Monthly Archives: May 2017

May 29 – TKP Ramthim Ni

Aizawl; Naktuk, Thawhtanni hi Mizoram Baptist Kohhran Ni pawimawh (Special Day) “TKP Ramthim Ni” a ni a. TKP Unit hrang hrangah urhsun taka hman a ni ang.

Kumina TKP Ramthim Ni thupui atan “Tho la êng rawh” (Isaia 60:1) tih thu hman a ni ang. Unit TKP-ten an ruahman dan angin chhun lamah emaw, zan lamah emaw remchang an tih angin hemi pual inkhawm programme hi an siam ang a, BCM Ni pawimawh programme bu-a inkhawm kaihhruaina duan sa bakah Unit-in tul leh tha an tih angin programme an siam ang.

He ni pual inkhâwmah hian thawhlâwm lâkkhâwm tur a ni a, Bial kaltlangin MTKP-ah thehluh tur a ni a. Thawhlâwm hi Mission puala hman a ni ang a, Missionary-te leh Mission rawngbâwlna atâna tawngtaihona neih a ni bawk ang.

Facebooktwittergoogle_plusredditpinterestlinkedinmail

Feature : Pisa kai hun

Mizoram sawrkar, General Administration Department (GAD) chuan Mizoram chhung a pisa te bakah state pawna Mizoram House-a pisa kai hun te a bithliah thin a. Mizoram chhungah chuan nipuiah zing dar 9 atanga tlai dar 5 leh thlasikah zing dar 9 atanga tlai dar 4 turin a ti a, Mizoram pawna Mizoram House te erawh chu an awmna hmun a zirin pisa kai hun chhung hi a inang lo thung.

Mizorama pisa hrang hrangte chuan pisa kai hun chhung (office hour) hi an zawm tha lo hle tih Zalen palaiin office hrang hrang a tlawhnaah a lang chiang hle. GAD Secretary Zothankhuma chuan office hnathawkten hun an vawndik theih nan hma lain ruahmanna an siam mek niin a sawi. Tunhma deuha office hrang hrangte endik thin (surprise check) ang kha tun hnaiah an neih leh neih loh chungchang zawhna chhangin GAD thawktute chuan ‘Tun hnaiah an nei lo’ tih an sawi.

Office dawr thin pa pakhat chuan, “Football etc. champion lawmna ang chi Lammual ah te a awm tuma sawrkarin a tel duh tan chawlh (eg. half holiday) a puan denchhena pisa a ruak huai mai thin leh kal an tlem leh hle te hi tha ka ti lo hle a. Hei mai bakah sawrkar hnathawkte hian office hour hi an ngai pawi mawhlo lutuk niin ka hre bawk a, zing dar 9 office tan a nih laiin a chang chuan dar 10-ah pawh dawr tur mumal an awm loh chang a tam mai a, tlai lamah nise dar 5 bân hun pawh nise office tam takah chuan dar 4-ah pawh dawr tlak mumal an awm tawh lo hi chu a dik lo hle mai. Hei hi corruption dik tak niin ka ngai,” a ti.

Private hnuaia thawk ten hun an hman dik theih viau laia sawrkar hnathawk ten hun vawndik an ngai pawimawh lo tlat mai chu tha lo hlea a hriat thu a sawi bawk.

Sawrkar hna Head Assistant atanga tun hnaia chawl ta pa pakhat chuan, “Kei chu ka thiamna ngaihtuah hian hlawh hnem ka inti hle a; chuvangin, office pawh hi ka ngai pawi mawh a. Ka thawhpui te hun vawng dik tura kan hauh deuhte hian mi huat phah nan an hman bakah mi sual nih hi kan hlawh leh mai thin a, a buaithlak khawp mai,” a ti. Hei mai bakah Kohhran leh NGO-a inhmang takte chu chhuahvahna tur an ngah avangin office ah pawh an thahnem lo deuh nia a hriat thu a sawi bawk.

Hetih lai hian Mizoram sawrkar hnathawk sing tel zingah hian tha tak tak, hun vawng dik, taima leh mi dangte tanpui peih mi engemaw zat an awm a. Mahse, office hun vawng dikte hi mi fel nih aiin mi â nih an hlawh zawk fo thin. Kan ngaihtuahna a dik a, mipui pawhin sawrkar hnathawkte hi hun vawng dik tura kan duh tak zet hunah chuan hun an vawng dik turah ngai ang. Tun dinhmuna kan phak tawk kan ti hrih mai dawn em ni?

Facebooktwittergoogle_plusredditpinterestlinkedinmail

SSA-in tih tur tih loh vangin Rs Nuai 743 hman loh a ni

Aizawl: Comptroller & Auditor General of India-in tun hnaia report a tihchhuahah Mizoram SSA chuan a tih tur a tih famkim tawk loh avangin school naupang nuai 1.86 te uniform leina tur sum nuai 743.16 chu hman lohin a awm niin an sawi.

Tun kara Assembly Session-ah CAG report hi phochhuah a niin report tarlan dan chuan sawrkar laipui chuan kum 2010-2011 khan hmeichhe naupang leh scheduled caste/tribe bakah BPL chhungkua te leina tur naupang pakhat zelah Rs. 400 a pe a, mahse SSA lamin tih tur tul ang te a tih loh avangin sum hi a kum leh atan siamrem a ni ta niin a sawi. CAG report chuan RTE dan kalha thawktu rawih an nih avangin nuai 3722.13 hman a ni tih a sawi bawk a. Heng sum hman hi kum 2010-2016 chhunga Aizawl leh Lunglei district ah te chauh a ni tiin dan diklo a sum hman te hi SSA Project Director hnuaiah nuai 324.50, SSA Aizawl district ah nuai 970.58, SSA Lunglei district ah nuai 90.72, School Education department Aizawl district ah nuai 1127.29 leh School Education department Lunglei district hnuaiah nuai 1209.04 te niin a tarlang bawk.

CAG report chuan kum 2011-2012 chhung khan sawrkar laipui chuan classroom 349 sak belhna atan, room khat zelah Rs. nuai 5 hisapin Mizoram district 8 tan vaibelchhe 17.45 a rawn pe niin a sawi a. Mahse district pathum – Champhai, Kolasib leh Mamit District Project Coordinators te chuan nuai 35 chu hmun dangah an pawtpeng (divert) nia sawiin danin a phal loh hna thawh nan an hmang niin a sawi bawk.

CAG report tarlan danin RTE dan bawhchhiain kum 2010-2016 chhung khan primary school 67 leh upper primary school 34 te chu din an ni a, mahse heng mite chungah hian dan angin hremna lekkawh a ni lo niin a sawi a. School naupang inziaklut (enroll) pawh kum 2011 chhiarpui nen a inang lo niin a tarlang bawk.

Facebooktwittergoogle_plusredditpinterestlinkedinmail

HSSLC-ah IES hmang dawn

Aizawl: Mizoram Board of School Education (MBSE) chuan kumin 2017-2018 a Higher Secondary School Leaving Certificate exam atangin Integrated Evaluation Scheme (IES) hman tan a tum.

IES hi kum 2016-2017 HSLC atangin hman tan a ni a, he scheme hnuaiah hian mark awm zawng zawng 80% chu zirlaiten an lehkhabu atanga an chhanna atangin an hmu dawn a, a bak 20% chu school ten an pe dawn a ni. School Education Minister H.Rohluna chuan IES hman anih avangin zirlaite ah hmasawnna a awm nia sawiin, “Naupang nungchang a that phah bakah school pawh an kal that phah a, result pawh a that phah a ni,” a ti.

MBSE Chairman Lalchungnunga chuan IES chu fekfawn tak emaw induhsakna atana hman chi a nilo tih sawiin, “IES hmang dik lo leh rinhlehawm School te enfiahna kan nei a, a theih ang angin kan enzui zel dawn a ni,” a ti.

Facebooktwittergoogle_plusredditpinterestlinkedinmail

Chiahpuam sem buaipui tan

Aizawl: Chiahpuam sum sem dan tur chu Aizawl DC, Police leh Finance department lamin an buaipui mek a, a sem dan turah thutlukna siam a la ni lo.

Zalen thudawn danin High Court chuan chiahpuam sum sem dan tur hi ruahmanna lo siam turin Aizawl DC a hriattir a, DC Office hian ruahmanna te siamin an ruahmanna hi Finance leh Police te nen an enho leh phawt hnuah thutlukna hi an siam dawn a ni. Thudawn danin chiahpuam sum hi Bank-ah account hran siamin dah a ni a, tunah hian nuai 1400 vel a tling tawh a, hei bakah hian in leh ram eng emaw zat a awm bawk a ni.

Facebooktwittergoogle_plusredditpinterestlinkedinmail

Hindi CSS zirna report la pe lo

Aizawl: Mizorama CSS Hindi Teacher te dinhmun zirchiang tura tih Award Research Foundation te chuan an report an la thehlut lo.

School Education department thawktute hnen atanga Zalen thudawn danin Award Research Foundation te hian data entry an zo chiah a, an report hi Ministry of Human Resources Development a thehluh turin an buapui mek a, May 2017 chhungin an thehluh hman beisei a ni.

Award Research Foundation, Lucknow atanga mi thiam pahnih lokalte hian Mizoram leh Nagaland-a CSS Hindi Teacher te dinhmun uluk takin an zirchiang a, an report azirin sawrkar laipui chuan rawih chhunzawm leh chhunzawm loh turah thutlukna a siam dawn nia thudawn a ni.

Facebooktwittergoogle_plusredditpinterestlinkedinmail

Edu Options-ah scho & PG

Aizawl: 15th ‘Edu Options 2017, April 2-3 chhunga Rooftop Millenium Centre-a neih tur niin a huaihawttu te chuan kum dang aiin subject duhthlan tur a tam dawn niin an sawi a, scholarship leh Post Graduate Degree course pe thei college an awm nual dawn niin an sawi.

“Tun tum hian college leh university rawn tel tur zingah scholarship pe thei an awm dawn a, ram danga zir duh thlengin an pui thei dawn a. Course zir turah hian B. Tech, Physiotherapy, MBBS, BBA, Law, Journalism, MBA leh a dangte a awm dawn a ni,” tiin organiser te chuan an sawi.

“Institution 35 beisei an ni a, zirlai rawn tlawhte chuan am thei ang berin free counselling hmang se kan duh ber a, an duh thal zawt turin kan fuih a, rawn tel tur te chu accredited institutions vek an ni bawk,” tiin organiser te chuan an sawi a. Plus 2 result chhuak tawh, +12 zirlai leh college zirlai te’n rawn tlawhin hetiang ang hun hi a awm zen zen loh avangin hlut thiam nise an tih thu an sawi bawk a ni.

Edu Options hi 11AM to 5 PM inkarah tlawh theih niin lucky draw ah selfie stick, smart phone, pen drive, otgs te a tlawhtute tan man theih a ni a, luh man a awm lova nilengin quiz neih a anga, lawmman man tur a awm ang.

Facebooktwittergoogle_plusredditpinterestlinkedinmail

Football hlawhtlinna tobul MNF sawrkar: Dr. Thangtea

Aizawl: Dr R. Lalthangliana chuan football hlawhtlinna chu MNF sawrkar hunlaia bul tan a nih vang niin a sawi a, he thu hi nimina Tlungvel BNRGSK Hall-a Tlungvel Group MNF huaihawt Socio Economic Development Programme (SEDP) zirho naa khuallian nia hmanpuinaah a sawi a ni.

Dr R. Lalthangliana chuan Football-a Mizoram dinhmun sang taka a awm chu lawmawm a tih thu sawiin, “Hetiang kan nihna \obul hi MNF sorkar kha a ni. Kan sorkar lai khan SSA Football Academy te dinin nasa taka hmalak a ni a, Catch them Young te pawh hi 2005-a MNF tihchhuah a ni a, Rajiv Gandhi Stadium sakna tur sum vaibelchhe tam takte hi MNF sorkar sawichhuah niin Lal Thawnhawla Stadium an tih takte pawh hi MNF sorkar sum sawi chhuaha sak a ni a. Heng ka sawi lan loh pawh hi infiamna kawnga thalaiten hma an sawn theihna turin MNF sorkar khan hma a la nasa em em a ni,” tiin a sawi.

MNF Vice President chuan Congress sorkar hnuaia hmasawnna hna thawh a tlem hle tih a sawi a, “MNF sorkar laia School tam tham tak kan upgrade bak kha tun sorkar hian engmah tih zui a nei lo hi a lungchhiatthlak hle a. Hmun hrang hranga kawng kan laihte enkawl zuina tur pawh an nei lote hi a pawi hle a ni,” a ti.

Dr. Thangtea chuan Zoram insingsak dan enin MNF chuan sorkarna a siam leh ngei dawn nia a lan thu sawiin Congress sorkar-a Zoram mipui an beidawn tawh takzet thu a sawi bawk. Aizawl FC neitupa Pu Robert Romawia Royte hmalakna ropui tak rahchhuaha Vijay Goel, Union Sports Minister-in Stadium puitling Mizoram tana pek a tiam chu lawmawm a tih thu Dr Thangtea chuan a sawi bawk. He hun hi Tlungvel Group MNF President V Lalmuana’n a kaihruai a, SEDP chungchang zirtirna hun Dr Lalsangzuala’n a nei bawk.

Facebooktwittergoogle_plusredditpinterestlinkedinmail

Solar electric mimalin hralh thei dawn: ZEDA

Aizawl: Zoram Energy Development Agency (ZEDA) chuan ni zung chakna hmanga electric siam chhuahna Grid Connected Rooftop Solar System chu subsidy in a pe chhuak dawn a. He khawl hmangtu mipui te’n an hman theih bak aia tam electric an khawl hmanga an siam chhuah chuan an hralh thei dawn nia thudawn a ni.

ZEDA hotute hnen atang Zalen thudawn danin Grid Connected Rooftop Solar System chu subsidy a pek chhuah tur a ni a, tunah hian mipuite’n dilna an thehluh mek zel niin an sawi. ZEDA hotute chuan Grid Connected Rooftop Solar System hmangtu te’n an mamawh aia tam an khawl hmanga electric an thar chhuah chuan Power & Electricity Department atanga connection an neihna ah ni zung hmanga an electric siam chhuah te chu a luang let dawn niin an sawi a. Hemi hmang hian an power siam chhuah chu an hralh let ve thung dawn nia sawiin a luanglet tam dan azirin electric bill chawi a ti tlem thei a, chawi a ngai lo hial thei niin an sawi bawk.

Zoram Energy Development Agency chuan Grid Connected Rooftop Solar System chu electric chawi tih tlem nan leh ni zung hmanga electric siam chhuah te hman \angkai a nih theih nan a nih thu an sawi a. Grid Connected Rooftop Solar System kilowatt 1 market rate a cheng nuai 1 leh tlem man chu subsidy pein a man tur sawi chian theih chiah la ni lo mahse Rs 46,000 bawr vela hralh theih an rin thu an sawi bawk.

Facebooktwittergoogle_plusredditpinterestlinkedinmail

Landslide policy AMC ah

Aizawl: Aizawl Municipal Corporation Office, Thuampuiah Aizawl Mayor PC Lalhmingthanga kaihhruaiin Landslide Policy Committee Meeting chu Ningani khan neih a ni.

Aizawl Municipal Corporation (AMC) chuan Aizawl khawpui chhunga leimin vanga chhiatna thleng thin a lo ziaawm theihna turin Landslide Policy Committee a din a. Tuna an \hutkhawm hi a vawi 5-na niin leimin tur venna kawnga AMC-in tun hnaia regulation a neih thar ‘The AMC Site Development & Slope Modification Regulations, 2017’ chu thlir ho a ni a. He Regulations hi tha taka kenkawh a nih chuan Aizawl khawpui leimin venna kawngah a tangkai hle dawn niin an tarlang.

Meeting-ah hian GeoHazards International ten Aizawl khawpui uluk zawka an zir chianna map ‘The Aizawl Landslide Hazard Map’ chu AMC hnenah an hlan a. He map-ah hian Aizawl khawpui leimin hlauhawm zual lai te chu uluk taka chhinchhiah a ni. He Map hi AMC-a Councillors te thu khawm Board of Councillors Meeting chuan pawm a nih leh nih loh tur a la ngaihtuah dawn a ni.

Meeting ah hian AMC chu India rama Municipal Corporation ah Site Development & Slope Modification Regulations nei awmchhun nih thu tarlan a ni a, Landslide Hazard Map nena tangkawpa AMC in hma a lak chuan leimin venna kawngah nasa taka hmasawnna a awm an beisei thu an tarlang bawk.

Facebooktwittergoogle_plusredditpinterestlinkedinmail

Login

Lost your password?