Monthly Archives: December 2016

6th Hard Rock Night – In Rock We Trust

Rock fans te thinlung kaitho zak thin tu, 20th December, Lal Thanhawla Auditorium-a neih tur  Hard Rock Night inpuahchahna a kal mup mup mek a, kumin hian ‘Sketch your favourite rock star’ organiser te chuan buatsaih leh an tum. Rock artist/musician duh ber pencil-a ziah tur a ni a, mi 1 in duh zah zah thehluh theih a ni a, lawmman siam a ni dawn bawk a ni. Lemziak sirah Hming, Address leh phone number chiang taka ziah tur a ni a, December ni 19, 12 noon thleng  Vortex (Sikulpuikawn), WellHome (Zarkawt), Lois Bet ( Chanmari), VLM Store ( Industry Peng) ah te thehluh theih a ni a. Heng hmun 4 atang hian ticket pawh lei theihin zawrh chhuah a ni tawh a ni.
Hard Rock Night ah hian Mizo zinga band leh musician lar ber berte an inlan dawn a, anni hian 80’s leh 90’s hard rock hla bakah glam lam chi leh mipui nawlpuiin kan zawm tlan theih tur hla nalh tak tak 20 chuang an sa dawn a ni.
AXIS – Axis band hi 2000 kum khan Mizo tlangval, Delhi-a college kalhoin an din a ni a. Delhi lamah hnuhma tam tak neiin Y2Fest kha an perform-na hmasa ber a ni. 2003 khan Death Metal Mania ah an perform a, Scavenger Rock Idol III ah khan coach angin an inlan a, an team a mi Ably chu pakhatna an ni nghe nghe a ni. Maldives Island ah te pawh gig an lo nei tawh.
Vocals – Joe Ralte (Realistic vocals a ni bawk), Guitar – Toya Renthlei (Chrome Shift Concerto), Guitar – Bobo Renthlei (Stacy’s Penitence, UK lama Music zir chhuak), Bass – J.K. Sangtea Keyboard -Bimal (Reverse Tragedy) Drums – Tetea Pachuau

Casey’s Secret – 2009 a din niin Zonet Thazual chart lamah pawh an music video ‘Pap Pap’ leh ‘Duhaisam’ chuan top 10 a hauh rei dun. Music Video siam a cool viau ang ai hian an perform-na lamah chuan an hard thei hle thung. Rock Costume Party 2013-a Steel Heart hla hit ‘She’s Gone’ an cover atang fans lamin anmahniah rinna an nghat thui hle. State pawnah DDK Guwahati-ah te, Rock-o-phoenix, Alcheringa Festival, IIT – Guwahati-ah te MZU hmingin band member thenkhatin lawmman pathumna an la tawh bawk.
Vocals – Frankie (Ex Stacy’s Penitence), Guitar – Asanga, Bass – Tluanga Ralte, Keyboard – Hlimpuia, Drums – Rfa Ralte.

Dot Inlay –  ‘I thu ni se’ tih hla hmangin kan hre lar tan a. Rock Costume Party 2013 khan mipui barakhaih zawkin AC/DC hla te hnehsawh em emin an lo sa tawh a. Freddy for A day Concert leh gig hrang hrangah an inlan nual tawh.
Vocals – Theodore Ralte (Bangalore Karoaking 2011), Guitar – Hriata, Guitar – Bena, Bass – Puia, Keyboard – Tea, Drums – Mala.

Juggernaut – 2012 a indin Juggernaut hi tunlai Mizo band active berte zinga mi an ni. An single  ‘Sacrifice’ chu Reverbnation lamah a dinhmun a sang hle a, local chart-ah pakhatna a hauh mek a, ‘Sabrina’ (ft. Zahminga) pawh youtube lamah a hit hle.  Anni band hian Dio leh Ozzy hlate bakah Europe hla hit ‘Final Countdown’ an cover dawn a ni.
Vocals – John, Guitar – Thakima Khiangte, Bass – Hmingsanga Hrahsel. Keyboard – Bennedict, Drums – Lianzuala Hrahsel.

Facebooktwittergoogle_plusredditpinterestlinkedinmail

2016 LPS Youth Icon K Lalthlamuankimi

Zirtawp zan khan Youth Icon 2016 result puan a ni ta — K Lalthlamuankimi (Mami) chu Icon atan thlan a ni. Rulchawm nula hian a duhthusam hlawmtlinna a chan rualin, lawm luat avanga hnukulh leh lungchhiain lawmman a dawng.

947f0ab7-56b2-4409-ad2a-fe26632ea7e9
Kum 2012-a H. Lalrempuia hnua Youth Icon hmasa leh ber, kum 18 mi Mami hian a sang pathum zinga a elpui R Lallawmsanga (Bethlehem Vengthlang) leh Eunice Lalngaihsaki (Republic Vengthlang) khumin Icon lallukhum a khum a. Judge panga point pek leh mipui vote-ah a sang ber.
Khawsak awlsam lo tak hnuaia pi leh puin an enkawl sei len Mami chuan, “Engtin nge pakhatna ka nih theih zawk? A mak lutuk!!” a ti.
Zirtawp zanah LPS Auditorium, Zarkawtah result puan a ni. Youth Icon ni tawh mi pali bakah 2016 top 10-ten zaiin mipui an awi a, a naupan laia a nu leh pa an inthen avanga harsatna temtu Mami chuan lungkuai takin — Nun Khawhar — tih hla a sa.
Host Baryl Vanneihsangi chuan a sang pathum atangin kum 19 mi Eunice-i chu pahnihna pahnih zingah a tel tih a puang hmasa. Second eng emaw chen rialin mipui inring tura a koh hmasak te te hnuah hmanhmawh lo takin a chhaih.
Mi pahnih la bangte thinphu ran dan chuan a vawrtawp aia sang a thleng hial ang. Che chang lovin an hriat chak ber chu huphurh tak siin kum 28 mi Amama leh a bula ding Rulchawm zai thiam chuan an nghak.
“Lucky number 7 K Lalthlamuankimi” tih ri chu mipui hlim au thawmin a zui nghal. Lawm luat avanga lungchhiatna nasa tak chuan Mami hnuk a tiulh a, tawng chhuak mai thei lovin a hun tawn tawha ropui ber chu mittui nen eng emaw chen a hmang a, a taksa, rilru leh thlarau thlengin a barakhaih.
Youth Icon pangana chuan Pathian leh a pi leh pu hnenah lawmthu a sawi a, a nih chak em em a ni ta mai chu a duhthusam a takin a thleng tih a sawi.
Mami chuan, “A hmasa berin ka sual chung chunga hetiang min hruai thlengtu Pathian chungah lawmthu ka sawi a. Hmangaih taka min enkawktu a pi leh a pu chungah ka lawm em em.
“Mi zawng zawng hian min duhsak a, ka nih chak em em Pathianin min nihtir avangin lawmthu ka sawi a ni. Min vote-tu zawng zawng chungah lawmthu ka sawi a, ka kal leh zelna turah min thlawp tlat turin ka ngen nghal bawk a ni,” a ti.
Mami hian intihsiak a hmachhawn chhungin lengzem leh lenglawng hla nem lam, rilru hneh thei chi a sa tlangpui a, inelna hnuhnung ber Top 3 Contest-ah ‘Hmangaihna Rinawm’ leh ‘Hling Zinga Rose Par’ a sa.
2006 atangin LPS Vision-in zai thiam thlanna ‘Youth Icon Contest’ a buatsaih tan. Mami hi hmeichhe zinga Youth Icon ni thei pathumnna niin Zoramchhani (2006) leh Malsawmtluangi Fanai (2007) hnung a zui a, mipa zingah R Lalhmangaiha (2009) leh H Lalrempuia (2012) chuan hlawhtlinna an chang tawh a ni.
Grand Finale hi official sponsored Zoplast neitu Lalhmangaihzuala Pachuau leh a nupui Lalmuanpuii bakah, Mizo Zaimi Insuihkhawm Pawl (MZI) treasurer Helen Zaithankungi leh general secretary Isak Malsawmtluanga’n a hmunah hmanpuiin lawmman an sem.

LAWMMAN LEH HAMTHATNA
Youth Icon
* Rs 1,50,000 leh trophy
* Scooter, Mahindra Rodeo Uzo 125 (Lee International atangin)
* Solar inverter full set, Rs 38,000 man (Solar House, Mission Veng atangin)
* Zoplast tuizem 1,500 litre
* Pangpar (John’s Decor, Millenium Centre atangin)
* Music video (Chiangtea Videography, Sihphir)
* Album hmasa ber Scavenger Records-in a buaipuisak ang
* Mi mal leh pawl hrang hrang hnen atangin sum leh thilpek dang tam tak

Top 3
* Rs 20,000 leh trophy
* Zoplast tuizem 1,000 litre
* Light 3 LED bulb (kit) (Solar House, Mission Veng atangin)
* Pangpar (John’s Decor, Millenium Centre atangin)
* Music video (Chiangtea Videography, Sihphir)
* Mi mal leh pawl hrang hrang hnen atangin sum leh thilpek dang tam tak

LAWMMAN DANG
Best Mentor (Rs 5,000) – Victor (Scavenger Records, R Lallawmsanga mentor)
Best Musician (Rs 5,000) – Lalmalsawma Kawlni (Princeton Records, Melody Lalzirliani music track siamsaktu)

Facebooktwittergoogle_plusredditpinterestlinkedinmail

Tinreng feature : Black Bumperz

Lunglei khawpuia i kal anih chuan Maruti 800 mawi taka chei a huho a tlan i hmu fuh hlauh maithei. Nu leh pa tam tak chuan thalai hawklak in tel khawm tlan ho dul dul ah kan ngai ngei ang. Black Bumperz tih hming invuah te hi tu te nge maw an nih le i han bih chiang dawn teh ang.

September 3, 2016 khan Maruti Suzuki 800 model nei chiah tel theihna tur Black Bumperz chu Lunglei khawpuiah din a ni a, midangte tanpui hi an din chhan ber a nih thu Information & Publicity lam mawhphurhna latu an OB R. Hmingthanzuala chuan a sawi. Tunah hian Lovy Malsawmzuala chu President a ni mek a ni.

A dinna a la rei lo viau nain Charity Ride hi vawikhat an nei tawh a. He ride hi a chhinchhiah tlak hle tih R. Hmingthanzuala chuan a sawi a. Serkawn hospital-ah thisen pe turin an kal a, blood bank a lo ruak vek mai a, damlo mamawh te tan thisen pakhat mah a awm lo. Serkawn Hospital hotute an lawm hle a. Midangte tanpuina rilru pua kal Black Bumperz te pawh an lawm hle a, project ah neiin remchang hmasa bera neih leh turin hmachhawpah an nei tiin Information & Publicity lama an hotupa chuan a sawi a ni.

Thla hnih thum a ral chuan mi mit a la a, tel ve duh an pung ta zel a. An din tirh lama an charity ride hmasa bera member 15 chauh kha member 50 dawn an lo ni ta a, tel duh lah an la pung zel mai. Mahni motor leh bike te hralha Maruti 800 lei ta tam tak an awm a ni. An hruaitu R. Hmingthanzuala chuan, “Member tam deuh active hleithei lo ai chuan active taka tel thei tur tlem te chauh kan awm mai dawn em ni tih hial te kan ngaihtuah tawh,” a ti a. Tunah hian an member te hi hna hrang hrang thawk sumdawng te, sorkar hnathawk te, traffic police te pawh an tel mek niin a sawi bawk.

An motor Maruti 800 te hi chei danglamin sports car accessories hrang hrang an vuah a, mawi tak taka chei a ni hlawm a. Thenkhat chei danglam miah loh te pawh an awm ve tho bawk. Mizoram motor te zinga a lar leh hman rim ber pawl Maruti Suzuki 800-a a model hlui atanga a thar thlenga body coloured bumper nei lova bumper dum a neih chu an pawl hming lo chhuahna a ni.

Black Bumperz te hian tunah hian hmachhawp hrang hrang an nei mek a. Chung zingah chuan haw na tur nei lo te thlah turin damdawiin kawtah duty te indah an tum mek a. Duty te petrol man pawh an pawl pawisa atanga pek an tum a ni. Black Bumperz te hi tum mumal tak neia ding an ni a. Midangte tanpui thupuia neiin hma an la mup mup reng a ni.

Facebooktwittergoogle_plusredditpinterestlinkedinmail

Tanpuina dil hmeichhia 452; ZU VANGA HARSATNA TAM BER

Aizawl: Hmeichhe tanpui ngaite puitu atana din ‘Universal Women Helpline’ chu hawn anih atangin puihna dila betu 452 an awm tawh a. Zu vanga harsatna thleng chu a tam ber a ni.

Universal Women Helpline thawktute hnen atanga Zalen thudawn danin July ni 14,2016 atanga helpline hawn anih atangin mi engemaw zatin telephone hmanga an biak bakah anmahni ngei kala puihna dil an awm tawh tih an sawi a. Hmeichhia ten harsatna an tawh lian ber chu an chunga hleilenna ‘domestic violence’ a ni tiin heng zinga 85% chu hmeichhe chungca kutthlak a ni a, a dang 15% chu rilru tihnat (non domestic violence), tih hmingchhiat/puhchhiat, vau etc te an ni. Hmeichhe chunga kutthlaktu zinga a tam ber hi an pasal pawmlai te an ni a, an bialpa, pasal chhungte leh midang pawh tlema zawng an awm bawk. Nupa kara buaina a chhuah chhan ber chu zu vang anih thu Universal Women Helpline thawktute chuan an sawi a, zu in vanga nupa inhau/kut inthlak leh ngaihzawng in neihsan te chu buaina tam ber niin an sawi.

Helpline thawktute chuan harsatna neite chu an case a zirin an thawhpui Police, damdawiin, dan lam thiam leh NGO te hnenah an hruaiin kawng an kawhhmuh thin niin an sawi a. Anmahni pantute lungawina thlen chu an tum ber a ni tiin an hnathawhna kawngah milian leh rethei thliar lovin a pan hmasatu apiang an buapui mai thin tih Zalen an hrilh.

Zalen zawhna chhangin Universal Women Helpline thawktute chuan anmahni pantu te thu thlen chu an finfiah (examine) hnuah chauh hma an la tan nia sawiin hmeichhe thenkhat report diklo hrilh te pawh an awm a, chung mite chu na takin an zilhhau tih an sawi a. Anmahni pantu zingah lehkhathiamlo leh veng kilkhawr a khawsa, a bikin state dang atanga lo pemlut an tam ber niin Zalen an hrilh bawk.

Facebooktwittergoogle_plusredditpinterestlinkedinmail

Vaihlo survey tan

Aizawl: Mizorama zuk leh hmuam ti zat zirchianna ‘Global Adult Tobacco Survey GATS) chu tih chhoh mek a ni a, kumthar January ah chuan zawh hman beisei a ni.

Zalen thudawn danin GATS hi Zirtawpni atang khan Aizawl district ah tih tan a ni a, kumthar January atangin district dangah chhunzawm tum a ni. Tun tum survey ah hian kum 2009-2010 a zawhna hrang hrang an zawh thin mei zu zat, eibar (economic) a nghawng dan, zuk leh hmuam nghei zat, midang meizuk  in midang a nghawng dan  te bakah kuhva pawh telh thar a ni.

GATS result hi kum khat hnu velah a result hi hriattheih beisei a ni.

Facebooktwittergoogle_plusredditpinterestlinkedinmail

Dawrpui ah ruihhlo halral

Aizawl: New Market leh a chhevela duty veng panga Chhinga Veng, Dawrpui, Electric, Saron leh Zarkawt Branch YMA ten ruihhlo an man khawm Rs 5,00,480/- hu chu nimin chawhma dar 10 khan bialtu councillor B. Lalawmpui’n Dawrpui School kawtah a halral.

Veng panga Joint YMA te hi September 3, 2016 atang khan an duty a, tun thleng hian mi 1079 man tawhin, an mi mante zinga 134 te chu home hrang hrangah an dah a, Police a pek mi 8, Excise a pek 3, leh CWC lama pek naupang 3 an nei tawh a, Rs 2,548,600/- hu ruihhlo man an nei tawh bawk.

Facebooktwittergoogle_plusredditpinterestlinkedinmail

Motor in chilhlum

Lalropuii (24) d/o Lalchhanhima (L), Kawnpui Hmar veng chu nizan hmasa dar 7:30 vel khan Aizawl atanga a haw lam Sairang pelh km 3 velah a chuanna motor in a chil a, ka pawh chhawn lovin a boral. A ruang hi nimin khan Kolasib damdawiin ah post mortem anih hnuah chawhnu dar 1 khan vui a ni.

Facebooktwittergoogle_plusredditpinterestlinkedinmail

CM’s Rural Housing Scheme cheng nuai 600 hmanna tur ruahman

Aizawl: New Economic Development Policy (NEDP) hnuaia Chief Minister’s Rural Housing Scheme atana hmalak dan tur chu a buaipuitu tura dah Rural Development (RD) Department in ruahmanna an peih thawkhat tawh niin Zalen an hrilh.

Zalen palai zawhna chhangin Rural Department hotute chuan CMs Rural Housing Scheme chu pilot basis anga tanin District pathum- Serchhip, Siaha leh Lawngtlai District ah tih hmasak a ni ang a. Department-in a kalpui mek scheme dangte nena kal kawp lovin a hranga kalpui tur niin an sawi.

RD hotute chuan District pathuma in sakna tur pawisa Rs nuai 600 sem dan tur ruahman a nih thu sawiin BPL an neih zat leh chenna in chhe tawh emaw hlui tawh awmzat chu tehfungah hman a ni dawn a, PMAY hnuaia Permanent Wait List (PWL) an siam tawh behchhanin teh a ni dawn niin Zalen palai an hrilh.

Planning Department-in ruahmanna an lo siam tawh in pakhat sak nana Rs 50,000 chu a tlem deuh a hriain Rs nuai 1-a tisang turin rawtna siam mek a ni tih RD hotute chuan an sawi a, in pakhata cheng nuai 1 hman a nih chuan in 600 a sak theih dawn niin Zalen palai an hrilh bawk.

Facebooktwittergoogle_plusredditpinterestlinkedinmail

State Central Library tlawhtu pung hleithei lo : State Librarian

Aizawl: State Librarian Lalramliana chuan October thla chhung khan State Cental Library tlawhtu chu mi 418 an ni tih sawiin tlawhtu an pun hleihtheih loh thu Zalen palai a hrilh.

Lalramliana chuan State Central Library chu mipui te ta a ni tih sawiin, “Neitu nihna rilru puin kan hman tangkai a ngai,” a ti a. Aizawl khawpui chhung sikul te pawhin lehkhabu chhiarna hun emaw library tlawhna hun an zirlai te tan siam thei se a duh thu Zalen palai a hrilh bawk.

Raja Ram Mohan Roy Library Foundation (RRRLF) Scheme hnuaiah Mizoram chhunga government recognized library 485 an enkawl mek tih sawiin State Librarian chuan kum tinin library 485 te hian lehkhabu an dawng thin a, an hna pui ber pakhat niin a sawi a. Library hi NGO te siam library mai bakah jail, rescue home leh hospital te pawh an tel niin a sawi bawk.

State Librarian Lalramliana chuan State Central Library ah hian lehkhabu 60,721 awmin computerized vek an ni tih a sawi a, “Heng lehkhabu te hi mithiam te thluak a ni a, kan ngaihlu tur a ni,” a ti a. Research scholar te tan pawh reference lehkhabu tha tak tak a awm thu Zalen palai a hrilh bawk.

State Central Library member ni tur hian puitling tan Rs. 20 leh security deposit Rs 100 chawi a ngai a, naupang tan Rs 10 niin security deposit chawi a ngai lo. Tunah hian Library member hi puitling 5069 leh naupang 911 an awm mek.

Facebooktwittergoogle_plusredditpinterestlinkedinmail

Zawhna chhan loh tha ti lo

Aizawl: MNF Senior Vice President Tawnluia chuan Assembly neih zawh taka Chief Minister in MNF MLA Lalruatkima zawhna a chhang duhlo chu tha a tihloh thu a sawi.

Zirtawpni kalta khan Hnam Run-ah thu sawiin Tawnluia chuan Lalruatkima zawhna Chief Minister-in a chhang duh lo kha, ‘A hnuaiah engnge inphum a, engvanginnge ‘ ka chhang dawn lo ‘ a tih tiin a zawt a. Sihhmui to Lengpui Road Tlawng lei (Bailey bridge) chim dawh that nan hian MoRTH atangin April ni 30,2015 daih tawh khan Rs.297.60 lakhs sanction hmuh a ni a, lei dawh nan hian Rs.244.20 lakhs sengin June ni 24,2016-ah dawh zawh a ni chauh a, pawisa hman zawh loh hi Rs.53.4 lakhs a chuang a, lei dawh hi lirthei 25 MT-a rit zawh theih turin DPR leh Sanction-ah 60 ft. Triple Structure-a siam tura tih anih laiin lirthei 20 MT-a rit zawh theih chauh turin Double Structure chauhva lei hi dawh a ni a, engvanga pawisa pawh hmangzo lova derdep leh rinawm lo zawka lei hi dawh anih tih chu Chief Minister hian zawhna a chhan duh loh lai chu a ni a ti a. Tawnluia chuan ‘ kan lo enchiang ang a, ziakin emaw kan la inhrilh dawn nia’ tih tal pawh ni ta se a la hriatthiam theih a, hetia zawhna inchhan duh loh ringawt mai hi tha kan ti lo hle a ni, a ti.

Facebooktwittergoogle_plusredditpinterestlinkedinmail

Login

Lost your password?