Monthly Archives: March 2017

Feature : Dampa zauh thei dawn lo?

Dampa Tiger Reserve chu zauh tuma hmalak mek a ni chungin khaw sawnchhuah tura tih Serhmun chu enfiah anih lai aia In ding a tam zawk avangin zauh theih a ni lo mai thei nia thudawn a ni.

Zalen palaiin Environment, Forests & Climate Change thawktute hnen atanga thu a dawn danin Serhmun khua hian Dampa Tiger Reserve area atan an khua/ram chu sawnchhuah an remtih angin enfiah a ni a. A tirah in/chhungkua 238 cheng anga chhinchhiah leh hemi hmanga sawrkar laipui ah pawh chhawmdawlna tur sum dil a ni a, a hnua LAD lamin an enfiah lehna ah in/chhungkua hi 273 ah an pung a, chubakah huan/lo ram nei ten surrender vek an huam laiin tun dinhmunah surrender theilo mi 60 an awm bawk a ni.

Heng zawng zawng chhawmdawlna tur sum hi a awmloh avangin hmalak a harsa dawn niin an sawi. Forests thawktute chuan Serhmun sawnchhuahna atan hian 14th Finance Commission chuan vbc. 23.9 a pe nia sawiin hemi sum hmang hian chhungkaw tinte Rs. nuai 10 theuh pek tum a ni a, mahse tuna chhungkaw awm zat ang chuan tih hlawhtlin theih a ni dawn lo niin an sawi bawk.

Zalen zawhna chhangin Forests department thawktute chuan Dampa Tiger Reserve huamchhungah hian sakei a awm ngei niin an sawi a, September 2016 pawh khan hmun 2 ah hmuh a ni tiin heng sakei te hi Thorang Wildlife Sanctuary leh Cachar-Tripura atanga lokalte nia an hriat thu an sawi. Forests thawktute chuan Indo-Bangladesh ramri hung mekah Dampa Tiger Reserve huamchhung km 62 a thui hunglo tura an ngenna chu a hlawhtling lo a, hung a ni dawn niin Zalen palai an hrilh bawk.
Dampa Tiger Reserve area hi square kilometre 500 a chhut a ni a, Serhmun ram hi lakbelh anih chuan square kilometre 45-50 velin a zauh phah dawn a ni.

Facebooktwittergoogle_plusredditpinterestlinkedinmail

Sawta’n indoor a hawng

Aizawl: Nimin khan Finance Minister Lalsawta chuan nuai 500 senga sak Saron Veng Indoor Stadium a hawng.

Hawnna thu sawiin Minister chuan Saron vengin Indoor Stadium changtlung leh tha tak neih theih chhan chu a tir atanga khawtlanga infiamna ngaina mi te, YMA, mipuite leh hall awmna ram thenawm te leh a satu ten thahnemngaihna rilru pu tlanga hma an lak a hna an thawh vang a ni tih a sawi a. Infiamna khawvelah Mizoram chu mihring cheng zat ngaihtuaha sports discipline hrang hranga infiammi thawn chhuaktu tam ber zinga mi nia sawiin, “Sawrkarin thalaite thiamna leh theihna haichhuak tura a hmalakna rah a ni,” a ti bawk.

Khual zahawm Sports Minister Zodintluanga chuan District khawpui hrang hrangah stadium puitling leh phuisui tak tak tur sak mek te chu zawh fel tep a ni tih a sawi a. Sawrkar hmalaknate hi a hlawhtlinna chu mipui tawiawmna leh thawhhona ah a innghat thin nia sawiin mipuite tawiawmna a ngen bawk.

Minister chuan, “Aizawl khawpui faina atan leh ek leh thli tawp leh tangkailoa kan ngaih chu thil tangkaia chantir turin SIPMIU-in hma a lak mek avangin Saron Veng leh veng dangah kawngpui laiha vangin harsatna tlem a awm a. He project hi zawh a nih chuan tuichhia khawlaiah luang nguai nguai thin te leh rem leh rem lova septic tank khat tawh paih ngai thinte kha a awm tawh dawnlo a. Heng hna thawh a nih chhung hian mipuite dawhtheihna leh tawiawmna a pawimawh a ni,” a ti bawk.

Facebooktwittergoogle_plusredditpinterestlinkedinmail

Vishal Megamart kawt ah MIMA pungkhawm

Aizawl: Nimin chawhma dar 10 khan Mizoram Merchant Association (MIMA) te chuan March 23, 2017 a MIMA Joint Meeting in a rel angin Vishal Megamart hawn thar tur duh lovin Bawngkawn-a Vishal Building kawtah an pungkhawm a, Thawh\anni-a a hmun ngaia punkhawm leh tumin chawhnu dar 1:30 velah an \in.

Bawngkawn-a Vishal Megamart hawn thar tur duh lohna ‘sit-in demonstration’ neihah hian MIMA President PC Laldinthara chuan thu sawiin hnam ralna tura hetiang hmun siam a ni chu pawi a tih thu a sawi a, \henawm state te pawhin sumdawnna hmanga chimral an tawh mek thu leh hnam dang sumdawng lianin hmun an luah deuh vek tawh thu a sawi.

Mizo hnam chimralna \an turin Vishal a lo awm tih sawiin, “Kan hnam tan kan pen ang a, zam miah lovin kan kal zel dawn,” tiin pungkhawm mipuite hmaah thu a sawi. PC Laldinthara hian Thawh\anni ah sit-in demonstration neih chhunzawm anih tur thu sawiin dawr zawng zawng khara Vishal kawta punkhawm a nih tur thu leh dawr khar lo te pawh an member te’n an enfiah vek tur thu a sawi.

MIMA member te hi Bawngkawn a Vishal Megamart building kawtah hian chawhma dar 10 velah an pungkhawm \an a. Ruah leh thli a rawn thawh thut avangin pungkhawm ten harsatna an tawk deuh a, chawhnu lama Vishal din tur duh lova an au rual laiin Bawngkawn Local Council te chuan rawn nangchingin an vengchhunga mipui ral\itna leh mipui tana boruak muanawm lo siam an duh loh thu MIMA hruaitute an hrilh a.

Hemi hnu hian inbiakremna neiin buaina leh bengchheng siam lova sit-in demonstration neih phalsak a ni. MIMA member pungkhawm te police nen in nawr deuh mahse harsatna lian tham awm lovin chawhnu dar 1:30 velah an \in a ni.

MIMA hian an office Electric vengah punkhawm zawh hian emergency meeting an nei nghal a, hetah hian Thawh\anni a sit-in demonstration an neih chhunzawm dan tur chiang zawkin an rel a, an thutlukna chuan Thawh\anni hian an hnah zuar tih loh dawr zawng zawng chu khar vek tur a nih thu leh Vishal kawta sit-in demonstration nei tur te chu chawhma dar 10 ah Millenium Centre kawtah innghahkhawm an tum thu MIMA General Secretary Lalramsanga Sailo chuan Zalen palai a hrilh.
Zalen thudawn danin Vishal Megamart neitute hi Lalrinmawia leh Lal\hai te nupa a ni a. March thla chhunga hawn hman an tum thu Vishal hotute chuan Zalen palai an hrilh.

Vishal hotute chuan MIMA hotute’n lehkha an rawn pek thu Zalen palai hrilhin he lehkha ah hian Contractor hnenah MIMA ten Vishal duh lohna an kalpui mek avangin hna thawh lai chhunzawm lo turin an ngen thu an sawi a, chhanlet tumna an neih rih loh thu Zalen palai an hrilh. Vishal hotute chuan Zalen palai zawhna chhangin Vishal a thawktu tur hi Mizo 39 leh hnamdang pali lak an ni a, heng hnam dang te pawh hi Mizorama pianga seilian vek an nih thu an sawi a, an ni bakah hian house keeper tur 16 leh security 5, Mizo vek an la bawk niin Zalen palai an hrilh bawk.

Facebooktwittergoogle_plusredditpinterestlinkedinmail

Thla 11 chhunga Home a naupang dah zat 128; 80% vel Mizoram mi ni lo

Aizawl: Thla 11 kalta, April 2016 atanga February 2017 inkar chhung khan District Child Protection Unit, Aizawl district chuan children home ah naupang 128 an dah a. Home a dah naupang zinga 80% chu Mizoram mi dik tak ni lo, Myanmar leh Manipur atanga lo pem te leh Bru (Tuikuk) te an ni.

District Child Protection Unit, Aizawl in children home-a an dah 128 zinga 57 hi hmeichhia an niin a dang 71 hi mipa an ni a, an zinga 30 te hi retheihna avanga dah an niin 18 chu enkawltu neilo an ni. April 2016 atanga February 2017 inkar chhung vek hian Chid Welfare Committee (CWC) chuan case thar 385 buaipui an nei a, hengte hi mipa 191 leh hmeichhia 194 niin an zinga 65 chu ngaihthah (neglect) an ni a, 45 chu enkawltu mumal awm lo, 33 chu mipat hmeichhiatna khawih, 24 chu CWC kut ahlan (surrender) leh a dang 24 hi an nu leh pa te ruihhl in a tihbuai te an ni. Hemi hun chhung vek hian Juvenile Justice Board (JJB) chuan case 95 an buaipui bawk a, hengte hi mipa 86 leh hmeichhia 9 an ni a. An case zinga 56 chu rukruk thubuai niin 5 chu pawngsual a ni a, a dang 6 hi pawikhawihna danga inhnamhnawih te an ni.

District Child Protection Unit hotute chuan Home a dah tur an buaipui zingah Mizoram mi leh sa dik tak chu an tlem hle tih an sawi a. Myanmar leh Manipur atanga lo pem zingah a hluar a, Bru zingah pawh naupang home a dah ngai an awm thin niin an sawi. DCPU thawktute chuan fimkhur takin thil an ti thin nia sawiin loh theih loh tih loh chu an buaipui lo tih an sawi a. Buaipui loh pawh duh thin mahse India ram chhunga thilthleng anih miau thin avangin mualpho ai chuan an buaipui mai thin niin an sawi bawk.

Facebooktwittergoogle_plusredditpinterestlinkedinmail

Serlui B Commission tep

Aizawl: Serlui B small hydel project chu hawn (commission) a nih theihnan theihtawpa tan lak mek a ni tih P&E Department thawktute chuan an sawi.

Assembly Session kal meka Lalruatkima MLA zawhna, ziak chhangin P&E department chuan Serlui B SHP chu 12MW pechhuak thei turin ni 12.12.2003 ah contract agreement ziakfel a ni a, October 2004 atangin hna thawh tan a ni, an ti a. Tun dinhmunah khawl pahnihin 8MW a pechhuak mek a, khawl 3 na hi hna thawk thei tura hmalak niin peihfel a ni tawh tih an sawi a. Tuna project cost angin unit 1 Rs. 4.33 vel a ni tiin kum 2012-2016 chhungin cheithat leh siamthat nan Rs. vbc 17.50 hman a ni tih an sawi bawk.

Facebooktwittergoogle_plusredditpinterestlinkedinmail

SEDP hi eizawnna ngelnghet neih theih nana duan a ni – Thangtea

Aizawl: MNF Vice President Dr. R.Lalthangliana chuan, “Socio Economic Development Programme (SEDP) chu chhungtinin eizawnna ngelnghet neih theih nana duan a ni,” a ti.

Nimina Lunglei North MNF Block II in Haulawnga SEDP zirhona hun an neih ah he thu hi sawiin Dr. R.Lalthangliana chuan SEDP chu NLUP anga instalment-a, sing hnih khat lek leka pek ve zauh zauh ang a ni ve lo a. Sum lokalna tur hre sa veka duan a niin, a bul tanna tur te, a thawh chhunga ei tur chhawmdawlna te, a hralhna tur ‘rate’ hre sa thlap leh a hralhna tur awm sa a duan a ni, tih a sawi a. Chhungkuain ram an neih zau dana zir leh ‘Trade’ a zirin cheng nuai hnih thum tela bul tan sakin sawrkar hna thawk awm ve lohna chhungkuate chu sawrkar hna emaw, company leh corporation-a thlatin hlawh an lak theih nan an siam sak dawn niin a sawi bawk.

Dr.Thangtea chuan kum 2018 inthlanah Pathian leh mipui zarah sawrkar loh hlauhna an nei tawh lo nia sawiin Mizorama MNF an la sawrkar lohna chu inthlan chiahin a dang niin a sawi bawk.

Facebooktwittergoogle_plusredditpinterestlinkedinmail

Hindi zirtirtuten chaw nghei chhunzawm zel

Aizawl: Mizoram sawrkarin a dahngheh phuta chawnghei mek CSS Hindi Teacher te chuan Chief Minister chenna bulah chawngheia nawrh an la chhunzawm zel.

Mizoram CSS Hindi Teacher hruaitute hnen atanga Zalen thudawn danin chawnghei hi mi 600 atanga 700 vel inkar an ni a, chawnghei zinga hmeichhe pahnih chuan nau an chhiat tawh niin an sawi a. Nimin khan medical team chuan tlawhin an hriselna dinhmun an enfiah. Hindi zirtirtute chuan an thilngiat a hlawhtlin hma chuan chawngheia nawrh chu chhunzawm zel an tum niin an sawi a, he chanchin buatsaih lai thleng hi chuan sawrkar atangin chanchin thar engmah an la dawnglo niin Zalen an hrilh.Hindi zirtirtute chawngheina hmun hi nimin thli tleh khan a tichhia a, nimin vek khan silpauline hmangin an siamtha lehnghal.

Mizoram CSS Hindi Teacher Association chuan nimin khan thuchhuah siamin tunah hian damlo chau 160 an awm tawh tih an sawi a, heti chunga sawrkar hruaitu ten ngaihsak tlaka min ngailo hian kan rilru a ti na hle a ni tiin Zoram mipuite tawngtaipui turin an sawm bawk.

MPC Party thalai chuan thuchhuah siamin CSS Hindi zirtirtu ten dah ngheh phut a chaw nghei an ngei chu awm an tihpuiin an thlawp tih an sawi a, CM chu chhuanlam dang siam lova a rang thei ang bera an thil phut te tihhlawhtlin sak ngei turin an phut tih an sawi bawk.

Facebooktwittergoogle_plusredditpinterestlinkedinmail

Nimin thli thawk sulhnu

Aizawl: Nimin chawhma lama ruah leh thli thawk thut chuan Mizoram hmun hrang hrangah in tihchhiat a nei nual a, mahse mihring thi leh hliam erawhchu an awm hriat a ni lo.

Nimina thli tleh khan Champhai Tlangsam Presbyterian school a len chhia a. School building bang leh a chung te a len chhe vek a, thi leh hliam erawh an awm lo thung. Tlangsam Presbyterian Kohhran School building hi session thar atanga luah tan tura ruahman niin School leh Office te luah mai theiha sak zawh tawh a ni. Thli hianChamphai Zotlanga H Zothangmura in chung leh MED AIM Hospital in chung a hawk bakah Champhai Kanan Vengah in 3 chung a hawk bawk.

Hei bakah hian Zairemmawa, Bawngva VC Tlangau In chu Hmawng kung tluin a vaw chhia a, an mahni hi an tlan chhuak hman hram a, a bula vawk a vawhlum. Rawpuichhip khaw helna kawng hmun 3 ah lung a min avangin he kawng hi Block rih a ni a, lung tla a la awm reng avangin thenfai mai ngam a ni loh avangin leh motor a vei vak te him zawk nan he kawng hi Block rih a ni ta a ni. Thli hian West Phailengah In 5, West Phulpuiah In 12 a tichhia a, heng zinga 3 hi luah tlak loh nia thudawn a ni.

Facebooktwittergoogle_plusredditpinterestlinkedinmail

CIC hlui lakah criminal complaint

Aizawl: Health department hnuaia Food and Drugs Administration (FDA) chuan tunhnai khan Mizoram Chief Information Commissioner (CIC) hlui Robert Hrangdawla IAS (Rtd.) chu pseudoephedrine lei leh hralh chungchangah criminal complaint court-ah a thehlut a, court chuan Robert Hrangdawla hi April 7,2017 ah inlan turin thu a pe nia thudawn a ni.

Tualchhung chanchinbu ‘The Frontier Despatch’ in a tarlan danin Taxation hnathawk te chuan tunhnai khan Lengpui airport ah khehpuam tia hriat lar pseudoephedrine parcel 5, a vaiin mum nuai 10 emaw vel chu rinhlelh thil thu ah an man a. Lehkha pawimawh te an enfiah hnu ah thil felhlel awm a an hriat avangin FDA hnenah hian an hlanchhawng leh a ni. Joint Director FDA, Lalsawma sawi danin Robert Hrangdawla hian license hmangin thla tin airport-a taxation hnathawk te’n an man zat ang hi thlawhna hmangin vawi thum atanga vawi nga vel a chah lut thin niin a sawi a, pseudoephedrine hi a lo thlen zin em avangin taxation hnathawkte chuan ringhlelin an lo endik ta niin a sawi bawk.

Facebooktwittergoogle_plusredditpinterestlinkedinmail

Rekha Sharma-in hmeichhe chungchang CM sawipui

Aizawl: Mizoram tlawha lo zin National Commission for Women (NCM) Member, hmarchhak enkawltu Rekha Sharma chuan Zirtawp tlai khan Chief Minister Lal Thanhawla chu a chenna in ah hmuin hmeichhiate dinhmun chungchangah thil hrang hrang a sawipui.

Rekha Sharma chuan Mizorama a cham chhunga Mizorama hmeichhia te dinhmun a zirchian thu leh hmeichhe pawl hrang hrangte nen inkawmhona hun tha tak neiin an dinhmun chawikanna atana thil pawimawh an sawiho te, hmeichhe lungin tang leh humsual dai leh vanduaina tawk hmeichhia te enkawlna protective home a tlawh thu te Chief Minister a hrilh a. Ramchhung hmun dang khaikhinin Mizoramah hmeichhiate dinhmun chu a tha zawk nia a hmuh thu a sawi a, nihmahsela inrebawlna a bik takin State chhunga inrelbawlna sang ber Assembly leh inrelbawlna dangah te hmeichhia aiawh tun aia an tam a pawimawh a ni, a ti a. Mizo hmeichhia te thawhrimna, an taihmakna leh chhungkaw tana an inpekna chu fakawm a tih thu a sawi bawk.
Chief Minister Lal Thanhawla pawhin Mizorama hmeichhiate dinhmun chawikanna atan sawrkarin hmalakna a neih te hrilhin khawtlang inrelbawlna Village Council tinah seat awmzat atangin pakhat tal emaw, a aia tam pawh hauhsak an nih thu te, Aizawl Municipal Council ah pawh hmeichhia te tan seat hauhsak an nih thu a hrilh bawk.

Inkawmnaah hian Mizoram State Commission for Women, Chairperson Vanlalawmpuii Chawngthu, MLA leh Commission Member Secretary Lalbiakkimi te pawh an tel a ni.

Facebooktwittergoogle_plusredditpinterestlinkedinmail

Login

Lost your password?