Monthly Archives: March 2017

Tinreng Feature : 2 wheeler taxi

Aizawl khawpuiah Traffic jam vangin thiltih a harsa a, meeting leh thil pawimawh tih dawn pawhin hun ruahman thiam a harsa thin. A hun taka thleng tur chuan a hma lama inpuahchah lawk a ngai a, hma takah meeting turin chhuak ila, traffic a jam loh chuan kan thleng hma lutuk a, a hun niawma kan hriatah chhuak ta ila traffic jam kan nan fuh erawh chuan kan tlai leh lawi si. Ni tinin lirthei a pung tual tual a, kawng lah chu zauh a harsa em em a. Zauh a hnekin kan nepchep tial tial emaw tih mai tur a ni bawk si nen rikrum thil leh damlohna thilah pawh chetvel a harsa ta hle.

Hetiang hi Aizawl khawpui Taffic dinhmun a nih avangin Mizoram State Transport Authority chuan mipuite samkhai zawknan nikum 2016 kumtawp lam khan Aizawl khawpui ah Two Wheeler taxi leh Aizawl khawdai vela service turin Auto Rickshaw te permit pek nise tiin a rel a. Hei hi mipui pawhin an tangkaipui hle niin a lang.

Transport department thawktute chuan Aizawl khawpui a service tur hian two wheeler permit 221 an pechhuak tawh a. Heng zingah hian service tura register fel tawh chu 24 an awm niin Zalen an hrilh.

Two wheeler taxi khalhtu pakhat chuan Office kai leh school naupang hruainan an hmang nasa hle niin Zalen a hrilh a. Anni ho bakah hian sumdawng thenkhat pawhin an hmang thin niin a sawi a, zingkar pisa kai hun leh naupang hruai hun vel, zing dar 7:30 atanga 9:30 inkar chu a buai hun lai ber niin a sawi. Two wheeler taxi chu a hlawk nia sawiin ni khatah Rs. 1000 chuangte a hlawh thei niin a sawi a. “A chhe berah Rs. 700 tal chu ka hlawh thin a, petrol hi a tam berah Rs. 200 man te ka thun a. Ka tlan chhiat deuh leh petrol kan hmang tlem ve mai a, a tihchi khawpin ka hria,” tiin Zalen a hrilh bawk.

Dawr te siam thin nu pakhat chuan a dawr bungruate la turin two wheeler taxi te chu a hmang thin tih a sawi bawk a. “Traffic jam a nasat thin avangin Taxi ah chuan rei tak tak hun hman chang kan nei a, two wheeler-ah erawh chuan kan put zung zung theih thin avangin a tihchi hlein ka hria,” a ti. Amah a kal kher loh pawhin two wheeler taxi khalhtute chu dawr bungrua la ten a tir mai thin a, mahin dawr a lo nghah theih thin avangin a tih chi hle niin a sawi bawk.

Two wheeler taxi hi STA rate bithliah dan chuan tlanchhuah tirh km khat ah Rs. 10 a niin a bakah chuan km khat zelah Rs. 5 tur a ni a. Mahse, STA rate siam hi two wheeler taxi zingah zawmlo an awm a, hemi chungchangah hian STA hotute chuan an zawm ngei ngei tur ani tih Zalen an hrilh a. “Rate zawm lo an awm chuan rawn report sela, a tul angin action kan la zel ang,” an ti.

Facebooktwittergoogle_plusredditpinterestlinkedinmail

Ngawlvei zirchianna kimchang hmasa ber

Aizawl: Ruihhlo chungchang zirchianna hi India ram state zingah Punjab (opiods zirna) chu hmasa ber ni mahse Mizoram chu mumal taka ti awmchhun a ni a. Baseline Survey on Extent & Pattern of Drug Use In Mizoram chu peihfel tawh niin Data lakkhawm sate hi international expert Debashis Mukherjee-a’n lo zirchiang lehin a thil hmuh dan hi Zirtawpni kalta khan Aijal Club ah drug lama mi thiam kalkhawmte nen sawiho leh a ni.

Social Welfare department chuan nikum 2016 chhung khan Mizoram district hrang hrangah drug ti thinte zirchianna baseline survey hi an kalpui a, district 8 ah zirchiangtu (researcher) 32 hmangin damdawi ti thin mi 2633 te zirchian a ni a.

Drug ti thinte chungchang zirchiannaah hian damdawi hmang thin mi 2633 te hun hman dan chu uluk taka zawhna hrang hrang hmangin zirchian a ni a, heng an zirchiante hi a tlangpuiin kum 28 mi an ni. Zawhna chhangtu zinga 89% chu mipa an ni a, hmeichhia 10% awmin 1% chu transgender an ni. Zirchianna atanga a lan danin drug ti thinte hian school an luh tan atanga kum 7-12 inkarah an ti tan tam ber a, heng mite hian a hmain meizial emaw zu emaw an ti hmasa tlangpui thin. Drug ti thin zinga 81.6% chu hnathawh mumal neilo niin ngawlvei mipa 32% te chuan hna mumal an nei a, hmeichhe zinga 12.9% chuan drugs an zuar a, 33% chu mahni inzuar an ni thung.

Mizorama damdawi ti zingah nachhawkna ruihtheih chi (pharmceutical opioids) ti an tam ber a, heroin, mutna damdawi (sedatives), thil charna atana hman chi (volatile solvent) leh opium te chu hman lar zualte an ni. Zirchianna tarlan danin ruihhlo ti zingah hian kawppui nei lo an tam ber a, ruihhlo ti thin zinga 49.5% an tling. Ruihhlo ti zinga 24.2% chu kawppui then an ni a, kawppui nei chunga ruihhlo khawih 20.7% an awm bawk. Ruihhlo ti thin hmun lia thena hmun thum (3/4) chu nu leh pate nena khawsaho an ni. Ruihhlo hmanga inchiu tum khatna zinga 78.6% chu an thian kawmte avanga inchiu tan an ni a, heng zinga 24.15% te hian an thiante hman hnu hriau an hmang nawn niin an sawi a. Inchiu zinga 65.8% chuan thiante nen hriau an inhmantawm thin a, inchiu nan hian in ruak, thiante in, mahni inluah, damdawi zawrhna hmun leh vantlang zunin te chu an hman lar berte an ni. Damdawi ti thin zinga 44.65% chuan man an tawk tawh tih an sawi a, 32.9%-in hrem an tuar niin an sawi.
Zawhna chhangtu zingah 48% chuan OPD-ah enkawlna an dawng mek a, 39.9% chuan IPD ah enkawlna an hmu a, OST la 35% an awm bawk. Overdose zingah 42.7% chuan detro-propoxyphene (spasmo) an hmang a, 47% chu heroin hmang an ni a, heng zingah hian 24.4% chuan zu, 22.4% chuan sedative, 12% detro-propoxyphene lam chi damdawi an hman pawlh bawk. OD zingah hian nunna chhanna atan hman ber Naxolone dawng chu 3.2% chauh an ni thung.

Zirchianna chuan hmeichhia, drug ti thin zingah hnathawh mumal nei lo an tam hle nia sawiin an hnathawh tur tawk ngaihtuahsak an nih chuan an tlem a beiseiawm niin a sawi a. Drug ti thinte hi a tlangpuiin zirna sang thleng pha lote an nih avangin zirna sang zawk an zir theih nana hmalak te, drug ti thinte bultanna zu leh meizuk an chin lohnan inven te chu a pawimawh hle tih sawichhuah a ni bawk.

Baseline survey chungchang sawihona a khuallian SWD Secretary P.Lalchhuanga chuan survey atangin thin thawng tak tak a tam thu sawiin damdawi hman sual laka thalaite an him theih nan awmze nei zawka do a tul tih a sawi a. Zirchiana nei thei tura Chief Minister in an mamawh ang pawisa a pek nghal avangin SWD hotute chuan lawmthu an sawi bawk a ni.


Rawtna
Stakeholder te nena State level action plan siam. Preventive intervention state pum huap beih tana education, envioronment protection, sports te nena thlunzawm.
Hmeichhia te tan sumlak luhna siamsak.
Drug tihching hmeichhiate tan treatment tha zawk pek a ngai.
Kohhran nena thawhhona tha tak siam.
Drug ei ching te inchiu ching ah an inlet em? tih entel reng theih nan harm reduction service leh MSACS thawhhona tha zawk a ngai.
Overdose thlen tamna ber ruihhlo chawhpawlh (opiod, sedative leh zu hman pawlh) hlauhawm zia zirtirna pek uar.
OD an awma hman tur booklet siam tam leh helpline siam.
Opiod drug-a inchiu ching leh ei chingte tan oral substitution therapy awlsam zawka pek.
Sikul naupang zingah ruihhlo khawih tihhniam nan zirtirtute’n a that lohna sawi tam sela.
Hepatitis C leh thin natna te enkawl a rem dan angin drug treatment anga rinluh.
Ruihhlo ngaite zinga mental health zirtirna pek.
Zu khap lai leh a MLPC hnu zirchianna neih.

Facebooktwittergoogle_plusredditpinterestlinkedinmail

Tennis court stadium hawng

Aizawl: Nimin khan Sports Minister Zodintluanga chuan Aizawl Tennis Club, Semi Indoor Tennis Stadium sak thar a hawng.
Hawnna thu sawiin Zodintluanga chuan, “Mizoram sawrkarin hun reilote chhungin hmasawnna hna thahnem tak a thawk a, thingtlang leh khawpui chhungah hmasawnna ruhrel ding thar hmuh tur tam tak a awm a, sports lamah phei chuan hmasawnna a tam lehzual,” a ti. Minister chuan Champhai, Kolasib leh Lungleiah Stadium puitling, 8 lane athletic track chhunga artificial grass, a entu mipui thutna tur gallery changkang tak neih theihna tur siam zawh tep tawh niin Serchhip Stadium a artificial grass phah tur pawhin Kolkata a thleng tawh niin a sawi bawk.

Semi Indoor Tennis Stadium sakna tur hian Special Plan Assistance atangin sawrkar chuan cheng nuai 100.80 pein, kum 2015 May ni 25 atang khan sak tan a ni a, October ni 12, 2016 ah zawh fel a ni. Stadium dung hi metre 37, a vang metre 18.70, a zau zawng 691.9sqms. a ni a. A chung hi a hniam lai berah metre 9.50 niin a sang lai berah metre 11.70 a ni. A chung dyna roof, a chhuat rubberised synthetic flooring niin zanah pawh inkhelh theih turin Indoor Lighting System siam a ni.

Facebooktwittergoogle_plusredditpinterestlinkedinmail

Mizo Carbon in Vbc 3 subsidy dawng tawh

Aizawl: M/S Mizo Carbon Product, Luangmual chuan Central Capital Investment Subsidies (CCIS) leh Central Transport Subsidy (CTS) atangin Rs. 34,165,086 an dawng tawh.

Assembly Session kal mekah Dr. K.Beichhua zawhna ziaka chhangin Commerce & Industries Minister H.Rohluna chuan M/S Mizo Carbon Product hian Central Capital Investment Subsidy atangin Rs. 93,90,361 leh Central Transport Subsidy atangin Rs. 2,47,74,725 an dawng tawh tih a sawi a. Tunah hian CTS ah hian dil mek; mahse, pawisa la lak loh an nei tih a sawi. Industries Minister chuan CTS an dil mek chu Rs. 10,34,82,311 a ni tiin hei hi State Level Committee-in a la recommend loh avangin Central-ah thehthlak a la ni lo niin a chhang bawk.

Facebooktwittergoogle_plusredditpinterestlinkedinmail

Spring Fair kharna hun nei

Aizawl: Hnam Chhantu Pawl in March ni 14-18,2017 inkar chhunga ni 5 awh ‘Spring Fair 2017’ Vanapa Hall-a a huaihawt chu nimin khan MJA President Vanlalrema Vantawl in a khar.

Fair khartu MJA president Vanlalrema Vantawl chuan khawvel huapa Mizoram chawilar theitu chu handicraft a ni tiin, “Dawhsan sang takah kan nihphung leh hnamzia a pholang thei a. Kan culture a nun reng theih nana hmanraw tangkai ber zing ami chu handicraft hi a ni bawk,” a ti.

Hnam Chhantu Pawl president Ramhmangaiha chuan Fair an buatsaih chu mipuiin an phurpui hle tih sawiin anmahni tan pawh chona leh thathona siamsaktu a nih thu a sawi a. An hnathawh avangin Hmunphiah man pawh hat Rs. 25 ni thin chu kuminah Rs. 100 chuangte a ni tiin thawk tha ve hlea an inngaih laia an tana hriat nuamlo thil Session ah sawichhuah a ni fo chu hrehawm a tih thu a sawi bawk.

Spring Fair 2017 ah hian Mizo kutchhuak chi hrang hrang handloom leh handicraft te phochhuah a ni a. Hnam Chhantu-in mau atanga a siam bowl, plates leh mau no te bakah, Mizo puan te pawh phochhuah zingah hian a tel a. Handicrafts bik hi item 180 vel niin Mizo pipute’n an lo hman thin ‘Hlum Bel’ pawh siamthar leh niin mipuiin an hlut hle a. Ni 5 chhung neihah hian chawhrualin ni tin cheng nuai khat vel an thil phochhuah hi hralh ziah anga chhut a ni.

Facebooktwittergoogle_plusredditpinterestlinkedinmail

Patea’n lungphum a phum

Aizawl: Health Minister Lal Thanzara chuan nimin khan Edenthar Veng Community Complex sakna tur lung a phum a, vengchhung Thlanmual kawng, Thlanmual In leh kawng siamthar dangte a hawng nghal.

Edenthar Community Complex hi cheng nuai 417 senga sak tur a niin NECS-in a sak hna hi a thawk dawn a ni. Lal Thanzara chuan Mizoram sawrkarin hmasawnna kawng ah mipui hnena a thutiam a hlen mek zel niin a sawi a. “Hmasawnna kawngah Mizoram in hna a thawk nasa tih hi state pawn lam mi ten Mizoram an hmuhdan a ni,” a ti a. Edenthar khawtlangin rotling sawrkar hmalakna hrang hrang an dawng chu a lawmpui tih tarlangin a neitu thinlung putu ni tur leh duat taka enkawltu an nih a ngai tih a sawi bawk.

MLA fund hmanga sak Thlanmual In (RCC)hi cheng nuai 4 chuang senga sak a ni a, thlanmual kawngpui, 1 KM-a thui, alkatra a luan, siam nan hian nuai 15 sen a ni a; Edenthar Vengchhung kawng, 110 metres (concrete pavement) siamnan pawh cheng nuai 15 tho sen a ni.

Facebooktwittergoogle_plusredditpinterestlinkedinmail

SRS 4th batch in ruihhlo Nuai 200 hu man tawh

Aizawl: Central YMA-in ruihhlo do tura a din Supply Reduction Service (SRS) 4th batch te chuan ruihhlo Rs. 2,15,28,110 hu an man tawh.

SRS 4th batch te hian ni 11.7.2016 atang khan thawk tanin naktuk ni 17.3.2017 thleng hian an thawk dawn a, naktuk zing atang hian 5th batch ten an thawk tan veleh ang. SRS 4th batch hian an thawh chhungin heroin hawng 201, can 1766 leh chhinsen 144 an man a.

Hei bakah hian Opium 15 kgs, ganja 32.7 kg, meth mum 31800 bakah ruihhlo dang engemaw zat an man tawh. Hemi kaihhnawih ah hian mihring 762 manin heng zinga 30 hi home ah dah an ni a, Police ah 9 leh Excise ah 44 dahin councelling turin mi 469 tih an ni bawk.

SRS thawktute chuan tunlaia ruihhlo ti thinten ruih nana an hman lar ber chu heroin a ni tih an sawi a, heroin hi khawchhak lam atangin a lokal ber a, thenkhat chu Silchar lam atang pawhin a lolet niin an sawi bawk.

Heroin bakah hian Alprozolam (AP) chu ruihhlo ti thin ten an hmang nasa hle niin an sawi bawk. SRS 4th batch te ruihhlo man khawm hi naktuk Thawhtanni zing dar 7:30 hian Central YMA office tualah Synod Moderator Rev. Lalzuithanga chuan a halral dawn a ni.

Naktuk zing atang hian SRS 5th batch ten an hna an tan ve nghal dawn a, Convener atan Central YMA Treasurer J.Lalsailova leh secretary atan K.Lalthanmawia te chu CEC meeting in a ruat tawh bawk.

Facebooktwittergoogle_plusredditpinterestlinkedinmail

Aadhar card diltu an la tam:DC office

Aizawl: Tun hnaiah Aadhaar card buaipuiin mipui te Deputy Commissioner (DC) Office kawtah an pung khawm nasa hle a, DC Office hotute atanga thudawn danin mipui ten Aadhaar card tel lova an tih theih loh thil a tam tak em vang anih thu Zalen an hrilh.

Aizawl DC Office a Aadhaar Card lam hotute chuan Zalen palai zawhna chhangin mipuite mamawh hrang hrang ration card, job card, bank leh thil hrang hrangah Aadhaar Card neih a ngaih zel tawh dawn avangin mipui zingah tun hnai hian Aadhaar Card siam tum chu nasa takin an pung niin an sawi ni.

Aadhaar Card siamna leh pekchhuahna hmun atana ruat Aizawl DC Office-ah pawh hian Aadhaar card siam hna hi ngawrh taka neih mek anih thu sawiin Aadhaar card lam changtu officer chuan theih tawp an chhuah thu leh sorkar chawlh leh Inrinni-ah pawh Aadhaar thlalakna te chu hawn a nih thu kan palai a hrilh bawk.

Zalen thudawn danin February 28, 2017 thleng khan Mizoramah hian ram mipui zaa 57 te Aadhaar-ah an inziak lut tawh a, hemi hnu lama nasa taka hma lak a nih vangin Aadhaar-a ziahluh te hi nasa takin an pung niin thu a dawng bawk.

Aizawl Deputy Commissioner Office-a Aadhaar lam hotute atanga thu dawn danin Aadhaar Card siamna lamah hian harsatna hrang hrang a thleng a, kum 2016 March thla tawp lam thleng ECIL Company hnuaiah khan ram mi zaa 50 chauhin thla an la hman a. Aadhaar card siamna kawnga harsatna hrang hrang a awm avangin tihtawp lailawk a ni. Mipuite mamawhna a san chhoh tak avang leh Aadhaar siamsak tawh zat percentage chu a chhiat em avangin state sawrkarin thla lak tan a nih leh nan hma a la a, September 1, 2016 khan thla lak hi tan a ni leh ta niin Zalen palai an hrilh a. Thudawn danin tunah hian Aizawl DC Office-ah leh Aizawl chhunga Common Service Centre hrang hrang 8 ah te Aadhaar thla lak hna hi kalpui mek a ni.

Facebooktwittergoogle_plusredditpinterestlinkedinmail

Dawrpui Pres. bialin HIV zirho

Aizawl: Nimin khan Zarkawt Presbyterian Kohhran Hall-ah Dawrpui Bial chhunga kohhran committe hrang hrang hruaitute tan HIV&AIDS chungchang zirhona buatsaih a ni. He zirhona hi MSACS leh FHI360 tang kawpin an buatsaih a ni a. Hetah hian Dr. Lalmalsawmi Sailo, Proj Director, MSACS chuan thusawiin kohhran bial meuh hruaitute nena hun an hmang thei chu lawmawm a tihzia thu sawiin he natna do kawngah hian Dawrpui Bial hian danglamna an thlen thei ngeia a rin thu a sawi a ni.

He zirhona ah hian Mizoram chhunga hmalakna hrang hrang te, a bikin ruihhlo khawih thin te zinga hmalakna chungchang te zirchian ani a. A do kawnga hmalatute’n ngawrh takin hna thawk mahse Mizoram ah he natna hi a hluar zel a, India ramah a tamna ber dawttu niin pakhatna ni thei mai dinhmunah kan ding mek a. Chuvangin a invenna lama hmalak kawngah kohhran te an chet a \ul hle a, chumi kawnga a sulsutu ni turin Dawrpui Bial Presbyterian kohhran te hi an tang thei ani tih an sawi a, thawhho dan te an sawi bawk. He zirhona ah hian Kohhran Committee, Hmeichhe Committe, KTP leh Pavalai lam aiawh eng emaw zat an tel a ni.

Facebooktwittergoogle_plusredditpinterestlinkedinmail

Pawisa thi thleng tum la awm

Aizawl: Thudawn danin tunlai hian Reserve Bank of India (RBI) Regional Office-ah pawisa note hlui thleng tum an la awm reng.
Zalen thudawn danin tunlai hian RBI Office Aizawl ah pawisa note hlui thleng tum an la awm reng a, Reserve Bank of India leh hmun dang khawiah mah pawisa note hlui te hi thleng theih a ni tawh lo niin Zalen chuan thu a dawng. Tun hnaia ni hnih khat pawisa note hlui thleng theihna hun siam a ni tia thu thehdarh awm pawh thu belhchian dawllo a nih thu leh chutiang thuchhuah chu RBI website ah engmah dah a ni lo niin thudawnna pakhat chuan a sawi bawk a ni.

Facebooktwittergoogle_plusredditpinterestlinkedinmail

Login

Lost your password?