Monthly Archives: January 2017

Mins leh Chair ban phut

Aizawl: MNF Thalai chuan thuchhuah siamin NIAS Kolkata a BHM zirtur a Mizo zirlai 32 tirh chungchangah LE&IT Minister Lalrinmawia Ralte leh Mizoram Youth Commission Chairman T.Sangkunga te chu a mawhphurtu an ni tiin bang ngei turin an phut.

Nimina thuchhuah an siamah MNYF chuan inremna ziah laia LE&IT Director leh MBOCWWB Secretary ni mek Rotluanga suspend ringawt chu sawrkar thiltih sual thupna leh an hmaibal phihfai nana Zoram mipuite rilru hruaipen tumna mai niin an sawi bawk.

ZNP Thalai pawhin thuchhuah siamin khatih laia LE&IT Director suspend ringawt chu sawrkarin a tihtur a la ti famkim tawklo an tih thu an sawi a.  MYC Chairman T Sangkunga chu a mawhphurtu ah an ngai nia sawiin ban tir ngei turin ZNP Thalai chuan sawrkar an phut tih an sawi bawk.

Facebooktwittergoogle_plusredditpinterestlinkedinmail

Feature : Ser zawnga thlum

Tunhma atang tawhin Mizoram ah kut hnathawh uar kan in zirtir a, mi thahnemngai thenkhat ten ‘Hnam thatchhia’ tiin han sawi thin bawk mahse kan pipu atang tawha hnam intodelh thin kan nih avangin vawiin thlengin a hlawk turah chuan kan la thatchhe lo. Kuthnathawktu ten an thawh tak tak chuan kan buaina ber chu thar tlem aiin a hralhna tur lam a la ni ta zel.

Mizoram rorelna in sang ber bul lawk, Mizoram a sawrkar hnathawk lal ber Chief Secretary in sirah chhunzan zawmin Serthlum a awm reng a, a neitu ten chhunzan zawma an riahchilh/ven laiin a leitu an awm reng bawk. Heng serthlum te hi a tlangpuiin khawchhak lam East Lungdar, Leng, Mualcheng, Bawktlang, Chekawn, North Vanlaiphai, Sailam leh hmundanga mite an ni. Tunhma in Mizoram khawtlang lamah serthlum a tha duh a, mahse khawthlang lam serthlum a thih zawh tak avangin tunah chuan khawchhak tlangdungah serthlum hi an ching uar ta a ni. Sawrkar, khawtlang leh mi thenkhat ten ngaimawh thin mahse inzawrhna tur hmundang an neih miau loh avangin loh theih lohvin an inzuar thin a ni.

Helai hmuna inzuar thin pakhat Mizoram khawchhak lam khaw pakhat cheng Zovi chuan serthlum chu a neitu (chingtu) ten an rawn phurh thin bakah mi thenkhat chu a hmunah kalin an khar thin niin a sawi a. Amah chuan pawisa a neih tam loh avangin serthlum lo thlen hunah lo kharchhawngin a hnen atang chuan phurchhuak ten an lakchhawn veleh bakah a duh apiang lei theihin a hralh thin niin a sawi. Serthlum zuar dang Thangi chuan an riahchilh loh chuan an serthlum chu a bo thin avangin hrehawm deuh mahse an ven reng a ngai niin a sawi a. An veng reng chung pawhin engemaw remchang melha lo ru duh an awm thin a, serthlum mai bakah pawisa leh phone bo pawh a awm tih sawiin buaithlak a tih thu a sawi.Hmingi chuan footpath lo chu inzawrhna dang a awmloh avangin inthlahrung tak chungin fate chawmnan an inzuar niin a sawi a, an bawlhhlawh pawh a chharfai leh thin niin a sawi. Ex-Minister Lalhmingthanga chuan a khawngaih thin hle nia sawiin a ina riak tura a sawm thin bakah thingpui te pawh a pe thin niin a sawi bawk.

Heng serthlum zuarte hi kea kalna (footpath) ah an inzawrh avangin mi tam tak ngaimawh an hlawh a, kum hmasa lamah te pawh Police ten an thilzawrh nen an lo man tawh thin a, mahse hmundang thutna tur an neih miau loh avangin helai hmun bawk hi an pan leh nge nge thin. Veng neitu Khatla Local Council pawhin tawp turin hriattirna lehkha an pe a. Mahse serthlum zuarte hian kar kalta khan Chief Minister Lal Thanhawla chu hmuin inzawrh phalsak turin an ngen a, Chief Minister pawh hian serthlum awm chhung chu an inzawrh a lo remti nia thudawn a ni. Khatla Local Council chairman pawhin sawrkar hmalakna an ngaichang mek niin Zalen a hrilh.

Mi thenkhat chuan serthlum hi a tlawm laiin hnamdang ten an leikhawl a, chu chu cold storage ah vawng tha in serthlum a tlem hunah Mizoram ah an hralh leh thin niin an sawi a. Mizoram sawrkarin a dahthatna hmun tur ngaihtuah sak se an duh hle niin an sawi bawk.

Facebooktwittergoogle_plusredditpinterestlinkedinmail

Mizoram sorkarin mi 2 hnen ah Bar license a pe tawh

Aizawl: Mizoram sawrkar chuan mi 2 hnenah zu in phalna ‘Bar license’ a pe tawh a, hengte hi Aizawl khawpui ah ve ve an ni.
Zalen thudawn danin Excise & Narcotics Department in Bar license a pek te hi Hotel Ritz leh Aijal Club te an ni a, Hotel Ritz hian pawnlam mi tan ni lovin an mikhual te tan bik (inmates) a ni a, Aijal Club hi an member te tan chauh a ni bawk. Tuna Bar license pekchhuah tawh bakah hian Tourist Lodge, Chaltlang chuan an buaipui dawn mek niin an sawi a, Lunglei lam atang pawhin mi thenkhat ngaihven deuh chu an awm nia thudawn a ni. Hotel Ritz leh Aijal Club a Bar te hi company ten an cheisak niin thudawnna chuan a sawi.
Chief Minister Lal Thanhawla chuan zu in duh ten felfai taka zu in theihna hmun an neih chu sawrkar duhdan anih thu tunhnaia amah kawmtu MJA hruaitute hnenah a sawi bawk a ni.
Excise & Narcotics Secretary Benjamin-a chuan, “Sawrkarin dan angin zu a zuar a, hetih lai hian inna hmun a awm loh avangin a in duh te pawhin inna tur nei lovin khawlai leh hmun remchang dang ah te an in mai thin hi a fello a. Felfai zawka kalpui hi thil tul tak niin kan hria,” tiin Zalen a hrilh.
Excise & Narcotics Department in ruahmanna a siam dan chuan Bar license nei tur hian Rs. 80,000 dahkham (deposit) a ngai dawn a, Bar hi zan dar 9 thleng hawn thin a ni ang a, dar 10 ah khar a ni ang.

Excise Department chhinchhiah danin kum 1997 atanga April ni 21,2016 chhung khan Mizoram ah zu chhe in vangin mi 57 an boral a, heng zinga 50 chu mipa niin hmeichhia 7 an awm bawk. Zu chhe in zinga 39 te hi methylated spirit pawlh vang a ni a, pethedine leh BEDC vangin mi 2 ve ve leh a chhan hriatchian loh 14 an awm bawk.

Facebooktwittergoogle_plusredditpinterestlinkedinmail

LEIT Dir. hlui suspend

Aizawl: NIAS buaina kal zelah Labour, Employment & Industrial Training Director hlui Rotluanga suspend na order chu Zirtawpni khan DP&AR chuan a tichhuak a, thuneitute phalna tel lo chuan Aizawl chhuahsan lo turin an hriattir. Rotluanga hi tunah Addl. Secretary ICT&PAD hna a chelh mek a ni.

Kum 2014 khan Nalanda Institute of Advance Studies (NIAS), Kolkata-a Bachelor of Hotel Management (BHM) zir tur hian thalai 32 thlan an ni a. Zirlaite hi August 29, 2014 khan thlahna hun hman a ni a, mahse NIAS hian an insawi ang chenna leh zirna tha a pek loh avangin he hmuna zir tura thlan zirlai tam tak chu beidawngin an lo haw a ni.

Facebooktwittergoogle_plusredditpinterestlinkedinmail

Custom Officer Award hlan

Aizawl: Lalthankunga Hmar, Superintendent, Customs, Central Excise & Service Tax, tuna Thuampui Veng, Aizawl a khawsa mek chu a hna thawh that vangin Presidential Award pek a ni.

Ni 27.01.2017 khan Presidential Award of Appreciation Certificate for Specially Distinguished Record of Service chu Thankunga hnenah hian hlan a ni a. He chawimawina hi Union Finance Minister Arun Jaitley an New Delhi hmunah a hlan a, NE atanga chawimawina dawng awmchhun nia thudawn a ni.

Lalthankunga Hmar hian kum 2016 khan International Customs Day den chhenin World Customs Organisation Certificate of Merit chu India aiawhin a lo dawng tawh bawk.

Facebooktwittergoogle_plusredditpinterestlinkedinmail

Bru hruaikirna tur sum buaipui mek

Aizawl: Tripura Refugee camp hrang hranga Bru awmte Mizoram a hruaikirna tur sum chu buaipui mek a ni a, remchang hmasa berah central ah thehthlak a ni ang.

Additional Secretary, Home Department Lalbiakzama hnen atanga Zalen thudawn danin a hmaa Bru hruaikirna tur sum, sawrkar laipuiin a pek chu thilman sang zel avangin a indaih dawn lova, central lamin revise rawn siam rawh u an tih angin buaipui mek a ni a. Sum ngai zat tur hi thlehthlak thuai an tum tih a sawi. Lalbiakzama chuan pawisa te hi sawrkar laipuiin a rawn pek theih chuan February thla laihawl velah chuan Bru hruaikir hna hi thawh theih an beisei niin a sawi bawk.

Hetih lai hian Tripura Relief Camp-a awm mek Bru Displaced Welfare Organisation (BDWO) invuah te chuan Bru te Mizorama laklet tumna tak tak awm lo nia sawiin tunhnai khan inrawlh turin Union Home Minister an ngen. BDWO te hian Mizoram sawrkar chu a lang a mawia thilti mai mai nia sawiin an ring ngamlo nia sawiin thilphut chi 13 an tarlang a, chung zingah chuan chhungkaw tin atanga mi 1 sawrkar hna pek te, chhungkaw tin tan ram pek te a tel a ni.

Tripura Relief camp 6-a Bru awm te hi a tirah chuan chhungkaw 3,445 a mi 21,000 vel a ni a. Nikum November ni 2-23 inkar chhunga a hmuna endik an nih hnu khan Mizoram mi diktak an hmuh chhuahte chu chhungkaw 5,413 a mi 32,800 chuang an ni.

Facebooktwittergoogle_plusredditpinterestlinkedinmail

Mizoram House siam mek

Aizawl: Kolkata Mizoram House 3 awm zinga lian ber Salt Lake Mizoram House chu thawm that mek a ni a, zawhfel a ni tep tawh a. Hetih lai hian Joint Resident Comissioner C. Lalsangliana, MCS chuan House chu Mizo awmten an dim thiam a tul niin a sawi bawk.

Zalen thudawnna in a tarlan danin House siamthat nan hian Nuai 84 PWD atanga hmuh a ni a, kum chanve vel chu hna thawh a ni tawh a. “Kan buaipui ber chu septic tank pipe phum (concealed pipes) te an ni a, a rei tawh avangin thlak vek an ngai a, electric wiring siamthat ngai siam a ni bawk a. Hna kan belh a, public leh VIP luhna lam pawh hi  chei that tur a ni,’ tiin thulakna chuan Zalen a hrilh.

‘Phaia kal Mizote’n House an bel lo thei lova, kan nungchang a mawi tlang tawh viau a chutih rualin House zahawmna hi kan vaia mawh a ni tih kan hriat nawn fo a \ul,’ tiin JRC chuan a sawi bawk.

Kolkata-a Mizoram House thar ber  Rajarhat (New Town)-a mi chu May 15, 2015 tlai khan chief minister Lal Than-hawla’n a hawng tawh bawk a. Rs. 21,43,00,000 sêngin M/s Gagan Construction Pvt. Ltd.-in June 2011- June 2014 inkarah a sa zo a. Chhawng ruk a ni a, square meter 1974.39 a zau a ni. CCTV 27 dah niin dormitory pahnih, leh pindan pangngai 13 a awm a, khum awm zawng zawng chu 88 a ni. Pindan tinah A/C dah vek a ni bawk.

Facebooktwittergoogle_plusredditpinterestlinkedinmail

BSF-in mipui rikrap?

Aizawl: Mizo Zirlai Pawl, Sub-Hqrs Tlabung chuan January 27,2017 chhun dar 12 vel khan Tablabagh khuaa ramri vengtu sipai thenkhat zu rùiin tualchhung mite rikrapin silai an lek khum nia sawiin an dem tak zet tih an sawi.

Tlabung MZP thuchhuah tarlan danin ramri hungna phur Mizo driver te chu Tablabagh-a Border Oupost bulah 99 Battalion BSF thenkhat ten lo tibuaiin silai in an tin niin an sawi a. Hetianga ramri-a bungraw thiara veivak Mizo driver-te laka BSF-ten harsatna an siam hi a thlen vawi khatna a ni lo nia sawiin, tun hma pawhin BSF-te hian harsatna an lo siamsak fo tawh niin an tarlang a. Chuvangin, ramri-a hnathawk thin driver-te mai bakah, civil mi dangte himna tura a tul anga hma laksak turin thuneitute an ngên tak meuh tih an sawi bawk.

Facebooktwittergoogle_plusredditpinterestlinkedinmail

CBSE Exam routine tidanglam Subject siamrem awm nual

Aizawl: Central Board of Secondary Education (CBSE) chuan Pawl X leh XII board exam routine ennawnin subject \henkhat exam ni tur chu a siam rem leh.

Zalen thulaknain a tarlan danin Pawl X bikah hian subject 3 – Tamil language , Gurung leh National Cadet Corps (NCC) te chu exam ni sawn a ni a, Pawl XII ah hian subject 5 -Theatre Studies, Tangkhul, Physical Education, Sociology leh Food Service-II  exam ni tur chu a siam \ha leh a ni. CBSE hian exam routine a lo set tawh sa chu State \henkhata inthlan a awm dawn avangin ni 9 in a sawn hma leh bawk niin thu dawn a ni.

Thudawnna a a lan danin Tamil language paper exam ni tur March 10, 2017 chu March 18, 2017 ah sawn a ni a, March 23 a neih tura tih Gurung language chu March 10 ah sawn a ni ve thung. NCC Exam chu tih tlai hret a ni a, March 15 a neih tura tih chu March 23 ah sawn a ni. Pawl 12 bikah hian Physical Education exam hun atana ruat April 10 chu ni 12 ah sawn a ni a, April 12 a exam tura dah Sociology pawh April 20 ah sawn a ni. Theatre Studies chu April 10 atangin April 20 sawn a ni a, Tangkhul language pawh April 10 ah sawn a ni. Food Service paper April 29 a exam neih tura tih pawh April 26 ah sawn a ni bawk.

Zalen laknain a tarlan danin  zirlai te leh nu leh pa te chuan Biology paper exam ni leh Joint Entrance Examination (JEE) 2017 exam hun chu a inhnaih lutuk tiin CBSE a an lo sawisel tawh a, hei erawh hi chu tih danglam a ni lo. Kumin hian CBSE hnuaiah hian Pawl 10 ah zirlai 16,67,573  leh pawl XII ah zirlai 1098420 in exam an hmachhawn dawn niin Zalen thulakna chuan a tarlang bawk.

Facebooktwittergoogle_plusredditpinterestlinkedinmail

Pantu tam ber medicine

Aizawl: Nikum 2016 chhung khan Civil Hospital, Aizawl ah inentir mi 424808 an awm a, heng zingah hian Medicine Doctor pantu an tam ber.

Civil Hospital thawktute hnen atanga Zalen thudawn danin Medicine Doctor pantu hi mi 59120 an awm a, he hi inentir zawng zawng atanga chhutin 14% (13.91%) an tling a, naupang Doctor leh vun lam harsatna in a dawt a. Clinic zingah dietician pantu an tlem ber a, mi 1209 in an pan a ni.

Civil Hospital ah hian nikum chhung vek khan naupiang 4277 awmin mipa piang an tam zawk a, mipa naupang 2269 piangin hmeichhia 2108 an piang bawk. Nikum chhung vek khan damlo 15182 admit an ni a, mitthi 750 awmin Mizoram pawn lama inentir tura tih (referred case) 2027 an awm bawk.

Facebooktwittergoogle_plusredditpinterestlinkedinmail

Login

Lost your password?