a tel.

Facebooktwittergoogle_plusredditpinterestlinkedinmail

Taxi neituten intlanchhawk dodal an tum lo

Aizawl: September ni 1,2016 atanga Aizawl khawpui Taxi te intlanchhawk tura Traffic Coordination Committee in ruahmanna a siam chu Taxi neitu pawl, Mizoram Taxi Association chuan dodal an tum lo nia thudawn a ni.

Traffic SP, C.Lal-thanmawia’n Zalen a hrilh danin tunkar tirlam khan Mizoram Taxi Association hruaitute nen hian boruak tha tak hnuaiah an inkawm tih a sawi a. An inkawmna ah hian Taxi neitute chuan sawrkar rua-hmanna chu zawm phawt an tum thu leh engemaw harsatna a awm anih chuan la enho zel nise tiin an inthlah tih a sawi. Mizorama Taxi neitu pawl pahnih Zoram Taxi Owners Association leh Zoram Taxi Drivers Association te chu pawl khatah inchhungkhawmin April ni 28,2016 khan Mizoram Taxi Association an din a ni.

Traffic SP chuan Aizawl khawpuia Taxi awm an chhinchhiah 3526 atangin Zirtawpni thleng khan intlan-chhawkna tur sticker la Taxi 2174 an awm tawh tih Zalen a hrilh bawk a. Kar hnih chhung vel hun a la awm avangin huntiam chhunga sticker hi an lak zawh hman a beisei thu a sawi bawk.

Lengpui bika Taxi service chungchangah engtia hmalak tur nge tih chungchangah thu-tlukna an la siamlo niin Traffic SP chuan a sawi a. Lengpui ah hian Taxi service 40-50 inkar vel an awm nia an hriat thu sawiin Thawhtanni hian sawiho pui an tum niin Zalen a hrilh bawk.

Facebooktwittergoogle_plusredditpinterestlinkedinmail

Clean energy kum khaw daih; fashion a ni lo

Aizawl: Hmarchhak chu clean energy – solar, bio gas leh thli thahrui Megawatt 60,000 lai pechhuak thei dinhmunah ding mah se mipuiten rinna an nghah ngam loh vang leh an ngaihsak tawk loh avangin state dang lakah state 7 te chu an hnufual phah a. Ni zung leh wind energy chu thil inchinhmuh mai mai ‘fashion’ anga liam leh tur ni lovin khawvel awm chhunga thahrui pawimawh pakhat a nih reng tur thu Centre for Science and Environment in Renewable Energy training Guwahati-a huaihawttah mithiamte chuan an sawi chhuak a ni.

August thla laihawla Nedfi Conference Centre, Guwahati-a neih ‘Renewable Energy Future for North East’-ah zawhna chhangin “Renewable energy chu Hydel/thermal-in chakna a chawkchhuah chhawktu a nih bakah khawvel hma hun a nih vangin NE mipui te chuan renewable energy an pawm a pawi mawh a ni,” tiin Chandra Bhushan, CSE, New Delhi chuan a sawi a ni.

India in Solar atanga chakna siamchhuah a tum chu a takin 27% chauh a la ni phaa, MW 800 dawn siam mek mahse hmabak a kova, NE state te chuan an theihtawp ang an chhuah ngai a tih thu CSE palai chuan a sawi a. “Solar energy hi kum khat chhunga ni sat leh chhum zin danah inghat lovin ni atanga ‘radiation’ (zung) hmuh zatah innghat a ni zawk,” tiin CSE, New Delhi chuan Zalen a hrilh a ni.

Bhushan chuan Germany model entawnin hlawhtlin theih nia a hriat thu a sawi a, “In tinin rooftop installation tiin tunah chuan 100% in an ram a innghat thei tawh a, mi cheng tlemna ramah phei chuan hlawhtlinna sang tak hmuh a ni,” tiin Zalen a hrilh a, zirna in, NGO leh hlep neilo pawl/ group te tan NE tan 70% subsidy a awm thu a sawi bawk.

Dhiraj Bhagchandra, MD Kirti Energy chuan, clean energy rooftop installation ah thil thar chhuak hman thiam chu hlawhtlinna nia sawiin, “Entir nan Arunachal hmang ta ila, kum 15 kalta chuan 15 watt khawnvar an duh tawk laiin, tuna kan han kal leh chuan 1,000-2,000 watt inchungah dah an duh tawh zawk a ni,” tiin Zalen palai a hrilh bawk. Mini-Grid-ah zuan chhoh a hun tawh a tih thu a sawi bawk a ni.

Facebooktwittergoogle_plusredditpinterestlinkedinmail

TB vei HIV 106 hmu

Aizawl: Kum 2016 January atanga June thla thleng khan TB vei zingah mi 106 te chu HIV hrik an pai tih hmuh chhuah a ni.

Zalen in TB Control Society atanga thu dawn danin January atanga June thla thleng khan TB vei 1140 zingah mi 925 te chu te HIV an kai leh kai loh thisen an laksak a, chung zingah chuan mi 106 te chu HIV hrik an pai tih an hmu chhuak a ni bawk a ni.

Zalen thu dawn dan chuan Mizoramah chawhrualin ni tin TB vei thar mi 5-7 zel hmuchhuak ang a ni a. Kum 2015 chhung in Mizoram pumah TB vei thar hmuchhuah mi 2088 an awm bawk a ni.

Facebooktwittergoogle_plusredditpinterestlinkedinmail

MIMER din dan tur sawi ho a ni

Aizawl: Indo Global Health Consortium leh Health Department hotute chuan Hotel Floria Conference Hall-ah Health Commissioner Lalrinliana Fanai hovin Mizoram Institute of Medical Education & Research (MIMER) din dan tur an sawi ho.

Meeting chuan Mizorama Medical College tha tak, International Standard ni chho thei tur din a nih theih nana International Partnership din dan bakah Mizoram chhunga mipuite hriselna tha taka record theih dan tur te, Nursing Graduate ten International-a hna an thawh theih dan tur te bakah damdawi lama thawktu Technical mi chi hrang hrangte chherchhuah dan tur ngun taka sawiho a ni.

Medical College (MIMER) din tura sawrkar hma lak mek tipuitling tur leh indaih lohna hrang hrang phuhruk turin IGHC te hian hma an la dawn a. Mizoram mipui thingtlang kilkhawra awmte pawh an hriselna chhinchhiah a, an natna te pawh hmunpui leh specialist te awmnaa thawn kual zung zung theihna tur (network system) siam that tum a ni bawk dawn a ni.

Cancer hmuhchhuahna leh enkawlna piah lamah a chhui zui zelna kawngah pawh internet leh khawl tha zawk hmanga Mizoram pum tuamchhuak thei tura ruahmanna siam tum a ni bawk.

Facebooktwittergoogle_plusredditpinterestlinkedinmail

CYMA vangin gas a zia awm – Mizofed Chairman

Aizawl: Mizofed chairman K.Laldawngliana, Mizorama gas harsatna chu CYMA te nena an hmalakna a zarah a zia chho hret hret tih Zalen palai a hrilh.

Zalen zawhna chhangin Mizofed chairman chuan gas chu a hma a harsatna a awm avangin buaina chu a la awm deuh a mahse, tun dinhmunah chuan that lam an pan chho zel tih a sawi.

Mualkhangah gas phurtute pawl pakhatin an dan avangin gas ah harsatna a awm deuh a, CYMA chuan hemi chungchangah hian hma la nghalin a lo dang tute chu mipui ti buai lo zawnga awm lo tura an hrilh hrilh hnuin gas phur an dan pawh an kal chhuah tir tawh a, Mizoram hmun hrang hrangah dan pangngaiin phurh chhuah a ni bawk.

Facebooktwittergoogle_plusredditpinterestlinkedinmail

Login

Lost your password?