Monthly Archives: April 2017

Feature : Gutkha-ah beihpui thlak

Tunlaia thangthar ten an ei nasat em em, drugs leh zu ang ema thil pawi a ngaih ni si lo, mahse taksa tana thil pawi tak thlentu chu Gutkha hi a ni awm e. Thalaiten an ei nasa a, dawra zawrh khap ni mah se lei tur a awm reng tho. Gutkha product zingah chuan Shikhar hi a lar ber leh Mizoramah chuan ei nasat ber a ni awm e.

Aizawl Civil Hospital-a Casualty duty Doctor te chuan Shikhar ei vanga damdawi in pan an awm deuh reng niin Zalen an hrilh a. Shikhar chu taksa tan a pawi nia sawiin pumpui lawng, luakchhuak, luhai leh thil dangten a thawk thin tih an sawi a. Hetianga an awm tawh chuan an natna hi a dam mai mai thei tawh lo nia sawiin tih loh/ei loh a him ber niin an sawi bawk.

Mizoram State Tobacco Control Society (MSTCS) thawktute chuan tunhnaiah thalai ten Shikhar an ei nasa chu pawi an ti hle tih an sawi a. Gutkha chu Food Safety and Standards Authority of India dan hnuaiah khap tlat a ni tiin remchang hmasa berah beipui thlak turin an inbuatsaih mek niin Zalen an hrilh bawk.

Sports Association-a hruaitu pakhat chuan an naute zingah a ruka Shikhar ei an tam hle tih a sawi a, heng mite hi infiamna ah pawh an tangrei thei lo bik nia sawiin pum nuamlo, luna leh thildang insawiselna pawh an nei nasa bik nia a hriat thu Zalen a hrilh.

Aizawl khawpui damdawiin pakhata duty Nurse chuan a thiante zinga Shikhar eite chu an tha a fei lo bik hle niin a sawi a. Operation Theatre ah te hun rei tak tak ding chunga duty te a ngai thin a, heng hunah te hian an ding rei thei lovin luhai ten an awm mai thin niin a sawi bawk.

Mi thil chikmi thenkhat chuan tunhnai Independence Day leh Republic Day lawmnaa parade-a tel school naupangte an tlu nasa thin lutuk pawh an riltam vang chauh ni lovin shikhar leh thil dang taksa ngeih loh zawng hmawmsawm an ei thin vang nia a rin thu a sawi a. Parade naah kum upa, sipai bang kum 80 chuang te pawh harsatna awm lova an awmtluan theih laia darkar chanve em pawh school naupangte an ding tluan thei lo chu mak a tih thu a sawi bawk.

Hetih lai hian dawrkai pakhat chuan Shikhar chu zawrh hreh mahse lei tum an tam thin em avangin an zuar ve tih Zalen a hrilh a. Shikhar chu a lang chuan an dah ngam lo nia sawiin lei tum an awm hunah an phawrh mai thin a. Zirlai mai bakah nu leh pa zingah pawh ei an thahnem hle niin a sawi bawk.

Facebooktwittergoogle_plusredditpinterestlinkedinmail

MSCPS – CWC case 1043 leh JJB 349 an chingfel

Aizawl: Kum kalta April 2016 atanga March 2017 inkar chhung khan Mizoram State Child Protection Society (MSCPS) chuan case 1392 an chingfel a, heng te hi Child Welfare Committee case 1043 leh JJB case 349 te an ni.

Mizoram State Child Protection Society thawktute hnen atanga Zalen thudawn danin Child Welfare Committee (CWC) hian nikum chhung khan case thar 1064 an dawng a, kum hmasa lama case pending 47 awm te nen a vaiin case 1043 an chingfel hman a, case 68 chu kumin chhunga ngaihtuah chhunzawm turin an dah. Case ngaihtuah chhunzawm tura dah te hi la chinfel theih chiah loh, naupang dinhmun en chunga ngaihtuahna la sen leh turte an ni. Nikum chhung vek khan tleirawl/rawlthar te ngaihtuahtu bik atana ruat Juvenile Justice Board (JJB) chuan case thar 347 dawngin kum hmasa lama pending nen a vaiin case 349 an chingfel a, case 92 chu la ngaihtuah chhunzawm zel atan an dah bawk.

CWC case neih zingah hian ngaihthah (neglected), khawsak harsa, nu leh pa enkawltu mumal nei lo, naupang tlanbo, nu leh paten an sawisak leh enkawltu mumal awmloh vanga CWC kuta hlan te chu a lianzual te an ni. JJB case neih zingah rukruk chu a tam lawrlak a, rukruk bakah hian pawngsual leh mi tihnat tuma beih te chu a langsar zualte an ni.

Zalen zawhna chhangin Mizoram State Child Protection Society thawktute chuan an case tam zawk 90% vel chu nu leh pa inthen, nu emaw pa emaw chhungte emaw in an nu leh pa inthen hnu a an enkawl zui an ni tlangpui tih sawiin, nu leh pa kar a awm pawh an awm tho tih an sawi a. An case neih reng reng hi veng khat a a mawng lam deuh an ni tlangpui a, hnam dang Aizawl a rawn pem lut case nei an awm nual rualin a tam zawk chu Mizo dik tak an ni tih an sawi. Zawhna chhangin MSCPS thawktute chuan naupang Observation Home leh Special Home-a dah te chu an chawr chhuahna chhungkua (family background) a zir leh thil an lo tawnhriat tawh a zirin an tha hlenin an tha hlen lo a. Fel tak a awm zui ta an awm laiin sual zui leh nghal an tam niin an sawi bawk.

Facebooktwittergoogle_plusredditpinterestlinkedinmail

ACH-in quality assurance hmu

Aizawl: Aizawl Civil Hospital chuan National Quality Assurance Standards atangin Accreditation Certification a hmu thar a, hetiang hi India ramah dawng thei pahnih chiah an la awm a, Civil Hospital hi a dawng thei pahnihna niin a hmasa ber chu Panchkula Civil Hospital, Haryana a ni.

Civil Hospital, Aizawl Medical Superintendent Dr K.L.Remsanga hnen atanga Zalen thudawn danin NQAS in a tum ber chu sawrkar damdawiin hrang hrangte quality tha an neih theih nana hmalak leh quality tha an pekchhuah theih reng nana hmalak te an ni tih a sawi a. Hemi atan hian guideline leh endikna chi 3000 chuanga damdawiin te endik a ni a. A thawh khatna atan heng endikna hrang hrang hmang hian April 2016 chhung khan endik a niin a endiktu mi 3 an lokal a, uluk taka an endik hnuah tun hnai khan an endikna result hi tichhuakin Civil Hospital, Aizawl chu accreditation an pe ta tih a sawi.

NQAS accreditation certification hi kum 3 chhung atan pek phawt a ni a, lawmman ah hamthatna tur thil hrang hrang bakah khum pakhatah Rs. 5000 zel a keng tel. Accreditation Certification hi kum 4 hnuah endik leh a ni ang a, tuna an point hmuh 70% atangin 5%-ah tal an san a ngai dawn a ni.

Quality Assurance hnuaiah hian damdawiin fai intihsiakna ‘Kayakalp’ pawh kalpui a ni a, Civil Hospital Aizawl pawhin kum 2015 khan district hospital fai ber nihna lain lawmman atan cheng nuai 50 a lo dawng tawh a ni. Civil Hospital, Aizawl in accreditation certification a dawn ang hi Kolasib leh Champhai a Civil Hospital ten an dawn ve theih nan hmalak mek a ni.

Facebooktwittergoogle_plusredditpinterestlinkedinmail

Veterinary Day 2017 hmang

Aizawl: Nimin khan AH& Vety Department, Mizoram State Vety Council leh Indian Veterinary Association huaihawtin World Veterinary Day 2017 chu Aijal Club-ah hman a ni.

Veterinary Day hmanna a khuallian AH & Vety Secretary B. Lalthanliana chuan Mizorama mi tam zawk chu antibiotics mahni thu a inchawh leh course dik taka ei loh pawizia hrethiam lo kan nih avangin, hetiang hun hman a ni chu lawmawm a tih thu a sawi a. Antibiotics hman fimkhur chungchanga inzirtirna chu tun aia uar lehzual tul a tih thu a sawi bawk. Ran an hrisel loh chuan an bula cheng mihringte pawh a hrisel theih loh tiin mipui leh kan ran vulh te an lo hrisel zawk nan thahnemngai taka thawk turin mipuite a ngen bawk.

Day hmanna ah hian Dr.Lalhriatpuii, Scientist ICAR chuan kumin World Veterninary Day thupui “Antimicrobial Resistance – from Awareness to Action” a sawi a, ran vulh than chakna atana antibiotics pek chu a sa eitu mihringte tan a tha lo hle niin a sawi. Dr. Lalhriatpuii chuan India ram chu antibiotics hmang nasa ram kan nih thu sawiin antibiotics hman nasat ngai lo tura mihring leh ran te hriselna enkawl uluk a tulzia a sawi bawk a ni.

World Veterinary Day program hi Dr. Jasper Rongura, Jt. Director, AH&Vety-in kaihruaiin thupui zirho leh sawiho na hun hman a ni a. Chawhnu lamah Indian Veterinary Association (Mizoram Chapter) General meeting leh hruaitu thlanna hun hman nghal a ni.

Facebooktwittergoogle_plusredditpinterestlinkedinmail

Gen. Cox-an hun hmang dawn

Aizawl: Salvation Army, India Eastern Territory kum 100 tlin chu lawm chhunzawm zel a ni a, nimin khan a lawmna hmun R. Dengthuama Auditorium-ah thalaite puala hun hman a niin General Andre Cox te nupa in hun an hmang a ni.

Vawiin chawhma inkhawmah General André Cox hnen atangin Pathian thuchah ngaih thlak a ni ang a, chawhnu dar 2:00 atangin Centenary March of Witness neih tum a ni bawk a, Pathianni zan inkhawmah General André Cox chuan Pathian thuchah a sawi dawn a, General hi naktuk hian a haw ang.

Facebooktwittergoogle_plusredditpinterestlinkedinmail

CHAMUL sum Finance-ah dil

Aizawl: Champhaia bawng vulhtute bawnghnute man ba rulhna tur sum chu Finance department-ah dil mek a ni.

Zalen-in a kawmna ah AH&Vety Secretary B.Lalthanliana chuan December 2015 atanga May 2016 inkar chhunga bawng vulhtu chhungkaw 46 te bawnghnute man ba tlingkhawm chu Rs. 25,37,940 a ni tih a sawi a. Hei hi department chuan rulhsak a tum mek a, Finance department-in an remtih chuan hun reilo teah pek theih beisei a ni tih a sawi. AH&Vety Secretary chuan bawnghnute hi a hralhna a awm that loh avangin tunah chuan Kahrawt leh Hmun -hmeltha a bawng vulhtute ta chauh lak a ni tawh niin Zalen a hrilh bawk.

AH&Vety department thawktute chuan sum ba a awm chhan chu duh anga hralhna a awm thatloh vang a ni tih an sawi a. “NLUP hnuaiah bawng vulh an pung a, an bawnghnute tharchhuahte lei loh theih a ni lo a. Mahse, a market a awm leh si loh avangin tam tak tak a chhe leh thin a, chuvangin leiba hi a awm phah ta a ni,” tiin an sawi.

Bawnghnute man an hmuh theih loh avang hian Champhaia bawng vulhtute chuan April 4, 2016 atang khan Chamul Managing Director Lalchungnunga Pudaite (DVO) pisa kai tur chu an dang a ni.

Facebooktwittergoogle_plusredditpinterestlinkedinmail

Truck-in pitar hnawl hlum

Aizawl: Nimin zing dar 7:45 vel khan Aizawl atanga Champhai pan 207 Truck MZ 04-7437, Mapuia Champhai Kanan veng khalh chuan Dulte khua ah kawngsira bike ding chu hnawlin bike hian a bula lo awm Sanghluni (65) leh Dengzeli te chu a vua a. Damdawiin pan pui tum an nih lai zing dar 8 pelh hret khan Sanghluni hi a hliam tuar lovin a boral a, a ruang hi nimin khan post mortem niin vawiinah vui a ni ang. Dengzeli pawh hian a khel leh a lu na a tih vangin Aizawl panpui a ni. Motor khalhtu leh neitu ni bawk Mapuia hi Khawzawl Police te chuan thu zawhfiah turin an la nghal a, zu a nam niin an sawi.

Facebooktwittergoogle_plusredditpinterestlinkedinmail

Mobile ICTC vangin thisen test pung

Aizawl: Mizoram State Aids Control Society (MSACS) atang thudawn danin Mizoram chhunga Mobile Integrated Counselling & Testing Centre (Mobile ICTC) kalpui a nih avangin thisen test-tu an pung.

MSACS hotute chuan Zalen palai zawhna chhangin Mobile ICTC chu district tinah 1 dah a nih thu an sawi a. Aizawl ah chuan Mobile East leh Mobile West te an awm thu an sawi bawk. Mobile ICTC te chu counsellor leh lab technician te’n an enkawl thu sawiin hmun hla zawka awm damdawi in pan rem lo te, nau pai te, damdawi ti thinte tan Mobile ICTC-ah hian thisen test a awlsam bik thu an sawi bawk. Mobile ICTC-te hi Central Jail ah thla thum danah an kal \hin bawk a, FHI360 Sunrise Project hnuaiah HIV Prison Intervention neih a nih thu sawiin MSACS hotute chuan hemi hnuaiah hian thla tin vawi 1 an kal ziah thu an sawi bawk.

MSACS hotute chuan thingtlang hmun hla tak taka Mobile ICTC te an kal theihna turin sum duh ang a an pek theih loh thu an sawi a, thla khat chhungin an kal tam hleihtheih loh thu an sawi bawk. Thudawn danin tunah hian Mizoramah Integrated Counselling & Testing Centre hi 28 awmin Mobile ICTC hi 9 a awm mek a. MSACS website in National Aids Control Programme hnuaia Mizoram dinhmun a tarlan danin October 1990 a\anga December 2015 chhung hian thisen test tawh zat hi mi 343,687 an ni a, heng zingah HIV Positive chu mi 11001 an ni. HIV inkaichhawnna tam ber hi sex vang niin kum 25-34 inkar zingah HIV Positive an tam ber a ni.

Facebooktwittergoogle_plusredditpinterestlinkedinmail

Bus 6 lei thar

Aizawl: Transport department chuan tunhnai khan Mizoram chhunga service tur bus 3 leh Mizoram pawn (inter state) a service tur bus 3 an lei thar.

Mizoram chhunga service tur bus te hi chu an lo thleng tawh a, State dang (inter state) a service tur bus te hi Nowgong (Assam) ah a body sak a niin karleh lam chuan a lo thlen beisei a ni a, heng bus te hi Shillong leh Guwahati ah te service tir an ni ang. Inter state a service tur hi deluxe bus a niin mi 31 chuang thei tura siam an ni.

Facebooktwittergoogle_plusredditpinterestlinkedinmail

Adoption regulation oreintation

Aizawl: Social Welfare Department (SWD), Government of Mizoram chuan Central Adoption Resource Authority (CARA) nen tangkawpin April 28, 2017, Zirtawpni nileng khan State Level Orientation Programme on Adoption Regulations, 2017 chu an buatsaih a, he hunah hian Adopton kaihhnawiha hnathawk pawl leh mimal thahnem tak telin Mizoram SWD Secretary, P. Lalchhuanga’n a hmanpui bawk a ni.

State Level Orientation Programme on Adoption Regulations, 2017 ah hian CARA lam atangin CARA Deputy Director, Binod Sahu leh CARA hnuaia Mizoram state coordinator, Surabhi ten thupui hrang hrang hmangin zirtirna an nei a. CARA Deputy Director, Binod Sahu chuan fa lak (adoption) chu thil pawimawh tak a nih thu sawiin, “Adoption hmang hian naupang te nun thar kan pe a, chuvang chuan kan la thu tak hle tur a ni,” tiin kalkhawm mipuite hmaah a sawi a. ‘Adoptions under JJ Act, 2015 & Adoption Regulations, 2017’ leh ‘Role of DCPUs and CWCs in Adoption’ tih thupui hmangin zirtirna hun a hmang a ni.

CARA State Co-ordinator, Surabhi pawhin Child Adoption Resource Information and Guidance System (CARINGS) hman dan zirtirna a nei a. He programme-a kalkhawm te hian CARA Deputy Director, Binod Sahu leh Mizoram SWD Jt. Director Laldikkimi te kaihhruaina hnuaiah Adoption chungchanga thil pawimawh sawihona hun an hmang bawk a ni. He hunah hian zirtirna hrang hrang pek niin dan anga fa lak chunchangah hian mi tu pawh fa la duh te chu sawrkarin a hriatpui Specialised Adoption Agency (SAA) ah online in mahni a in ziah luh theih a, hetah hian thil \ul dang pawh kawhhmuh zel an ni dawn a ni. Fa la duh ten thutlukna mumal tak an siam theih nan leh fa lak chungchanga hriat tur pawimawh zawng zawng hrilhhriat leh fa la tu turte buatsaih chu SAA mawhphurhna a ni tih tarlan a ni.

Facebooktwittergoogle_plusredditpinterestlinkedinmail

Login

Lost your password?