Monthly Archives: December 2016

Zawma’n pavillion leh building a hawng

Aizawl: Aizawl West III bialtu MLA Vanlalzawma chuan nimin khan MLA Local Area Development Fund atanga a pek Lawipui khelmual-a , Pavillion cheng nuai 10 senga sak leh Bungkawn vengthar MHIP building cheng nuai 1.5 senga sak a hawng.

Lawipu khelmual Pavillion a hawnna ah Vanlalzawma chuan MLA Fund chu bial mipuite ta a nih angin, tangkai leh a chhawrtu pawh mipui vantlang ban phak, daihzai thei ang bera hman a duh tih a sawi a. Lawipu khelmual pawh mahni veng bil tan mai ni lo, veng thenawm te tan pawha an Field chu phal taka inhawng chung leh, mi dangte tan malsawmna thlen tirtu a nih zel theih nan rilru leh ngaihtuahna zau tak pu zui turin a chah bawk.

Bungkawn vengthar MHIP Branch building thar a hawnna ah Vanlalzawma chuan MHIP te chu inlungrual tur leh an hmalakna kawngah tha thlah lova kal zel turin a fuih a. MHIP Branch thenkhat leh an Headquarters lamah boruak duhawm vak lo, inhruipawhna thleng thin ang chi-te ah inhnamhnawih lo va, pawl thianghlimna leh ropuina chu zah a, chawisang chunga a ti hlu tu nih tum zel turin a chah bawk.

Facebooktwittergoogle_plusredditpinterestlinkedinmail

Aizawl faina atan hma la mek

Aizawl: India ram khawpui fai zinga Aizawl a tel ngei theihnan hmalak mek a ni a, hemi kawnga a bultanna hun hi naktuk hian I&PR Conference Hall ah UD&PA Minister Zodintluanga chuan a hawng ang.
Aizawl khawpui faina kawnga hma latu tur High level monitoring & coordination committee on Swachh Survekshan 2017 hi Nilaini kalta khan Planning Conference Hall ah UD&PA Minister Zodintluanga hovin an thukhawm a, hmalak zel dan tur an sawiho. Meeting ah hian kumthar a Quality Council of India in Aizawl khawpui fai leh fai loh an endik huna an hmun tlawh tur hrang hrangte thlang felin tanlak dan tur an sawiho a ni.
Nikum 2016 khan India khawpui thlanchhuah 73 endik zingah Aizawl chu 41 na a ni.

Facebooktwittergoogle_plusredditpinterestlinkedinmail

CM in NCC dahbelh remti

Aizawl: Chief Minister chuan Lal Thanhawla chuan Aizawl ah NCC Academy leh North East Air Wing Headquarters te dinna tur leh Lunglei ah NCC Battalion dang pakhat dah belhna tur te chu NCC hotuten an remti niin a sawi.

Government Champhai College in college te tehna NAAC Accreditation a Grade B++ an hmuh lawmpuina programme Zirtawpni a neih a hmanpuina ah he thu hi sawiin Chief Minister chuan Champhai College in Spoken English, Hindi leh Burmese class an kalpui mek chu tha a tih thusawiin, “Heng tawng te hi kan tawng a nilova mahse kan thiam dan ang angin kan hmang mai tur a ni a, Sap tawng kan zah lutuk avanga kan hman duh lohna leh Hindi kan hmusitna te kan dah that a ngai a, heng tawng te hi thalai te tan a bik takin thiam a pawimawh zual a ni,”  a ti.

GCC hian zirlai naupang 650 chuang an nei mek a, Department 14 neiin zirtirtu 52 an awm mek a ni. NAAC Accreditation chuan  B++ a pe mek bawk.

Facebooktwittergoogle_plusredditpinterestlinkedinmail

HEPATITIS VACCINE MANSAK

Aizawl: Health & Family Welfare Department hnuaia Food & Drugs division chuan Mizoram hmunhranghrangahridanna vaccine pekchhuahhnathawk thin NGO pakhat Human Health Care Society chuphalna an nei lo niasawiin an office-ah an kalchilh a, Hepatitis B vaccine vial (bur) 52 an man sak.

Zalen thudawnna in a tarlan danin Human Health Care Society hian Rose Laboratory, Lunglei a awmnen tangkawpin Mizoram District capital hranghrangah vaccine pekchhuahhna an kalpui thin a. Mi pakhat chiuna manah Rs 150 zel an la thin. Human Health Care Society hnathawh kalpuitu chuan vaccine pekchhuah dawn reng rengin District Chief Medical Officer rawn an ni ziahin, Aizawl-ah pawh Health department hriatpuina an neih thu a sawi.

Kar hmasaa thil thleng hi bawhzuiin Zalen palaiin zawhna chhangin Expanded Programme of Immunization a programme officer Dr Lalzawmi chuan he society ina vaccine pek a kalpui thin chu a hmain tihtawpsak an ni tawh tih sawiin, “Project chu an lo thehlut a, vaccine an pekchhuah leh pekchhuah loh tur department in kan buaipui mek laiin vaccine pekhna an lo kalpui leh a, hei hi a dik lo a, drug license pawh engmah an nei lo a ni,” a ti. “Venghranghrangah chuan an buaina hre loin khawtlang hruaitute pawhin an lo recommend a, an fate chungah eng emaw thleng se a pawi hle dawn a, tun thleng chuan thil pawi thleng a awm hriat kan la nei lo” a ti bawk.

Human Health Care Society ah hian mi 14 vel an thawk mek a, hnathawktu zingah hian doctor, nurse, health worker leh technician pakhat theuh an tel a ni.

Facebooktwittergoogle_plusredditpinterestlinkedinmail

The Week That Was (Dec 11, 2016)

Court ah
ZNP President Lalduhoma chuan ni 5.12.2016 (Thawhtanni) khan an office ah Press mite a kawm a, Assam in Inner Line Forest Reserve a lo enkawl chungchang sawiin, “ZNP kan sawrkar chuan Assam sawrkar-in chhiah an rawn chhun luh loh zawng zawng hi Court-ah kan khing dawn a, chu bakah chuan ‘Min lo enkawlsakna ah lawmthu kan sawi a, tun atang chuan kan lo enkawl ve tawh ang e’ kan ti dawn a ni,” a ti.

Vawk sawiho
Ni 5.12.2016 (Thawhtanni) khan Chief Minister Lal Thanhawla hovin NLUP hnuaia 3rd leh 4th Phase a AH & Vety. Department in vawkvulh thlangtu te hnena vawk note sem mek chungchang an sawiho.

DC in hawng
Ni 5.12.2016 (Thawhtanni) khan Aizawl DC Kannan Gopinathan chuan DC Office-ah Certificate/ILP/Aadhaar Facilitation Centre a hawng a, he Centre atang hian mipui mamawh certificate leh lehkha pawimawh dang hrang hrang – Tribal/ Residential/ Income Certificate/ ILP/ Aadhaar te chu hmunhma felfai zawk leh mipui tana awlsam zawk a buaipui sak an ni ang.

Session tan
Ni thum chhung awh tur Mizoram Legislative Assembly pasarihna thutkhawm vawi 11-na (thlasik thutkhawm) chu ni 6.12.2016 (Thawhlehni) khan tan a ni a, session neih kar laka MLA boral mi 2 LP Thangzika leh J.Lalthangliana te sun an ni. Speaker Hiphei a zin avangin Deputy Speaker in session hi a kaihruai a ni.

Zofest tan
Ni 6.12.2016 (Thawhlehni) khan MZP buatsaih Zofest chu Zofa te Run, Zokhawthar ah tan a ni a, EF&C Minister Lalrinmawia Ralte chuan khuallian niin a hmanpui.

Flag day
Ni 6.12.2016 (Thawhlehni) kha Armed Force Flag Day a ni a, India ram pumah hman a ni. Hemi ni hian indona-a nun chanta nupui fanaute, hliam tuar a ramtuileilo a awmte leh Ex-servicement leh hmeithai harsa zualte tan Car leh Sticker Flag zuara tanpuina khawn a ni a, Rs. 53,640 /- hmuh a ni.

Thukhawm
Ni 7.12.2016 (Nilaini) khan UD&PA Minister Zodintluanga hovin High Level Monitoring & Coordination Committee for Swachh Survekshan 2017 an thukhawm a, lndia ram khawpui fai thlanna survey, Swachh Survekshan 2017 atana inpuahchahna leh ruahmanna an thlirho.

Khawmpui
Ni 7.12.2016 (Nilaini) khan Mizoram Economic Association (MEA) chuan Aijal Club Reception Hall-ah Conference an hmang a, Finance Minister Lalsawta chuan khuallian niin he hun hi a hmanpui.

Lungawiloh lantir
Ni 8.12.2016 (Ningani) khan MNF Thalai chuan sawrkar laka an lungawiloh lantirnan Assembly House bulah an pungkhawm a, Police te nen hun rei vaklo an innawr vangin mi thenkhatin hliam tenau an tuar.

Tlawh
Ministry of Home Affairs a special secretary MK Singla chuan ni 8.12.2016 (Ningani) khan Saikhawthlir khua tlawhin Tripura atanga Bru raltlante awmna tur hmun buatsaih a tlawh.

Session tawp
Ni 3 chhung awh Assembly thutkhawm chu ni 8.12.2016 (Ningani) khan tihtawp a ni a. Session ah hian zawhna (starred question) 90 lut zingah 77 pawm a niin 13 hnawl a ni a, house ah 16 chhan hman a ni. Ziaka chhan chi (unstarred question) 23 lutin 19 admit a ni a, 4 hnawl a ni bawk. Session ah hian report 5 pharh a ni a, bill 2- ‘The Mizoram Fisheries (Amendment) Bill, 2016’ leh ‘The Mizoram Drug (Controlled Substances) Bill, 2016’ te chu lungrual taka pass a ni bawk.

Mizoram ramri
BJP Mizoram Pradesh President Dr. JV Hluna chuan ni 8.12.2016 khan Press mite a kawm a, “Congress leh MNF te hi ramri chungchang sawi thei dinhmunah an ding lo a ni,” a ti. Dr. JV Hluna chuan Vairengte chu Mizoram chinah an pawmlo nia sawiin Assam in an enkawl mek Inner Line Forest Reserved chu Mizoram chhung tih chu an pawm dan niin a sawi bawk.

Minister in tlawh
Circuit House, Khatla building awmna hmuna State Convention Centre sakna atana lei laih hna thawh mek chuan a chhak Baptist House a lei a tikhi nia sawi a awm avangin ni 8.12.2016 (Ningani) zing khan UD&PA Minister Zodintluanga chuan a tlawh a, a hmunah thil awmdan a enfiah.

Synod in rel
Durtlang biakina Synod khawmpui chuan mahni intihlum te a hrana vui dan bik neih thin chu tihtawp an rel.

Hmanpui
Ni 8.12.2016 (Ningani) khan 5th Assam Regiment atanga pension chhuak intelkhawm te chuan Aijal Club ah Batlle Honour of Chhamb an hmuh champha an lawm a, home Minister R.Lalzirliana chuan a hmanpui.

Facebooktwittergoogle_plusredditpinterestlinkedinmail

BLOOD TEST PAWIMAWH TAK

Damlo enkawl kawngah hian doctor-te chuan an natna hriat chhuah nan investigation hrang hrang kan tihtir thin a, chung zingah chuan a pawimawh ber pawl leh kan tih hmasak deuh ngei ngei, zai ngai tan phei chuan tih ngei ngei tur chu Hemogram kan tih hi a ni. Hemogram hi thisen test a ni a, chumiah chuan Hemoglobin (Hb kan tih fo) level te, Total Leucocyte Count (TLC) – thisen a timur var (white blood cells) awm zat te, Differential Leucocyte Count (DLC) – timur var a chi hrang hrang awm zat te (Neutrophil, Basophil, Eosinophil te an ni), Platelet Count (Platelet hi thisen khangna tura timur pawimawh a ni) leh Erythrocyte Sedimentation Rate (ESR) an ni.
Hemoglobin level hi kan timur sen (red blood cells) a awm, kan boruak hip luh atanga Oxygen sem darhtu ber a ni a. Hb hi normal level chu 12-16 a ni a, hmeichhiaah tlemin mipa aiin a hniam hret a ni. Hb hniam tia kan sawi fo hi medical term chuan Anemia kan ti a, a chhan common zual te chu ei leh in lam fel lo, Vitamin tlakchham vang te, chaw kawng/ pumpui/ril atanga thi put (Gastrointestinal blood loss) vang te, kidney (kal) lam tha lo vang te a ni tlangpui. HB hniam chi hi an awm ve hrim hrim bawk a, 10 kai thei mang lo te an ni a; mahse, fel lohna an nei hran lo. Hmeichhe thi neih fel lo vangin a awm fo bawk.
TLC – normal chin chu 4000-11000 anga ngaih a ni a. WBC te hi kan taksa sipai an ni a, natna hrik dotu ber an ni. A count hi a san chuan natna hrikin taksa a tihbuai vang (Infection) a ni duh ber a, a dang lehah chuan damdawi eng emaw ei sual vangin a rawn sang thei a, thling (bone marrow) lama thisen insiam dan dik lo vangin a sang thei bawk. A count hi a hniam chuan Leucopenia kan ti a, WBC insiam tlem vang a ni a, taksa natna do theihna tlahniam (Immunosuppression) vangin a awm fo thin. Cancer enkawlna Chemotherapy vang hian a hniam fo a, Kidney transplant (kal thlak) te hian an nei duh viau a, damlo taksa chau chaw ei mumal lo vangin a awm fo a, HIV+ te pawh hian an nei duh viau bawk. DLC bikah hian Neutrophils bik hi a san zual chuan infection vang a ni duh viau. Eosinophils hi Allery vangin a sang fo thung.
ESR – normal level hi 20-30 ang vela ngaih ani a, a san chuan infection nasa te, TB vang hian a sang fo a, ruhseh (arthritis) nei ah te, thisen zam lam fel lo ah te a awm duh bawk. Platelets hi kan tarlan tak angin taksa a thisen khang tura hmalatu pawimawh tak a ni a, normal range hi 1.5-4.5 lakhs vel a ni. Platelet count sang (Thrombocytosis) hi a chhan ni thei te chu thisen hlauh thut (acute bleeding) te, thil huat (allergic reactions), cancer, kidney failure (kal hnathawk lo), heart attack, leh infection eng emaw vang te a ni a. A hniam (Thrombocytopenia) ve thung hi chu infection (viral) vang te, vitamin thenkhat tlakchham vang te, thling atanga thisen insiam tlem (aplastic anemia) te, damdawi thenkhat (aspirin hi a chhan common tak), naupai laiah te leh immunosuppression hrim hrim vang te a ni thin.
Heng kan han tarlan te hi medical hriatna lam atana kan tarlan a ni a. Hemogram test hi kan ti a nih chuan a chhan tlangpui ni thei te kan rawn tarlang ringawt a, a confirm-na tur erawh chuan doctor te reading tihtir ngei ni thei se. Investigation kan tih hian pakhat ringawt a innghah ngawt chi a ni lo va, entirnan, Hb hniamah hian an ekah thisen a awm nge awm lo test (Stool Occult Blood test) te kan tihtir leh thin a, Endoscopy te pawhin an chawkawng leh pumpui lamah bleeding an neih leh neih loh kan en tel bawk thin a ni.

Facebooktwittergoogle_plusredditpinterestlinkedinmail

Hnam inpumkhatna

Tunhnaia Mizo Zirlai Pawl chuan Zofate inzawmkhawlehna kawng khat atan Zokhawthar ah Zofest hlawhtling takin an huaihawt a. Hetiang deuh bawk hian zirlai pawl dang Mizo Students Union pawhin Zo hnathlak unaute inzawmkhawmlehna atan nasa takin hma an la bawk a. Chumai ni lovin Mizoram a tlawmngai pawl lian ber Central YMA chuan Mizoram chhunga cheng hnam hrang hrangte unau kan nih lantir nan leh kan inpawh lehzual nan kar kalta mai khan Lammual-ah Joint Cultural Meet hlawhtling tak an buatsaih a. Lai leh Mara atangin zaithiam leh lamthiam engemaw zat lo telin hun hlimawm tak hman a ni tawh bawk a nih kha.

Tunkar maia neih zawh tak Zofest hmanpuitu Chief Minister Lal Thanhawl chuan, “Kumpinu sawrkar policy divide and rule tuar nasa berte chu Zohnahthlak te kan ni a, ram pathum India, Bangladesh leh Burma ah te hian min then a, India ah phei chuan state pali Mizoram, Manipur, Assam leh Tripura ah te kan awm darh a. Chuti chungin kan inuana leh thisena kan inzawmna te hi a bo chuang lova. Tunah rih chuan rorelna pakhat hnuaiah awm lo mah ila, engtik emawni hunah chuan Pathian hian Zo hnahthlak te hi rorelna pakhat hnuaia min la awm tir ka ring a, chutiang turin tun atangin inpumkhat zai rel a, kan inlaichinna leh kan in unaunate ti chak turin kan ngaihtuahna leh rilru te senga hma kan lak a ngai a ni,” tiin a sawi anih kha.

Chief Minister mai bakah kan ram hruaitu hrang hrang, political party, NGO, zirlaite leh mipui ah nasa takin hnam inpumkhat pawimawhna kan hre thar hi a lawmawm a, chutih rual erawh chuan hmalakna tur erawh a la tam hle awm e. Khawvel hnam ropui kan tih te hi an ropuina chhan chu an lungrualna leh an thawhho thiam vang mai a ni. Mizote pawh hmun hrang hrangah awm mah ila kan tanrual tlat chuan hnam chak leh zahawm kan ni dawn a, chu chu an hlauh vangin min thenhrang a ni pawh a tih theih ang.

Hnam inpumkhatna atan hian Zofate Jerusalem, Mizoram a cheng te hian mawhphurhna kan nei sang ber a ni tih kan hriat thar a pawimawh a. Kan unau thenkhat, Duhlian tawng an thiamloh avanga lo hmuhsit mai te, tlema an khawsak phung a hniam deuh avanga lo nuihsawh mai palh pawh thil awm thei a ni. Kawng hrang hrangah nu leh pa chan changa huikhawm hi kan tihtur a ni tih i hre thar leh ang u.

Tunhnaia Zofate insuihkhawmlehna atana hmathar lakna, a bikin thangtharte zingah nasa tak a awm chho hi a lawmawm a. Hmun hrang hrangah awm darh mah ila Mizote hi tangrual thiam ngat ila chuan hnam zahawm tak kan ni thei tih i hre nawn fo ang u. Hnam inpumkhatna atana hmalakna hi mipui ten kan tawiawm thiam a ngai a, zirlaite leh tlawmngai pawl te hian nasa lehzualin hma han la se. Raltiang kai turin leh an hmalakna tawiawm a, puibawm turin an hnungah mipuite kan awm ni tih hre thar leh teh se.

Facebooktwittergoogle_plusredditpinterestlinkedinmail

Kristiante nekckepna leh Good Governance Day

Kum 2014 inthlanpuiah khan BJP leh an thawhpui party-ten hnehna chiang takin an chang a, May thla tawp lam atangin Narendra Modi-a kaihhruai sorkar a lo ding a. Tunhma atangin BJP hi hindu sakhua nena inzawm tlat, India ram hi hindu rama leh tum anga ngaih a ni a. Hindu sakhaw behchhan pawl leh party firfiak tak takte nena inkungkaih tlat an ni bawk a. Chu’ng avang te leh prime minister Modi-a ngei pawh hi RSS a lo tel tawh a nih avang te hian Kristian pawl thenkhat leh kohhran hrang hrangte chuan tihduhdahna a thleng mai ang tih hlauhthawnna an nei viau a ni.
Mahse, prime minister hi ram hmasawnna atchilh bur a ni a, inthlan campaign laia a thupui ber pawh ‘development’ a nih kha. Thuneihna a chan hnuah ram hmasawnna tura ruahmanna thar leh kalphung thar a ti nual tawh a. India ram hmasawnna turin beihpui a thlak a, ram hrang hrangah a zin kual a, sorkar hrang hrangte chu sumdawnna leh thil dangah thian a siam turin a bei nasa hle a. Ram hmasawnna beihpui a thlak mek avang hian sakhaw dangte (Kristian leh Muslim) tihduhdahna a thlen a hlau viaua ring an awm a, khawthlang lama Kristian tamna ram hausate an lungawi loh palh a hlauthawng viau tura ngaih a ni.
Chutihlaiin, ‘sapuiin a zia a thlak thei lo’ an tih ang deuhin, sakhaw tih bik nei BJP kaihhruai (NDA) sorkar hnu hian Kristiante tawrhna a thleng ngun malh malh hle tawh a. Tunhma atangin BJP leh an sangawi zawnpui hindu pawlte – RSS, VHP, etc., hian India ram hi hindu rama siam an tum hle a. RSS hruaitu pakhat Rajeshwar Singh phei chuan, “Lo nghak ula, lo thlir rawh u, December 31, 2021 hi kan rama Kristian leh Muslim awm tawpna tur ni a ni,” tiin India rama Kristian leh Muslim sakhua nuai bo an tum thu a puang a nih kha.
Mahse, kum hnih chuang BJP hruai sorkar hnuaiah hian sakhuana kaihhnawih buaina lian tham (major communal riots) a thleng lo a. Chutihlaiin, ram chhung hmun hrang hrangah Kristiante beihna tenau leh biak in suasamna erawh a thleng zing malh malh viau thung. Kristian pawl thenkhatte (United Christian Forum, the Evangelical Fellowship of India, etc.) hian nitin a Kristiante chunga hleilenna thlengte hi an chhinchhiah thin a. Tharum hmanga beihna bakah tawngkam a beihna sawi tur a tam hle a, sorkar laipuia minister zingah ngei pawh Kristiante vau leh tawngkam na taka bei thin an awm.
Engpawhnise, India rama thuneihna chang mektute hi hindu sakhua nena inthunzawm tlat an ni a, India ram hindu rama leh tumtute an nih bawk avangin Kristiante chunga hleilenna leh biak in beihna te hi a hluar tial tial lo ang tih a sawi theih lo a. Chutih rual chuan, a hma lama sawi tawh angin, prime minister chak tak hruainain sorkarin ram hmasawnna beihpui a thlak mek avangin khawthlang ramte laka India hmai timawk thei tur thil a thlen erawh an hlau viau thei. Mahse, hindu sakhua ngaihpawimawhna erawh a lian chho tial tial a, bawng talh khap te, yoga chawilar te pawh hi an hmalakna langsar zinga mi a ni.
Kum 2014 khan sorkar laipuiin Good Governance Day atan Krismas ni a puang thut mai a, he ni hi prime minister hlui Vajpayee pian cham denchhena puan a ni nghe nghe. A tir atangin Kristiante ni ropui ber pakhat Krismas Ni ber kher sorkar ni pawimawh atana hman a ni hi sawiselna a nasa hle a. Parliament-ah hial sawi chhuah a nih kha. Mahse, sorkar laipui hian, beih letna leh dodalna a nasa dawn tih hriain, good governance day hmang tur hian sorkar hnathawkte tihluihna nen a kar chiah lo a. Kuminah pawh hian Krismas Ni taka good governance day hmang turin thuchhuah siam a ni tawh a. Mizoramah chuan sorkarin good governance hman ve a nih loh tur thu an sawi chiang tawh a. Kristiante ni pawimawhah hian a hranpaa good governance day puala hun hman a nih loh tur thu Mizoram BJP pawhin an sawi tawh bawk a, a lawmawm hle a ni.
He good governance day an puan chhan hi thil tha tak a nih rualin a hun atan Krismas ber kher an thlang hi chu tihluih a ni tih a chiang a, Kristiante ni pawimawh a ni tih hre chiang chunga ruat an nih avangin Kohhran hrang hrangte leh Kristian pawl hrang hrangten an sawisel nasa hle a. India danpui – sakhaw zalenna thlengin a kalh ni a sawi te pawh an awm. A bikin Kristian tamna leh Krismas uar taka lawm thinna hmarchhak biala chengte tan phei chuan a thinrim thlak hle a ni. Mahse, sorkar hian khawng leh khauh takin a ti lem lo hlauh zawk a. Engpawhnise, keini Mizo, Kristiante hian kan hmalam huna kohhran leh kan sakhua leh kan hnam tana pawi thei tur thil eng eng emaw kan la tawng chho zel lo ang tih a sawi theih loh a. Chuvangin, vai ram politics vir vel leh ram hruaitute hmalakna hrang hrangte chik taka thlir chunga kan hnam leh kan sakhaw hmabak hi kan ngaihtuah fo a tha awm e.

Facebooktwittergoogle_plusredditpinterestlinkedinmail

Salvation Church Assembly

Aizawl;     Chhandamna Kohhran (The Salvation Church of India) rorelna sang ber, 5th National General Assembly chu Zirtawpni zan atang khan Ramhlun Indoor Stadium-ah hman a ni a, zanin hian a tiak ang.
Zirtawpni zan atang khan rorel inkhawm tan a  ni a, Lunglei Area, Kolasib Area leh Aizawl City Area atangin rorel palai thahnem tak an kal a  ni.
Rorel inkhawmah hian Chhandamna Kohhran Service rules leh Financial Rules, Pastor Pension Scheme leh Administrative Oficers post siam belh bakah Mannual Review Committee in a chhawp chhuah te passed a ni a. Mamitah Biak In hmun tur lei an remti bawk.
Kum 2017 atana Sunday School Zirlaibu, SHP (Salvation Hmeichhe Pawl) leh STP (Salvation Thalai Pawl) zirlaibute Upa H. Lianzela, President-in a tlangzarh bawk.
Inrinni zan atangin Kohhran mipui huapa Pathian Biak Inkhawm neih a ni a, Inrinni zanah Pro. Pastor Onesim C.Lalnunzira chuan thuchah a sawi a. Vawiin chawhma inkhawm hi Kohhran Upa nemngheh inkhawm a ni dawn a, Kohhran Upa atan hian mi 14  nemngheh an ni dawn a ni.
Vawiin chawhma inkhawmah Rev. R.Lalsangzuala, NHQ Pastor-in thuchah a sawi ang a. Chawhnuah Lalpa Zanriah Sacrament kilho niin Rev. J.C.Lalengmawia, Aizawl City Area Pastor-in thuchah a sawi ang a, zan inkhawmah Rev. C.Rualchungnunga, Kolasib Area Pastor-in thuchah a sawi ve thung dawn a ni.

Facebooktwittergoogle_plusredditpinterestlinkedinmail

Mission Buh Thar Hlan Ni hnuhnung ber

Aizawl; Vawiin hi Mizoram Baptist Kohhran ni pawimawh zinga mi, ‘Mission Buh Thar Hlan ni’ a ni a.  Kumin hi Baptist Kohhranin he ni an hman hnuhnung ber a ni ang.

BCM Assembly 2016 chuan BCM ni pawimawhte paih then ni se, Central Committee-in hma la tura an tih angin Central Committee chuan ni Pawimawh paih then tur zingah Mission Buhthar Hlan Ni hi a tel ve avângin nakum atang chuan he ni hi hman a ni tawh dawn lo a ni.

Kumin thupui atan hian Kohhran tinah “Pe rawh u, chutichuan pêkin in awm ang” (Luka 6:38) tih thupui hmangin hun hman a ni ang.

He ni puala Kohhran hrang hrangten hun an hman turah tawngtairual neih a ni dawn a, thupui atan – Pathian hnêna läwm thu sawina leh  buh tharte leh thilpêkte hlanna chu hman tur a ni a. Headquarters atangin Kohhran tina chhiar chhuah tur thuchah chhiar a ni bawk ang a. Chawhma inkhawm thawhlawm chu Mission pual hman turin Headquarters-ah thawn tur a ni.

Facebooktwittergoogle_plusredditpinterestlinkedinmail

Login

Lost your password?