Monthly Archives: February 2017

Feature : Zu

Mizote hi hmanlai atang tawhin zu buaipui hnam niin an sawi a. Zu in thin ten an buaipui a, a in ngailote pawhin an buaipui tho a. Sawrkarin zu a zawrh hma leh a zawrh hnuah pawh inhnialna a ti tamin zu kan buaipui hi a la reh thei chuang lo chu a nih hi!

Mi tam takin sawrkarin dan hnuaia zu a phalrai/zawrh hnu hian chhungkaw intibuai an tam a, mi tam takin an thih phah a, khawtlang a ralmuanglo niin an sawi thin. Hei hi thui tak a dik niin a lang a, zu phalrai anih hnu hian zu a zalen avangin in thar an tam a, hmeichhe zingah pawh zu leh beer in an awm nual niin a lang. Hetih lai hian khawtlang a ralmuanglo nia an sawi erawh inhnial theih tak a ni thung.

Medicine Doctor senior pakhat chuan zu vanga thi te chu a tlangpuiin tunhnai sawrkarin a zawrh hnua in te ni lovin khap lai pawha in, zu phalrai anih hnua chintawk hre lote an ni tlangpui tih Zalen a hrilh a. “Mi tam tak chu awmze nei lovin an hmuh hun hunah an in tawp mai zel a, ei leh in thlah thak ten an in a, chu chu taksa tan tawrh zawh a ni thin lo a, an chhiatpui hma bik a ni,” a ti a. Zu chuan thin (liver) a khawih hma ber nia sawiin Hepatitis B leh Hepatis C lo nei te ah a langchhuak hma a, thin insiamtha hmanlo leka zu kan in thin avangin thihna hial a thleng tih sawiin zu in loh chu tha ber mahse tlem deuh leh kartawpa in thinte ah chuan nghawng thalo a awm tlem niin a sawi bawk.
Zu in thin pakhat chuan pumruak in zu a in ngailo tih sawiin zu a in dawn chuan chhang engemaw tal a ei thin thu leh sehhmeh tello chuan a in ngailoh thu a sawi a. A taksa pawhin a ngeih tih sawiin hetiang hian zu in thinte pawhin ti thin se a duh thu a sawi a. Mizo tam berte zu in dan- riltam lai leh sehhmeh tello a zu in chu taksa in a haw hle tih a sawi.

A tlangpuiin zu in mite hian mei an zu tlangpui a, zu leh meizial an tihpawlh phei chuan taksa in a haw lehzual a. Cancer leh natna dang neih theihna chance a sang hle a ni.

Zu hi kan zuar emaw zuarlo emaw kumkhuaa inhnialna tawp hleitheilo siamtu a ni reng dawn a. Zu phalrai duh pawl an awm ang a, chutih laiin zu in mihring a tihchhiat theih zia te, sum leh pai mai bakah natna leh thihna hial thlentu a nihzia an sawi reng ang a. Tute mah inhmin chuang lem lova inhnialna tawp theilo thlentu ani reng dawn a ni.

Zu hi sawimawi a har a,a in thinte pawhin thiltha ani tiin an fak chuang lo. Mahse vawiin thlengin Mizote zingah zu in mi thahnem tak kan awm reng si a, heng miten zu in dan tha zawk leh taksa in a huatloh tur zawnga an inthiam a pawimawh. Thalai tam takin zu an in thiamloh avangin thlanmual ah naupangte te kan inphum ta fo mai. Kan nih tur min nihtir theilo tu Zu hi in lo tura tan kan lak a ngai a, kan in lo theilo anih pawhin in dan changkang zawk leh taksa pawhin a huatloh tur ang bera in thiam a pawimawh hle.

Facebooktwittergoogle_plusredditpinterestlinkedinmail

S/C thupek vangin Zu dawr 20 khar a ni dawn

Aizawl: Supreme Court in National Highway atanga metre 500 aia hnaia zu dawr te titawp vek tura a tih avangin Mizorama zu dawr 20 chu tihtawp emaw an insawn a ngai dawn nia thudawn a ni.

Supreme Court Chief Justice TS Thakur hova Judge 3 awmna bench in National Highway leh State Highway bul hnai, metre 500 huamchin a zu dawr te chu March ni 31,2017 hmaa titawp vek turin state tin Chief Secretary leh Police hotute a hriattir avangin Mizoram ah pawh Court thupek ang hian hmalak tan a ni a. Excise & Narcotics department chuan National Highway bul hnaia zu dawr te chu March ni 31,2017 hnu lamah chuan chhunzawm tawhlo tura an hriattir bakah signboard an tar te pawh an lakthlak tir tawh nia thudawn a ni.

Zalen palai zawhna chhangin Excise & Narcotics Secretary Benjamina chuan, “Mizoram chu tlangram anih avangin phairam te nen tehkhin a remchang lova. Phairama metre 500 chu keini tlangramah chuan a zauh dawn em avangin a taka kalpui a harsa dawn a. Chuvangin Supreme Court ah kan awmdan hi ngaihtuah tha leh tura thlen a tha em tih dan hre mite rawnin kan ngaihtuah mek a ni,” a ti.

Zalen thudawn danin Supreme Court thuchhuak hi a taka kalpui anih chuan Aizawl ah zu dawr 14, Champhai ah 2 leh Serchhip ah 4, a vaiin zu dawr 20 khar emaw an awmna sawn emaw a ngai dawn a ni.

Zalen in zu dawr neitu pakhat a biak chuan a taka Court thupek kalpui anih hun chuan an tan a buaithlak hle dawn niin a sawi a. “Dawr hmun tur hmuh a har bakah metre 500 pelah chuan inhralh a har dawn a, chuvangin kan tawp mai pawh a ngai mai thei a ni,” a ti.

Excise & Narcotics Department chuan April ni 1,2017 atanga hman tan turin license fee a tisang a. Zu dahkhawlna dawr ‘bonded ware house’ neitu ten kum khata license fee Rs. 500,000 an chawi thin chu Rs. 800,000 leh zu dawr neitu ten license fee an chawi thin Rs. 50,000 chu Rs. 80,000 ah a tisang dawn.

Facebooktwittergoogle_plusredditpinterestlinkedinmail

C/H ah nausen thi 84 awm

Aizawl: Aizawl Civil Hospital a Medical Record Section a\anga thudawn danin 2016 chhungin nau piang hlim 84 an thi a, nau neih kaihhnawih avanga nu thi zat chu 5 a ni a, sorkarin hemi tihtlem nan hian hma a la  mek zel.

National Health Mission (NHM) hotute chuan Zalen palai zawhna chhangin nau piang hlim thi (Infant Mortality Rate) ti tlem tur leh nu raicheha thi ti tlem turin nasa taka hma lak anih thu an sawi a, sawrkar pawhin programme hrang hrang a kalpui mek niin Zalen palai an hrilh a. Nikum a\anga kalpui Prime Minister programme Quality Ante Natal Check ina nu a rai chhungin doctor in vawi khat tal a check ngei tur a ni tih pawh Mizoram pumah kalpui chhoh mek a ni tih an sawi a. Heng bakah hian Ultrasound a vawikhat tal nu a rai laia en tur tih te leh programme hrang hrang hnuaia dawmdawiina nau nei te sum hmang \anpui leh lawmman pek te pawh kalpui a nih thu NHM hotute chuan Zalen palai an hrilh.

NHM hotute chuan Zalen palai zawhna chhangin nau neihna ‘labour room’ tihchangtlun anih tur thu te, sub centre te nau neihna tura thawm\hat mek a nih thu an sawi a, District Hospital leh PHC te thlengin a \ul thut pawha nau zai chhuah anih theih nan Short Course Training pek an ni dawn niin a sawi. Heng bakah hian hri danna te pek chhuah reng a ni a, damdawi mamawh ang supplement te pek reng anih thu an sawiin nau piang thi leh nu thi te tihtlem mai bakah nau piang hlim leh an nu te hriselna ngaih pawimawh anih thu NHM hotute chuan Zalen palai an hrilh bawk.

Facebooktwittergoogle_plusredditpinterestlinkedinmail

‘Project Pushpak’ Jubilee Run nei

Aizawl: Nimin zing khan Border Roads Organisation ‘Project Pushpak’ chuan Mizorama an din kum 50-na lawmna chikhat atan ‘Golden Jubilee Run’ an buatsaih a. He huna tlan te hi zing dar 7 khan Chief Secretary Lalmalsawma chuan a vailiam a, zing dar 9 ah Run kharna inkhawm Lammual a neih chu Larsap Lt. Gen. Nirbhay Sharma in a hmanpui.

Governor chuan Mizo thalaiten chin dan tha leh hriselna lam an ngaih pawimawh chhoh zel avangin lawm thu a sawi. Prject Pushpak hi May ni 1, 1967 khan Mizoramah an inbun tan a ni. Golden Jubilee Run-ah hian  tlan zinga upa ber chu Darrothanga (kum-85), Arhuan, Salem Veng a ni a, naupang ber chu Mimi Vanlalthazuali (kum 7), Chanmari an ni.

Facebooktwittergoogle_plusredditpinterestlinkedinmail

Thinlung chimral a hlauhawm -Tlanga

Aizawl: MNF Vice President R.Tlanghmingthanga chuan, “Hnam dang duh dan tipuitling tura beitute hi an hlauhawm a, a taka in chimral a hlauhawm ang tho hian thinlunga inchim ral pawh hi a hlauhawm em em a ni,” a ti.

Nimin Keitum khuaa MNF Workers Meet a hmanpuina ah he thu hi sawiin MNF Vice President chuan, “Kristian ni si, krista neitu ni si lo; krista neituten an vei em em ang hian Mizo Hnam Nationalism palzuta Hnam dang Nationalism tun din tumtute pian thar tir hi MNF thil tum pawimawh berte zinga mi a ni,” a ti a.MNF chuan SEDP hmangin, lei chung leh lei hnuai hausakna hai chhuakin, hmasawnna ruhrel tin rengte chu an sawrkar hunah an hai chhuak dawn nia sawiin, ei leh barah ram mipui an intodelh theih nan hma an la dawn niin a sawi bawk.

Facebooktwittergoogle_plusredditpinterestlinkedinmail

Chapchar Kut ropui taka lawm tum

Aizawl: Mizo Kut zinga ropui leh ngaihhlut hlawh ber Chapchar Kut 2017 chu ni 3.3.2017 (Zirtawpni) hian Mizoram pumah ropui taka lawm tum a ni a, kumin Kut thupui atan hian ‘Aia upa zah’ tih chu hman a ni dawn a, a lawmna pui ber chu Lammual ah neih a ni ang.

Kumin Chapchar Kut lawmna atan inbuatsaihna chu ngawrh taka kalpui mek a ni a. Chief Minister Chairman na hnuaia Organising Committee in kumin Chapchar Kut lawmna atana ruahmanna a duan te chu Sub-commitee hrang hrang ten chak taka bawhzuiin Kut lawmna atana a bul tumtu pawimawh Art & Culture department leh CYMA te bakah sawrkar department pawimawh te leh chanvo neitu hrang hrang ten ngawrh takin inbuatsaihna an kalpui mek a ni.

Kumin hian khuallian atan Salai Lian Luai, Chief Minister, Chin State, Myanmar sawm a ni a. Kut lawmna tur hmun Aizawl Sipai Lammual chu uluk taka chei leh buatsaih niin March ni 3,2017 Chapchar Kut ni hi a lawmna hmunpui berah chuan hnam lam chi hrang hrang leh zai rimawi te bakah Mizo kutchhuak puan leh thiamhnang thil siam chi hrang hrang te pho langa ropui taka lawm tum a ni a. Kut lawmna pual hian Vanapa Hall ah Photo Exhibition, Transport department building sak thar mekah Flower Show leh Aizawl Art Gallery ah Painting Exhibition te buatsaih a ni dawn a. March ni 2,2017 zingkar hian Chanmari leh Sikulpuikawn atangin Chapchar Kut Run 2017 neih a ni dawn a, Lammual ah an lutkhawm ang. Mizoram sawrkar chuan Aizawl bakah district khawpui 7 a Chapchar Kut lawmna atan hian cheng nuai 1 \heuh a pe a, district khawpui ah te hian ropui taka lawm tum a ni.

Chapchar Kut Organising Secretary Lalhmachhuana chuan Chapchar kut hi sawrkar in chawlh puang meuh in lawmna hun hman a nih theih nan ruahmanna a siam a. Hetih lai hian pawl thenkhat remchang a la a hnatlang lo ko emaw programme lo duan hnan emaw an awm thin nia sawiin programme dang siamlo turin mitin an ngen tih a sawi.

Facebooktwittergoogle_plusredditpinterestlinkedinmail

Vairengte SDO (C)-in a mamawhte tan a thlawnin damlo en \hin

Aizawl: Zalen thudawn danin Vairengte SDO (C) Dr. Arun T, IAS chuan a hun awlah medical doctor a nih angin damlo mamawh te a thlawnin a en \hin.

Vairengte YMA hruaitute chuan Zalen palai zawhna chhangin Vairengte SDO (C) Dr. Arun T chu a office chawlh Inrinni ah Community Health Centre ah doctor dangte zingah a \hu ve \hin a, damlo te a thlawnin a en ve \hin niin an sawi. Vairengte YMA hruaitute chuan nikum khan Dr. Arun-a ho hian free clinic buatsaih a nih thu sawiin Vairengte a doctor awmsa te leh sipai lam doctor te nen buatsaih niin damdawi chu a thlawna sipai lamin an rawn tum thu Zalen palai an hrilh bawk. Vairengte YMA hruaitu pakhat chuan Dr. Arun-a chu damlo ten an pan nasat thu sawiin a chenna inah ngei pawh mi tam takin an pan \hin a, thil dangah pawh \halaite hmakhaw ngaitu mi fel tak a ni, tiin Zalen palai a hrilh.

Zalen palai chuan Dr. Arun T chu biain doctor a nih anga vantlang tana a tih theih tawk a tih thu a sawi a, “Ka thiamna neih ve te mi \anpuina atan ka hman hian min ti hlim a ni,” a ti. Medical lam mi anih thu sawiin Dr. Arun chuan, “MBBS, MD ka zir a, ka thiamna mipui ten an hman \angkai a tul a ni,” a ti a. Kolasib, Kawnpui leh hmundang a\ang te pawhin inentir tur an kal \hin thu sawiin Dr. Arun chuan YMA leh khawtlang mipuiin an thawhpui \hat thu leh Vairengte Sub-Division tan pawh thil \ha tam tak tih a nih tawh thu Zalen palai a hrilh bawk.

Facebooktwittergoogle_plusredditpinterestlinkedinmail

North East mi tan Delhi Police

Aizawl: Zalen thudawn danin North East mi New Delhi a hnathawk a awm te tan Delhi Police North East Unit te leh NGO pakhat Helping Hands te chu local guardian-ah hman theih an ni.

North East Special Police Unit a Nodal Officer Robin Hibu (IPS) hnen a\anga Zalen-in thudawn a danin private sector hrang hrang- spa, hotel, shopping mall, industry, leh adangte a thawk duh ten local guardian ziah mai tur an neih loh chuan Office of the Nodal Officer for North East India chu an hmang thei dawn a, NGO pakhat Helping Hands pawh hman theih a nih thu an sawi.

Robin Hibu chuan North East mi hetiang hmuna thawk te hian tihduhdahna leh en hranna an tawk nasa tih sawiin ni tin report tam tak an dawn thin thu a sawi a, North East mi hnathawk te chuan an hming, address, mobile number, job appointment letter, company address leh phone number leh thil dang pawimawh te chu an email – helpinghands2016th@gmail.com ah thawn tur niin Zalen thudawnna chuan a tarlang.

Zalen thudawn danin Nodal Officer Robin Hibu chuan North East \halaiin register te chu ngun taka an enkawl tur thu sawiin, “An in-register zawh chuan kan police ten an hnathawhna hmunah te an tlawh emaw an phone \hin ang a, harsatna an neih leh neih loh te an zawt \hin ang. Anmahni chhawrtute pawhin hlawh an pe \ha em, an chungah harsatna an siam em tihte kan vil \hin dawn a ni,” a ti. “PAN North East NGO pakhat Helping Hands te nen he thilah hian kan thawk ho a ni,” tiin a sawi a, registration lama puih ngai te tan Phone-011-26879656 ah leh Fax-011-24104568-ah an biak pawh theih an nih thu Robin Hibu chuan a sawi bawk.

Facebooktwittergoogle_plusredditpinterestlinkedinmail

Campaign turte vailiam

Aizawl: Nimin zing dar 8 khan Digidhan Outreach Campaign a kalchhuak turte chu ICT Secretary C.Lalhmachhuana chuan Secretariat Annexe-I kawtah a vailiam.

Digidhan Outreach Campaign hi sawrkar laipuiin Digital Payment Services (Pawisa note tel lova thil lei leh hralh) chungchang in hrilh hriatna leh inzirtirna a kalpui mek niin sawrkar laipui Ministry of Electronics & Information Technology chuan Mizoram chhunga he campaign rawn nei tur hian Group M Team a rawn tir a. Campaign ah hian phone atanga e-wallet hman dan leh cashless transactions (pawisa note tellova indawr tawnna) tih theih dan hrang hrangte zirtirin Aadhar Card hmanga digital payment siam dan (AEPS – Aadhar Enabled Payment System) te an sawifiah dawn a ni.

Campaign-a chhuakte chuan February leh March thla chhung hian Aizawl, Serchhip, Lunglei, Lawngtlai, Mamit leh Kolasib District te tlawhin khaw hrang hrang 56 ah campaign an nei dawn a ni.

Facebooktwittergoogle_plusredditpinterestlinkedinmail

MJA President leh Medica hotu inkawm

Aizawl: Aizawl-a special clinic neia rawn kal, Medica Superspeciality Hospital, Kolkota-a super specialist doctor pahnih leh an hospital corporate executive chuan nimin khan Mizoram Journalists’ Association Gen. Hqrs. president Pu Vanlalrema Vantawl chu Aizawl Press Club ah hmu in special clinic an neih chungchang leh an hospital nena MJA inthlunzawm theihna kawng an sawipui.

Zunthlum, thyroid, hormones lam thiam bik Dr Kaushik Biswas chuan zunthlum natna chu Mizoram mai ni lo, India leh khawvelin natna a buaipui ber pakhat a ni mek tih sawiin, enkawl dam har a nih avangin invenna lam ngaihthah loh a that thu a sawi. Zunthlum chu ei leh in fimkhur a, taksa insawizawi that chuan inven theih a nih thu a sawi bawk.

Tlangramah Thyroid natna nei an tam bik nia a lan thu sawiin, iodine tlakchham vanga thleng thin a nih thu a sawi. Aizawl-a special clinic an neihah thyroid lam diklo an tam thu sawiin mahni inrinhlelhna nei chuan thyroid scan tih thuai a tha a ni, a ti.Medica hospital hian mipa leh hmeichhia serh thlak pawh an tih theih tawh thu a sawi bawk.

Ruhseh lama enkawlnaa mithiam bik Dr Sudipto Das chuan zing thawh hlim atanga ruh chuktuah kham leh na themthum nei chi chu ruhseh nei thei an nih avangin rang taka doctor pan a that thu a sawi a. Ruhseh natna chu tidam hmak tur chuan ruh thlak te a ngai a, insenso ngai tak a nih avangin a inven leh enkawl hma lam ngaihthah loh a that thu a sawi. Hmeichhe zingah he natna hi a hluar hle tih sawiin  nau neih kawngah thleng nghawng tha lo a neih theih thu a sawi.

Medica Hospital hotute chuan health care lamah MJA nena thawhdun an hreh loh thu sawiin an hotu dang te nen hemi chungchangah hian zau zawka la sawihoa inrawntlan nise an ti a ni.

Facebooktwittergoogle_plusredditpinterestlinkedinmail

Login

Lost your password?