Monthly Archives: May 2017

Vawk chaw khawn kual thin tlangval nazawng hi an lo zuamawm dawn loh tawp mai!

KA KAWMTHLANG TLANGVAL

Kekawrbul ha chungin kawngka a rawn kik a, bucket a rawn khai lut a. A tihtur chu kan hre mai. A tihthan danin choka pawn lam chu a pan nghal a, kan chaw nawi khawl sa chu a rawn la a, kan lo dah khawlna chu a tleuh fai a, lawmthu sawi pahin a chhuak mai thin. Chutiang chuan vawi tam tak a rawn ti thin.

In ka sak zawh hlim khan thing bung laklawh, ka thuka tuah atana sei si, dah that dawna hlu lutuk si lo chu inhnuaiah ka chhek vum nual a. Tan tawi ila, ek phel ila, thlasika ai atan dah tha ta ila chu kum tam min daih hial ang. Mahse ka ara bil tak leh ka hreite ringawt chuan ka huphurh a ni.

Vawk chaw la thin tlangval chu vawk chaw chhumna tur thing an duh leh duh loh ka zawt a. Lei atan pawha an duh thu min hrilh a. Hralh tul ka ti lem lo. Hnathawh thawmhnaw dik tak nen an pafa liin an rawn thiar a. Khawpui tlangval, Mission venga sei lian ni siah chuan thing han put vel pawh an zeiin an chak roh fu mai a. Rei lote chhungin an thiar zo thuai mai. Lawmthu lah chu an sawi sek lehnghal a. Ka tana hnawk min thenfaisak avangin kei lah ka thawveng huai bawk.

Kan kawmthang lawka awm an ni. Ina ka awm remchan lai takin vawkchaw tur chu a rawn khawn leh ta a. Ka be lum lam ta mai mai a. Chu tlangval kekawrbul ha, sek lem lo tak, nula try dun dawn ta ila ka huphurh lem loh tak tur, a hawiher vel ena cho awm ve tak, a inngaihtlawm avanga zuamawm taka lang chu zuam chi a lo ni awmzawng lo mai!

Vawk chaw chhum nana mi thing bung khawmtu, vawk chaw atana thenawmte chaw nawi khawn kual thin, ka kawmthlang tlangval Robert-a chu Engineer a lo ni pek a! Chennai atangin B.Tech (Computer Science) a zawh hnuah Bits Pilani, Rajasthan atangin M.Tech (Software System) degree lo zuk nei reng a!

Bharat University, Chennai ah PhD a la ti mek zui! A PhD tihna chu englam nge tih ka zawt a, ka bo nasa lutuk. “Cloud computing,” a ti a, “A nih tak chu,” tiin ka hre awm vel mai mai!

He Engineer tlangval vawk chaw la thin hi MZU IT Dept ah Guest lecturer a lo ni leh nghal a. MZU ah vek Asst Professor hna a hmu dawn a ni awm e, appointment a la chhuah chiah loh avangin a tawng tim khawp mai. A hnathawhna chu hla tak a ni. Bus in a kal thin.

Thawhnaa a zin ve dawn tum hian Lengpui Sumo-ah a chuang thla hmiah zel ni awm e! Taxi a hmang ngai lo. Rs 80-120 vel a seng thin a ni awm e. A uikawm vang a ni lo tih ka chiang!

A bulah chuan kan te chem chem mai dawn alawm le! Mi hi an awm mai mai hmel leh an nihna tak tak hi a lo inang lo thei dawn khawp mai. Thahnemngai fal ten Mizo thalaite chu lehkha zir peih lo, thatchhia, hna thawh hreh zawng nei tlat, engmah ni mang si loa gas put leh bus-a chuan zak, chhungkaw tana tangkai lem lo, ruihtheih thil leh lirthei duh huam anga min sawi vek mai thin hi a lo nih lem dawn loh hi.

Ka kawmthlang tlangval Robert-a anga zahawm tak tak hi Mizo tlangval zingah hian an tam ka ring tlat. Mizoram hmakhua thlira thawpik thlak riaua hre thinte tan pawh thlamuanpui huai huaina tham an ni e.

Facebooktwittergoogle_plusredditpinterestlinkedinmail

Ka Huang (May 28, 2017)

Kum 1996, March ni 1 khan MNF hruaiin indipenden kan puang a, hei, hmanni lawk mai kha emaw tih chhungin, a teha teh ralah chuan kum 51, thla 2 leh ni 27 (1-3-66 to 27-5-2017) a lo ral ta reng mai. Kum 50 hnuai lamho tan chuan ram ram buai kan tih mai te kha history an tih hi a va ni mai awm ve!

Kei pawh hian Ralleng rama buai kha ka nin hlauh em a vangin, Head Clerk ni tawh mah ila, ka pa thih chhuanlamin Mizorama LDA hna kha ka thlang zawk a nia, ka thawk fel ve deuh chauh a, Independen kan puang ve leh ta mai sia- Ekna ngaiah bawk ka e leh ta a ni ber mai!

Civil Surgeon, Aizawl hnuaiah ka thawk a, ti khan 1-3-1966 atang khan independen kan puang ta thut mai sia, thenkhat kha chu min barakhaih hle hlawm awm e. MNF sipai khan, “A buai dawn chauh, insaseng thei chu lo insaseng rawh u,” tih vang khan, fa nu 2 leh fapa 2 nei, a naupang ber 23-12-1946 a piang hruaiin kan chhungte awmna, Khawrihnim kan pan ta a. A upa pahnih chu mahniin an kal thei a, a pathumna chu ka’n kaltir a, a tlu a, hruichun hrui te a pal nen, kan paw leh a. Kan chhungkaw puan thuah leh buhfai no 10 vel leh dal tlem, ka ak bawk a, hnung lam atang chuan ka lang thei lo a ni ber awm e! Kan te ber chu a nuin a puak a tul si, Eng tin tin emaw Khawrihnim chu kan zuk thleng rawih mai a. Kan fate an la a mawl nasa si, chaw ei lai te hian ghee te, dal te an han ngen ta thin a, a hrehawm teh a sin.

Office a clerk hna thawk ka nih si avangin, ni 9-3-1966 chuan Aizawl kan pan leh ta a, Kulikawn thlen hma ngaizelah sawn tute’n emaw, “Flag var tar ula, lut ang che u, chuti lo chu sipaiin an man mai ang che u,” min ti a (Ka nupui fanaute chu Khawrihnimah khan an awm a ni). Tichuan, engmah hlauhawm tawk loin, in ruak chu ka thleng ve ta a. Aizawl khawpui chu chutih lai chuan ‘Ghost town’ an tih hi niawm tak a ni, a thing tih piah lam a ni ber mai. A tit hian kan ti dui mai a ni. A tuk lamah chuan office chu ka va kai ve a. MNF sipai khan hmar lam atanga rawn nawrin jail te leh civil hospital leh a bula kan office te kha an la vek a, lungin tang te kha an chhuah vek nghe nghe a, mi A e A lo e, an chhuak fai vek mai a ni.

Kan office chu tute’n emaw an lo suasam nasa mai a,an hal bawk sia, Nagaland atanga ka record tha zawng zawngte pawh chu a kang fai hneh ngei mai. Kan pawisa dahna bawm chu a chabi loa hawn theih miah loh chi a nia a inkalh tha than a, rit tak mai quintal chanve aia rit a ni hial ang. Chutih laia kan Civil Surgeon chu M.Bora a ni. Tih ngaihna a awm si loh avangin, thir mistiri ruaiin ahnung lam atangin chheniin a chik hawng ta ringawt a, CS hoin kan thlir thap reng a ni. A han hawn pawh chuan a thingrem chu kan pawt chhuak thei chuang lo. Pawisa chu a fai hneh em em khawp a, lehkha nawi tlem leh pawisa pali tlang (one anna bit)chauh a awm. Pawisa pali chu hna khat kan ti bawk a, tlukpui chu pawisa 6 ang vel a nih chu. Kan office kalte hi a titin kan ti dui reng mai a, Assam rifles HQs kha chu la ni se chu kan zia pawh a awm deuh mahna. Gorkhali sipai te tak te pawh hi ‘Salute’ kan pe lo chauh a ni tawh mai si, Mizo kha chu sipai e, police e, rin kai kan awm lo a ni ber ang. Chukchu ben thelh an sawi ang mai kan ni, kan beng hi kan chhi hru vek mai.

Ka nupui fanaute pawh Khawrihnim atangin an lo chho leh tawh a, Sikulpui kawnah khian Dr. Thantluanga in Rs. 40/- pm-in kan luah ve a ni. Zanah pawh kan mu nghet hlei thei lo. Sipai lamin tunge MNF tunge MNF lo an hre hrang chuang si lo. Chua chhapah mahni taksa him nana KAWKTU, mi hek ching an han awm tam rang khawpa (Mizo khristian hi???). Kei pawh chu office hna ka thawklai hi, sipai an lo kal a, “I u-in a be duh che,” tiin min ko chhuaka, ka rin hriat avangin, ka thiante hnenah sipaiin min man ta a ni tih hrilh hawng turin ka chah nghal mai a.

Quarter Guard-ah min dah a, chu tak chuan Gorkhali Havilder major ( bel thum leh lallukhum) hi an lo lock-up ve bawk a, case hran a niang, kan vanneih phah ang reng khawp mai. Min vengtu ho kha chu ‘Ei, Ganglia’ te a ti mai mai a, biri uri, kuhva ilo pawh a zar kan zo hle. Khang 1966 lai te pawh khan pumpui thur, thip vung vung reng mai ka nih tawh reng avangin, digene tablet hi a stripin ka ak reng thin. Pumpui thur vanga pumpui na hian chaw ei mumal loh hi a haw tak tak a, a na reng mai a ni. Tichuan, ni 4/5 emaw kan awm hnuah Aizawl police lock-up ah min hruai phei leh a, vai police hlir an ni. Kan ipte min dapsak a, ka digene neihchhun pawh chu min chhuh leh ta bawk si. Lock up-ah zan khat (?) kan riah hnuin Aizawl jail (Central jail awm hma)-ah min bun thla leh ta a. Chuta min vengtute pawh warder ni loin CRP ho an ni. Jail hi insiam thatna tur emaw kan lo ti thin a, Fin phakar/chalak zir-na hmun a lo ni. Mei zuk tur ilo, kamram takngial pawh inpek phal a ni lo, chaw erawh an phal. (ka tan dawn chauh, dam chuan leh pek zelah aw)

Facebooktwittergoogle_plusredditpinterestlinkedinmail

DRUGS OVERDOSE ENKAWL DAN

Overdose (OD tia kan sawi lar) hi emergency, thihna thlen fotu a ni a. A enkawl dan hriat chuan chhan theih a ni a, a lan chhuah dan hriat loh chuan an ti der emaw tih mai tur ang te a ni thei a, hriat chian a pawimawh hle a ni. Overdose kan han tih hian damdawi (drugs) hrang hrang hi a OD theih a, amaherawhchu damdawi thenkhat hlauhawm zual a awm nual awm e. Chuvangin tun bikah chuan Opiate Drugs ho (Heroin te, Proxyvon, khuh damdawia an ruih ber Codeine te) leh Benzodiazepines (Diazepam, Alprazolam, Nitrazepam etc) te hi kan thlur bik dawn a ni.

Opiate drugs bikah hian ruihsual nana an hman common ber chu Heroin hi a ni a. He damdawi hi a hmang tam ber chu an inchiu a, tlem a zawng chuan an chase (a khu an hip) thin bawk. A damdawi hi phal loh anih vangin a powder form in damdawi bur ruak Vial ah emaw, Insulin syringe chhin senah te an dah mai a, a lo kalna a hriat loh a, a chak dan (strength – engzat mg nge awm) a hriat loh bawk. Chutiang avang chuan ‘chhinsen’ chanve rau rau pawh hi a lo kalna a in an loh chuan a milligram (mg) a dang thei a ni. A hmangtu hian a dose zat hi chhinsen chanve nia a hriat laiin a mg zat a lo san si chuan a OD phah thei ta reng a ni. Tin, drugs ruihtheih chi chuan tolerance an tih mai, a dose mamawh zat sang tial tial ang hi a thlen ngei ngei a. An nghei vang vang hian an tolerance a lo tlahniam a, an han tih let thut hian an tih hnuhnun ber dose ang kha an inchiu leh fo mai a, chu chuan OD a thlen fo bawk a ni.

Opiate drugs hian thluak a boruak hip lut tura taksa control tu ‘Respiratory Center’ a han block thei a, chu chuan boruak hip lut tura taksa che vel a ti tlem a, an thaw tlem tial tial a, boruak kham loh vangin an thi ringawt thei a ni. A dang leh ah chuan an inchiu luh khan thisen zamah thisen khal/khar a lo insiam a, chu chu lung (heart) ah lutin a chhuak leh khan chuap a boruak lo dawngsawngtu Air-Cells te a dang chat a (thromob-embolism), boruak an hip lut thei lova, boruak tlachham bawkin an thi thei a ni.

Opiate drugs vanga OD an awm chuan a lan dan chu: an thaw tlem hle a (5 seconds ah vawikhat pawh thawk loh chang a awm fo), nikhua an hre mumal lo va, an kut hmawr leh hmui a lo duk a, an taksa a ro a, chuan a hriat chianna lai ber chu an mit naute (pupils) hi a zim set mai bawk a ni (pin-point pupils). Mit naute hi withdrawal (chiri) ah thung chuan a zau huau thung.

Hetiang anih chuan a tira enkawl dan tur chu:
1. Airway – a thawk luhna lamah block tu a awm loh nan a sir zawnga muttir tur a ni a (duhthusamah chuan an ding lamah), hrawk vela chil hnawhtu a awm chuan syringe hmanga hip fai vat tur a ni bawk.

2. Breathing – An thawk that theih nan an dul mar lo turin a khup pakhat zawk tal tawm tir tur a ni a, mouth to mouth resuscitation (a ka a boruak ham luh) tih a tul bawk ang (anmahni a an thawk mumal theih loh vangin).

3. A marphu leh BP check theih chua a tha hle bawk. A taksa lamah hliam a neih leh neih loh enchian ni bawk se.

4. Chuan damdawiin lam a rang lama panpui ni bawk se. Pan mai a remchan loh chuan hospital damdawi dawrah te hian an nei deuh vek tura ngaih a ni a, Inj.Naloxone – 1 ampoule i/m a chiu tur. A emergency viau chuan I/V pawhin a chiu theih. Naloxone hi Opiate antidote a ni a, nunna chhan theihna damdawi (life-saving drugs) a ni.

Facebooktwittergoogle_plusredditpinterestlinkedinmail

GIG Motors Pro Volleyball League; 3rd MAP lakah TNT an chungnung

Zirtawp zana Pro Volleyball League match hnihna khelah TNT chuan an khingpui 3rd MAP chu set nga an khelhpui hnuah an hneh hram a, he intihsiaknaah hian chakin bul an tan.

Nizan inkhelah hian Player of the Night atana thlan TNT spiker Jatin Singh chuan point 34 thawk chhuakin point 18 a hloh thung a, feet 7 leh inches 2 ngawt sang hi Mizo hlanga khel Police player ten an chelh lo a ni ber mai. He inkhelah hian set khatna hi TNT lam hian an la nghal a, mahse, Police lam hian rawn bei let ve letin set an rawn la leh zui a, set thumnaah harsa vak lovin TNT lamin an rawn la leh a, inhnentawk taka set lina inkhelah Third Sentiniel an chungnung zawk a, mahse, set tawpna berah harsa lem lo takin TNT lamin set an rawn la leh zui a, 25-18, 26-28, 25-21, 25-27, 15-11 in an chak ta a ni. Chak zawk TNT hian point 2 an hmu a, police lam hian chak lo zawk ni mah se, set hnih an lak avangin point 1 an hmu ve thung.

Ninzan khan Chhinga Veng leh Hunthar te an inkhel a, Hunthar lam hi an vawikhat khelhna tur anih laiin Chhinga Veng hi chuan Ningni zan khan Ramhlun Sporting Club chu 3-0 in an lo hneh tawh a ni.

Inkhel tan zan hian Chhinga veng hian Ramhlun Sporting Club chu 25-21, 25-14, 25-21 in an hneh a, he inkhelah hian Gurinder Singh chuan Chhinga Veng tan point 13 hlap chhuakin vawi ruk tisual mah se “Player of the Night’ lawmman a dawng. * Mandeep Singh chuan Gurinder ang bawkin a khel tluan zak a, point 12 hmuin vawi nga a tisual ve thung.

Chhinga Veng ang thovin RSC-in Pro Volleyball an khelh vawi khatna a ni a, state pawn atanga an lak luh chhun Vicky Suresh Chandra chuan point 15 thawk chhuakin point riat a hloh.

FIXTURE
May 29, 2017 (thawhtanni):
Power v Electric Veng (women)
May 31, 2017 (nilaini) :
TNT v Hunthar (mipa)
Jun 1, 2017 (ningani) :
Chhinga Veng v 3rd MAP (mipa)
Jun 2, 2017 (zirtawpni) :
Ramhlun SC v TNT (mipa)

Jun 3, 2017 (inrinni)
: Hunthar v 3rd MAP (mipa)
* Inkhel hi zan dar 8-ah vek ?an tura ruahman a ni a, LPS 1-ah live-a pek chhuah vek a ni ang.

LAWMMAN
Mipa
Pakhatna : Rs 1,00,000 & trophy
Pahnihna : Rs 60,000
Semifinalist (2) : Rs 35,000
Pangana : Rs 20,000

Hmeichhia
Pakhatna : Rs 50,000 & trophy
Pahnihna : Rs 30,000
Pathumna : Rs 10,000

* League inkhel bikah match money – a chakin Rs 1,000 leh a chak lovin Rs 500 an dawng ang.

* Inkhel apiangah player tha ber leh fan tha ber (mi mal) thlan ziah a ni.

* Mipa leh hmeichhe team tin hnenah cheerleader’s tanpuina Rs 5,000 theuh pek a ni.

Facebooktwittergoogle_plusredditpinterestlinkedinmail

Sawhkhawk (May, 28, 2017)

Sawhkhawk of the week

In Chanchinbu hi regular taka chhiar vetu zinga mi ka ni a, an sawisel luih luih lai cheu pawha lo tan ve tang tang thin cheu ka ni a. Kei chuan tan man hi in awm ka ti tawlh tawlh mai. In tihsual leh dik lovah tan in la niin ka hria a, chu chu a chhiartute hian kan hre thei khawp a nia. Pathianniah hian chanchinbu dang a chhuah loh vang nge, a ngaihnawm ve hrim hrim vang ka hre lo va; mahse, in chanchinbua in chhuah hi chu chhiar a manhlain chhiar chhuah dap a awm bik riauin ka hria. Sawiselna lai tur chu in awm lo tawp chu a ni tawh lo va; mahse, in tan phawt chuan hengte pawh hi a ziaawm chho zel ang tih ka ring tlat a, tan han lain han ngaihnawm zel teh u. – Chhantei

Pu chhuanliana thu ziak hi ka chhiar ziah a, a ngaihnawm ka ti thin khawp mai a. Chutih rual chuan a kum upatna a lang ve tan niin ka hmu, a ziah tawh hnu a ziak ta zeuh zeuhvin ka hria. A ngaihnawm dan chu ngai reng mah se tun hma chu a pha ta lo deuh em maw ni ka lo ti ve. Chutih rual chuan dam reng turin duhsakna ka hlan a, a thu ziak hi kan hmaih ngai miah lo a ni. – Asawmi

Pu chhuanliana, Zalen chanchinbua i thu rawn ziah tawh zawng zawng hi a buin rawn chhuah teh. A tak ngeia i tawn a ni a, a ngaihnawm si a, ka ngaisang khawp mai che. – Chhuanliana fan

Zalen chanchinbu hi tan han teh u, chanchinbu dang pawh ni tin kan hmu a, a man kan chawi ve tho si a, thla khatah chawlhni vawi li chauh pawh khaw nawm loh vanga kan hmu lo hi chu a semtu thiam loh nge a chhututen in chhu hman lo tih hi a latute hian kan hre duh a ni. – 9436360899

Miin an sawisel tawh thin cheu em ka hre lo va, kei chuan ka chhiar ve tawh chinah hi chuan in fakawm khawpin ka hria. In chanchin thar ziah pawh a huap a zau khawp mai. In chanchinbu hi a phek zawng zawng chhiar deuh zel chi ka ni ve a, sawiselna lai tur cheu ka nei ve vak lo. Chhut sual hi chu hetiang zar chhut chuan a awm ve zauh zauh lo thei lo niin ka ngai hmiah a, in eizawnna mah ni se fimkhur vek zen a ni lo vang tih ka rinpui cheu a ni. Chutih rual chuan hmasawnna tur nei miah lo chu in ni lo va, in tan zel chuan hei aia tha hian in chhuah thei tih ka chiang, tang zel teh u. 8794686442

Ram rorelnaa Kohhran leh pawl a inrawlhin ram a kal dik thei ngai lo. Kaisara thilte chu Kaisara hnenah an tih ang khan ram chu roreltu Pathianin a ruat a, Kohhran pawh chutiang bawkin. Hmanlai Europe ram kalphung kha, Kohhranin mi a khaihlumin a hal hlum thin a nih kha. Ram rorelnaa Kohhran a inrawlhin ram a kal dik thei ngai lo. Tin, kan Zoram Kohhranpawh hian zu hi a do takzet a nih chuan wine, entir nan Sacrament-ah hian sem tel tawh lo se, a chhang ringawt hi sem tawh zawk se.A entirna pawh zu entirna a nih chuan huat awm tak a ni si a. YMA leh pawl anga sual kan do a nih pawhin kan tih tur chin leh kan tih loh tur chinte hi kan thliar thiam a tul takzet. Hel pawl emaw, pressure ni awm ziazawnga sorkar thutlukna siam lo dodal fo mai pawh hi kan tih tur a ni lo. Ram hnuk khawih thil pawh ni lem lova kan inrawlh thlazen mai hi chu intheh lar kan tum hrim hrim emaw ni aw tih theih tak a ni. – 8575155647

Pathian leh a Kohhranah hian han nghet phawt zel mai ila, a lo hahdam ber mai. Chhiartu duhtak, engtikah nge i Pathian hi i tawh dawn i hre lo va, kei pawhin ka hre lo; chuvangin, i awmna hmun apiangah Pathian hi tih la, a thupekte vawng la, a chhandamna che hi pawm la, i Pathian tawk turin inpeih rawh le!! – 8974232935

Ringtu nih hi a harsa lo va; mahse, ‘Ringtu dik tak’ nih hi a lova harsa em! – 8794686442

Zu zawrh a that loh chuan,’ an ti fo hi a ninawm ta e! Kan thurin bu, Bible duh loh zu zawrh hi Mizo Kristian tan a tha thut dawn lo va, a tha lo zel bawk ang! – 9774354495

Kei zawng, ei rukna hi hnawk ka ti ber mai. Ringtute hian huat tur dik kan hriat a hun ta viau e. Engpawh nise, Pu K.L.Liana thu ziakte hi lo chhiar ve thin tan chuan ringtu ni kher lo tan pawh ngaihdan dik neihna tham a ni e. Zu hi mihring tichhetu a nih rualin mi hlemhle, tawngtai duah hluah, ei ruk hreh si lote hi ram leh mihring hmelma a nih zawkzia ziah/sawi duh hun ka nghakhlel hle. – 9862372482

Facebooktwittergoogle_plusredditpinterestlinkedinmail

CAG-in NLUP a lepse – Lalthlamuana Ralte

January 14, 2011 khan sorkar hmalakna pui ber NLUP chu chief minister-in ropui takin Vanapa Hall-ah a hawng a, district khawpui dangah pawh a hawnna hun hman a ni bawk a. Kan la hria anga chumi tum chuan chief minister-in kumtin January 14 hi ‘Kut Hnathawktute Ni’ atan hman a nih tur thu a puang a nih kha. NLUP hian a tum ber chu thingtlang lo neih tihtawp a, leilung a innghat eizawnna tha zawk leh changtlung zawk siam te, mipui nawlpui dinhmun chawikan a, chumi ruala leilung, nungchate leh ramngaw (environment) venhim a, tuihna tihpun a hman tangkai bakah leilung hausakna hai chhuah te hi a ni.
Chutianga ruahmanna tha tak chu Planning Commission-in July,2010 khan a pawmpui a. A tira ruahmanna ang chuan NLUP hmang tangkai tur hi chhungkaw 1,20,000 an ni a, Cheng vaibelchhe 2873.13 sen tur niin, kum 5 chhung awh tura tih a ni bawk. Mahse, kum nga a vei hnuah pawh hmalakna hi chhunzawm zel a la ni. A tir lamah khan NLUP hi beiseina sang tak nena kalpui a ni a, chief minister phei chuan kum 10 chhungin Mizoramah mirethei (BPL family) an awm tawh dawn loh thu leh tlangram lo neih hi bansan hlen a nih tur thu a lo sawi a.

Mizoram economy (GSDP) pawh hi thang awk awk tura beisei a ni a, kum nga kalpui hnuah chuan economy thanna pawh 16% zet a tlin an beisei a nih kha. Mahse, kum nga hnu 2015-16 a Mizoram economy thanna chu 9.18% a ni thung. Zep thu a cheng lo a tir atangin NLUP hi politics khelhna hmanrua, inthlana tlinna tura an vauchher ber a ni a. A tir atangin beisei a pha lo a, an kalpui tak tak hnuah pawh an sawi ang hlawhtlinna hmuh tur a awm lo a, thil fel lo leh dik lo hmuh tur a awm reng bawk, a hlawhchham tih hi mi tam ber ngaihdan a ni.

Assembly session-a tlangzarh CAG audit report-ah khan NLUP a thil fel lo tam tak tarlan a ni a. NLUP dawngtute (beneficiaries) thlan danah tih dik loh lian tak a awm thu tarlan a ni a. NLUP Manual-ah a dawngtu tur uluk taka thlan tur a ni a, survey neih atangin Village Level NLUP Committee (VLNC) hian an thlang tur a ni a. Mahse, a dawngtu tur thlannaah hian VLNC te hi inrawltir an ni lo a, manual kalhin NLUP Apex Board (chief minister kaihhruai, thuneitu sang ber)-in an thlang a, Apex Board hian an thlan dan phung tarlan tur an nei lo nghe nghe. Hei vang hi aniang thingtlang lamah chuan NLUP dawngtu hi party pakhat mi leh sa an tam bik em em a, party induhsakna thil anga sawi a kai chhan ni.

CAG report vang hian hmun dangah chuan thubuai lian tak tak a awm phah a, India ram pum huap eirukna/hlemhletna lian tham (2G scam ang te) pawh a lo awm phah tawh a. Tun tuma CAG-in NLUP a thil dik lo tam tak an tarlan pawh hian boruak a siam chho ve maithei a ni. Manual kalhin beneficiary thlan a ni a, dawng thei lo tur dawng an tam hle a, CAG mi leh saten district thenkhat a beneficiary engemaw zat an kawm chiannaah dawng thei lo tur 1400 in an dawng tih an hmu a. Ram pum huap phei chuan party induhsakna leh poltics thil vanga dik lo taka dawngtu tur thlan an tam ngawt ang. An thlan dan a dik loh avangin complaint lut pawh 1389 lai a lut nghe nghe.

NLUP sum hmuh leh hman dan chungchangah hian felhlel leh sawi mam chawp a awm nual a. A tirah prime minister special package atanga dawn tur angin an sawi a. Kum 2008 MLA inthlan dawn a khatih laia prime minister Manmohan Singh rawn campaign khan hei hi a sawi niin an tarlang a, mahse a thusawi ziaka an semah kha chuan a tel lo ngei mai a. Engpawhnise, state budget pawn lam atanga NLUP sum hi hmuh tur angin an sawi reng a. Mahse, Mizoram budget pawisa ngei a hmang a, state annual plan-ah an rawn telh thin a nih kha.

Sorkar laipuiin NLUP atana pawisa a pek tur Cheng vbc 2873.13 atang hian kum nga chhungin (October 2010 leh September 2014 inkar) Cheng vbc 1526.14 a rawn pe tawh a. A bâng a la awm nual na a, kum kal ta 2015-16 chhung khan NLUP sum rawn pek a ni lo a. Pawisa an rawn pek tawh atang hian Cheng vbc 1518.03 chu hman ral tawh anga ziak a ni a, a takah chuan heti zat hi an hmang lo hrim hrim. Sum la hman loh tam tak hi K.Deposit/Civil Deposit a dah a ni nghe nghe. A dawngtuten (beneficiaries) a hmasa berah Rs 20,000 aia tlem lo dawng tur an nih laia chu aia tlem daih an dawn te, pawisa sem dan leh kalpui dan (implementation) ah thil felhlel thenkhatte CAG report-ah hian tarlan a ni bawk. NLUP Implementing Board (NIB) pawhin kum 2013 a pawisa an sem dan mumal lo hi an pawm thlap nghe nghe, a mumal loh avang hian hmalakna pawh a that loh phah a ni.

NLUP hnuaiah hian sumdawng pawl leh mimal 30 hnenah pung awm loa loan Cheng vbc 6.46 pek a ni a, an inremnaah chuan March 2012 leh September 2017 inkara rul zo vek tur an ni a, an rul zo thei lo a nih chuan sorkarah an dahkham LSC an pe tur a ni a. March 2016 thleng khan Cheng Maktaduai 9.4 chauh rulh a la ni a, Cheng vbc 5.02 rulh loh a la awm. NIB lam bawk hi an che fel lo leh pek a, loan rulhna tur saving bank account pawh an lo nei lo a. Kum hnih liam hnu pawh a cheng khat mah la rul lo te pawh an awm a, loan la zingah hian sorkar hotu lawk fate telna sumdawng pawlte pawh an tel nawk nghe nghe. Loan latu zingah hian an sumdawnnaa harsatna tawka insawi te an awm a, state sorkar hian loan latute sum hman dan a enpui lo a, a rul tha lo te chunga hmalakna a awm lo bawk. Rulh tha lo viau mahse sorkarin a ngai pawimawh tawk lo hle a ni.

NLUP pawisa enkawl danah thil fel lo a awm nual tih CAG report-ah tarlan a ni a. A hun a sem theih loh te, hmanna lama harsatna awm te, civil deposits/K Deposit a dah te leh a dangte hi kalphung pangngai kalh a tih a tam hle a. Sum enkawlna lam a chhia tih chu chu thuhran nise, state sorkar hian NLUP a sum hman dan chiah hi tarlan a la tarlang lo, CAG report hian a ti a ni. Implementing Board (NIB) hian mamawhna hmanhmawh thlak awm si lo a pawisa lak chhuah an ching a, thla tin hian pawisa mawng phah tur a tlem phah thin a. Hetianga mamawh vang ni lo a pawisa lak chhuah fo hi thil fel lo tak a ni a, a hman dan a fel lo ngeiin a rinawm bawk.

NLUP hi kan hriat angin kum 2008-a congress party an sorkar atangin development programme lian ber anga ngaih a ni a. A sum hi a tam tham a, thil fel lo tam tak a awm ngeiin a lang a, party lamin insawi theihna atan leh inchirhthehna atan an hmang nasa hle bawk. Sorkar lamin a sum hman dan leh NLUP hnuaia hmalakna hrang hrang an vil tha tawk lo bawk a, a hlawhchham chhan pawh hi mipui lam ni loin thuneitute hi an ni zawk ang. CAG in sum hman dan leh hmalakna te a zir chianna atang hian cheng vaibelchhe sang hnih zariat chuanga a lo thlawna a luang ral a tam lutuk hi kan hnam tan a pawi thei ngeiin a rinawm. Political party-te pawh hian rinawmna tel lo a sum tam tak hmanna tur hi mipuiah zuar chiam tawh lo se a tha ngawt ang.

Facebooktwittergoogle_plusredditpinterestlinkedinmail

Lirnghing laka himna leh dinchhuah leh nana hmalakna tur – Dominic Lalhmangaiha

Mizoram Disaster Management & Rehabilitation Department leh GeoHazards International (GHI) USA te tangho chuan Aizawl khawpuiah hian lirnghing Magnitude 7-a na nghing ta se he khawpui a nghawng dan tur zirchiangin an hmuh dan report chu a bu-in “Effects of a Magnitude 7 Earthquake on Aizawl, Mizoram and Recommendations to Reduce Losses” tih chhuah a ni a.
He Report-in a duan ang chuan Aizawl atanga 10km (epicentre)-a hlaah Lirnghing Magnitude 7 chawhnu dar 2-ah lo thawk ta mai se, tun dinhmun angah hian Aizawl khawpui chhung a in tam tak hi a chim ang a, mi 25,000 velin nunna an chân nghal ang. Hmun 1000 chuangah leimin a awm thei a ni an ti a. Lirnghin zawhah chuan Aizawl khawpui hi kalpawh theih lohin a awm dawn a. Leiminin hmun tam takah kawngpui a hnawh ping ang a, hmun hrang hrangah kangmei a chhuak ang a, landline leh mobile phone te kan hmang thei dawn lo. Aizawl khawpui chhunga in chim-in kawng te a hnawh ping bawk ang a. Electric power line leh PHE tui te pawh hi a chhe hneh hle ang. A thla a thla tui leh current kan nei lo ang an ti a ni.

GHI/GHS team te chuan Aizawl khawpui hian chhiatna nasa lutuk thleng thei laka kan tawrh nep theih nan leh nunna tam zawk chhanhim nan thu rawn tam tak Mizoram sorkar leh mipui te hnen ah a pe a.

Aizawl khawpui enkawltute hnena lo inbuatsaih lawkna atana thurawn a pekte chu:
Mizoram sorkar hian Geologic Hazards Commission din thuai se la. He Commission hian lirnghing leh leimin laka him zawkna atana plan tha tawk siamin, mawhphurtu department, etc. te huikhawmin, chung hmalakna te pawh chu a tha tawk em tih thlithlai reng chu an mawhphurhnaah an nei tur a ni ang.
Heng a hnuaia hna hrang hrangte tih hmasakah neih ngei ni se:
1. Aizawl khawpui chhung leilung awm dan zir chiang a, leimin duhna hmunte nen ‘map’ tha taka duan chhuah nise. Kan tui-luan-kawr te, kan kawng laihdan te, kan insak dan te leh leimin duhna hmuna development ruangam kan dinte pawh hian engtin nge min nghawr tihte hi zir chian ni se.
2. Leimin nasat theihna hmunte chhinchhiahin zirchian nise; a bikin mihring bitna lai leh mipui tana hmun pawimawh bik teah bul tannin; heng hmun leh building-te hi chhiatna lo thleng thei laka an him zawkna atan hma lak ni se.
3. Tui chhe luan kawr te, septic tank te leh tui luan kawr te mumal tak kan neih theih nana tha taka duan.
4. Lei laih dan tha tak duan chhuah a, khauh taka lekkawh ni se.
5. Building Regulations a nihna tur ang tak leh khauh taka hman.
6. Building Regulations leh Site Development Regulations te hi mipuite tan a him zawkna tur a ni tih hi nasa leh zuala tlangaupui a, mipuite pawh kaihhruaina tha pek.
7. National Building Code a Building Regulations kan neih sa hi a tul laiah kan leilung mil tur a herrem.
8. In sak sa kan sak belh dawn emaw kan tih danglam dawn in lirnghing lak a him thei ber tur a ruahmanna siam a zawm.
9. Leilung hmun him lo a in sak phal loh leh hmun pek loh.
10. Aizawl Master Plan leh Development Plan hrang hrang te hi he Lirnghing Effect Report leh leilung chiang zawka zirna nen khaikhina, a tul anga tihdanglam.
11. Master Plan-in Aizawl khawpui tih zauh dan tur a duan hi a kalphung tur tha taka duan a, leilung chhiatna awm theite thlir tel a kalpui ni se. Remruatna awm tha mang lova a tlachawpa kalpui bawrh bawrh ang chi chu tihtawp ni se.
12. Lirnghing leh leimin kaih hnawih thil hi agency tin ten kan lo hriat thiam leh zual zawk nan a zirtirna tam zawk in pek.
13. Geology, Geotechnical engineering, structural engineering, architecture leh planning te tun aia tih changtlun.
14. National Highway eng emaw ber – entirna’n NH 54 Aizawl leh Silchar kawngpui leh Lengpui Airport leh Aizawl khawpui inkar te hi lir na tak pawh nghing se kal tlang reng theih tur a siam nise. Helai kawng tluan hi leimin mai theite pawh min lo tura lo sawngbawl a, kan lei (bridge)-te pawh chim mai thei lo tura kan lo en fel lawk a ngai a. A chhe ber pawh lo thleng se state pawn atanga tanpuitute leh tanpuina rawn lut turte tana kaltlang theih reng tura lo buatsaih nise.
15. In (building) pawimawh zual bik, entir nan hospital te hi endik vek nise, a theih dan anga lo thawm that leh a hmun pawh him zawk tur a lo duana lo buatsaih nise.
16. State, District, Aizawl khawpui leh veng tin hian Disaster Management Plan kan neihte hi a tak lo thleng ta se hman tlak em tih hi en chin thin nise. Tabletop exercise te nei inthlak danglam ngaite thlak thin nise.
17. Kum 2030 thleng daih tur chhiatrupna lo thleng thei tinep thei tura long term plan siam nise. Hemi atan hian Department tin leh pawl hrang hrangte hma lak dan tur siam nise.
18. Chhung tinten lirnghing leh leimin thulha an lo inbuatsaih lawk theih nan Awareness Program te siam thin nise.
19. Thil pawimawh em em, entir nan kawngpui te, electric kan lakna te, tui kan lakna te, kan inbiakpawhna te, hospital te leh thil dang dang tel loa kan awm theih lohte hi chhiatrupna lo thlen pawha chat lak loa kan hman zawm theihna tura ruahmanna lo siam.
20. Sikulah zitirtu leh naupangte hnenah lirnghing leh leiminin nghawng a neih dan leh lo inhmakhua dan tur zirtirna pek.
21. Lirnghin zawh tawh hnua reconstruction leh recovery plan siam.
22. National Disaster Response Force leh State Disaster Response Force te hnuai a rescue team tha tak din.
23. Veng tinah chhiatrupna lo thlen a hma la nghal tu tur te buatsaih nise, mi zawn leh chhanchhuah dan turte training tha tak pek nise.

Mi mal leh chhung tin ten a in buatsaihna tura kan lo tih theihte:
1. Chhungkaw emergency plan siam vek tur ani. Chhungkua a mi tin ten lirnghing, leimin leh chhiatrupna dang pawh lo thleng se chet lak dan tur sawi ho a, hmun hrana kan awm lai a lo nih pawha inhmuh khawm dan turte kan duang tur a ni. Plan siam dan tur sample hi he website-ah hian a en theih-http://www.geohaz.in/upload/files/important/familypreparedness.pdf
2. Chhungkaw emergency kit siam tur a ni. Ei tur, tui thianghlim, damdawi leh chhungkaw mil a mamawh chi hrang hrang te bag-ah dah khawm tur a ni a, he kit-ah hian engte nge kan dah tur tlangpui sample hi he website-ah hian a en theih – http://dmr.mizoram.gov.in/page.disaster-survival-tips.html
3. Mi mal ram leh in hmun te kan laih dawn emaw leilung kan khawih danglam dawnin Geologist te rawn ngei ngei tur a ni. Kan leilung laih dan leh sawngbawl dan dik loh avangin Hlimen leh Laipuitlang ah te pawh mi tam tak in nunna an chan phah tawh a ni.
4. In kan sak dawnin kan thenawmte in lo sak tawh sain kan in a rawn chim hnan emaw, a rawn hnawl thei mai em tihte hi en hmasak a hriat chian phawt tur a ni. Tin, thenawmte pawh kan in sak vangin an him loh phah thei bawk a; chuvangin, in kan sak dawnin thenawmte leh kan himna ngaih pawimawh tur a ni.
5. Kan tui chhia emaw, ruah tui pawh kan in bulah a luanna tur tha tak kan siam tur a ni. Tui luanna tur kan siam that loh chuan leiah tui a lut a, hei hian lei a tinem a, lei a min phah thei. Chuvangin kan in leh a vel chu tui tling thei lo tura siam tur a ni.
6. Assam type leh concrete in pawlh in emaw, Concrete in emaw kan sak dawnin mi thiam engineer kan ruai tur a ni a; tin, Aizawl Building Regulations mil in kan sa tur a ni a, mistiri pawh mi thiam ngei kan ruai tur a ni. Hetiang thlapa in kan sak hian 5% vel kan insen belh a ngai a; mahse, in him tak sak hi kan tan a himna a nih piah lamah chhe rup thei lo a ni a a tha zawk a ni.
7. Assam type in kan sa a nih chuan thing mistiri thiam tak rawih ngei ni se. Tin, a ban leh ban inkarah te thingin nghet taka dokalh ni se.
8. Structural Engineer-te hnenah kan in sak sate hi lirnghing lakah a him thei ang em tihte rawn ila. Tun aia lirnghing laka him zawk tur in engtin nge kan inte hi kan tih ang tihte rawn tur a ni.
9. First Aid training-te hi nei ila. Mahni tan chauh lo pawh mi nunna chhanhimtu kan ni thei.
10. Sorkarin lirnghing leh leimin laka kan him zawkna tur a hma a lakna te hi thlawp tlat tur ani.
11. Lirnghing leh leimin hi zir chiang ila, hriat zau belh zel tum ila, kan fate, kan thian te leh kan chhung te pawh hrilh hre ve zel ila. Kan hriata kan lo inbuatsaih that hi kan himna tur a ni zel zawk a ni.

Facebooktwittergoogle_plusredditpinterestlinkedinmail

SLWF Annual Meeting

Aizawl; Mizoram Synod hnuaia thawktu zawngte inhlawmkhawmna, Synod Lay Workers’ Fellowship chuan Zirtawpni khan Synod Hospital, Durtlangah Annual General Meeting an hmang a. Rev. Lalzuithanga, Synod Moderator-in a hmanpui.

Chawhma lam inkhawm chu Upa R.Lalmalsawma, Chairman, SLWF-in a kaihruai a. Secretary leh Treasurer, SLWF hnen atangin report an ngaithla.

Synod Moderator-in thuchah a sawi a. Hruaitu thlan tharte chu Pu Lalromawia, Fin. Secretary, SLWF-in Pathian hnenah hlanin Annual Meet neih inkara an member thi mi 6 sunna hun an hmang bawk.

Chawhnu lamah hun zangkhai hmangin Dr. Vanlalchama, Lay Asst. Hospital-in a kaihruai ve thung a. ATC, Hmangaihna In, Masihi Sangati, MTC, Pensioner, P.C Girls, PRESCOM, Rescue Home, Synod HSS, SMTC, Synod Hospital leh Synod Office atangin item chi hrang hrang an nei hlawm a ni.

Facebooktwittergoogle_plusredditpinterestlinkedinmail

Tirchuak dawn

Aizawl; Vawiin chawhnu hian Zonuam Kohhran Biak Inah hnam dang zinga rawngbawl tur hnam dang tirhkoh tirhchhuahna hun hman a ni dawn a. Rev. K.Lalrinmawia, Secretary, Synod Mission Boarch chuan tirchhuakin thuchah a sawi ang.

Tirhchhuah inkhawm hi Rev. K.Lalthlanpuia, Director, Masihi Sangati Kendra-in a kaihruai ang a, Dr. Robert S.Halliday, Coordinator, SMB chuan inhmelhriattirna hun a hmang ang.

He hunah hian zaipawl pathum – Aizawl West II Area Standing Choir, Synod Mission Choir leh Aizawl SouthWest Area Choir te an zai ang.

Facebooktwittergoogle_plusredditpinterestlinkedinmail

Bial Sunday School Secy training

Aizawl; Kum thum dana neih thin, Mizoram Synod hnuaia Bial tin Sunday School Secretary-te tana buatsaih, Triennel Secretarial Training Vawi 15-na chu Thawhlehni atang khan Aizawl Theological College-ah neih a ni a, Zirtawpni khan an zo.

Thawhlehni zan atang training hi tan niin a hawnna inkhawm neih a ni a, Rev. P.C.Pachhunga, Executive Secretary-in a kaihruai a, Upa Lalthahluna Ralte, MSSU Asst. Coordinator hnen atangin thupuan ngaihthlak a ni a, Pu John Lalhruaitluanga, MSSU Asst. Coordinator-in inhmelhriattirna a nei a, Rev. Lalzuithanga, Synod Moderator-in hawngin thuchah a sawi bawk.

Nilaini leh Ningani khan Sunday School atana thil pawimawh thupui hrang hrang zir a ni a, mi thiam hrang hrangin an zirtir a ni.
Training kharna inkhawm hi Ningani zan khan neih a ni a, Rev. Lianhmingthanga Sailo, Synod Secretary-in kaihruaiin Rev. P.C.Pachhunga, Executive Secretary-in fuihna thu sawiin certificate a sem a.

Bial Sunday School ziaktute pual training hi kum thum danah neih thin a ni a. Bial thenkhatah ziaktu hun chhung (term) a inang chiah lo va; mahse, a tlangpuiin kum hnih an tang thin a. Tun tum training-ah hian mi 167 an kal thei a ni.

Facebooktwittergoogle_plusredditpinterestlinkedinmail

Login

Lost your password?