Monthly Archives: April 2017

LC insiamrem

Aizawl: Republic Veng Local Council chairman T Vanlalruata leh Treasurer ten party hriatpuina anga an nihna an bansan hnu ah nimin khan Republic veng Local Council chu hetiang hian mawhphurhna an insiamrem LC chairman ah Lalengmawii, Vice chairman Lalremtluanga, Treasurer HD Renthlei. Member te T Vanlalruata, Lalramnghaka,F Vanramsanga, Rohlupuii te an ni.

Facebooktwittergoogle_plusredditpinterestlinkedinmail

Larsap leh CM in red beacon la thla tawh

Aizawl: Sawrkar laipuiin VIP light ‘red beacon’ lakthlakna tur dan a siam hnuah Mizoram larsap Lt.Gen. Nirbhay Sharma leh Chief Minister Lal Thanhawla te chuan an lirthei atangin VIP light hi an la thla tawh.

Ministry of Road Transport & Highways (MRT&H) chuan April 20, 2017 khan Central Motor Vehicles Rules, 1989 siam\hatna tur a duan chhinna (draft), Central Motor Vehicles (Amendment) Rules, 2017 chu a tichhuak a. He dan duan thar hi hman a nih chuan VIP light hman theih a ni tawh dawn lo a ni.

MRT&H thuchhuakin a tarlan danin he dan thar siam that hi chhuah a nih atanga ni 10 chhungin sawisel duh emaw siamthat rawt duh te chuan Joint Secretary (Transport), Ministry of Road Transport & Highways, Transport Bhawan, Parliament Street, New Delhi-110001 ah thawn tur a ni a. Ni 10 hnua hman a nih chuan May 1, 2017 atanga hman a ni dawn a ni.

He dan siamthatah hian Central Motor Vehicles Rules, 1989 hman mek a rule 108 na in a sawi, lirthei chunga eng sen, var emaw pawl chhi thei tur Central emaw State sorkar mi pawimawh te, state sorkarin a eng pawl a chhittir te, mi pawimawhte escort-tute chhit thin eng pawl te, ‘state sorkarin motor chunga eng a chhittir te central sorkar a hriattir tur a ni’ tih te, ‘sorkar mi pawimawhte an chuan loh lai a nih chuan motor chunga eng chhit te chu cover dum a khuh tur a ni’ tih inziahna ho rule 108-na a sub rule 1 hnuai clause (iii) leh clause (iv), sub-rule 2, 3, 4, 5 leh 6 te chu paih vek a ni tawh a ni.

Facebooktwittergoogle_plusredditpinterestlinkedinmail

Heroin man

Mizoram Excise & Narcotics Department te chuan Zirtawpni tlai dar 4:30 khan Zotlang veng-ah heroin gram 13 (Hawng khat) leh a neitu nia puh C. Rosangi (45) d/o Vungzaliana, Mimbung,Champhai Dist (tuna Zotlang, Aizawl-a khawsa mek) nia inchhal chu an man a. Zirtawpni tlai vek khan Chhungte Veng, Champhai-ah Heroin gram 223 (Hawng 16) leh a neitu nia puh Hrangkapruma (39) s/o B. Vanlala, Zotlang, Champhai nia inchhal an man bawk.

Facebooktwittergoogle_plusredditpinterestlinkedinmail

Khar dawn

Sawrkar laipuiin India ram hmun hrang hranga digidhan mela/fair a neih kharna hun chu May ni 2,2017 (Thawhlehni) hian neih tur a ni a. Mizoram ah pawh chawhma dar 11 hian I&PR Auditorium ah khar hun neih tum a ni a, Chief Secretary Lalmalsawma khuallian a ni ang.

Facebooktwittergoogle_plusredditpinterestlinkedinmail

Thisen pe

Nimin khan a mamawh apiangte hman turin NE Tlangnuam SU ten Aizawl Civil Hospital a damlo mamawhte tan thisen unit 19 an pe a. Zemabawk Vengthar Branch KTP in an rising day pualin Synod Hospital ah unit 21 an pe bawk. Nimin vek khan Sialsuk South Branch YLA te pawhin Lawngtlai damdawiin a hman turin unit 36 an pe a, Thalai Kristian Pawl, Thingkah Unit leh Peneil Unit ten unit 15 an pe bawk a ni.

Facebooktwittergoogle_plusredditpinterestlinkedinmail

The week that was (April 30, 2017)

CM-in thlen
Chief Minister Lal Thanhawla chu ni 23.4.2017) Pathianni khan New Delhi-ah Prime Minister Narendra Modi hova NITI Aayog Governing Council thutkhawm vawi 3-naah a tel a, NITI Aayog ngaihpawimawh zual bik chungchanga Mizoram Sawrkar hmalakna leh hemi kawnga harsatna leh Central Sawrkar puihna hrang hrang a mamawhte dante bakah Mizoram mamawh a thlen.

Larsap in sawm
Mizoram Governor Lt. Gen. Nirbhay Sharma chuan ni 24.4.2017 (Thawhtanni) khan Aizawl Footbal Club Player leh officials te chu Raj Bhawan-a lengah sawmin Inrinni kal taa an chak lawmpuina thingpui a inpui.

Sawrkar dem
Ni 24.4.2017 (Thawhtanni) khan BJP President Dr. JV Hluna chuan Aizawl Press Club ah press mite a kawm a, CSS Hindi teacher te thawh zawmna atan leh Mizoram sorkar hnathawkten 7th pay an hman theih nan Mizoram sawrkarin hma a la lo niin a sawi.

Thlang
Mizo Academy of Letters (MAL) chuan kum 2016 chhunga Mizorama lehkhabu chhuak zinga tha ber atana Lalhruaitluanga Chawngte ziah ‘Aizawlah Aizawler’ tih an thlang.

Zirho
Ni 24.4.2017 (Thawhtanni) khan Police Officer-te pualin pawisa note thar Rs 2000 leh 500 note lem manchhuah zung zung theihna tur leh mipuite tana tangkai tur inhrilh hriatna, ‘Training on sensitization & identification of New currency note’ chu Aizawl SP Conference Hall ah neih a ni.

Crime review
Ni 25.4.2017 (Thawhlehni) khan DIG Northern Range huam chhunga awmte tan crime review meeting neih a ni a, nikum January- March aiin kumin 2017 January-March-ah thubuai ziahluh a tlem tih tarlan a ni.

Malaria
Kum 2016 Jan-Dec chhungin Mizoram mipui thisen exam zawng zawng mi 267747 niin heng atang hian Malaria vei hmuhchhuah zat chu mi 7583 an ni a, PV mi 1676 leh PF 5907 an ni a, nunna chan mi 9 an awm tih ni 25.4.2017 (Thawhlehni) a World Malaria Day hmanna ah tarlan a ni.
Thukhawm
Centrally Sponsored Scheme (CSS) hrang hrang Mizoram chhunga kalpui dan enzuitu State Level Vigilance & Monitoring Committee chu ni 25.4.2017 (Thawhlehni) khan Rural Development Minister R.Lalzirliana hovin Secretariat Conference Hall, Aizawlah an thukhawm.

Centenary lawm
Salvation Army India Eastern Territory kum 100 tlin lawmna chu ni 25.4.2017 (Thawhleh) zan dar 7 khan R.Dengthuama Indoor Stadium, Salem Veng Mualpui ah tan a ni a, Centenary mei chu Commissioner Lalngaihawmi, Territoial Commander chuan a dep kai a ni.

TB thi 29
Ni 26.4.2017 (Nilaini) khan I&PR Conference Hall-ah TB chungchang thlirhona meeting neih a ni a, chhinchhiah danin nikum 2016 chhung khan Mizoram chhungah TB vei mi 2149 hmuhchhuah niin mi 29-in an thihpui.

Hmanpui
Mizoram Governor Lt. General Nirbhay Sharma chuan ni 26.4.2017 (Nilaini) khan Salvation Army, India Eastern Territory Centenary lawmna hun R. Dengthuama Multipurpose Hall, Mualpui -ah a hmanpui.

Hruaitu thlang
Mizoram Upa Pawl chuan ni 27.4.2017 (Ningani) khan Vanapa Hall ah general assembly an nei a, kum 2 chhunga an pawl hruaitu thar an thlang.

Khawmpui
Mizoram Government Doctors’ Association (MGDA) Annual General Conference 34-na chu 27.4.2017 (Ningani) khan Aijal Club-ah neih a ni a, Health & Family Welfare Minister Lal Thanzara’n a hmanpui.

Hawng
Law Minister Lalsawta chuan ni 27.4.2017 (Ningani) khan Aijal Club ah Mizoram sawrkar hnuaia Public Prosecutor leh Advocate te intahhriamna atana buatsaih ‘Training of Public Prosecutors & Government Advocates’ chu a hawng.

Tanlak tum
All Mizoram Farmers’ Union (AMFU) hruaitu thlan tharte chuan ni 27.4.2017 (Ningani) khan charge an inhlan a, kumthar ah chuan a taka ei leh bara Mizoram a intodelhna turin tanlak leh zual an tum tih charge an inhlannah hian an sawi a ni.
&&&&

Facebooktwittergoogle_plusredditpinterestlinkedinmail

Mizoram Economic Survey & a behbawm

Assembly session zawh takah khan Mizoram Economic Survey pharh a ni a. Kum hmasa lam zawng aiin Economic Survey hi a bu a chhah a, a kim chang zawk bawk a. A buaipuitu Planning & Programme Implementation Department an fakawm khawp mai. Mizoram Economic Survey ah hian tun hnai kum hnih khat chhunga Mizoram economy dinhmun kim chang taka tarlan a ni a, kan ram dinhmun zir chiang duh tan a chhenfakawm khawp ang.

Mizoram economy hmasawnna kum 2015-16 chhungin za zela 9.18 leh 2016-17 chhungin za zela 9.06 tling tura chhut a ni a, hei hi India ram pum (economy) thanna aiin a sang zawk a. Kum 2015-16 chhung khan state sum thawh chhuah zawng zawng (GSDP) Cheng vbc 13,277.78 tling tura chhut a ni a, chu chu mi tinin kan insem theih zat/mi pakhat thawh chhuah zat hisap (Per capita income) chu Rs 95,317 a ni a, India ram pum huapa mi pakhat sum thawh chhuah zat Rs 93,293 aiin a tam zawk nghe nghe.

State sum indaih lohna leh leiba hi ngaihthah mai chi a ni ta lo. State sum thawh chhuah (GSDP) atanga za zela chhut chuan tun hnaiah a tlahniam viau a, mahse, leiba zat tak erawh a pung viau thung. Kum thar (2017-18) chhunga leiba zat hi Cheng vbc 7,177.99 ni tura chhut a ni a, chu chu state sum thawh chhuah zawng zawng (GSDP) atanga chhutin zaa 40.87 a ni. Budget-a a lan danin kum hmasa lama kan leiba dinhmun atang pawh hian leiba hi a veiawm hle tih a lang thei awm e – kum 2013-14-ah Cheng vbc 5,608.38, kum 2014-15-ah Cheng vbc 6,550.39, kum 2015-16-ah Cheng vbc 6,407.39, kum 2016-17-ah Cheng vbc 7,290.17.

Sorkar laipui atanga sum dawn a tam zel a, sorkar hnathawk hlawh a pung zel a, NLUP leh thil danga sum tam tak hman belh zel a ni bawk a, kum hmasa lam aiin sum lo luang lut a tam zel avangin a chunga sawi tak state sum lak luh/thawh chhuah (GSDP) pawh khi a pung zel a. Finance minister-in budget pharh ruala a sawi danin kum 2017-18 chhunga GSDP thanna tur zaa 13.05 ni tura chhut a ni.

Heti khawp hian state sum thawh chhuah hi a pung a, a lawmawm khawp mai. Mahse, pawisa pung hi tute kutah nge luh? A insem rual tha em? tih hi ngaihtuah ngai chu a ni. Heng pawisa hian mi rethei zawkte hnen a thleng phak lo a, a nei sa te hausakna tipungtu lek a nih chuan hmasawnna tak tak a thlen chuang lo tihna a ni ang. State sum thawh chhuah leh mimal tin thawh chhuah zat chhut a (GSDP leh per capita income) a punna hi hmasawnna tehfung pawimawh taka ngaih a ni na a, a insem rual that leh that loh erawh a hril tak tak lo thung.

Chuvangin, mi thiam tam tak chuan sum leh pai pung zel hian mi rethei leh harsa zawkte hnen a thlen mumal loh thin avang te, mi hausa tlem tete hausakna tipungtu mai a nih theih avangin hei hi tehfung dik berah an ngai lo a. Kan ram dinhmunah pawh hian mi rethei zawkte hi an bet rengin a lang a, state chhunga sum che vel a pun zel vanga hmasawnna chak taka a kal anga ngaih hi a dik tawk lo thei tho a ni. A tawi zawngin, state sum lak luh pung zel hi mi rethei zawkte hnen a thleng pha meuh lo a nih chuan hmasawnna a kai rual tawk lo tihna a ni a, mi tlemte sahmim tihpuarna mai a ni.

Economic survey-a a lan danin eizawnna peng hrang hrang (economic sector) zingah Service Sector hian a thawhhlawk ber a. Service sector chu thiamna leh hriatna hmanga eizawnna hi a ni mai awm e, Mizoramah chuan service sector a thawhhlawk ber chu sorkar hnathawkte hi an ni a, sumdawnna peng hrang hrang, hotel/restaurant, damdawi in, zirna in, media leh a dangte a huam bawk. Kum 2015-16 chhunga state sum thawh chhuah/lak luh zawng zawnga a zatve aia tam 55.64% chu service sector thawh chhuah a ni. Sorkar hnathawkte hlawh hian a thawhhlawk viau a ni.

Lo neih lam leh a kaihhnawih eizawnna hna (Agricultural/primary sector) hian kan ram economy-ah 18.75% a thawh ve a, thilsiamna tenau kan neih ve te (industry, quarrying, manufacturing) hi Industry sector an ti a, kan ram economy-ah 25.61% an thawh ve a ni. Industry sector a thawhhlawkte chu electricity, gas, water supply leh utility service hrang hrangte an ni.

Ngun zawk a ngaihtuah chuan Mizoram mipui tam ber, 60% vel te innghahna leh eizawnna lo neih leh a behbawm (agriculture & allied activities) thawh ve hi a bei tham hle. Chumiin a entir pawimawh tak mai chu kan ram sum 19% hi mihring 60%-in an insem a, NLUP leh sorkar hmalakna hrang hrang kalpui hnuah pawh lo neitute hi a rethei ber ber an la ni reng tihna a ni. Lo neih bansan an tam tawh nia an sawi lai hian mipui zaa 60 zet chu an la inhnangfak tihna a ni a, bansan chiangkuang lo an tam tihna pawh a ni thei ang. Engpawh nise, kum nga tal tap NLUP kalpui a ni ta a, lo neitute eizawnna erawh a la hlawk lo hle reng a nih hi.
Ram hmasawnna kalphung pangngaiah chuan a tirah lo neih lamah hmasawnna a thleng a, chumi hnuah thilsiamna lam (industrial sector)-in hma a sawn leh a. Lo neih leh a behbawma eizawng tam takin thilsiamna lam an bawh a, industry sector a hmasawnna chuan service sector a chawm a, nasa takin a lo thang thin a. Tunlaiah chuan ram hrang hrang economy khai dingtu ber a ni tawh. Mizoramah hi chuan lo neih lam (agriculture sector) ah hmasawnna a la thleng tak tak lo a, hman atang tawhin sorkarin hmalakna ropui tak tak a lo nei tawh mah se a la hlawhtling tak tak lo. Industry sector-ah kut benna tham hmasawnna a la thleng lo bawk. Chutianga sector hrang hrang a tahtawla thang lo chuan kan service sector hi a thang ta vak a, kan economy innghahna ber a ni ta a ni.

Economic survey a a lan dan chuan kum khat chhunga kan state buhfai mamawh zat hi 1,80,000 MT vel a ni a, kan rama buh thar chhuah ve 62,089 MT a ni a, kum khat chhunga kan mamawh zaa 34.49 chauh kan thar a nih chu. Kum 2015-16 chhunga buh chinna leilet zau zawng chu 17,302 hectares a ni a, 12th plan (2012-17) tir lam khan 12,700 hectares a ni a, chumi awmzia chu NLUP kalpui hnuah leilet hi 36.24 % in a zau tawh tihna a ni. Chumai a ni lo a, buh thar pawh 31.54%-in a pung bawk.
Tlangram lo neih zau zawng pawh 11th plan (2007-2012)-ah 44,947 hectares a ni a, nasa taka tlahniamin 2015-16-ah chuan 19,851 hectares a lo ni a, kum sawm chhungin 55.83%-in a tlahniam a nih chu. Tun hnai kum ruk kal ta, NLUP hun chhung (2010-2016) hian tlangram lo zau zawng hi 30.50% velin a tlahniam bawk. Hei hi NLUP hlawhtlin vang niin an sawi thin a, tlangram lo neih bansan an tam hle tihna a ni. Lo neiha eizawng pawh hi kum 6 chhung (2010-11 leh 2015-16 inkar) hian chhungkaw 68433 atangin chhungkaw 48417 ah a tla thla a, 29.25% in an tlem tawh tihna a ni. Rei lote chhunga eizawnna danga insawn an tam hle chuan kan economy a nghawng viauin a rinawm a, mipui nawlpui dinhmun pawh inthlak danglam viau tur chu a ni. Mahse, Economic Survey hmasa lama a lan dan chuan (NLUP bul tan lai velah pawh khan) lo neih leh a behbawm a eizawng 60% vel tho an ni a. An tam lam hi za zela chhut chuan NLUP hmalakna tawp tawh lamah pawh a la ngai reng tho hi thilmak tak a ni.

Mizoramah hian (MNF sorkar laia bul tan) Oil Palm ching an tam ve ta hle a, chin theihna tur ram 24.78%-ah chin a ni tawh a, tunah hian ram 22,027 hectares-a zauah chin mek a ni a. Chin theihna ram zawng zawng hi 1,01,000 hectares zet a zau a ni. Oil Palm hi nungchate hnawt botu leh a chinna atana ramngaw tha lai tihchereu thin a nih avangin khawchhak lam ram thenkhatah chuan an bansan tan tawh a. Keini chu sorkar hmasa leh tuna kan sorkar hian an tuipui viau mai a, ram tha lai kan chan hnem avang leh nungchaten an tawrh avangin kum 20/30 a vei leh chuan kan la inchhir ngeiin a rinawm. Ram hmasawnna kan buaipui hian hmasawnna tlo (Sustainable development) chauh hi tuipui ila a duhawm khawp ang. Hmunphiah, Rubber leh Oil palm chinna atana ram tha lai vah chereu chiam hi nakinah kan la inchhir ngeiin a rinawm.

Facebooktwittergoogle_plusredditpinterestlinkedinmail

Ka Huang (April 30 2017)

Chawlhni hmasa (23-4-2017) a chhuak tur kha ka puah peih ta lo a, kum a tam ve ta a, sawisel theih apui a tam ve ta a ni ber awm e, ka chumi, ka khami tih tur a kat ve ta nuk mai!

Kum 1948 kha chu a liam ta mai a, kum 1949 khan Offg. L.P. Zirtirtu hna ka thawk a – January atanga December thlaa Primary zirtirtu (nupui nei lo) hlawh zawng zawng chu Rs. 1,045/75 paise zuk nia! Thla khatah Rs. 87/17 paise tihna a nih chu. Heng hun lai hian Lushai Hills chuan RCA (Ration Compensation Allowance) kan hmu a, market rate-in thla tin an chhut a, nupui fanau nei chuan RCA dawbawl, keini ke pahniha mu chuan single RCA kan dawng a. Nupui neiin an hlawh tam zawk zel tihna a nih chu.

1949 atanga 50 chhung chu lote ka nei vel a, 1951 December-ah Forest Guard-ah ka tang a, thla riat emaw lek ka thawk a, ka hlawh chu Rs. 72/- p.m a ni. Bilkhawthlirah min dah a. Kum thar 1952 chuan Aizawl lam Forest Guard 2 sai sual tiriral turin an lo thlawh thla a, chu sai sual chu ni 29-1-1952 khan ka’n kap ve ngawt mai a, a cheng dek ve thiam lo ta chu, a haw lo kher mai. Chutah Pu Bawktaian a’n kap ve ta a, pasaltha a ni bawk a, chalchang nei miah loin a kap thlu ta a ni, sai sual e ti loin a lian vak lo, a bawk hnawk kha chhipzawn vel chu ni awm tak a ni. Chhun lai vela kap thlu kan ni a, a nawn an tan hmawk a, Tv. Nawla nen min chantir a, kan nilenpui der tho mai. Tlahthi siam pawl an awm a, sai sa hi chema chan harsa tak a lo ni, Rawthla tlahthi hi a tha, a daih rei lo mai pawh a (He kan sai kah ni hi ka lo dah tha ve khiah mai!). Chuti chuan 1952 chu Bilkhawthlir velah ka hmang ral ta a ni ber mai. Heta ka awm chhung hian phai ka ngeih loh avangin, malaria te ka vei a, ka na sek mai.

Takin a, kum 1949 December thla khan, Aizawl Bawrhsap, Pu S.Barkataki chuan saza kap tura a tirh zingah ka tel ve a, kan hlawhchham a, a tukah kan kal leh a, Sairang kawng mek 8 ruam kawng chhakah khuan U Dengroa nen huallutah kan tang a, chumi ni chuan kan kap ta. Bawrhsap chu a jeep leh trailer rawn thawn turin kan chah a. A fanu pahnih, Lulu leh Bonti an lo chuang ve, saza chu trailer-a dahin driver Indana chhiarin mi 11 jeep-ah kan han inhnawh tehreng a, nuam ve tak a ni. Bawrhsap bangla hulhliapah kan zalh zan mai a, Pu Bara pawh a lawm ngei mai, whiskey um a rawn la chhuak a, kan tauh barh barh mai. Ni 31-12-49 zan chuan Bara khana a siam a, ramchhuakho pawh chu min sawm ve a, fatu hluiah kan ei ve phak, Mizo takin thlangraah vek kan ei. Saza kaptu chu Pu Bawlliana, Sikulpuikawn, Peter’s Street khi a ni. Nuam ve tak asin.

Kum 1952 khan, khatih laia NEFA (North East Frontier Agency) an tih thin – Naga Hills Tuensang Area tiha Capt. L.R.Sailo (Kelsih lal fapa) kha Political Officer-a a awm avangin thian pakhat nen kan chhuak ve rawih mai a, Lower Division Asst.-ah min khawngaih lak ve a, chuta tang chuan Burma ram dep, Noklak out post-ah min dah ta a ni. Naga Hills – Tuensang Area chu NEFA atanga la hrangin Nagaland-ah an rin lut na a, rorelna leh engkim chu Adviser to the Governor of Assam-in direct-in a enkawl a ni.

1953 (chu kum 63 liam ta thil a nih chu) te kha chuan an la mawl ve em em a, hmeichhe pawnfen chu inches 8 vela hlai a ni. An inbual ngai lo, an ti a tha em em a, an sei tak tak hlawm mai, an awmna hmun a zo vang a ni mai thei. An thu lang lo si nia.

Mipa chuan hrenpereng (lengta) an hreng tawp mai bawk a, chu chu an ni tin inhak dan a ni.

Konyak leh Upper Konyak an tih phei chu Adama suit takmeuh an la ni. Republic Day-in lam turin Bawrhsapin Konyak paho a ko a, Tuensang lammualah, a laiah Governor Jairam Das Daulatram khan a fanu nula 2 rawn hruaiin kan Republic Day chu a rawn chhim a, pachang ruak ngan ngat mai 100 emaw lai an han lam kual mup mup mai chu, thên thei apui a tam khawp a, Governor fanu pakhat chuan khati zozai zak map lo kha a la hmu ngai bik lo a niang, a au ta vak vak a, a ât phah ta an ti. Nula, pachang Z.. la hmu ngai reng reng lo tan chuan a ruala 100 vel thên suau suau mai han hmuh kha rapthlak deuh tur a ni, ât phah pawh a mawh lo e.

Chu tih lai chuan, Asst. Political Officer, Lashkar leh Base, Supdt. Bora lah chu phawk ta reng reng, foot rule an keng a, ziak loh bu nen, “A nei sei ber chu Bawrhsapin lawmman a pe dawn,” tiin an lo tehsak a, a sei zawng an record vel a! Engah mah an ngai lo tak meuh a ni.

Kan kal tirh chuan nula hnute kawh nalh deuh mai, ngo deuh hnute lehnghal han hmuh hian, tlangvala pumpa han ….. nawk nawk hi a chakawm thin. Thi hi an awrh nasa a, an thla kan lak dawn hian an thi kha dah thatsak a, siam rem vel a awl khawp mai, siam rem lah chu a harsa duh phian a!!

Ka han awmna piah, Burma border kan va tlawh chuan zan thle eng hnuaiah hmeichhehoin min lâm khum a. An hla sak chu ‘Thongbu hong pe, ti kiua dha’ tih hi an sa a, key 2, rang mawi em emin. A awmzia: Sawrkar an lo kal sia, eng tak min pe ang maw?’ tihna a ni. Chi bag 5/6 te kan pe ve mai, Political issue atangin. LDA chauh ka ni; mahse, thu a buai a, an insah dawn mai avangin (Khristian vs Non-Khristian) Bawrhsapin min tir tawp mai a, ka han lal kal ve mai. Ka sawi rem ve thlup mai!!

Facebooktwittergoogle_plusredditpinterestlinkedinmail

Dr. Hrekima titi (April 30, 2017)

“Min ring chuang lo a, ka rilru a na a, ka rui leh law law mai,” an ti fo nia!
&&&&

AN AWIH NGEI TUL HUN A LA AWM DAWN
Ama chanchin a ziahna lehkhabu Days of Grace-ah chuan tennis khel thiam hmingthang Arthur Ashe chuan kum 17 a nih laia a thil tawn chanchin a ziak a. West Virginia-a tournament an khelh tuma thil thleng a ni. Chu tournament-a mihang inkhel awmchhun a ni lehpek bawk a.
Zan khat chu tleirawl thenkhat hian infiam mite thlen in pakhat chu an suasam chiam a, an tichhe nasa hle mai a. Arthur Ashe-a tih anga sawi turin an inthurual thap mai a ni awm e. Chu thil thleng chu chanchinbu lamah te hial a lang zui ta bawk si a. Arthur-a chuan han pha ngial mah se tleirawl rual lam chu an tangrual ruh ve tlat bawk si a. A hrehawm a ti em em mai a. Arthur-a hlauh ber zawk phei chu a pain a lo hriat hunah eng nge a sawi ang a, engtin nge a tih ang tih a ni. A tawpah chuan hreh takchungin a pa chu biakhlatnain a be hmasa ta nge nge a.
A pa chuan thil thleng chu a lo hre tawh nghe nghe a. Lungngai aw ki hniam vawt raih mai hian a pa chuan zawhna pakhat chiah a zawt a. “Arthur Junior, ka hriat duh zawng chu.. I tih a ni em?” a ti a. Arthur-a chuan, “Aih, ka pa, ka tih a ni lo,” a ti mai a. A pa chuan vawikhatmah a zawt nawn leh tawh lo.
Chumi tum chuan Arthur-a chuan dawt sawi ngai lo tura zirtir thin a nih chhan chu a hre chiang ta uar uar a. Engtikniah emaw chuan a thil sawi chu miin an awih ngei tul hun a awm dawn a, chumi hun chu tun hun hi a ni tih a hre thiam chiang khawp mai. Tun hma atangin a pa rin a hlawh tawh miau a, chumi tum pawh chuan a thusawi chu a pain a awih tih a hre chiang khawp mai. A pa berin a thusawi a awih avang chuan hlauh tur dang a nei tawh lo. Chumi ni atang chuan dikna nunpui a tum nghet lehzual ta a ni.
Drug addict ka enkawl thin a. An han nghei ve renrawn a, an rawn ti leh thin a. An chhuanlam tam tak chu, “Min ring chuang lo a, ka rilru a na a, ka rui leh law law mai,” tih zuk ni fo a! Drugs an tih laiin dawt an sawi a, mi an bum a, thil sual an lo ti hnem tawh a. Nun han siam that ve an tum pawhin miin rin mai harsa an ti tawh thin reng a ni. Dawt sawi fo thinte hian thu dik an sawi pawhin awihsak an har fu. Esopa thawnthu fingah kan zir thin kha.
Naupang pakhatin beram a veng a, beram seh tum chinghnia an lo kal miah loh laiin, “Chinghnia! Chinghnia!” tiin a au chiam thin a. Thu tak emaw tia amah tanpui tuma mipui lo tlan khawm vel thin chu a lo nuihzat thin a, a hlimawm riauin a hria a ni awm e. Ni khat chu chinghnia a lo kal ta tak tak a, mangangin a au chiam chiam a; mahse, miin dawt bawk a sawi leh a nih an ring a, engahmah an ngaihsak duh ta lo va, Chinghnia chuan a beram chu a sehsak ta teuh a nih kha. Dawt sawi hrat takte pawh hian engtik niah emawchuan thu dik an sawi ni chu a awm ngei ang. Miin kan thu sawi an rin ngei a ngaih hun a la awm dawn. Rin kan hlawh ang em le?
Mi min rinna hi hlawhchhuah chi a ni. Hlawhchhuah dan kawng khat chauh a awm. Dik taka nun a ni mai. Mi kan rin takte kan rin loh taka an awm hian rin leh an har khawp. Mi rinna hloh hi a pawi thui thei. Inrintir leh tur chuan hun rei fe dik taka nun phawt a ngai.
Thu dik kan sawi ve tumah pawh miin an awih tlat loh chuan buaithlak khawp ang. “Min ring mai rawh,”ti tun tun kher lo pawha kan thusawi an awih ngei tul hun a la awm dawn si a.

Facebooktwittergoogle_plusredditpinterestlinkedinmail

Sikul te’n library nei rawh se

Mizoram Journalist’s Association chuan an library chu ram chhunga a tha pawla thlan a nih vangin lawmna hun an hmanga, he hunah hian library lama mithiam te chuan thangthar te’n lehkhabu chhiar an ngaihthah chu pawi an tih thu sawiin lehkhabu chhiar chu ngaia innneih tir turin tan lak a tul thu an sawi a. Sikul te chuan library nei vek se lehkhabu chhiar uar lamah hma kan sawn theih a beisei awm niin an sawi bawk a ni.

Technology-in hma a sawn zel a, awlsamna mihringin kan zawng zel bawk a, lekha chhiar awlsam dan pawh a piang zel a. Tunlai angah phei chuan tablet leh phone hi thil chhiar nana kan hman tam ber pawl chu a ni tan der tawh a. Mahse heng thil te hi thil tangkai tluantling chhiar nan erawh kan hmangin a lang lem lova, hriatna thuk zawk paw chhuak tur phei chuan innghah nan a tlak meuhin a hriat lem loh a ni. Tuna mihring nihphung hrim hrim hian rilrua nghet taka vawng tura a phak tawk nia lang chu lehkhaa inchhu ngei chhiar tih a chiang hle a ni. Lehkhabu atanga a chhiara chhiar ngei hi chu rilru pawhin a vawng rei zawk bawk a ni.

Tuna sikul naupang te hi lehkha chhiar tihphunga neih tir an tul hle a, an zirlaibu hi chu an zirlai chauhin an chhiar anga,lehkha an zir chhuah hunah thil dang chhiar tumna an neih loh chuan an than a thu dawn tih pawh a lang reng awm e. Duhthusamah chuan lehkhabu chhiar hi inchhung atanga ngaia inneih tir ni sela a tha ber a ni. Nu leh pate pawhin thuamhnaw leh electronic bungraw manto tak takin fate an vur a; tam tak chuan chumi aia man tlawm lehkhabu leisak na an ti leh tlat a, inbihchian a tul hle a ni.

Tunhma deuh khan English medium te hian ‘reading class’ an siam thin a, library an nei zo chiah lo a nih pawhin reading class ah lehkhabu an sem a, zirlaite’n a tahtawlin an chhiar mai thin kha a ni a. Kha khan ‘reading habit’ thuk tak a tuh ngei a rinawm a ni. Tunlai sikul tam tak chu co-curriculam tha tak tak nei tawh te an ni a, rimawi thlengin an inzirtir thei tawh a. College ah te library hi awmfur mahse reading habit chu naupan lai atanga intuh ngai a nih avangin kan sikul te hian library neih tum theuh sela a that a rinawm a, Sawrkar pawhin hemi kawngah hian theihtawpin hma a lak a pawimawh khawp ang.

Facebooktwittergoogle_plusredditpinterestlinkedinmail

Login

Lost your password?