Monthly Archives: October 2016

AMC-in enfiah

Aizawl: Aizawl Municipal Corporation Technical Team te chuan Zirtawpni khan khawpui chhunga dan baka in sa sang building hmun 3 ah an endika, local council ten tawiawmin building neitute awm tura hriattir an nih angin a hmunah hian an awm bawk a ni.

Building 3 endik zingah hian R. Lalawia, Tuikhuahtlang in Khatla Venga a sak kawng an ami chu endik hmasak ber a ni a. Chhawng 6 thleng sak phalsak a nih laiin chhawng 9 thleng sak a ni. Stay order 6.01.2015 leh show cause notice 9.11.2015 ah pek tawh a ni.

Lai House, Bungkawn chu endika teh a ni bawk a. Chhawng 5 sak phalna pek a nih laiin chhawng 8 an sa mek bawk a. He building enkawltute hnenah hian stay order 23.9.2016 leh show cause 6.10.2016 ah pek an ni tawh bawk.

Jeffrey Zampuimanga Building, Mel 3 (Zampuimanga Lungphun bul) chu endik ni bawkin feet 72 sak phalsak a nih laiin feet 79.3 a sangin sak a ni a.He building neitu hnenah hi an 6.10.2016-ah stay order leh show cause notice pek an ni tawh a ni. Ni 27.10.2016 khan he building bik hi a chhawng hnuai lampang chauh sak phal chhunzawmna pek a ni leh tawh bawk a ni.Inspection Team te hian report kimchang an thehluh leh dawn a. Report atangin a tul angin dan anga action lak a ni ang. AMC Building Regulation, 2012 hmangin dan loa sak chin te chu thiahtir theih a ni bawk a ni.

Facebooktwittergoogle_plusredditpinterestlinkedinmail

Mizoramin dawng tam ber

Aizawl: Ministry of Consumer Affairs, Food & Public Distribution in August 2016 thlenga state hrang hranga State Consumer Helpline Scheme hnuaia pawisa a pekah Mizoramin North East state-ah a dawng hnem ber.

Mizoram hian nuai 77.48 dawngin a sang fal hle a, a dawtah Sikkim awmin nuai 63.97 an dawng. Heng bakah hian northeast state dang te dawn dan chu Assam in nuai 24.1, Manipur – nuai 41.15, Meghalaya – nuai 21.95, Nagaland nuai 29.55 leh Tripura in nuai 23 te a ni.

State Consumer Helpline hi Department of Consumer Affairs plan scheme pawisa hmanga State ten  consumer te complain an lo dawnsawnna tur leh zirchian hna an lo thawhna tura siam a ni.

Facebooktwittergoogle_plusredditpinterestlinkedinmail

Pol.Party tel tlem

Aizawl: Nimin khan PRISM chuan Synod Conference Centre ah Mizoram Watch hun an hmang a, Political party zingah MPCC, MNF leh ZNP te an tel lova, MPC leh BJP erawh an tel. PRISM thil tih hi mipui leh political party-te’n an hlut thin hle a, hetia an tel duhloh tak chhan hi PRISM kalphung inthlak deuh vang leh political party-a inlet thei reng dinhmuna an din vang nia ngaih a ni.

Facebooktwittergoogle_plusredditpinterestlinkedinmail

Tuilian in la

Nimin chawhnu dar 1:30 bawr vel khan Lawipu rama mi huan sama inhlawh Upper Republic KTP te chu Kawhpawp ah chaw chhun an fak laiin Sabereka Khuangkaih thawk thutin an zinga 2 a la a, mipa zawk Joss Zonunsanga s/o R.Zothanpuia hi inhamchhuakin Lalhmachhuani d/o Kawlchhuanmawia chu tuiin a lakna atanga km 1 velah a ruang hi hmuh a ni. Lalhmachhuani ruang hi nizan khan tlaivarpui a ni a, vawiin chawhnu dar 1 ah vui a ni ang.

Facebooktwittergoogle_plusredditpinterestlinkedinmail

Thisen pe

Nimin khan Bru Students Union chuan Civil Hospital a hman turin thisen unit 16 an pe a,  Thakthing branch KTP chuan a mamawh apiangte hman atan Synod Hospital, Durtlang tan thisen unit 20 an pe.  Nimin vek khan TKP Thingkah Unit (Lawngtlai) ten an din champha vawi 65 pualin Lawngtlai District Blood Bank ah thisen unit 24 an pe a. Chawngte Area Students Union ten Lunglei Civil Hospital ah thisen unit 16 an pe bawk.

Facebooktwittergoogle_plusredditpinterestlinkedinmail

The Week That Was (Oct 30, 2016)

Pisa kai tur dang
Ni 24.10.2016 (Thawhtanni) khan Mizoram sawrkarin Revenue stamp fee a lak tihhniam phut nan MNF Thalai te chuan Revenue Directorate a thawkte pisa kai tur an dang a, thuneitu lamin a pangngai anga lak leh an tiam avangin chawhnu lamah an chawlhsan.

Larsap hmu
Ni 24.10.2016 (Thawhtanni) khan Mizoram Governor Lt. Gen. (Rtd) Nirbhay Sharma chuan Pipu Sulhnu Humhalhtu Pawl, Dungtlang hruaitute nen inkawmin an hmalakna hrang hrang an sawiho. Pipu Sulhnu Humhalhtu Pawl-in Dungtlang-ah ‘Cultural Centre’ sak an duh thu an thlen chu Governor chuan an hmalakna a fak a, theihtawp a chhuahpui tur thuin a chhang a. Dungtlang khua chu tlawh a, an hmalaknate a hmunah ngei a enpui tur thu a hrilh bawk.

VC-in hawng
Mizoram University Vice Chancellor, Prof. R. Lalthantluanga chuan ni 25.10.2016 (Thawhlehni) khan Technical Festival “ZoTech Fiesta ‘16” chu School of Engineering & Technology Conference Hall, Mizoram University-ah a hawng.

MRB thar
Ni 25.10.2016 (Thawhlehni) khan Mizoram Rural Bank, Mission Vengthlang Branch chu Lalsawta, Finance Minister-in a hawng a, hei hi MRB Branch 80-na a ni.

Hmawrbawk
Civil Hospital Aizawl-in MJA member te puala special clinic a buatsaih chu ni 25.10.2016 (Thawhlehni) chawhnu dar 1 khan Civil Hospital Auditorium-ah hmawr bawkna inkhawm hman a ni.

Sem leh rel
Ni 25.10.2016 (Thawhlehni) khan Chief Minister leh NLUP Apex Board Chairman ni bawk Lal Thanhawla hovin a Pisa ah AH & Vety Minister C.Ngunlianchunga, AH & Vety. Department hotulu te leh NIB hotu te chu thukhawmin NLUP-a 3rd leh 4th Phase hnuaia vawk note sem dan tur Department-in a ruahman chu an thlirho a, ruahmanna chhawpchhuah te chu tha tiin November thla atangin NLUP hnuaia beneficiary a vawk no sem zui leh an rel.

Hawng
Sports Minister Zodintluanga chuan ni 25.10.2016 (Thawhlehni) khan Sir Ratan Tata Trust (SRTT), Sarva Sikhsha Abhiyan (SSA) Mizoram leh Mizoram Football Association (MFA) te tangkawpin a buatsaih, ni 4 awh tur 1st Inter-district under-14 grassroots football tournament for boys and girls chu Rajiv Gandhi Stadium, Mualpui-ah a hawng.

Thehlut
Central Young Chakma Association leh Mizoram Chakma Students Union hruaitute chuan ni 27.10.2017 (Ningani) khan Mizoram Governor Lt. Gen. (Rtd) Nirbhay Sharma hmuin Chakma Autonomous District Council hnuaia dan lova hnathawk tur lak chungchanga an lungawi lohna ‘Joint Memorandum’ an thehlut.

FIR thehlut
Ni 26.10.2016 (Nilaini) khan MNF Party chuan Mara Autonomous District Council-ah eirukna thil tam tak a awm a ni tiin chhuichiang turin ACB ah FIR an thehlut a, hemi chungchang hi Mizoram Governor Lt. Gen. (Rtd) Nirbhay Sharma hmuin an sawipui bawk.

CM-in hawng
Department of English, Mizoram University huaihawt ni 3 awh tur International Seminar ‘Claiming Differences: Literatures and Cultures’ tih chu ni 26.10.2016 (Nilaini) khan Chief Minister Lal Thanhawla’n MZU Auditorium ah a hawng.

Lirnghing
Ni 26.10.2016 (Nilaini) chhun dar 12 vel khan Mizoram hmun hrang hrangah na vak lovin lir a nghing a, Indian Meteorological Department tarlan dan in lirnging tan na hi Lunglei niin 4.8 magnitude a na a ni a, hriat theih chinah chhiatna thleng a awm lo.
Hospital thar
Ni 27.10.2017 (Ningani) khan Chief Minister Lal Thanhawla chuan hmarchhak bial a hmasa ber tur cheng nuai 554 senga sak Integrated Ayush Hospital, Thenzawlah a hawng. Hospital hi January 4, 2012 khan Chief Minister hian a sakna tur lung a lo phum tawh a ni.

Zirlai Ni
Mizo Zirlai Pawl bultumin ni 27.10.2017 (Ningani) khan Lal Thanhawla Auditorium, Treasury Sq-ah ‘Zirlaite Ni’ hman a ni a, Par.Secy. i/c Education Joseph Lalhimpuia chuan a hmanpui.

Thuthlung ziak
Ni 26.10.2016 (Nilaini) khan Chief Secretary’s Conference Hall ah Japanese International Cooperation Agency(JICA) leh Mizoram sawrkar chuan tlangram lo neih hlawkzawk a kalpui dan leh thlai chawmtu tuihna hnianghnar zawka siamchhuah dan tur chungchangah thawhhona thuthlung an ziak.

Facebooktwittergoogle_plusredditpinterestlinkedinmail

Mizo film hmasa ber ‘Puii leh Lala’; Mizorama film hmasa ber ‘Phuba’ a ni tih chhuichhuak

Mission veng tlangval, Mizo te’na thlalak leh video lama kan dai chin zirchiangtu — Lalawmpuia Chhangte — chuan Mizote’n film kan lo neih tawhte chhui let lehin, document atan ziahluh theih Mizo film hmasa ber a rawn hai chhuak e.

hhhh

Lalawmpuia Chhangte hian hun rei tak atangin Mizo film hmasa ber zirchianna a nei a, a tawpa a hmuhchhuah chu Mizo film hmasa ber chu “Puii leh Lala” tih niin, he film hi kum 1973-a Manipura siam a ni a. Vanapa Films Co. Pvt., te siam a ni tih a zirchiannaah chuan a tarlang a. Mizorama film hmasa ber chu kum 1983-a siam ‘Phuba’ a nih thu pawh a tarlang bawk.

Mizo film hmasa bera a changtunu ber — Lalthachhungi, Bethlehem Vengthlang leh Mizorama film hmasa ber buatsaihtu “Young Star Films Company” te hnena Lalawmpuia Chhangte chuan ngaihhlutna thilpek pein, he company aiawh hian film producer F. Hrangmuana, Khatla te hnenah a hlan a ni.

Facebooktwittergoogle_plusredditpinterestlinkedinmail

Centenary Concert-ah Mizo guitarist ropui 2 inlan dawn

The Salvation Army, India Eastern Territory-in an centenary lo thleng tur lawmna atana inbuatsiahna’n — Centenary Concert — ropui tak an huaihawt dawn a. He concert-ah hian Mizo guitarist ropui leh hmingthang bakah gospel singer te an inlan dawn.
November ni 29, 2016 khian Centenary Concert hi Lammual-ah buatsaih tum a ni a. Zan dar 6:30 atangin concert hi neih tan tura ruahmanna siam a ni. He concert hi atanga sum hmuh te hi Chhandamna Sipai pawl enkawl Home hrang hrang — Motherless Babies Home, Aizawl; Hlimna In Girls Home, Saitual; KK Boys Home, Lunglei leh Home for the Blind, Kolasib te tanpuina’n hman a ni ang.
Centenary Concert-ah hian Mizo guitarist ropui pathum — Dreamhunter guitarist David Z Hmar te, Boomarang guitarist Boom-a leh The Breeze-a an guitarist Ephraim te an inlan dawn a. Anni bakah hian gospel artist rualin an perform dawn bawk a ni.
Centenary Concert-ah hian a duh apiangte tan chhim theih a ni dawn a. Ticket hi Rs. 50, Rs. 100 leh Rs. 500 man te a ni ang a. Era Boutique, Millennium Center; Lawma Enfield, Sikulpuikawn; Dindin Pharmacy, Khatla Kawn; Matthew Restaurant, Chaltlang Bethel Lungphun bul; Zo Colours, Temple Square; Mizo Tea, Temple Square ah te hian ngaihven theih a ni.
Ticket hi pawl ang pawha zawrh hlawh theih a ni a. Pawl leh mimal zuar duh tan Jedidia Enterprise, Vaivakawn (Phone no. 9862375426/03892326075) leh Zonunthari, Treausry Square (PH. NO. 9862310027) ah te biakpawh theih a ni. Ticket zuartuten ticket man atangin 355 an hlawh ang.

Facebooktwittergoogle_plusredditpinterestlinkedinmail

Praise On 2016 pakhatna R. Lalrinmawii

Synfo buatsaih fakzai hunpui hmanga malzaia intihsiakna chu Zirtawp zan (October 28, 2016) zan khan neih zawh a ni ta a. Praise On hmasa berah hian Leitan nula zaithiam — R. Lalrinmawii — a ni thu puan a ni ta.

heihi

Praise On hmasa bera pakhatna R. Lalrinmawii (Arini) chuan, “Ka lawm khawp mai. Tun thlengin ka la awih thei lo a, ka la normal lo,” tiin pakhatna a nih avanga a lawmzia chu Thalai Khawvel a hrilh a. “Audition atang tawhin tlak hi ka inring reng a, ka zai apiangin. Pakhatna ni tur khawp chuan ka indah sang vak lo hrim hrim a. Intihsiakna stage-ah hian kan zirna ami ang hi ka pha ngai bawk si lo nen, pakhatna ni tur em chuan ka inbeisei pha ngai lo hrim hrim,” tiin a sawi bawk.

Pakhatna a nih chhan nia a hriat zawhna chhangin Arini chuan, “A hmasa berah chuan Pathian vang ka ti lo thei lo a. Engkimah tawngtaina min chhan sak a, kan duh ang kan thlen te hi min tihhlawhtlin sak thin a,” tia sawiin, “A bik takin ka u vanga hetiang dinhmun thleng thei ka ni tih ka chiang a. A tir atanga a tawp thlenga min tawiawm a, a bul ret atangin hla min thlan sak a. Chubakah, kan mentor te leh judge te vangin hmasawnna nasa tak ka neih phah bawk,” tiin lawmthu a sawi hial a ni.

Arini chuan sawi zawm zelin, “Ka u Loncy kha an koh ka ring tawh a. Kei chu ka hming an lam chhuah pawh ring tawh loin ka lo awm mai mai tawh a. Mahse, ka hming an lam thut kha mak ka ti lutuk a, ka hnuk kha a ulh bawk si a, mittui chhuak thei si loin ka hul hak mai a ni,” tiin pakhatna nia a hming an lam laia a awm dan a sawi bawk.

Leitan nula zaithiam hian pakhatna a nih manah lawmman atan trophy leh keyboard bakah Rs. 80000 a hawn a. Pahnihna Zorinsanga, Ramhlun North pawhin Rs. 40000 leh keyboard bakah trophy a dawng a. KTP Tlangnuam Branch aiawha intihsiaknaa tel Cindy Lalthanpuii pawh kut ruakin a haw bik lo a. Rs. 20000 a hawn bakah keyboard leh trophy a dawng bawk a ni.

Praise On 2016-ah hian Special Award siam a ni a. He intihsiaknaa pathumna Cindy chu ‘Best Performance Award hlan niin; kum 18 chauha upa Tuikual South tleirawl Irene Laldingngheti chu — Most Promising — atan thlan a ni a. Lalruatfeli, Chanmari, Lunglei chu — Most Inspiration Award — hlan a nih bakah, KTP, Bungkawn Branch hnenah — Best Participation Award — hlan a ni.

praise on 2016 judgte’n engnge an sawi?

Liandingpuii : Pakhatna hrim hrim hi chu pakhatna tlaka kan ngaih a ni tawp! Inhnial buai pawh kan nei vak lem lo a, a phu ngawih ngawih ka ti. A tir atangin a che chhe lem si lo a, final-ah pawh a rawn che tha leh hle. Arini hi kan tum ang tak, Pathian fakna hla sa tur diktak a nih hmel hliah hliah a. Passion zawng zawng pawh pe chhuak thei siin, hneh tak maiin stage-ah pawh a lo la ti thei tho bawk si a. Final-ah khami lam side kha a rawn show leh bawk nen. Pakhatna a ni hi a awm hliah hliah a ni.

Upa C. Vanlalvuana : A sakhat/nghet (consistent) em em a, a hmel kan hmuh hlim atangin chet chhiat tak tak a nei lo a. Final round-ah a rawn invawrh dawrh bawk si a… a hma atang pawhin a rawn invawrh sang em em a. Kan hna te pawh a lo tih awlsam phah ta phian a. Pakhatna nih a phu a ni.
Pakhatna thlanna kawngah midang pawh chu awm ve thei tho e. Mahse, kan inhnialin, kan sawi rei lutuk lem lo. An zai hi kan ennawn vek thin a. Intihsiakna a zawhin kan ennawn nghal char char zel. Final zan hnih endik a nih miau avangin, a hmaa an zai chuan kawngro chu a su thui lutuk lo. Ka mimal ngaihdan hi chuan Arini hi a aw hi a bawhawk hawk ka ti mai thin a. A rawn dawn bawhawka hi a mawi tawk a, tih lui ni si lo kha a mawi em em mai a ni. Chubakah, hla hi a thlang fuh tluan chhuak parhin ka hria a. Audition round hi keini endik a ni lo a, a hnu zel kha chu hla a thlang fuh thei hle. Second round kha ngaihnawm ka la ti reng a. A range lo sanzia final-ah kan hmu a, a aw comfort-zone atanga lo chhuak, a sang a hmaa kan hmuh lem lohte’n min rawn barakhaih a, a timing ang reng.

(Judge zing ami Lalrinfela (Tekawka) hi a zin avangin kan inbe fuh hleithei lo)

Facebooktwittergoogle_plusredditpinterestlinkedinmail

Huai takin AMC kal pawp rawh se

Aizawl Municipal Corporation (AMC) chuan Zirtawpni kalta khan Aizawl khawpui hmun thum a building sak chu dan phal bak a ni tiin an enfiah a, an thil hmuhdan hi report an thehluh hnuah a tul anga action lak zui a ni dawn a ni.

AMC hian Khatla venga R.Lalawia building chu chhawng ruk thleng sak phalna a neih laiin chhawng kua thleng sak a ni tih an finfiah a. Lai House, Bungkawn ami chu chhawng nga sak phalna pek an nih laiin chhawng riat thleng an sa tih an hmu bawk a, Zampuimanga lungphun bula building Jeffrey Zampuimanga building chu feet 72 a sang sak phalsak anih laiin feet 79.3 a sang in sak a ni tih an finfiah bawk a. AMC Inspection team hian Building Regulation 2012 hmangin a tul angin action an la leh dawn a ni.

Thil mak tak mai chu tun tuma AMC in dan phal baka in sa an enfiah te hi sawrkar building bakah mi hausa, ram rorel khawla dinhmun sang tak lo chelh tawh te in a ni hi a ni. Dan leh thupek zawm kawnga hma hruaitu tura ngaih ten dan zawm lova an bawhchhia hi a lungchhiatthlak a, an kaihhruai mipui te zahlohna a ni a tih theih hial. Tuna thil langchiang tak mai chu AMC hian mi hausa leh rethei, mi lian leh te a thliar lo tih tuna an thiltih hian a tilang a, mi hausa ah bul an tan chat mai hi a lawmawm hle.

Kan hriattlan angin Aizawl khawpui hi ruahmanna mumal awm lova thang a ni a, tunhma chuan mahni remchanna lai laiah in kan sa mai a ni. Aizawl Development Authority a lo din atangin dan mumal deuh hman tan a ni a, tunah a takin AMC lamin an kalpui ta a. Plan city anih loh avang tak hian khuarel chhiatna chi hrang hrang lo thleng thin leimin, kangmei leh a dangte ah pawh kan tuar nasa zual a ni. Kan in leh lo din kawngah mithiamte thurawn kan ngaih pawimawh loh thin avangin kan tuar zual ni te pawhin a hriat. Engpawhnise dan zawm hi himna a nih bakah khua leh tui tha nihna a ni tih kan hriat thar leh a pawimawh.

Khawvel ram hrang hrangah han thlir ila, ram nuam leh zalen ho chu dan leh thupek ngaih pawimawhna hmun a ni zel. Dictator rorelna te, sipai rorelna leh Communist in thuneihna an channa hmun ah chuan mipui nun a zalen lova, mahni kuta dan chelek anih thin avangin a hrehawm thin a ni. Chuvangin dan pawisak hi khua leh tui tha te tan kan ‘duty’ a ni tih hriain nasa lehzuala tan kan lak a pawimawh.

AMC hian mipuite himna ber tur nia an hriat angin hma an la a, chuvangin huai taka an kal a, sut ngai a awm chuan huai taka an hmachhawn zel a ngai. Chuti ni lova an tawpsan mai emaw mi hausa leh thiltithei ten an palzut zel dawn anih chuan Aizawl khawpui hmalam hun chu a thim viau mai thei. A chak leh thiltithei apiang an dingchang anih chuan khawpui hrehawm takah a chhuak thei a ni. Chuvangin AMC hi huai tak leh chak takin kal zel sela, thiltha an tihna kawngah chuan an hnung ah mipui ten an zui a ni tih hre nawn leh teh se.

Facebooktwittergoogle_plusredditpinterestlinkedinmail

Login

Lost your password?