Monthly Archives: September 2016

Mental Health Clinic buatsaih

Aizawl; Nimin khan National Mental Health Programme, Department of Health and Family Welfare leh Light for Comprehensive Development (LiFCoDe) tangkawp chuan Chawlhhmun Veng Community Hall ah veng mipuite tan Mental Health Free Clinic an buatsaih.

Free clinic ah hian mi 200 vel an inentir. Inentir zawng zawngte hi an rilru lam dinhmun uluk takin doctor te leh psychologist ten an en a, social worker ten an khawtlang dinhmun an zirchiang bawk a ni. Chawlhhmun veng Local Council ten free clinic hlawhtlinna turin theih tawp chhuahin programme huaihawttu te an lo tawiawm a ni.

Facebooktwittergoogle_plusredditpinterestlinkedinmail

Free clinic ah mi 500

Aizawl; Electric Veng Branch YMA in an kum 50 tlin, Golden Jubilee lawm nan nimin khan West Lungdar khua ah a thlawna inentirna ‘free clinic’ an nei.

He hunah hian Doctor 5 Dr. Robert Lalmalsawma, Dr. JC Lalremruata, Dr. Lalhma -chhuana, Dr. Lalbiakdiki leh Dr. Lalremruata te’n damlo an en a, doctor te damdawi chawh te chu Electric Veng YMA hian a thlawnin an sem nghal . Electric Veng YMA Golden Jubilee free clinic ah hian West Lungdar khaw mipuite bakah Chungtlang, Rulpuihlim, Lungphun, Kanghmun, Hreichuk leh Khawrihnim atangin damlo 500 chuang an inentir a ni.

Facebooktwittergoogle_plusredditpinterestlinkedinmail

Thisen pe

Nimin khan Ramhlun Vengthar Branch KTP chuan Synod Hospital a damlo mamawhte hman turin thisen unit 37 an pe a, Aibawk bial KTP ten Aizawl Civil Hospital tan unit 46 leh Zoram Medicare Pharmacy-in World Pharmacist Day pualin Aizawl Civil Hospital ah unit 8 an pe bawk a. J. Buana College NSS ten Lunglei Civil Hospital tan unit 24 an pe bawk.

Facebooktwittergoogle_plusredditpinterestlinkedinmail

Mahima’n hmanpui

Nimin khan MZP, Hqrs. Manipur chuan YMA Hall, Hmuia Veng, Churachandpur-ah 43rd Annual Conference Cum Meritoriuos Award 2016 an buatsaih a, Par.Secy. Joseph Lalhimpuia chuan a hmanpui. Mahima chuan, “Tawng hi kan mizona a ni mai lo va, thisena kan inpumkhatna leh Krista-a kan inzawmna zawkah hian Mizote kan insuihkhawm tlat a ngai a ni,” a ti.

Facebooktwittergoogle_plusredditpinterestlinkedinmail

MPLADS Review

Mizoram sawrkar chuan MPLADS Review & Monitoring Committee a din thar a, Chief Secretary chu chairman niin Planning Secretary chu member secretary ah ruat a ni a, member 8 an awm bawk a ni.

Facebooktwittergoogle_plusredditpinterestlinkedinmail

Right to Information Week

October ni 5-12,2016 inkar chhung hian Mizoram pumah Right To Information Week hman a ni dawn a, RTI Week hawnna inkhawm pui ber hi October ni 5,2016 chawhma dar 11 hian I&PR Auditorium ah neih a ni ang.

Facebooktwittergoogle_plusredditpinterestlinkedinmail

The Week That Was (September 25, 2016)

Nupui hal
Serkhan khuaa mi bawng vulha eizawng Samu Sahani chuan a nupui Lalrinzovi (50) chu August 16, 2016 zan khan a hal a, a hliam tuar lovin Pathianni khan a boral. Sahani hi thu zawhfiah atan Police ten an man.

Gas hlan
MJA, Hnahthial Sub-Division te chuan ni 17.9.2016 khan Hnah-thial damdawi-in hnenah eirawngbawlna gas connection thar an hlan.

Zira’n Taxi hlan
Home minister R Lalzirliana chuan Thawhtanni khan pianphunga rualbanlo Vanrammawii (22), Armed Veng hnenah lehkha a zir chhunzawm zel theihna tura a hman atan taxi a hlân. Vanrammawii hi thla kua a nih atanga rualbanlo, kal thei lo a ni, PUC zirlai ni mek a ni.

Martar ni
Ni 20.9.2016 (Thawhlehni) khan MNF Party chuan Mizoram hmun hrang hrangah Martarte Ni an hmang a, Martar Thlanmual, Luangmual ah neih a niin MNF President Zoramthanga chuan a hmanpui a ni.

Thukhawm
Aizawl khawpui tawt lutuk tih ziaawm dan ngaihtuahtu Coordination Committee on Traffic Management chu Thawhlehni khan Home Minister R Lalzirliana hovin a pisa-ah an thukhawm. Meeting-ah hian Committee member-te bakah Finance minister Lalsawta leh AMC mayor PC Lalhmingthanga te an tel.

Cabinet meeting
Nilaini khan Council of Minister chu Chief Secretary conference hall-a chief minister Lal Thanhawla hovin an thukhawm a, thil tam tak an ngaihtuah zingah school tan hun tih danglam an rel a. Ruahmanna an siam dan chuan school tan hun chu thlasik October 15 atanga a kum leh February 15 inkarah zing dar 8:30 a ni ang a, nipui February 16 atanga October 14 chhungin zing dar 8 a ni ang.

Kawngzawh
September 21,2016 (Nilaini) kha World Alzheimer’s Day a ni a, Mizoramah pawh Alzheimer and Related Disorders Society of India (ARDSI), Mizoram Chapter huaihawtin zingkarah Millennium Centre tual atanga Vanapa Hall kawt thleng Memory Walk an nei.

Tlawh
Committee on Government Assurances member-te chuan Nilaini khan an chairman R.Van lalvena hovin Thenzawl dái, Mausep rama Food Testing Laboratory sak mek an tlawh a, hnathawh an enfiah.

Festival tan
Ni 3 awh tur Anthurium Festival chu Ningani khan Reiek ah tan a ni a, Tourism Minister John Rotluangliana chuan a hawng.

CYMA in CM hmu
Ningani khan Central YMA OB te chuan chief minister Lal Thanhawla chu a pisa-ah an hmu a, Gas harsatna chung chang leh thil pawimawh dangte an sawipui.

Seminar
Mizoram University-a Department of Zoology leh Zoological Society of India, Gaya (Eastern Zonal Chapter) tangkawp chuan Ningani khan MZU Auditorium-ah ‘Impact of Climate Change on Biodiver-sity: Applications of Recent Technologies for Conservation of Threatened Species’ tih thupui zirhona an buatsaih a, Seminar hi Fisheries Minister Dr BD Chakma chuan a hawng.

Court suasam
Lunglei Zohnuai mipuite chuan Ningani (22.9.2016) khan Magistrate R. Malsawmdawngzuala office leh a chenna in an suasam a, he thilthleng vang hian Gauhati High Court Registrar General H.K.Sharma order chhuah nghalin Lungleia awm mek District & Session Judge R. Thanga, Addl. District & Session Judge Helen Dawngliani leh Civil Judge cum JMFC R. Malsawmdawngzuala te chu thu leh awm hma atan a sawnchhuak nghal a. Lawngtlaia CJM Laldinpuia Tlau pawh Lunglei-ah Circuit Court-a kal rih lo turin a hriattir bawk. Zohnuai mipuite hian an veng tlangval C.lalsawmliana (33), ni 27.8.2016 zana vithlumtu a puh Stephen Lalchawiliana hmel hmuh an tum a, mahse ni 21.9.2016 ah Jail ah camp court a lo nei tawh tih an hriat avangin an thinrim, chu heti hian an che ta mai a ni.

Zirho
Zoram Entu Pawl, National Institute for Empowerment of Persons with Multiple Disabilities (NIEPMD), Chennai leh Perkins Voice and Vision India (PVVI), Mumbai-te tangho chuan Thawhtanni khan ni 3 awh India hmarchhak state banlo enkawl dan zirhona chu Bishop House, Ramthar vengah an nei.

Facebooktwittergoogle_plusredditpinterestlinkedinmail

MOB-O-CRACY?

Mizoram a thil la thleng ngai lo in September ni 22, 2016 khan Mizoram pum a deng chhuak a, Zohnuai mipui pungkhawm in Lunglei District & Sessions Court leh Judicial Officer Quarters an suasama, dem a hlawh hle. Hemi thu kal zelah Chief Minister pawhin Mizo leh Kristian zia nia a hriat loh thu a sawi a, vai hovin thinrim an lantir dan kan la chu pawi a ti bawk a ni. Home Minister pawhin pawi khawihtute chu mana an chungthu relsak an nih tur thu a sawi bawk.

Gauhati High Court chuan Judge leh Magistrate te sa him zawk nan Aizawl atanga an hna thawk tur in he thil thlen ni vek ah thuchhuah a siam nghal a. September ni 23 khan Mizoram Bar Association Lunglei Sub-Headquarters chuan Court leh Judicial Officer Quarters thu leh awm hma chuan an hna an chawlhsan hrih tur thu leh Affidavit, Legal opinion leh Advocate inrawlhna chi reng reng an tih loh tur thu an sawi bawk a ni. Gauhati High Court Chief Justice Ajit Singh chuan Sawrkar chu lehkha rawn thawn nghal in Mizoram Judiciary a thil thleng tawh ah chuan hun thim ber a tih theih hial thu a sawi bawk.

Thinrimna lan tir danah hian uchuak lutuk a awm thei a, mipui pungkhawm pawh ni ila a hlap let a awm thei tih min hriat nawn tirtu nise a duhawm hle mai. He thil thleng hian Lunglei mipui tam takin nghawng thei a, lehkha pawimawh affidavit siamtir leh sumdawnna thleng in a nghawng thei a, Police in misual an man te leh man tharte pawh Aizawl a an rawn hruai zel a ngaih hmel a, court-a chhungte tawiawm duh tan pawh a buaithlak khawp ang. Naupang thil tisualtu te tan a Juvenile Justice Board sitting pawh Principal Magistrate tel lo chuan eng case mah a tih tawp theih dawn lo a, kum tlinglo naupang leh an chhungte pawhin an tuar ngei dawnin a lang. Lunglei Judicial Branch hian Lawngtlai leh Siaha te a huam tel a, heng khaw pahnih te pawh hian engemaw chen chu an tawrh phah a rinawm.

Eng pawh nise mipui chet dan kha Dan zahlohna vawrtawp a ni a, dan lama thanharh a tul zia tichiangtu a ni. Dan hi ‘technical’ tak tura ngaih a nih thin laiin ‘common sense’ ah thui tak a innghat a, khawtlang/ram in a pawm theih thil a ni em? tih ngaihtuah vang vangin mi pangngai tan chuan a chiang mai awm e. Mihring theuh kan nihna hi kan inzah sak tawn tur a ni a, chumi thiam lote chu Dan in an chungah kut a lek mai dawn tih hriat nawn a pawimawh awm e.

High Court in Dan lalzia a rawn lan tir hi Mizo hrim hrim tan zirlai a tling a; mipui ‘mob’ rorel hian awmzia a nei thui teh chiam loa, ‘mob’ anga punkhawma duh duha inhrik thlaknaah hian himna a awm ngawt thei lova, Dan chu Dan a ni miau a ni. Judiciary lak hran a nih zia lan tirtu a ni thei bawk ang.

Hetiang ang thil hi hmun dangah pawh thleng tawh lo sela, mipui anga thinrim lan tir danah pawh a mawi hawih zawng tlang ang u.

Facebooktwittergoogle_plusredditpinterestlinkedinmail

Dr. Hrekima Titi (Sept. 25, 2016)

Zu a tam si! In an tam si! Zu in hi a hlauhawm a, nghei dawn pawhin fimkhur a tha!
&&&&&&

ZU NGHEI NGHAWNG
An phalna ka la bawk a, thawnthu lungchhiatthlak tak ka’n sawi teh ang. Zir chhuah tur kan neih tak hlauh dahin! Nu pakhatin min rawn pan ve a. “Ka pasalin zu a nghei a, a buai leh riau mai a..“ tiin tun hmaa lo enkawl tawhna lehkha hluite chu a rawn phawrh a. Zan thum vel chu an mu tawh lo a ni awm e. Kan inbiak mek laiin phone-a min be duh an awm thu min hrilhin pawn lam atangin phone min rawn pe a. “Tuna a pasal tana rawn kal mek kha.. hei, a pasal kha a inawkhlum tlat mai! Kan lo tlan mek a, ti khan in hnenah khan lo awm se, kan rawn hruai dawn e!” an rawn ti ta mai a.

A pasal dam nana rawn fehchhuak mek chu, chu chanchin lungchhiatthlak tak chu ka hrilh ngam hauh lo. “Lo nghak lawk la, i pasal kha engtin emaw a awm a, i chhungte an lo tlan mek a, an thu rawn ken ngaichang phawt ang aw, damdawi kan ziah hmain,” ka ti a. “Aw le,” tiin a lo nghak ta kha a nia! A va hrilhhaithlak tehlul em!

Thil duhawm lo engemaw a thlen hian dem tur zawn maite a awl khawp. Thihna a lo thlente hian inhnemna tawngkam tul lo hi a awm theiin ka hria. “Kal hma deuh ula chu..in inngaihsak har deuh a ni..in rawn tlai hret a ni..phaiah inhruai ve ula chu..chumi damdawiinah kher chuan in kal a nih chu maw le..chu daktawr kher in lo pan chu a va’n pawi em!” tih ang chi, mahni an inthiam loh zui theihna tur tawngkam leh tu emaw dem zawnga han tawng hramte hi kan hrat fu mai.

He thihna duhawm lo tak maiah hian dem tur zawng dawn ta ila, kei leh hriselna kawnga mipui zirtirtu turte hi dem tur kan ni ang. Kan zirtir tam tawk lo a ni mai.

Se bo hnua se kawng khar ang em a la ni lo turah ngaiin ka’n sawi nawn leh ang e (Hmanah Zalen Titi-ah hian zu nghei chungchang ka sawi tawh a). Zu nghei hi awmze nei taka kalpui a tha khawp mai. Zu in mite dinhmun azirin a nghawng a inang lo thei viau si a. Taksa chak leh chak loh dan te, an ei in that leh that loh dan te, taksa lam natna an neih tel leh tel loh te, depression an neih leh neih lohte hian zu nghei nghawng an tawrh nat dan a hril tel fo.

Mi thenkhatin, “Kei chu chiri chi ka ni lo..ramhuai ka hmu ve ngai lo,” an tih hi pawimawh tho mahse, zu an in tirh lama thleng ngai lo hi zu in rei tawh chuan a thleng thei vek tawh tih hriat a tha. A tlangpui chuan zu nghei atanga darkar 6-8 hnuah kut khur a awm tan a, ramhuai hmuh leh aw hriat leh buai hi darkar 8-12 hnu velah a lang a, kaih (chiri) hi darkar 12 – 24 inkar velah an nei thin a, nikhaw hriatna buai leh mumal lo, a ruai (Delirium tremens) hi darkar 72 chhungin a lang fo. Hetiang thlap erawh hi a ni vek kher lo. Ni 7 hnu daiha chiri pawh ka hmu tawh. Thil dang awm hmasa mang loa ni 3 hnu vela buai thut a awm thei bawk. Zu nghei nghawng dang : Thlan tla, lungphu rang, hlauthawng, BP sang, mu thei lo, phu zuk zuk, phili ruai emaw mu chawrh chawrhte a awm thin.

Zu in rei poh leh, zu in tam poh leh, hriselna a chhiat poh leh, zu nghei ngawng hi a na a ni mai. Zu nghei an buai viau hian fimkhur a tul hle. An thil hmuh leh hriat, dik si lo chu a tak emaw an ti fo a, chumi mila chet phut an ching thei. Mi dang tihnat leh mahni nunna lak thlengin a awm thei.

Zu nghei tur hi damdawia enkawl a tha ber. Ven leh khuahkhirh an tul fo. Nunna chhan nana phuar beh hial pawh a tul thei. Zu nghei nghawng hi sawi lawk vek theih a nih loh avangin mi thiam rawn chunga nghei hi a him ber e. Zu in miah loh hi invenna tha ber a ni thung!

Facebooktwittergoogle_plusredditpinterestlinkedinmail

Ka Huang (Sept. 25, 2016)

Chawlhni hmasa chhuaka, “A hming ka theihnghilh,” ka tih kha thiante’n min rawn hrilh sup sup mai a, ka lawm tak meuh a ni. Chubakah keia ‘KA HUANG’ ve tehlul hi chhiar in lo thahnem ve hle tih ka hriatin ka lawm lehzual a ni.

Tun tum chu, Sikulpui ka’n thleng phei tawh ang e. Vai sikul kawmchhak kawng leh sikulkawn inkarah in pakhat mah a awm lo. Chuti ang bawkin kawng thlang lamah in a awm lo, a hmaa ka sawi Khuptuaha chauh lo chu. Khang lai hun khan vaiin Mizo hi min hmusit em em a, Lushai Kuki min ti thin. Tui in tur pawh dil ila, an noin an rawn suak a, kan kut kan khawr a, tah chuan an chhung a, kan kuta mi chu kan dawt mai thin. Nimahsela, chuti e ti lo chuan ngaihzawngte kha an lo nei ve a ni chek ang, an fanu pakhat hmeltha deuh mai khan tu fa ni maw, a lo pai chu niin, Mission Venga Pu Hanga lamkhuang bulah nau a vei ta mai. Kha, naupang thuchang engtin zel te nge chu ka hre miah lo. Kum 1940 chho vel kha vai hmeichhe naupang sikul an kai awm reng ka hre lo.

Sikulpui khi Mizoram hmar chana sikul sang ber a ni. Middle English school tih a ni. Thingtlanga Primary (Class III) pass-ho kha an lo kal a, khi chauh khi Middle school awm chhun a ni si. 1944-ah Middle Anglo Vernacular school hmasa ber, ka pain Sialsukah a va hawng a, a hnuah an pun hret hret ta zel a ni. Kei pawhin khi sikulpuiah khian 1942 khan Pawl VI ka pass ve hram. Zirna lam ka ngaihsak loh em avangin Class III-a Mizorama pahnihna ni ve lem, Class VI chu 3rd Division-ah pawh 33 zingah 30-na ka’n ni riap mai a nih chu! Kan pawl 6 kumte chuan thiante nen zu (tin zu, a sawra sawr chu) bel khat der?(13 paise) Kulikawn leh Venghnuai hmeithai inah kan in ru thin maw le! No 2 theuh tea kan in chu kan rim a nam ang tih hlauin, thingpuife kan bar loh leh bal rawh te kan ei vel thin maw le. Miin min hriat loh nan tiin kawrte kan inhak thleng vel! Khi sikulpui sak khi a tha em em ringawt mai, sikulkawn atang khian rahka 52-in a tual zawl a thleng a, a sir tawn tawnah man em emin side drain an siam a, kan tawlh vak vak thin. Sikul luhna tak tak step chu chhawng thum a ni, a chung ber chu lung pakhat, sei tak, a dawt leh chu lung pahnih, a lei dek chu lung pathum a ni. Luha vei lam chu Head Master room, ding lam chu Teachers’ room. Hall chu Class IV Sec A leh B, Sec C chu sikul senah khian a ni. A?thla ding lam chu Class V Sec A leh B, vei lam chu Class VI Sec A leh B. Tichuan pawl hrang pasarih a awm a nih chu. Zirtirtu chu Head Master telin pariat chiah an ni bawk. An lo hah awm thin, kan sual nasa hlawm sia! Hd. Master chu Pu Hrawva, Asst. Hd. Master Rostosingh Diengdoh. B.E.Jones (missionary) Pu Chawnga, Pu K.Zawla, Pu?Leta, Pu V.L.Lawma leh Pu Lungmuana te an ni. Head Master khan a zirtir tlem ber. Ani pawhin min zirtir fo mai. Tun hnua ka ngaihtuah hian an hah awm thinin ka hre hnuhnawh. Awl awm thei hek lo, subject an thlak pawhin pawl an sawn a ni ringawt mai. Head Master-in a rawn thlak changin pakhat chu a awl ve thei hram tihna a nih chu. Tunlai nena tehkhin chuan pui tak a ni. Tunah chuan Pawl hrang pakhat zelah zirtirtu 2/3 awm ang an ni hial mai si a, khanglai zirtirtu kha chu ZIRTIRTU an lo ni nameuh mai.

Mission Veng hian sikulpui leh Biak inpui a nei ve tawp mai. Tunah Middle school te chu a tam em em tawh a, keini ang duang chuan kan chhiar seng ta lo. Chuti chung chuan Mission Veng sikulkawn chunga mi khi sikulpui a ni tlat mai. Tin, a thlang lawka mi khi Biak inpui an ti leh mai. Hei hi a hmasak vang a ni ber a niang chu. A velah te khian in a awm reng reng lo. Venghlui lam chhuah chhawngte khi ngaw durpui vek a ni a, in awm hmasa ber chu 1948 kha Capt. L.R.Sailo khan Kelsih House tiin tuna Upper Republiv Biak in khi KELSIH HOUSE tih a ni a, Capt. L.R.Sailo (Lalrinthanga Sailo, Kelsih Lal, Lalsailoa fapa) kha tuna Vawk pum var kan tih tak nupa hi a rawn hawn chhuah a ni, kha tuna vawk pum var kan tih tak nupa hi a rawn hawn chhuah a ni. A?hma chuan Mizo vawk thangmawh zet, kum 2/3-ah lo chuan talh tham loh kan nei, tuikuk vawk kan vulh bawk thin. A hmui chu a hmui; mahse, a te hrim hrim. Vawk var tichhuaktu Capt. L.R.Sailo hriatah a tha hle.

Sikulpui kawn atanga Khatla inkarah hian Khuptuaha chauh a awm thin ka tih kha. Kan Bawrhsap L.L.Peters khan a hnuaia thawkte – R.Zuala, V.L.Zapa (Hd. Clerk Civil Surgeon Office) leh U Bawlliana (SAMSUNG) khi Bawrhsap a nih lai khan a pe. Khing mite 3 khi awm hmasa an ni awm e. Chuvanga tun thlenga Peter’s Street an tih takna chhan a ni. New Street kan tihte kha a ruak vek. J.Thanghuama kawmthlangah khian Puantah in kan ti mai a, Hmeichhe sikul naupangin Pi Darlianchhunga hoa, puan tah ilo, la deh dan an zirna in a ni thin. Sikul kawn atanga kawng chung – Sipai canteen thleng khi chuan a kar karah thir ban pathum/pali khawimaw lai laiah an phun a, chu chuan bawngtawlailir a dang a, thirsakawr chak lutuka kal a dal bawk.

Facebooktwittergoogle_plusredditpinterestlinkedinmail

Login

Lost your password?