Monthly Archives: September 2016

Tinreng feature : AIIMS ah Hmarchhak tan blood bank hran

Pathianni hmasa chhun khan All India Institute for Medical Sciences (AIIMS), Delhi ah Hmarchhak mite tan blood bank chu pawngsuala rawng taka thah Nirbhaya hringtunu Asha Devi chuan hawngin movie star Shilpa leh Asha Devi te chuan thisen an pe hmasa ber a. Hmarchhak state thenkhat leh Nepali community te chuan thisen an pe nghal a, unit 100 dawn an pe niin IGP Robin Hibu IPS, Hmarchhak mite tana hmala tura Sawrkar in a ruat chuan ZALEN a hrilh a ni.

‘Sunday apiangin 11 AM-4.30 PM inkarah NE Blood Bank tana thisen pe duh tan a pek theih tawh dawn a, 26879656 or 1093 ( NE People HELPLINE ) ah a pe duh te chu in report theih a ni bawk a ni,’ tiin Hibu, IPS chuan kan palai a hrilh bawk a ni. NE Nodal Officer, Delhi chuan Hmarchhak community anga hmalaknaah tun aiin Mizo, Naga leh Tripura mite te chu tel tam turin a ngen a. ‘Delhi damdawi in 51 laiah Hmarchhak damlo tan concession 30%-60% thleng NGO kan dinthar Helping Hands hmalaknain an pe thei tawh a, heng hi hman tangkai ni se, blood bank pawh hi Hmarchhak miten kan chawm a tul na thui tak a awm a ni,’ tiin IPS officer chuan a sawi bawk.

Hawnna function-ah hian Professor Poonam Kaushik, AIIMS leh senior doctor 4 dang an tel a, thisen mamawh mi rethei te’n awlsam zawka an hmuh mai nan duan a nih thu sawiin thisen pekah pawh tan lak a ngaih thu a sawi bawk. ‘Mi retheite tan thisen a harsaa Hmarchhak mi hetiang ka hmuh hian rilru a na duh hle a, tunah chuan kan zia awm a beisei awm tawh,’ tiin a sawi bawk.

Mizo te’n Delhi damdawi In consession pe leh blood bank an hman tangkai theih nan Health Minister Lal Thanzara chuan NE Nodal Officer hmua thawhhona tha zawk a awm theih nan a rang lama palai tirh thuai a tum niin thudawn a ni bawk.

NE Blood Bank Core Committee chuan ‘rethei chanhaite chu dah pawimawh hmasak ber a duh a, Sawrkar hnathawk te medical reimbursement ti thei an nih avangin NE Blood Bank bik hi chu rikrum thilah lo chuan tawm lo sela’ tiin ngaihdan nei mahse rawtna/ ngaihdan erawh na a ngai chang tih an sawi bawk.

Facebooktwittergoogle_plusredditpinterestlinkedinmail

Thla 13 Chhungin : Aizawl traffic tawt tihreh beihpui; Mobile Apps hmangin taxi tlan theih tir tum

Aizawl: Law & Finance Minister Lalsawta chuan Aizawl khawpui traffic tawt tihrehna tur chu October atanga hman tan tum a nih thu a sawi a. Hemiah hian mimal lirthei tih tlema khawpui hrisel zawk neih; public transport chhun zana neih; vantlang lirthei 24×7 awm tira lirthei tih tlem te chu he beihpui thlakna hian a tum ber a nih thu Traffic Management Co-ordination Committee a hrilh.

He beihpui ‘5 Point Vision’ hi Coordination Chairman leh Home Minister ni bawk R.Lalzirliana hova sawikhawm niin October 1st, 2016 atanga a tah tawla tan tura beisei a ni a, 31st November, 2017 ah inpeih fel hman tum a ni bawk a. Ni 426 chhunga tih tur te biktuk a ni. ‘Garage nei turin ni 421 i nei’ tiin 1.10.2016 atangin media lamah countdown neih tum a ni bawk a ni. Lirthei ke li, thum leh hnih nei bakah leilaihna JCB, bulldozers, tractor leh adt. te chu dahna garage siam tura tih an ni dawna, a tul chuan Veng dang thlengin dahna siam phalsak an ni ang. AMC, LC, Traffic police te tangrual chuan 1.4.2017 atangin garage nei leh nei lo an endik tan dawn bawk a ni.

Taxi awmze neia tlantirtu Uber leh Ola te khawpui danga an hlawhtlinna system zulzuiin taxi te chu Central control atangin koh leh biak theih tura siam a ni anga, mobile phone-a application (apps) hmang in a mamawhtute’n booking lut chu a bul hnaia ding/tlan taxi khalhtu te’n chhangin passenger te chu GPS hmangin an awmna ah an la thei mai dawn a, passenger tan a him bawk a ni. Taxi te hi an ding hman mang lo tura ngaih an ni a, khawpui chhungah a bika tlanna siam a ni dawn tawh lo niin thulakna chuan a tarlang bawk. City Bus leh line bus pawh IT hmangin tlandan siam that tum a ni bawk a ni.

State Transport Authority chuan Veng tinah permit 4/5 pein zanlai/vartianah pawh rikrum thilah vantlang lirthei hman tur a awm theih nan thla 13 chhung hian hmalakna zawhfel tum a nih thu Committee invitee Lalsawta chuan a sawi bawk.

Facebooktwittergoogle_plusredditpinterestlinkedinmail

Cancer thlentu vaccine research vangin dose pek tlem theih phah

Chhul hmawr cancer siamtu HPV hrik danna vaccine vawi 3 pek thin chu Mizo hmeichhia 500 leh state danga zirbingna neih a nih atangin vawi 2 pekin a thawhdan a hen tih hmuhchhuah a ni h thu sawi a ni bawk.

He thu hi Lanset Oncology 2016 lehkhabuah tihchhuah a nih thu Mizoram doctorte leh Indian Cancer Care Foundation te chuan Zalen zawhna chhangin an sawi chhuak.

ICCF hotute chuan 2009-2011 inkar khan Aizawl chhevel chhim lamah kum 10-18 inkar hmeichhia 500 te chu 250 ve vea thenin cervix cancer thlentu HPV vaccine thla 6 chhungin tih dan thin dose 3 leh zirbing nan dose 2 an pe a. India hmun hrang hrana hmeichhe 17,000 ah hetiang hian WHO hmalaknaa enchhin a ni bawk a ni. ‘ Vaccine thawh dan a in ang tih hmuh chhuah a ni a, ram dang te pawhin dose 3 pe lovin dose 2 chauh kum 9-15 inkar hmeichhiaah an pe tan tawh a, he zirbingna hian nghawng tha thui tak a nei a ni, ‘ tiin Zalen zawhna ICCF chuan an chhang a ni. 2021 hian Mizo hmeichhiate chu cancer hrik siamtu an pai leh pai loh test leh tur a nih thu Zalen an hrilh.

Facebooktwittergoogle_plusredditpinterestlinkedinmail

Aizawl mipa 4 a 1 ‘cancer prone’

Aizawl: Aizawl mipa te chu cancer an vei duh bik niin Mizo doctor 7 in research an tihna PCBR 2016 May a release takah ziahlan a nih thu Dr Eric Zomawia chuan I&PR Conference Hall-a Cancer Seminar neih naah a sawi.

PBCR a Principal Investigator Dr Eric Zomawia chuan damchhung kum 74 a chhutin cancer vei theihna ‘chance’ chu Chennai ah mi 8 ah mi 1 a nih laiin Aizawl-ah chuan mipa 4 ah 1 zel niin a sawi a, hmeichhia ah 5 ah 1 a nih thu a sawi bawk.

Zalen zawhna chhangin ‘Mi ramah chuan cancer siamtu zuk, hmuam, rep leh adt te hi 40% a nih laiin kan ramah chuan 70% lai a ni a, kan thil chin hi mipuiin an sim a nih chuan 30% ah a tla thei anga, genetic tih loh chu tam takin cancer an pumpelh theih a beisei awm a ni,’ tiin Dr Lalbiakzuala chuan a sawi.

Dr Saia Chenkual chuan hnathawk kum 35-60 inkar chu Mizoramah cancer vei tam ber an nih thu sawiin ram pum economy nghawng thei thil a nih hial thu a sawi a. ‘Kan chin thalo te bansan turin keini Mizo te chauh hi kan ram cancer do theitu kan ni a ni,’ tiin Zirtawpnia Cancer Seminar chhimtute chu a hrilh bawk.

Facebooktwittergoogle_plusredditpinterestlinkedinmail

Damlo 2500 Ayush pan tawh

Aizawl: Official chuan Ayush Hospital Thenzawl chu la hawn ni lo mahse August thla atang khan mipui te mamawh phuhruk thei turin September thla laihawl thleng khan mi 2500 chuangte chu an enkawl mek niin Ayush hnathawk te chuan Zalen an hrilh a ni.

Kumin March khan sawrkar laipui chuan Integrated Ayush hospital chu ram chhung hmun hrang hranga din turin a pawm a. Hemi zul zui hian North east sate zinga te ber Mizoram chuan Intergrated Ayush hospital chu Thenzawlah nei tawhin hei hi north east state zinga a hmasa ber a ni.

Ayush department hi kum 2001 a hawn chauh ni mahse an hmalakna avangin Mizoram mipui te chuan an hmang tangkai tawh hle a, tunah hian district tinah khum 10 awmna Ayush hospital te chu awmin tunah hian integrated ayush hospital atangin damlo te chu a thlawnin enkawlna an pe mek bawk a ni.

Facebooktwittergoogle_plusredditpinterestlinkedinmail

Mizoram Sorkar-HPCD an inbe leh dawn hnai

Aizawl: Mizoram sawrkar leh HPC(D) aiawhte chu October ni 4,2016 (Thawhlehni) khian remna zawngin a tumhnihna atan an inbe leh dawn.

Nimina Press mi thenkhat ten an kawm naah Home Minister chuan HPC(D) ten Autonomous District Council an ngiat chu pek theih a ni lo tih a sawi a. HPC (D) te thil ngiat chu ADC pek chungchang a nih dawn chuan inbiakna chuan awmzia a neih
dawn loh thu a sawi a ni.HPC (D) ten ADC an ngiat chu awm loh a tih thu sawiin Home Minister chuan, Hmar te chu Mizoram mi leh sa ngei, an ta ti tur zawk ni a a ngaih thu a sawi bawk.

Home Minister R.Lalzirliana chuan tun hnaia Lunglei leh Siaha-a thilthleng chu a dem thu a sawi bawk a. Thil zahthlak leh Mizo te tiha mawilo a nih thu a sawi a, he thil thleng chungchangah hian Magisterial Inquiry din a nih dawn thu sawiin, a tul dan angin hma an la dawn tih a sawi bawk a ni.

Facebooktwittergoogle_plusredditpinterestlinkedinmail

Kum 29 chhung ruah tui a danglam vak lo

Aizawl: Kumin 2016 chhungin ruahtui 1584 mm a tla tawh a, hemi hun chhung vek nikum 2015 chhung khan ruahtui 1813.07 mm a tla thung a; 1986 atanga chawhrualin ruahtui tlak dan chu danglam a la awm tehchiam lo.

Kumin January atanga August inkara ruahtui tla chu 1584.06 mm niin ruahtui tlak tlem ber thla January ah ruahtui 1.0 mm a tla a, ruahtui tlak tam ber thla June ah 396.03 mm a tla thung. Kum 1986 khan Mizoram ah ruahtui 2582.05 mm a tla a, hetihlai hian nikum 2015 chhunga ruahtui tla zat thlenga chawhrualin 2479.07 mm a tling a, hei hian Mizoram a ruahtui tlak dan-ah thil danglam lutuk ala awmlo tih a entir ni a an ngaih thu State Meteorological Centre thawktute chuan an sawi.

State Meteorological Centre, Directorate of Science & Technology chhinchhiah danin, kumin chhunga ruahtui tlak tam ber ni chu August 14 niin 95.01 mm a ni a, ruahtui tlak miah loh thla ala awm lo. Kum 1986 atanga nikum 2015 chhunga ruahtui tlak tam ber kum chu 2003 niin, hemi kum a Mizoram pum a ruahtui tla hi 3081.06 mm a tling. Kum 29 chhunga Mizoram a ruahtui tlak tam ber kum chu 2003 kha niin, hemi kum a ruahtui tla zat chu mm 3081.06 a tling a, hemi hunchhung vek a ruahtui tlak tlem ber kum chu 2014 kha niin, hemi kum hian Mizoram ah ruahtui mm 1891.07 a tla.

Facebooktwittergoogle_plusredditpinterestlinkedinmail

CJ in pawiti

Aizawl: Gauhati High Court Chief Justice chuan Chief Minister hnenah lehkha thawnin Lunglei thilthleng chu pawi a tih thu a sawi.
Chief Justice chuan mi thenkhat ten dan rorelna chelek a, Court leh office-a lo awm Judicial officer-te leh staff te thlenga an vau chu ngaimawhawm tawpkhawk a ni a ti a. He thil thleng hi sawrkar tan a hmingchhiatthlak a, dan leh hrai kenkawhna a hlawhchham nasa hle a ni tiin a tul anga dan bawhchhetute chung ah action la nghal turin a ngen a. Misualte thil tihchhiat chu siamtha leh nghal tura a ngen bakah tun hnuah venhimna tha tak pe turin a beisei tih a sawi bawk.

Facebooktwittergoogle_plusredditpinterestlinkedinmail

Court ah hruai

Aizawl; Ningani kaltaa Lunglei Court building leh Chief Judicial Magistrate chenna in suasamtu a puh mi 10 te chu Police ten manin nimin khan Aizawl a H.Lalduhsanga Chief Judicial Magistrate Court ah hruai an nih hnuah Central Jail ah thawn an ni a, October ni 7,2016 ah Court ah an inlan leh ang.

Facebooktwittergoogle_plusredditpinterestlinkedinmail

Thubuai 3604 ziaklut

Aizawl: Mizoram Police chuan thla 8 kalta (January- August, 2016) inbkar chhung khan thubuai 3604 an ziaklut a, heng zinga thubuai 1671 hi IPC hnuaiah a ni a, a dang 1933 hi Cr PC hnuaia ziahluh a ni.

IPC hnuaiah hian rukruk thubuai ziahluh tam berin thubuai 665 ziahluh a ni a, hei hi thubuai ziahluh atanga chhutin 40% (39.79%) a tling a, inrawk thubuai in a dawt a ni. Chhinchhiahna atanga a lan danin thla 8 kalta khan tualthahna tum 13 a thleng a, pawngsual tum 19 a thleng bawk. Thla 8 chhung vek khan lirthei chesual ah mi 31 an thi nia tarlan a ni bawk.

Cr.PC hnuaia thubuai ziahluh ah hian POCSO Act chu tam berin thubuai 100 ziahluh a ni a, hei hi thubuai ziahluh atanga chhutin 5% a tling a. ND&PS Act hnuaia thubuai ziahluh 71 in a dawt leh a ni.

Kumin thla 8 chhung hian March thla ah thubuai ziahluh a tam ber a, March thla hian IPC hnuaiah thubuai 237 leh Cr PC hnuaiah thubuai 269 ziahluh a ni.

Facebooktwittergoogle_plusredditpinterestlinkedinmail

Login

Lost your password?