Monthly Archives: November 2016

Tinreng feature : Secondhand leh Mizote

Secondhand thawmhnaw leh Mizote hi a inhmeh tawh a, kumtluanin bazar leh dawr hrang hrangah te secondhand thawmhnaw hmuh tur a awm thin a. Krismas dawnah phei chuan kawngsir hmun remchang lai leh mahni inah pawh zuar an tam zual bik thin.

Secondhand lo kalna hi hmun hrang hrang Europe, USA leh tunlaia Mizo thalai tam takin an ngaihsan leh an entawn Korea leh hmundang atang ten niin a lang a. Tunhnaia Mizo sumdawng thenkhat ten China ah te han la in Myanmar ram atangin Zokhawthar kaltlangin Mizoram ah an rawn luhpui nasa hle. Tunhma deuh chuan Bangladesh kaltlangin Tlabung lamah phurhluh thin a ni bawk.

A lo kalna leh Mizorama phurhluh dan chu engpawhnise secondhand hian Mizote nunah thuk takin zung a kaih a, secondhand tello chuan kan khawsa thei lo ta hial awm e. Milian leh hausa an ni emaw, mirethei thlengin kan thing a, kan duhzawng leitur a awm reng zawng anih hi. Bale thar hawn hlim, a man to deuh laiin mi hausa ten an duhzawng an thlang hmasa a, tlema a hnunawi leh man tlawm hunah rethei deuh ten an lei ve leh a. A hnunawi lehzual deuhte thingtlang lamah thawnin a tawpah chuan engtin tin emaw tlailam ‘sale’ nen a zo leh mai thin.

Secondhand hmanga sumdawng nu pakhat chuan China ramah tawng thiamte ruaiin secondhand bale a la thin tih a sawi a. Lawng hmangin Mandalay (Myanmar) te rawn phur thlengin chuta tangin motor hmangin Mizoram ah rawn phur thleng a. Chuta tang chuan Mizoram hmun hrang hrangah a semdarh ve leh thin niin a sawi a. Secondhand chu a chhunga bungraw awm a zirin a man pawh a inang lo nasa hle niin a sawi bawk a, thawmhnaw tha an dahna chu a man a to deuh a, tlema thawmhnaw tha lo deuh awmna chu a man pawh a tlawm deuh zel niin a sawi. Khawi atang bera thawmhnaw te chu lokal nge a hriat bikloh thu sawiin “A then hi company lian leh changtlung tak tak Nike, Adidas thilsiamte an ni a, a then hi khawchhak lam a awm bawk a. A ngaihna tak pawh hriatthiam har ka ti thin,” tiin a sawi.

Secondhand zuar nu pakhat chuan hralh tam chu an duhthusam ber ni mahse nu thenkhat chu an mamawh pawh ni lemlo, nalh an tih avang maia lei an awm thin niin a sawi a. Nu hausa thenkhat tan chuan an economic lam nghawng lo mah se chhungkaw thenkhat secondhand lei nasat vanga inhauh phah te pawh an awm niin a sawi. Nu pakhat erawh chuan man tlawm deuh zawka thawmhnaw tha an hmuh theihna anih avangin tha a tih thu a sawi thung.

Aizawl veng pakhata cheng Mawii chuan secondhand chu lei ve zeuh zeuh mahse an thenawm nu ho ai chuan a lei tlem zawk hle tih a sawi a. “Thawmhnaw tha tak tak awm mahse fimkhur hi tha ka ti a. Khawi atanga lokal nge, tute hak hnu nge, engtia sawngbawl tawh hnu nge tih pawh kan hriatloh te an ni a. Kan hriselna khawih pawi thei thil leh natna hrik te a awm ka hlauh avang ka lei tlem hle a. Mizo mipuite pawh helamah hian fimkhur thei deuh se ka duh hle a ni,” a ti ve thung.

Facebooktwittergoogle_plusredditpinterestlinkedinmail

Sawrkar hna, a thawk tur ni lovin dil

Aizawl: Sawrkarin thla thum thleng thawh theih tur hna a nei a nih chuan tlang hriata puanchhuah tur a ni tiin CNV Act tia sawi thin Employment Exchanges (Compulsory Notification of Vacancies) Act 1959 chuan a ti a. Mizoram sawrkar erawh chuan tlang hriata puan chu sawi loh, a thawktu tur ni lo dilte pawh a ruai.

Inclusive Education Disabled at Secondary Stage (IEDSS)-ah hian rualbanlote zirna huangchhunga seng luh buaipui turin special educator an awm a, tunhma chuan SCERT-in kalpuiin a hming pawh Inclusive Education for Disabled Children (IEDC) tih a ni nghe nghe. Kum 2009 atang khan IEDSS tia a scheme hming hi thlak niin a hnu deuhah RMSA-in an kalpui a ni. Mizoramah hian RMSA-in an kalpui hnuah hnathawktu paruk lak an ni a; 6th January, 2015-ah pakhat lak niin 21st June, 2016 khan panga lak leh an ni. Heng hnathawktu parukte hi lak an nih dawn hian sawrkar hnuaiah hna thawh tur a awm tih hriattirna chhuah a ni lo mai ni lovin thawk tura lak pahnihte chu anmahniin hnathawh hi an dil ni lovin an nuten an dilsak a ni.

Hemi chungchang Zalen in a chhuinaa thudawnna pakhatin a sawi dan chuan heng a ruka hna thawk tura lak paruk zinga pali chu rualbanlote zirtirtu ni tura zirnaah hian foundation course zo chauh an ni a, dan ang tak chuan an tling lo niin a sawi nghe nghe.

Special educator te hian SCERT hnuaia an awm lai chuan bial neiin an bial chhunga rualbanlo awmte an zawng chhuak a, rualbanlo ten zirna pangngai an hmuh ve theihna turin an tanpui thin a, mahse, RMSA-in a lak khan school hrang hrangah sem darh niin zirtirtu angin an thawk hlawm a ni. He kalphung hi 27th June, 2016 khan sawrkar chuan tidanglamin special educator mi 47 te awmna hmun a siksawi a; secondary school hrang hranga awmte chu sawnchhuak vekin District Project Office (DPO) leh High School thenkhata RMSA resource room-ahte dah an ni a, a ruka lak pakhat erawh chu Special Blind School, Durtlang-ah dah a ni.

Thudawnna pakhatin a sawi dan chuan special educator te hian secondary school hrang hrang atanga office lama sawnchhuah an nih hnuah hian SCERT hnuaia an awm laia an thawh thin ang thawk turin sum an nei chuang si lo va, hna mumal vak pawh nei lovin an awm hlawm niin a sawi a; hetih lai hian rualbanlote chungchanga sawrkar hmalak dan chinchang hre tak pakhat chuan special educator ten SCERT hnuaia an awm lai anga hna an thawhna tur sum hi RMSA project-ah a tel vek a, chu chu central pawhin a pawmpui niin a sawi.

Facebooktwittergoogle_plusredditpinterestlinkedinmail

SBI-in note hlui vbc 363 dawng tawh; Note hlui Account-ah

Aizawl: Sawrkar laipuiin Rs. 500 leh Rs. 1000 note a tihthih vanga State Bank of India-in note hlui a dawnkhawm chu Rs. vaibelchhe 363.9 a tling tawh a. Pawisa note hluite hi Bank-ah thleng theih a ni tawh lo a, mahni Account-ah erawh chuan December ni 30, 2016 thleng dahluh (deposit) theih a la ni thung.
Zalen palaiin SBI Main Branch thawktute hnen atanga thu a dawn danin pawisa note hlui hi thlengtu an tam avangin harsatna an nei nasa hle tih an sawi a, “Pawisa note hlui te hi dawn loh ngawt kan hreh avangin kan dawng zel a, mahse Main Branch, Dawrpui leh Bawngkawn a strong room ah te a leng lo va, kan buai hle a ni,” an ti. SBI thawktute chuan Rs. 500 note thar chu a lo thlen hun tur an la hre thei mai bik lo nia sawiin an beisei reng niin Zalen an hrilh a, pawisa thleng theih hun hawn chhungin remchanga hmanga pawisa lem thleng tum an awm lem lo niin an sawi bawk.
SBI hian sum pekchhuah theih chin bituk an neih avangin sawrkar bill liantham chu an pechhuak hrih lo a, hei vang hian Treasury lam pawhin bill an kaltir lo. Zalen palaiin a biak naah Treasury thawktute chuan, “Chegue siam tur chu kan nei nual a, mahse Bank lamin payment an tih theih loh avangin kan siam lo a. Tuna chegue kan lo siam chuan siamthat leh a tul dawn a, department lam pawhin bill an thehluh nawn a ngaih dawn avangin kan chawl hrih a ni,” an ti.

Facebooktwittergoogle_plusredditpinterestlinkedinmail

High level team in Gujarat an tlawh

Aizawl: Gujarat-a ruahmanna hlawhtling entawntlak, a bik takin contract farming, cooperative movement leh entrepreneurship development te a hmuna en a an tih dan thate zir tura kal Finance Minister kaihhruai Mizoram High Level Team chuan Gujarat hmun hrang hranga heng thil an kalpui dante zirin an tlawh kual.
Gandhi Nagar District-a Shivpura Kampa khuaa Pepsico Company-in contract farming a kalpui dan tlawhin he khuaa loneitute nen inkawmhona hun an nei a, contract farming-a an ngaihdan leh a hlawkdan te an zawt a. Chandralala khuaa ICT leh Balaji Company ten cold storage hmanga thlai an sawngbawl leh hralhchhuah dan an tlawh leh a, company aiawhte nen inkawmhona an nei a. Sabarkantha District-a Vadrad khuaa awm Centre for Excellence for Vegetables an tlawh leh a. Vegetable Nursery leh Trial Field te fangkualin helai hmuna thlai chungchanga hma an lakna te an en a ni.
Gujarat Sawrkar thuthmun Gandhinagar-a Secretariat Sachivalaya ah Gujarat Agriculture Minister C.D. Shapariya leh High Level Team te nen meeting neiin Agriculture & Cooperation Principal Secretary-in Presentation a pe a, Gujarat a contract farming leh cooperative movement kalpui dan an hrilh a. Mizoram High Level te hi Zirtawp zan khan Gujarat Agriculture Minister hian zanriah a buatsaih sak a ni.
Zirtawpni khan Gandhinagar District-a Isanpur Kota khuaa Primary Agriculture Credit Society tlawhin an hnathawh dan te an enin helaia loneitu ten heng cooperative ruahmanna an hman tangkai dan an zawt a. Hemi hnu hian Ahmedabad-a District Central Cooperative Bank tlawh lehin hnathawkte nen inkawmna an nei a. Hemi hnu hian India leh khawvel huapa cooperative movement hlawhtling bera ngaih Anand-a Anand Milk Union Limited (AMUL) hmunpui an tlawh leh a, AMUL hotuten High Level Team hi lo dawngsawngin hna an thawh dante an hrilh a, AMUL factory te an tlawhpui bawk a ni.
High Level Team ah hian Finance Minister Lalsawta bakah State Planning Board Vice Chairman H. Liansailova; Horticulture Minister P.C. Lalthanliana; AH & Vety. Minister Ngunlianchunga; Chairperson, Mizoram Cooperative Apex Bank T. Lalmuanpuii te bakah Planning Secretary Dr. C. Vanlalramsanga leh senior officer dang te an tel a ni.

Facebooktwittergoogle_plusredditpinterestlinkedinmail

Transport Department hnuaiah Ambulance service thar

Aizawl: Transport Department chuan Mizoram Road Transport Development Society (MRTDS) hnuaiah mipuite hman theih tur ambulance 5 a nei thar.

Transport Department Director R. Remmawia chuan ambulance thar chu Transport Department hnuaia Society pakhat Mizoram Road Transport Development Society hnuaia neih thar a ni tih sawiin, “Damlo phurhna tur pathum leh ruang phurhna tur pahnih an ni a, a mamawh tan hire theih reng a ni tawh,” tiin Zalen palai a hrilh.

Ambulance hman man hi Aizawl Municipal Corporation (AMC) huam chhungah Rs. 800 niin AMC pawnah chuan kilometer 1-ah Rs 50 zel a ni dawn niin Director chuan a sawi bawk.

R. Remmawia chuan ambulance hman man pek dan tur sawiin, “Hiring charge hi pek lawk (pre payment) a ngaih avangin a hmang tur chuan hman man inrinlawk tur a ni,” a ti a. Ambulance hmang duh te chuan Transport Directorate-ah ngaihven mai tur niin Zalen palai a hrilh bawk.

Facebooktwittergoogle_plusredditpinterestlinkedinmail

Ruihhlo halral

Aizawl: Nimin zing dar 7:30 khan Ramhlun South YMA Kumpuan Force chuan  Ralven buk hawnna leh an ruihhlo man te tihralna hun an hmang a, ruihhlo te hi Laltlanzova Khiangte, Councellor AMC ward No IV chuan halralin Ralven buk hi Kapthangvunga LC Chairman in a hawng. KPF te hian veng chhung nunau te thlamuang taka an awm theih nan tanlak zel an tum tih an sawi.

Facebooktwittergoogle_plusredditpinterestlinkedinmail

Mizopain khawl thar 2 siam

Aizawl: Mizopa F.Lalhmangaiha Hualngohmun khua chuan tuizema tui a khah huna mahnia titawp (off) thei, tui pump na khawl leh a ruala vawi khata no 30 sacrament thli thei khawl te a siamchhuak a. Heng khawl thar te hi naktip Thawhlehni chhun dar 12 hian Synod Conference Hall ah Parliamentary secretary KS Thnga leh Ex Moderator Rev. Lalrinmawia ten an tlangzarh dawn.

Zalen palaiin a kawm naah Automatic Water Pump Controller siamtu F.Lalhmangaiha chuan an tui pump thin a liam fo avanga hetiang khawl hi ngaihtuahchhuak ta anih thu a sawi a. “Tui pump liam vanga nupa inhau te an awm thu ka hriat avangin tihdan tha a awm ringin kum 3 chhung vel ka ngaihtuah hnuah hetiang khawl hi ka puitlin thei ta a ni,” a ti.

Sacrament thlitna khawl ‘Sacramental Wine Dispenser’ chu tuna Kohhran in a hman mek aia tihdan tha a awm beiseiin kum 10 vel ngaihtuahna a sen hnuah hetiang khawl hi a siamchhuak thei ta tih a sawi a. Sacrament chu Kohhran serh leh sang pawimawh tak anih avangin uluk a ngai a, thlitbuak palh leh phai bik te a awm thei niin a sawi a. He khawl thar ah hian tum khatah a rualin no 30 a thlit theih dawn a, tihbuak leh no phai bik awm lovin inangtlang takin a thli dawn niin a sawi. Sacrament thlitna khawl hi Kohhran thenkhat chuan an ngaihven tan tawh niin an sawi bawk.

Automatic Water Pump Controller hi Rs 2990 man tur a ni a, Sacramental Wine Dispenser hi Rs. 42,500 man a ni ang.

Khawl thar siamtu F.Lalhmangaiha chuan a thil siamchhuahte chu midangin entawna an siam ve mai leh a neitu nihna an nei mai ang tih a hlauh avangin a neitu nihna a nei ‘Patent’ tawh niin Zalen a hrilh a. Tuna khawl a siam bakah hian tum khata thingpui no 15/20 thlitna tur te, vawkchaw channa khawl leh tui tih thianghlimna khawl te siam leh tumin hma a la mek niin a sawi bawk.

F.Lalhmangaiha hi Science lamah hnuhma leh thiamna sang a nei hran lo a, kum 1978-1980 inkar chhung khan Pachhunga College ah Science subject a zir a. Hemi hnu hian zirtirtu ah tangin kum 2013 khan voluntary in a pension a ni.

Facebooktwittergoogle_plusredditpinterestlinkedinmail

Nuai 3 tlin chuan inthlan chuh dawn

Aizawl: Nimin khan C.Laltanpuia chuan Aizawl Press Club ah chanchinbumite kawmin Mizoram tana a hmathlir leh ruahmanna te a sawi a, a ruahmanna tawmpuitu mi nuai 3 an tlin chuan MLA inthlan loawm tur chu chuh ve an tum dawn niin a sawi.

C.Laltanpuia chuan political party hrang hrang ten policy an lo siam te chu ram tan chhenfakawm tur a la awm lo niin a sawi a, mipui mimir hnathawh tur te, ram hmasawnna tak tak thlentir te, ram leilung hausakna haichhuah kawngah te policy nghet nei lovin tih hlawhtlin hleihtheihloh an tiam thin niin a sawi. Congress policy NLUP leh MNF policy MIP te chu mithiam rawn lova siam anih avangin a hmantlak loh nia sawiin ZNP in thlai thar lei an tum pawh thil tih hlawhtlin theihloh niin a sawi.

C.Laltanpuia chuan policy 40 a siam te chu tih hlawhtlin theihloh leh harsa engmah a awmlo nia sawiin a policy duan te chu Mizoram hmun hrang hrangah an semdarh dawn a, a ruahmanna tha titu mi nuai 3 an tlin chuan inthlan loawm leh turah candidate neih ve a, an tlinglo anih erawh chuan candidate neihloh an tum dawn niin a sawi bawk.

Facebooktwittergoogle_plusredditpinterestlinkedinmail

Mathematics intihsiak

Aizawl: Mizoram Mathematics Society leh Mizoram Council of  Science, Technology & Innovation Council tangkawp chuan nimin khan a vawi 8-na atan Mizoram pum huap Mathematics Competition inelna – Class V, Class VIII, Class X leh Class XII zirlaite tan an  buatsaih leh a. He inelna hi Exam Centre 6 – Aizawl, Lunglei, Champhai, Serchhip, Saitual leh Kolasib-ah te neih a ni a. Aizawlah chuan Pachhunga University College-ah he exam hi neih a ni.
Mathematics inelna hmachhawn tur hian zirlai 2410 ten hming an pe lut a, a tithate hnenah lawmman tha tak Cash Award leh Certificate pek a ni ang a, lawmman te hi National Mathematics Day, December ni 22, 2016-ah sem a ni dawn a ni.
Mizo zirlaiten Mathematics an hlauhna ti bo tur leh Mathematics zirna lama hma kan sawn theihnan te, ram pum huap leh khawvel huapa Mathematics inelna sang ber International Mathematics Olympiad exam-a zofate hming a lan theih nana rahbi pawimawh tak a nih beiseina nena he exam hi buatsaih thin a ni.

Facebooktwittergoogle_plusredditpinterestlinkedinmail

MZP School Quiz-ah Living Water School

Aizawl: MZP buatsaih Inter High school quiz 2016 intihsiak chu Zirtawp zan khan a hmawrbawk a ni a, final ah hian school 3 intumin Living Water School chu pakhatna an ni a, lawmmanah Rs 30,000 leh citation an dawng a, pahnihna St. Pauls Higher secondary school in Rs. 20,000 leh pathumna Royal standard school ten Rs. 10,000 an dawng bawk.
Quiz intihsiak kharna inkhawma khuallian ZOHANDCO Chairman R.Vanlalvena MLA chuan zirlaite chu tunlai changkanna chi hrang hrang mobile phone, whatsaap leh facebook te intihbuaitir lo tur leh an zirna ngai pawimawh hmasa ber turin a chah. Quiz intihsiak ah hian school 18 an tel a ni.

Facebooktwittergoogle_plusredditpinterestlinkedinmail

Login

Lost your password?