Monthly Archives: November 2016

Rua tam

Aizawl: Tunlai hian Mizoram hmun thenkhat ah Rawnal leh Rawthing a tam mek a, hengte hi kum 2006/2007 a Mautam tum khan an tam ve lo a ni.
Environment, Forests & Climate Change thawktute hnen atanga Zalen thudawn danin Rawnal leh Rawthing tam hi Aizawl khawpui hmun thenkhat ah pawh hmuh tur a awm a, Aizawl pawn Saitual, Kolasib leh Mamit lamah pawh hung 1 lek leka tam te an awm niin an sawi.

Facebooktwittergoogle_plusredditpinterestlinkedinmail

CM leh sipai lal inkawm

Aizawl: Nimin khan Chief Minister Lal Thanhawla chu a chenna inah General Officer Commanding (GOC) 57 Mountain Division Maj. Gen. SS Mishra, VSM chuan hmuin inkawmna hun tha tak an nei.

Chief Minister chuan 57 Mountain Division chu Mizoramah kum 1968 a din anih avangin Mizoram nen inlaichinna thui tak a lo neih tawh thu sawiin rambuai avangin rei tak Mizo thalai ten sipai an bawh lova mahse tunah chuan Mizo thalai sang tam tak sipai ah an tang mek a ni, a ti a. Maj. Gen. SS Mishra chuan sipai bang tawh, ex-servicemen ten pension chungchangah harsatna an tawh mek leh heng te sutkian anih thei nan a hote nen Mizoram hi a rawn tlawh anih thu hrilhin ex-servicemen te hmakhua ngaihtuahtu Zila Sainik Board leh Rajya Sainik Board te chu tun aia chak zawka thuam a ngaih thu a sawi a. Chief Minister chuan a theih ang angin ex-servicemen te hmakhua leh hamthatna atan Sawrkarin hma lakna a neih mek thu a sawi. Sainik School, Chhingchhip chuan nakum atangin zirna an tan thei dawn tih sawiin hei hian Mizo te tan nasa takin sipai-a officer ah luhna tur kawng a hawng thei dawn a ni, a ti.

Maj. Gen. Mishra chuan he Sainik School ah hian ram pumah a hmasa ber ni turin hmeichhia te tan pawh luhna tur kawng dap turin Chief Minister hi a ngen a, Chief Minister chuan a rawtna chu tha tiin Sainik School Society hotute chu hemi chungchang hi a sawipui tur thu a hrilh a ni. Gen. Mishra hian nakum January thlaa mi 20 vel a rawn tirh tur thu sawiin hengte hian Mizoram hmun hrang hrangte tlawhin ex-servicemen ten pension chungchangah harsatna an tawh te chu sutkian an tum dawn a ni, a ti.

Gen. Mishra chuan Mizoramah inthliarna awm lo, thalai ten khawtlang tan an hnathawh leh inpekna leh mipui an lungawi dan a hmuh hian a rilru a khawih takzet a ni tiin hengte hi ram chung hmun dangte pawhin Mizote leh Mizorama atangin zir se tiin a duh thu a sawi a ni.

Facebooktwittergoogle_plusredditpinterestlinkedinmail

Thisen pe

Nimin khan Electric Veng Branch YMA chuan an branch golden jubilee lawm nan Aizawl civil hospital-ah thisen unit 38 an pe a. Hunthar Veng Branch KTP-in an rising day pualin Synod Hospital tan thisen unit 23 leh Leitlangpui Sailo Facebook group ten Lunglei Civil Hospital-ah unit 7 an pe bawk.

Facebooktwittergoogle_plusredditpinterestlinkedinmail

SARAS Fair

Rural Development Department chuan November 28 atanga December 10, 2016 inkar chhung hian Transport Directorte building sak mek ah Regional SARAS Fair an buatsaih dawn a, he Fair hi RD Minister R.Lalzirliana chuan a hawng ang.

Facebooktwittergoogle_plusredditpinterestlinkedinmail

Police-in hma la

Krismas lo thleng tura mipuite himna atan Police ten hma an la mek a, Sumo lut leh chhuakte an enfiah thut thut bakah halpuah leh silai lem, a mu kapchhuak thei pawh vai leh an tum mek. Aizawl SP hnuaia OC zawng zawngte chu December 8, 2016 hian kokhawmin hmalak dan tur an sawipui ang.

Facebooktwittergoogle_plusredditpinterestlinkedinmail

Hawng dawn

Chief Minister Lal Thanhawla chuan ni 30.11.2016 hian AH&Vety department in Mampui khua ah Ar, Vawk leh Bawng vulhna hmun an siamthar a hawng dawn.

Facebooktwittergoogle_plusredditpinterestlinkedinmail

Thubuai 231

Mizoram police te chuan October 2016 chhung khan thubuai 231 an ziaklut a, heng zinga 191 chu IPC hnuaiah a niin a dang 40 chu Non IPC hnuaiah a ni.
October 2016 chhunga thubuai ziahluh zingah hian rukruk thubuai a tam ber a, thubuai 78 a awm. Thubuai ziahluh dang langsar zingah tualthah thubuai 3 leh pawngsual thubuai 3 a tel a, heng bakah hian MPLC Act hnuaiah thubuai 16 leh POCSO hnuaiah thubuai 10 ziahluh a ni bawk.

Facebooktwittergoogle_plusredditpinterestlinkedinmail

The Week That Was (Nov. 27, 2016)

MPF te leng
Ni 21.11.2016 (Thawhtanni) khan Mizoram People’s Forum (MPF) hruaitute chu Hnam Run -ah an leng a, MNF hruaitute nen ‘Good Governance’ (Rorelna Tha) chungchang an sawiho.

Dincham
Meizial zuk sim a, vaihlo dona kawnga hma latu pawl pakhat, Tobacco Quitters of Mizoram chuan ni 21.11.2016 (Thawhtanni) khan Aizawl Press Club ah an pawl din champha vawi 3-na an hmang a, Health Minister Lal Thanzara chuan a hmanpui.

Police meet
Mizoram Police Sports Meet vawi 17-na chu ni 21.11.2016 (Thawhtanni) khan Rajiv Gandhi Stadium Mualpui-ah Home Minister R.Lalzirliana’n a hawng a, meet ah hian Police te chu athletics, football, volleyball, lawn tennis, table tennis, badminton, taekwondo, judo, wrestling, tug of war, boxing bakah indoor games hrang hrang chinese checker, carrom leh chess te hmangin an inel dawn a ni.

Meeting
Ni 21.11.2016 (Thawhtanni) khan Transport Minister John Rotluangliana hovin a Office Chamber ah Transport Department hotuten meeting an nei a, mipuite leh lirthei khalh tu te hriattur pawimawh hrang hrang an sawiho.

CM in hawng
Chief Minister Lal thanhawla chuan ni 22.11.2016 (Thawhlehni) khan Directorate of Economics & Statistics office building sak thar, New Secretariat Complex ami chu a hawng a, department hrang hrangte chu an website enkawl uluk turin a chah.

Hlan
Ni 22.11.2016 (Thawhlehni) khan Anganwadi hna thawktha ‘Best Anganwadi Worker 2015-16 Award’ semna chu Social Welfare Department Conference Hall-ah neih a niin PC Lalthanliana, SWD Minister in a hmanpui.

Inrawnkhawm
Ni 22.11.2016 (Thawhlehni) khan UD&PA Department bul tumin Pi Pangi Pêng junction siam mek chungchanga inrawnkhawmna I&PR Auditorium-ah neih a ni. Venghlui leh Republic Veng pengthuam, Pi Pangi Pêng tia hriat chu a siam hna hi kumin November 30-ah tanin kawng laih chhiat hna tan tum a ni a, December ni 5 thleng kawng block tum a nih thu UD&PA Minister Zodintluanga chuan a sawi.

Thukhawm
Social Welfare Minister P.C. Lalthanliana  hovin ni 22.11.2016 (Thawhlehni) khan a office ah State Level Coordination Committee on Persons with Disabilities an thukhawm.

Hnam lam
YMA Branch hrang hrang te inelna tur 12th Chief Minister Running Trophy in YMA Cultural Dance Competition chu ni 23.11.2016 (Nilaini) khan Lammual ah tan a ni a, Cheraw, Tlanglam leh Chawnglaizawn te a intihsiakna hi neih a ni.

Thi
Mizo palar Padma Shree C Rokhuma (100) chu ni 23.11.2016 (Nilaini) chawhma dar 11:30 khan Aizawl Hospital ah thawhah avangin a thi a, ni 24.11.2016 (Ningani) ah vui a ni.

CM in ngen
Chief Minister Lal Thanhawla chuan ni 23.11.2016 (Nilaini) khan a pisa ah Brieflee Lyngkhoi, Director, Ministry of Power, Central Electrical Authority, North Eastern Regional Power Committee nen an inkawm a, kawlphetha man tihniam turin a ngen.

Session ko
Mizoram Governor Lt.Gen.Nirbhay Sharma chuan Mizoram State Seventh Legislative Assembly, Session 11-na chu December ni 6, 2016 (Thawhlehni) zing dar 10:30 a tan turin a ko.
Enfiah zo
Ni 23.11.2016 (Nilaini) khan Tripura Transit Camp paruka Bru enfiah hna thawh tawpna ber turin Hazacherra Camp ah thawh chhunzawm a ni a, zawhfel nghal a ni.

Hawng
Ni 24.11.2016 (Ningani) khan Mizoram Governor Lt. Gen. (rtd) Nirbhay Sharma chuan Raj Bhawan building thar Phase-I sak zawhfel tawh chu a hawng.

Tlawh
Ni 24.11.2016 (Ningani) khan I & PR Department leh MJA Gen. Hqrs bultumin Aizawl  chanchinbumiten PWD Aizawl Road South Division hmalakna thenkhat an tlawh.

Khawmpui
Ni 24.11.2016 (Ningani) khan P&E Engineering Officers’ Association chuan an pawl khawmpui lian vawi 17-na chu Aijal Club-ah an hmang a, Power Minister Lal Thanzara’n a hmanpui.

Facebooktwittergoogle_plusredditpinterestlinkedinmail

Mizo zinga NAVAL ARCHITECT hmasa ber – ZOHLUPUII

Big Ships leh Small Craft-ah honours ve ve

“Result te a chhuak ve chauh a, ka graduate hun te nghak ve phawt ila,” tiin inthlahrung leh inngaitlawm, hawihhawm takin nghak turin min ti a. Mahse, Thalai Khawvel in tan kan khawh tlat a, official taka a graduate hun hmain remchang min siamsak thei hlauh — kan thaw huai. Zorammuana leh Ramdinpuii te fa pathum zinga hmeichhe awmchhun, The Chosen band bassist ni bawk Zohlupuii (Zo-i) chuan khawvela thliarkar lian 26-na ni a, mihring 518,500 bawr vel chenna Tasmania thliarkara Australia Maritime College atangin Naval Architecture a rawn zir chhuak a. Graduate ni turin harsatna tam tak a paltlang a, a chhungte sum thawn thlak ringawta innghat lo a, a theihna leh remchang apianga inhlawh chungin a zirlai chu tha takin a rawn hlen chhuak ta. Hriat theih chinah Mizo zinga Naval Architect hmasa ber a ni. Hei le! Inthlahrung hauh loin kan rawn interview e…

zoe

Khawiah nge i zir?
Australian Maritime College, Tasmania-ah a nia ka zir. Kan college hi University of Tasmania hnuai a mi a ni.

Naval Architecture hi?
Naval Architecture tih hian lawng nalh deuh a design lam ni loin, a engineering aspects of ship design lampang zawk hi a nia. Chu chuan a engine leh efficiency te, functionality leh durability te a huam a. Chuan, lawng chhunga structure awm te design a ni tel bawk a.

Engtik atangin nge i zir tan… a course?
February 2013 khan ka chhuk thla a, hmelhriat pawh ka nei sa lem loin ka thleng thla ve hlawl a, ka kal mawl ve tawp a ni ber. A course hi kum li (4) chhung a nia.

Naval architecture zir tur hian?
Eng ang qualification vak pawh a ngai chuang lo a. Mahse, class 12 leh tlukpui exam-ah mark hmuh that ve chu a ngai.

Ngati nge Australia lamah daih?
India ramah chuan Naval Architecture zirna chu a awm ve tho a. A tha pawl hi chu IIT paltlang a ngai a, a dang hi hi chu an tih tlak vak loh. Heta college dang atanga masters rawn ti te standards atang hian, Indian Maritime College nen standard inthlauhzia a hriat.

Naval architecture hi i tui vang renga zir nge i nih?
Aw! Hman atanga ka zir chak tawh kha a ni ve hrim hrim a. Engineering line kal rau rau chuan lawng han design thiam kha chu ka chak zawng tak a lo ni a.
Engtin nge in zir dan?
Kan design mawlh mawlh bik lo a. Kum hnih (2) thleng kha Basic engineering kan zir a. Civil engineering te ho zir ang vek tho a nia. Chumi hnuah, kum thum (3)-na atang kan ‘line’ ah min khalh deuh tawh ta a. Kan zir chhung khan lawng (ship) design lo pawh project tam tak kan nei a. Pasta bridge design te, Rattrap boat design te, Submarine design te leh Autonomous Underwater Vehicle (AUV) tih te, kan engineering skills development tan leh work ethics kan neih that na’n group project tam tak, first year atang khan kan lo nei chho tawh a. Tichuan, final year ah design project tak tak kan nei ta a ni.

Naval Architecture huangchhungah hian thil hrang — merchant ships, passenger, warship etc., a awm niin a lang a. He’ng zingah

hian zirbik deuh i nei em?
Kan college atang hian Naval Architecture bikah Big Ships leh Small Craft ang tawpin kan then hrang a. Mahse, keichu, a pahnihah ka honours ve ve a ni.

Zir a hautak em — senso bakah thil dangah?
Senso chu hautak ve map map khawp mai. Khawsak man (cost of living) a lo sang bawk nen. Amaherawh chu, theih ang ang leh a tul ang angin ka’n inhlawh ve lawp lawp a. Restaurant-ah leh farm-ah te kan inhlawh ve mawp mawp thin.

I zir chhungin eng ang harsatna nge i hmachhawn?
Harsatna chu sawi mai dawn chuan, sawi sen pawh a ni lo. ‘Male dominated area’ a nih avang hian hmeichhe tan chuan ‘challenging’ ve thin khawp mai a, hmeichhia kan tam lo nen. Chubakah, software (3D modelling leh simulation) tan te kan hmang nasa a, harsatna chu a tam ve thin. Chu mai bakah, kan awmna Tasmania-ah tak hian Mizo dang an awm ve loh avang hian hnampuite ngaih a na duh ve thin lutuk. Thian tha leh chhung hnaite ngaih a na thin hle bawk. Hei chauh lo pawh — financially paw’n a har ve thin lutuk.

Tichuan, i graduate ta a…
Ka hmalam hun tur chu ka hre chiah lo nain, Pathian rorel dan dan a ni mai. A mihring lama ngaihtuah chuan, opportunity hi tam ve a; mahse, tunah rih chuan Australia-ah innghah (settle) phawt ka tum hrih.

I pass a, engtikah nga graduation?
Ni a, Pathian zarah ka pass chu a ni ve ta mai si a. December ni 17, 2016 khian graduation day kan hmang ang.

Facebooktwittergoogle_plusredditpinterestlinkedinmail

Hnathawk dawr nuam

Chief Minister Lal Thanhawla chuan sawrkar hnathawk te chu mipui te tana dawr nuam, a mamawhtu leh dawrtu te tann beiseina leh thlamuantu ni turin a chah a. Kan ram hruaitu lu berin vantlang hriat ah meuh hetiang thu a sawi ta hian ngaihtuah a ti thui a, sawrkar hnathawkte a inenlet a hun ta niin a lang. Chief Minister hian sawrkar hnathawkte hi a fuih anih rualin sawrkar hnathawkte pawhin inenfiahna tur tam tak an nei a ni tih an hriatthar atan a sawi anih a rinawm zawk.

Sawrkar hnathawkte hi Mizoram ah chuan an pawimawh em em mai a, state dangte angin company leh factory lian, mi tam tak tak chhawr thei ang chi hi kan la nei ve lo a. Hlawh an lak har chuan pawisa lengvak a tlem a, mi rethei ber thlengin kan tuar mai thin. Chubakah Mizoram chu Kohhran leh NGO nei tam kan ni a, sawrkar hnathawkte hi lehkhathiam an nih hlawm avangin Kohhran ah leh pawl hrang hrangah pawh chanvo an chelh tam hle a ni.

Sawrkar hnathawkte hi buai leh tul tak tak, chhun leh zan pawh sawilo leh office tan hun hmaa thleng a, ban hnu thleng pawha hun rei tak tak hnathawk thin an awm rualin tam tak hi chu inthlahdah tak tak, an hlawh phulo khawp a thawk ve mai mai pawh engemaw zat an awm bawk. Buai tak tak lai chuan hnathawh hah nen tlema tawngkam vin deuh pawh lo hman mai pawh thil awm thei a ni. Mahse hetih kawngah hian sawrkar hnathawkte hi an insum lehzual a pawimawh.

Office hrang hrangte hnathawh dan leh an kalhmang a hrang thei viau mai a,pisa a thawk theuh theuh pawh mahni chan lo lam chu hriatloh theih tak a ni. Chutih mek laiin office a ni khat pawh thawk ve lo tan chuan office kalphung chu hriatloh theih tak a ni. Hetih hunah hian sawrkar hnathawk ten anmahni dawrtute hawihhawm taka an lo chhawn thin a pawimawh. Thingtlang atang ten khawtlang leh mimal thil pawimawh ah office dawrin khawpui lian zawkah an zin ve a, sawrkar hnathawk thenkhat anmahni dawrtute pawh enchiang mang lova lo chhang mai mai te, tawngkam vin lo hmang mai te, biak chhunzawm dawn pawha ngamawmloh deuh te hmun thenkhatah an awm thin. Heng mite hian an thawhchhan an hre lo a, kawng lehlama sawi chuan thawk tlak an ni lo pawh a tih theih hial awm e.

Sawrkarin uluk taka a ngaihtuah hnuah an hlawh phutawk nia a hriat angin thawktu tur a la thin a, chung mite chuan taima tak leh thahnemngai taka a ruaitu tana an thawhlet kha an bat a ni. Mi thenkhat, chhuanlam ho te te siama pisa tlai reng mai te, pisa ban hun hmaa haw mai ching te, chhuanlam fahrah te te hmanga office chawl fo mai te an awm thin. Sawrkar in pisa kai hun a siam vawndikloh te pawh hi ‘corruption’ chi khat a ni a, Kristian te tan chuan tih loh tawp tur thil a ni. Sawrkar hian hnathawk thalo te hi a hrem rualin hnathawk thate chawimawina hi nei thin ta se tun ai hian hawihawm kawngah hma kan sawn ngei a beiseiawm bawk.

Chief Minister thusawi hi sawrkar hnathawkte hian a tha zawnga inenfiah nan hmang thei se, dawr nuam zawkin awm tum hram teh se. A hlawkna teltu tur chu sawrkar leh mipuite hi kan ni dawn si a.

Facebooktwittergoogle_plusredditpinterestlinkedinmail

Login

Lost your password?