Monthly Archives: March 2017

Ramsanga’n stadium tlawh

Aizawl: Kolasib bialtu MLA PC Zoram Sangliana chuan nimin khan Project veng a stadium sak mek tlawhin an hmalakna te a enpui.

MLA hi NBCC a Project Director chuan lo dawngsawngin an hmalakna te a hrilhfiah. PC Zoram Sangliana chuan thangthar te tana ro tling tur Stadium tha tak sak puitlin nise tih chu a duhthusam a nih thu a sawi a. Hetiang a nih laiin hnathawktuten harsatna an nei tih a hriat avangin tanpui theihna a nei em tih hriat a duh vang a nih thu sawiin NBCC hotute chu harsatna an neih te ziak a a hnen a hrilh hre tura chah in, a theih ang anga lo bawhzui sak a inhuam thu a hrilh a ni.

NBCC hotute chuan harsatna an neih ber chu a hun taka fund an hmu thin lo chu a nih thu sawiin Utilization Certificate (UC) an thehluh hnuah pawh pawisa an dawn mai theih loh thu an sawi a. Tunah hian 67.87% physical hna an zawh tawh laiin fund hi 22. 68 crore atangin 9.29 crore chauh an la dawn thu leh, UC an pek tawh chinah pawh 5.5 crore dawn loh an la neih thute, an supplier te hnenah pawisa an pek theih loh avanga supplier tur an hmuh that theih loh thu an sawi a ni.

Facebooktwittergoogle_plusredditpinterestlinkedinmail

WRC-a hman ram hec. 16862

Aizawl: Mizoramah WRC (leilet /buh chinna) atan hman tangkai theih ram zawl leh awihtlan hectare 74644 a zau a awm mek niin chhut a ni a, hman trangkai mek hectare 16862 awmin hectare 57782 chu WRC atana cheibawl tlak si; mahse, la cheibawl loh a awm mek niin Agriculture Department chuan an chhut.

Agriculture Department in session neih meka Lalruatkima MLA zawhna, ziaka an chhanna ah kum 2012-2016 chhungin NLUP leh RKVY sum hmangin leilet 5825 hectare a zau siam tawh a ni tiin WRC I & WRC II ah beneficiary 16107 an awm mek niin an sawi.

Facebooktwittergoogle_plusredditpinterestlinkedinmail

Women’s month khar

Aizawl: Khawvel puma hmeichhia te dinhmun chawisanna thla “international women’s month” kharna hun chu nimin khan Heritage Lounge ah All Mizoram Women Federation (AMWF) bultumin hman a ni.

International womens month closing programme hi President Indian Society on Tobacco and Health, Mizoram Chapter Lal Riliani’n khuallian niin a hmanpui a, khawvel puma hmeichhe te hlutna ngaih pawimawh a nih zel chu lawmawm a tih thu a sawi a, kalkhawm te chu hmeithai leh hmeichhia harsatna tawkte tana bengvar a pui thin turin a chah a ni. He programme hi AMWF President Dr. Jane R Ralte in a kaihhruai a, chawhnu lamah “issues related to Single Women/single parent” tih thupui hmangin sawihona neih nghal a ni.

Facebooktwittergoogle_plusredditpinterestlinkedinmail

Thisen pe

Aizawl: Nimin khan Aizawl Civil Hospital a damlo mamawh apiangte hman turin Kawlkulh Students Union in unit 13, South Lungpher Students Union in unit 8 leh Khawrihnim Students Union ten unit 5 an pe a. Nimin vek khan Tlangnuam West Branch KTP-in KTP Day pualin Synod Hospital tan thisen unit 17 an pe bawk.

Facebooktwittergoogle_plusredditpinterestlinkedinmail

The Week That Was (March 26, 2017)

Budget sawisel
ZNP President Lalduhoma chuan ni 20.3.2017 (Thawhtanni) khan Aizawl Press Club-ah thuthar thehdarhtute a kâwm a; Finance Minister-in kum 2017-18 atana Mizoram budget tur a pharh tâk chu vote zawnna budget mai a nih thu a sawi.

Halral
Central YMA hnuaia ruihhlo do tura din Supply Reduction Service (SRS)-te’n ruihhlo chi hrang hrang an man Rs. 57,77,500 hu chu ni 20.3.2017 (Thawhtanni) zing khan CYMA office kawtah Mizoram Kohhran Hruaitute Committee (MKHC) chairman Rev. Lalzuithanga’n a hâl ral.

Sawiho
Zoram Entu Pawl (ZEP) leh Ferrando Women Development Centre (FIWDC-Peace Home) tangkawp chuan ni 20.3.2017 (Thawhtanni) khan I&PR Conference Hall-ah ‘Issues of Persons with Disabilities’ tih thupui sawihona hun an buatsaih.

Summer camp
Mizoram Science, Technology & Innovation Council (MISTIC) leh Mizoram Mathematics Society (MMS) tangkawp buatsaih, chawlhkar khat awh tur Mathematic Summer Camp chu ni 20.3.2017 (Thawhtanni) khan Pachhunga University College-ah chief scientific officer Dr RK Lallianthanga’n a hawng.

Thukhawm
Ni 20.3.2017 (Thawhtanni) khan Mizoram Pollution Control Board (MPCB) chu PCCF conference hall-ah an chairman RC Thanga hovin an ?hukhawm a, khauh zawka dan kenkawh an rêl.

Poetry day
Mizo Poetry Society (MIPOTY) leh Mizoram University-a Mizo department-te chuan ni 21.3.2017 (Thawhlehni) khan Hrangbana College Golden Hall-ah World Poetry Day an hmang a, parliamentary secretary TT Zothansanga’n a hmanpui.

PYD Day
Ni 21.3.2017 (Thawhlehni) khan UPC (North East India) ?halai pawl, Pentecostal Youth De­partment chuan Mizoram hmun hrang hrangah PYD Day an hmang a, vntlang tana thil tha tihnan leh thisen peknan hun hman a ni.
Phut
Mizoram CSS Hindi Teachers Association (MCHTA) chuan ni 21.3.2017 (Thawhlehni) khan Vanapa Hall-ah Special Conference an nei a, resolution pass in, CSS hnuaia Hindi zirtirtute sorkara a ngheta dah vek turin Mizoram sorkar an phût tih an tarlang.

Khawmpui
PRISM chuan ni 22.3.2017 (Nilaini) khan Chanmari YMA Hall-ah inkhawmpui lian vawi 12-na an hmang a; Mizoramah rorelna dik leh sorkar tha a awm theih nan kum 2018 Assembly inthlanah hmalak an rêl.

Chhuak tau
Ni 22.3.2017 (Nilaini) a session neih ah Deputy Speaker in a kaihhruai dan chu duh lovin eptu MLA te an chhuak tau a, March ni 30,2017 thlenga session neih turah Deputy Speaker kaihhruaina hnuaiah chuan tel an tum tawhlo tih an sawi. Eptu MLA te hian demand sawihona ah Dy.Speaker hian sawina hun a pelo niin an sawi.

Tlawh
National Commission for Women (NCWM) member Rekha Sharma chuan ni 22.3.2017 (Nilaini) khan Mizoram State Commission for Women (MSCW) pisa, Crime Against Women Cell leh Protective Home a tlawh a, March 21, 2017 tlai khan Central Jail-a hmeichhe tángte dahna pindante a tlawh bawk a ni..

Cong in sawm
ZNP president Lalduhoma chuan ni 22.3.2017 (Nilaini) khan Lunglei Press Club-ah thuthar thehdarhtute a kâwm a; kum 2018 Assembly inthlanpuiah Mizoram mipuite’n Bible keu chunga vote thlakna tur an ngaihtuah a tul tih a sawi bakah Chief minister ni lai Lal Thanhawla’n kum 2018 inthlan­ah ZNP chu thawhpuiah a sáwm niin a sawi bawk.

Tlangzarh
Ni 23.3.2017 (Ningani) khan Vanapa hall-ah MNF Party chuan MNF Policies & Programme, Socio Economic Development Programme (SEDP) an tlangzarh.

MJA day
ni 23.3.2017 (Ningani) kha Mizoram Journalists Association (MJA) din champha a ni a, MJA chuan urhsun takin he ni hi an hmang.

Facebooktwittergoogle_plusredditpinterestlinkedinmail

Khaw 30-ah Mobile Bookshop

Aizawl; Synod Bookroom chuan kum tina an lo tih thin angin thingtlang kilkhawr zawka miten an rawngbawlna an chhawr theih nan kar kal ta chhung khan Mobile Bookshop a nei a. Thawhtanni khan Mobile Bookshop neia kalchhuak turte chu PRESCOM Deptt General Manager Upa R.Lalmalsawma’n a thlah liam a. Tun tum Mobile Bookshop-a tuam khua hi a vaiin khaw 30 an ni.
Mobile Bookshop hi tlangdung pathum – Tuipuiral, Tuichangral leh Hmarchhak tlangdung te tuam tura tirh a ni a. Tlangdung tinah hian truck pakhat zel tirh niin Bookroom thawktu pahnih zel an tel bawk.

Hmarchhak tlangdunga feh chhuakte hian Thawhtanni tlai khan Saichalah bul an tan a, Zirtawpni tlaiah Kawlbemah an khar a. Tuipuiral tlangdungah Thawhlehni tukah Khuangthingah tanin Zirtawpni tlaiah Khuanglengah an khar a. Tuichangral tlangdunga feh chhuakte chuan Thawhtanni tlaiah Tualteah bul tanin Inrinni tuk khan Khawlailungah an khar thung a ni.
Mobile Bookshop hi Synod Bookroom branch leh distributor dawr ve pha lo khuaten an hlutin an chhawr tangkai hle thin a. Synod Bookroom pawh hian khawpuia lehkhabu lei pha lote tana kum khata vawi khat tal lehkhabu chhawp hnaihsak hi rawngbawlna pawimawh takah ngaiin a ti ziah thin a ni.

Facebooktwittergoogle_plusredditpinterestlinkedinmail

NEI UPC thalaiten an day hmang

Aizawl; UPC North East India kohhran thalai, Penmtecostal Youth Dedaprtment chuan Thawhlehni khan an day chu hlim takin an hmang a. He hunah hian hmun thenkhatah thisen pek a ni a, vantlang tana hnathawk te leh intihhlim nana hun hmang pawh an awm.

Chaltlang bial, Kolasib, Lawngtlai, Thenzawl Bial leh North Mizoram District Headquarter Bial te chuan thisen an pe a. Kolasib bial hian Kolasib District Hospital Blood bank-a dah turin thisen Unit 45 an pe. Thisen petute hi mipa 32 leh hmeichhia 13 niin Blood Bank thawktuten Venglai UPC Naupang Sunday School Hall-ah kalin an laksak a. Thenzawl bial PYD chuan Serchhip Hospital tan Unit 34 an pe a, Lawngtlai Bial PYD chuan Lawngtlai Civil Hospital tan Unit 12 an pe bawk.

Local tam zawk chuan vantlang inthiarna leh zun in te, Community Hall leh Sub-Center te, tualchhung bawlhhlawhte thian faiin zingkar atangin an hnatlang hlawm a. Local thenkhat chuan veng chhung mi a duh apiangte tan thei tui leh ei tur semin hun an hmang bawk.

Sorkar chawlh a nih loh avangin chhun lamah intihhlimna dang siam a ni vak lo va, zan lamah erawh fellowship leh item hrang hrang hmanga intihhlimna hun hman local eng emaw zat an awm bawk.

North East India UPC Unit hrana a din hnua Executive Board hmasa ber, March 21. 1969-a Shillong Peak Hotel-a neih chuan Pentecostal Youth Department hi a din a. President hmasa ber chu Rev. K.L.Hnuna niin Rev. K.Satinvela te chu Secretary/Treasurer hmasa ber a ni thung.

PYD hian motto atana ‘Krista tana sengkhawm’ tih hmangin kum puan atan tunah hian ‘Intodelh’ tih a hmang mek a. Tun dinhmunah hian member 19,933 an awm mek a, tualchhung kohhran 531-ah PYD hi din a ni.

Facebooktwittergoogle_plusredditpinterestlinkedinmail

Kan economy & Sumdawnna

Kan economy hi a derthawng hle. Zep thu a cheng lo, state sum hnar ber chu sorkar laipui atanga dawn a ni a, chutiang tho chuan kan ram chhunga sum leng vel hi sorkar hnathawk hlawh leh sorkar sum hman chhuahah a innghat a ni. Sorkar hnathawkten hlawh an lak har chuan sumdawngte an inhralh thei lo a, thawhlawm a nghawng a, thil dang dangah a nghawng kal zel thin. Thar chhuah leh siam chhuah tih tham kan la neih loh avangin sorkar laipui atanga sum lokal tam ber hi phai lamah a liam thla leh duak a, kan rama sum leng vel hi rei lo teah a tlem rawk thin a ni. Thilsiam chhuah leh thar chhuah hmun danga thawn chhuah turte hi neih teuh ila, sum luang chhuak aiin lo luang lut hi tam zawk se, sorkar hnathawk hlawh leh sorkar sum hman baka innghahna tur hi nei ila chuan kan economy pawh hi a ngel nghet sawt dawn a ni.

Hmanni lawka finance minister-in budget a pharh takah pawh khan sum hman tur (hmuh tur) Cheng vbc 8800 chuangah khan kan state sorkar thawh chhuah ve tur chu Cheng vbc 700 chuang hret a ni. Budget a hman tur atan sorkar hian Cheng vbc 597 vel puk a tum a, sum indaih lohna (puk belh ngai tur – fiscal deficit) Cheng vbc 139 a awm dawn bawk. Chumai a ni lo a, kumin chhunga leiba tlingkhawm hi Cheng vbc 7178 a tling tura chhut a ni bawk. Kan dinhmun hi a chhe zawnga ngaihtuah chuan chhe tak a ni a, thuneitu tan chuan mut mawh hnar mawha neih tham a ni. Mahse, a vei tur bera ngaihte hian an vei tak tak loin a lang bawk si a. Engpawhnise, kan ram economy hi siamthat a ngai a, kan sum leh pai chet vel dan pawh hi kalphung tha zawka her a ngai khawp mai.
Economy derthawng takah hian mi hausate hausakna pawh a tlo thei lo. Ram chhung siam chhuah leh thar chhuah zawrh tham nei ve ta lo chu ram pawna mi chawk luh a ngai zel a, sumdawnna khawvelah thil a inlumlet chak bawk si a. Sorkar a inthlak rualin contractor an inthlak a, ruling party bel fuh, minister hnaih deuhte an hausa thut a, eiru leh kuttling lo a la lutte an hausa em em bawk. Mahse, sorkarin sum hman tur a neih loh vang te, sorkar inthlak vang te hian rei lo teah sum nei tak takte kha an tlachhe leh mai thin. Chutiang chu kan dinhmun a nih avangin kan inven thiam a tul a, pawn lam atanga sumdawnna leh politics hmanga kua rawn hreuh a, min tichhe theitute kan lo do let thiam hi a tul hle a ni.

Kan hnam hi kan la tam lo a, kawng hrang hranga chhut pawh kan dinhmun a la sang lo. Kan inven thiam loh chuan rei lo tea ral mai thei, ho te a tluchhe mai thei kan ni. Sumdawnna khawvelah kan cheng tawh a, tawktarh itawm tak tak nena min nektu thiltithei tak tak an lo chhuak zel dawn a, kan retheih avang te, kan rualawh avang te, kan inngeih loh thin avangte hian fimkhur a ngai leh zual tial tial dawn. Ram hrang hranga inzarpharh sumdawng lian ‘multinational company-te’ hi khua reiah an sumdawnna ramte tan hian hlawkna thlentu ni loin harsatna/hlohna thlentu an ni zawk, an ti. India sorkar pawh hi a inhawng zau viau tawh na a, ram chhung sumdawng/dawr liante ven him an duh vangin ram dang dawr lian (mega store/chain store) lian lo luhna tur erawh an la dang tlat.

Ram changkang US ngeiah pawh khaw thenkhatah chuan Walmart leh dawr lian (Retailing corporations) te hi an tual chhung sumdawnna a tichhiat hlauh vangin an lo dodal tawh a. Heng dawr liante hian dawrkai dangte aia tlawm zawkin an zuar a, chi hrang hrang an zuar hnem bawk a, mi pawh an hip a, dawrkai dangten an tlak hniam phah thin. Kan rama sumdawng bank lo lutte hian an hnena mipui sum dahte hi Mizoram chhunga loan pek nan an hmang tam duh lo a, an hmunpui lamah an thawn zel a, kan sum hmangin khawpui dangah an intuak hausa thin. Chutiang deuh chuan, hnam dangten sumdawnna lian tak an rawn din chuan kan sum tam ber hi an nei dawn tihna a ni. Chutiang zawnga hnam rilru taka thlir chuan kan sumdawngte tichhe tur leh kan sum luang chhuak tur ui vang pawhin lo dodal hi tihawm tak a ni. Hmun dangah pawh an ti thin tho. Chutihlaiin, kan sumdawngten thil man an chhiar to uchuak lutuk avang hian man tlawm zawka thil lei chak tan chuan dawr lian, thil man tlawm bawk si chu lawm taka lo dawnsawn awm tak a ni thung.

Kum zahnih vel kal taah khan French sipai hotu lu ber leh ram hruaitu ni bawk Napoleon-a’n an thenawm ram England chu “Dawrkai tamna ram” (A nation of shopkeepers) tiin a sawi a. Europe khawmualpuia finna leh thiamna lama harh tharna a thlen lai vel a sumdawnna lam lo tuipui tak English-ho a deusawhna anga ngaih a ni a. Mahse, English-ho hi an lo fingin an lo huaisen fal deuh chu a ni ang Europe awm tum Napoleon te, Hitler te pawh an hneh zel a, sumdawnna leh politics an kal kawptir thiam a, ram ni tla seng lo a roreltu an nih phah a ni.

Aizawl pawh hi ‘Dawr tamna khawpui’ (city of shopkeepers) tih hial tlak a ni. Kawng dunga dawr awm zat hi chhiar ka tum thin a, mahse, chhiar sen mai mai chi a ni lo. Khawi vengah pawh hian, veng mawng deuh a ni emaw ni lo emaw dawrte a tam em em a, veng chuan chung deuh veng thenkhatah phei chuan kawng dung in 3/4 dan zelah dawr te a indawt zut a. Dawr tam ber hi nepnawi dawr a ni hlawm a, kawng sirah thil zuarte, dawr nei lem lo a thawmnhnaw leh thil dang zuarte nena chhut phei chuan a zuartu leh a leitu hi kan inzat thuak mai awm asin. India ram khawpuiah a zuartu leh a leitu intam hleihna a tlemna ber kan ni hial ang.

Kum zabi 19-na tir lamah khan French economist, J.B. Say chuan thilsiam chhuah hi kan mamawh chawp zel a, leitu tur an awm zel (Supply creates its own demand) tiin a sawi a. Heti khawpa dawr te leh nepnawi dawr a tam chung hian a leitu an awm ve zel a ni. He khawpuia retail revolution thleng mek hi research bei a, zir chian tham a ni. A nawlpuia lak chuan Mizote hi sum khawl keuh keuh ai chuan hman ral awlsam chi kan niin a lang a. Khawpuia chengte tan phei chuan lei tur hi a tam khawp a; thil leina sum leng vel (urban consumerism) hian kan ram economy ah nghawng lian tak a nei a, khawpuia sum lengvak a tam hian hmun dangah pawh a zar an zo thin. Khawpui chhung leh Mizoram chhungah hian sum hi leng kual tam se, state pawna luang chhuak tur hi a theih chin chinah veng ila, chu chu kan economy insawhnghehna atan leh hmasawnna atan a pawimawh hle a ni.

Kan economy derthawng leh nghet lo tak mai leh kan hnam him la him lo tak mai tan hian ngun takin ngaihtuahna seng ta ila. Inrelbawlna tha (good governance) tha tak hnuaiah chuan zu zawrh te hian buaina leh harsatna a thlen nasa lem lo, sorkar inrelbawlna tha lo hnuaiah chuan zu zawrh phalna nei an awm avangin zurui an zalen a, zu vanga chhiatna leh thilhna a thleng tam thung. Chutiang zelin, mipui (consumer-te) lungawi lohna ber dawrkaiten thil man to takin an hralh thin chungchang te pawh hi inrelbawlna tha lo hrin chhuah a nih hmel. Kan ram tan hian a leitu atanga thlira thil man tlawm a zuar thei apiang lawm taka dawnsawn nge fuh anga tualchhung sumdawngte venhim a, sum leh pai luang chhuak tur ven bawk?

Facebooktwittergoogle_plusredditpinterestlinkedinmail

Ka Huang (March 26, 2017)

Ka huang February ni 19-a mi kha ka’n chhunzawm tawh ang e. Sialsuk atanga ka hawng phei leh kha – 84 days War End leave at home a ni na a, ka lerin ka lepchiah a ni ber ang, ka kham lo a ni ang chu, Assam Regimental Centre Shillonga ka zuk in report chuan ni 3 in ka la tlai ta hram, nimahsela hrem lohin ka chhuak thei e.

Shillongah hi chuan ka Hav/Clk thian, P. Ngurkhuma (RIP) nen Cinema hi kan en nasa teh a nia. Chutih lai chuan Kelvin, Bijou, Garrison Theatre leh Hippodrome (Happy Valley-ah) Cinema Hall a awm a, Singhania khu a la awm lo. Chu Cinema hall palia chhuak tur chu kan hre hler hlur mai a, ziakna bu te tak te, ah tham lek ah hian film hming, starring leh chhuah ni leh hall hming kan ziak a, kan lungkham ve em em ringawt mai a ni. Office lamah chuan thawh tura min tuk chu taima em em in kan thawk ngar ngar mai a, kan Record Officer, Lt. Jibeswar Chetia pawhin min duhin min duat reng a ni. Family allotment branch-a thawk kan ni ka tih kha, Money Order form a a receipt hi IRLA (Individual Running Ledger Account)-ah kan record thlap a, an pawisa hmuh ni nen vek. Chutah an original receipt chu a hrangin kan bel leh thlap zel thin, thil harsa a ni lo naa, an thawn tur MO-BA form chhut vek nen chuan hna a tam duh khawp mai.

Indopui II-na chu, Japan rama Hiroshima leh Nagasaki a Atom Bomb thlak avang khan, Japan rama a tlawm tak avangin, a tawp ta a. Allied sipai kha kan tam nasa mai si, Sap, Negroes, Indian kan inpawlh niai nuai mai a, Sawrkhar tan kan tul ta lo. Tichuan lehkha min pawhtir ta a – DV I leh DVR tiin. Kei chuan DVR ka pawt ta hlauh mai a, chu chu Deferred Volunteer Regular tihhna an tia, chu DVR pawt chuan thawh zawm zel a tum chuan kum 19 ngei ngeia thawh tur tihna an ti. Kan Record Officer pawh chuan pawi min tihpui khawp a, DV I chuan a awm emaw tiin 2nd Echelon, Jhansi te pawh a zuk zawt a, a awm ta si lo a, ban ka thlang ta nge nge a ni.

27-7-1947 atangin min release ta a, Shillong chu ka ruala bang ve thenkhat, Pachhunga te, Liankima te nen Aizawl kan pan ta a. Hetih rual hian St. Mary’s College-a tleirawl 2, Rozami leh Zodinpuii te’n min rawn kawp a, Sipai 4/5 leh tleirawl hmeltha deuh deuh 2 te nen chuan kan haw tlang ta a ni. Khatih lai khan Aizawl leh Silchar inkarah motor, A lu mak kan tih mai Sipai truck hlui, mi hausa ta a kal ve a, ni hnihah Aizawl kan thleng thei hram thin.

Silchar atang chuan ‘a lu mak’ hnunga dak khat tlata a phurh, tarpaulina a phuah chungah chuan kan thu far mai le. Vai dan takah koi surut-in Kawlasip kan thleng a. Diakkawna hotel an siam tan vel lai kha a ni. Kan vaiin Gorkhali hotel thar hlakah kan innghat a. A thar zia chuuh.. an hotel thar tuih zan chiah a lo ni a, an pawisa umin min thleng mai mai ni awm tak a ni. Khum hrang pawh a awm lo, dawh sanah kan vai pawha thawlna ah kan mu vek mai, mahse an tuih zan a nih avangin Thingdawl vai putarte khan eng hla hla emaw an sa zankhua titih mai, tinzu (zu sawr) an in a, an ri zankhua ve mai, Mizo tawng upate min leh zawh a, chhang thei aram pawh kan awm lo. A Mizo inti zawk chu kan ka hui hlawm mai. Kha vai hotal tuih zan kha ka theihnghilh thei lo. Kan tlaivar a ni ve ti tih mai!

Facebooktwittergoogle_plusredditpinterestlinkedinmail

Dr. Hrekima titi (march 26, 2017)

Zu kan in duh a nih rau rau chuan, patling zu inin, pawi khawih lo turin aw..
&&&&

PATLING ZU IN
Kan thiante nupa chu phaiah an zin a. Bangalore zan lam nun tem chhin ve chakin hun zalen hman tumin an lengchhuak dawn a. Anmahni lo mikhualtu, Bangalore-a officer tlangval hausa leh thian dang pahnih thum nen Brigade Road vela intihthawl ve an chak a ni. An thleninpa ber chuan taxi-a kal a rawt ta tlat a. “I motor-in kalila,” an tih chuan, “ Aih, zu ka in ve duh alawm!” a ti ta daih a.
Chu hun zalen zanah chuan zu a in ve duh tlat a ni. A lo in tam ve palh deuh pawhin zu rui chunga a thiante phurh haw chu a duh lo. A him lo tih a hria. Zana mahni motor ngeia han tlan chhuah a, zan rei lamah, motor dang leh mihring dang veivak pawh an tlem tawh hnua ring taka car tape play-a, rui phur tawka han te velte pawh a chakawm ve dawn nen maw! Kamding rualin taxi han phar zuk zuk velte chu a nihna nen pawh a inhmeh lo a ti ve lo em ni le??
Zu in hi chu a tha lo a ni. Mihring rilru a tidanglam thei a, mahni inthunun theihna a tichhia a, fimkhurna a tinep a, khawhawi hi a titawi tuk tawh mai thin a. Zu rui chunga motor khalh ngat phei chuhlauhawm tak a ni. Kawngpui a hmuh phir theih a ni a, a brake rah hun turah ke a chet muan palh vaih a, herh kawi hunah ban tha a zawi tlat mai chuan thil pawi a thleng tawh thin si. Chu chu he zu in tum pa hian a hre vek. Chuti chung chung chuan a in ve duh miau si a.
Mi fing, rilru hrisel, patling dik tak zu in ve duh chu an danglam hle. Zu a ruih avanga thil tha lo thleng thei chu a hria a. Zu a lo rui ve a nih pawha ama tan leh a thiante leh hmelhriat loh kalkawnga kal vel tan tala pawi khawih loh leh hnawksak loh a tum mai a ni.
Tum khat pawhan thianzaho zu in chu an phur tawh viau a. “Peg khat leh aw!” an intihchhawk sek laiin an thianpa pakhat chuan zan tir atangin Beer can khatna chu a la khal ta ngar ngar bik a. An thianten in belhtir ve an tum ngial pawhin a duh tlat lo. A chhan an zawh chuan, “Him taka hruaihaw che u hi ka mawhphurhna a ni a, ka rui thiang lo!” a ti leh mai. Zu in rau rauah Patling zu in hi chu an danglam maw le!
Zu in hi thil tha ni se chuan chupa chuan a in ve teuh ang. Zan dangah pawh a in hnem thei ber a ni thin si a! Zu hian pawi sawi thin lo se chu thiante peg zat chu a khulh thei ve khawp mai. Mahse chumi zan chuan motor khalh hawtu tur a ni tlat. A mawhphurhna hria a, a in tam duh hauh lo. Zu rui chunga motor khalh pawi theihzia a hria a ni, Patling nana na chu, zu an in ve a nih pawhin an danglam leh thin.
Hmannia ka enkawl pakhat pawh motor khalhtu a ni. A motor-ah chuan mi engemawzat a phur a, sum pawh a lalut nual dawn. Mahse a zing zu lo in ve chuan a rawn nghawng buai ta tlat a. Daipawn an thlen hma deuh chuan mi tam tak nunna a kuta awm mekte chu an thlir a. A tlin dawnin a inhre lo. A phurhte chu a chhuktir a, motor dangah a chuantir ta vek a. Sum tam tak a hloh phah.
Zu hi tha se he pa hian sum a hloh lo ang. Mahse a ni zu rui kuta mi tam tak nunna innghat tur chu a ngai ngam ngang lo a ni. Zu hi tha nise chuan engvangin nge mi thih leh dam nen thlunzawm kher a ngaih ang? Zu in hi zawng a tha lul lo mai. Zu in mi hian an hre vek. Mahse zu in duh rau rau, patling leh patling lo hi chu an danglam leh tlat thin.
Zu duh tam tak, rilru hrisel lo, patling tawk lo hi chuan anmahni chiah an inngaihtuah a, an ruih chuan an duhtawk. A dawt leh thil thleng tur an ngaihtuah thleng tawh lo fo. Motor an khalh dawnte hian, “khalh thiam tawka ruih theih” nite hian an hre tlat pek a!
Zu in ve chak zawng zawngin hei hi hre teh se. Zu hi a tha reng reng lo. Kawng engkima chhiatna thlen thei a ni. Zu in miah loh hi a tha ber. Mahse, i in luih duh miau si chuan mi tan hnawksak hauh suh. Pawi khawih lo turin fimkhur sa rawh. Mi tana hnawksak loh leh mi pawikhawih loh hi a patling zia em em a ni. Zu kan in duh a nih pawhin, Mizo pa, patling dik tak zu in dan tur ni awm tak hi ngaihtuah teh ang u. Patling hi chuan mi pawi sawi leh mi tana hnawksak hian hlau thin.

Facebooktwittergoogle_plusredditpinterestlinkedinmail

Login

Lost your password?