Monthly Archives: June 2017

Tinreng Feature : GST hman inpeih

Sawrkar laipuiin July ni 1,2017 atanga chhiah lak dan thar Goods & Services Tax (GST) hmang tura ruahmanna a siam ah Mizoram pawh he dan thar hmang tur hian a inpeih tawh niin Taxation hotute chuan Zalen an hrilh.

Taxation Commissioner LH Rosanga chuan GST atana tih ngai rule notify tur chu buaipui mek a niin tun thla chhungin peih hman tum a ni tih a sawi a. Taxation officer te pawh training pek pek an ni tawhin sumdawngte registration pawh thawh mek a ni tiin register fel hmanloh an awm anih pawhin harsatna a awmlo turah an ngai tih Zalen a hrilh.

GST hman hunah state sum hmuh tur a tam zawk dawn leh dawn loh zawhna chhangin, “Thil thar anih avangin hriatthiam a har a, tax expert te chuan sum hmuh tur hi a tam zawk an beisei a ni,” a ti. Taxation Commissioner chuan GST tih hunah chuan 24 hours internet hman a ngaih dawn avangin harsatna engemaw chu an tawk mai thei nia sawiin BSNL lam te direct a thlunzawm turin an dawr mek niin a sawi bawk.

Sawrkar laipui chuan June ni 30,2017 (Zirtawp) zan hian New Delhi ah GST hawnna hi neih a tum a, hetah hian Taxation Minister Lalsawta leh Taxation Secretary Vanlalchhuanga te an tel dawn a ni.

GST hi hman ni dawn mahse Zu leh Petroleum kaihhnawih chu VAT hnuaiah chhiah lak chhunzawm zel a ni thung dawn a ni.

Facebooktwittergoogle_plusredditpinterestlinkedinmail

Refer case-ah vaihlo ti tam

Aizawl: Aizawl Civil Hospital a refer case (damdawiin lian zawka kal tura tih) zingah vaihlo leh a kaihhnawih ti thin an tam hle.
Thla hnih (26.4.2017 atanga 7.5.2017) inkar chhunga refer case damlo 42 te zirchianna ah refer tur zinga 66.66% chu vaihlo leh a kaihhnawih hmang an ni a. A bikin cancer vei refer zinga 83.33% chu vaihlo leh a kaihhnawih engemaw ber ti an ni.

Chhinchhiahna atanga a lan danin zuk leh hmuam ching thar 70% te chu kum 17-19 inkara ti an ni a, 10% chu kum 15 an tlin hmaa ti tan an ni. Mizoram a zuk leh hmuam ti thin zingah 20% chauhin an nghei thei a, India ramah chuan 3-5% in an nghei niin zirchianna ah tarlan a ni.

Taxation department chhinchhiah danin Mizoram in kum khat chhunga vaihlo leina atana a senso chu nuai 10463 a ni a, chu chu Mizoram thla khat chhung buhfai leina daih a ni.

CID Crime hnuaia Economic Offences Wing chhinchhiah danin nikum 2016 chhung khan Myanmar atangin dan lovin sikret Rs. 23,81,25,000 man hu lakluh a ni a, heng zingah hian Winbody chu tam berin a dang hi Farstar, Valiant, Hummer leh Classic te an ni.

Facebooktwittergoogle_plusredditpinterestlinkedinmail

Vawk thih chhan enfiah

Aizawl: Tun hnai Champhaia vawk thi chu a sample lain College of AH&Vety, Selesihah enfiah mek a ni a, vawk thih chhan hi hriatchian theih thuai beisei a ni.

Zalen palaiin AH&Vety department hotute hnen atanga thu a dawn danin vawk sample hi enfiah a, a result hi hriat thuai beisei a ni tih an sawi a. AH&Vety Doctor thiam ‘Rapid Response Team’ te chuan Zirtawpni khan Champhai an pan bawk.

Champhaia AH&Vety thawktute hnen atanga thudawn danin Zirtawpni a vawk 2 thihbelh tihloh chu tunhnaiah vawk thi thar a awm lo a, chhinchhiah danin vawk hi 25 an thi tawh a, chhinchhiah loh pawh a awm nual mai thei niin Zalen an hrilh. Vety thawktute chuan vawk thih chhan hi hriat ni chiah lo mah se ‘classical swinbe fever’ an ringhlel a, Champhai khaw chhunga vawk chauh a thi niin an sawi bawk.

Facebooktwittergoogle_plusredditpinterestlinkedinmail

Cement issue: Truck 25 RV-ah dang, trip 10 dang let leh

Aizawl: Mizo Students Union (MSU) chuan Mizo mipuiten man tlawm zawka cement an lei theihnan hma an la chhunzawm zel a, cement bag khat Rs. 360 aia tova hralh tur cement phur truck 25 chu unload phal lovin Ch.Saprawnga Truck terminal, Rangvamual ah an dang mek a. Truck 10 vel chu phai lamah an let tawh bawk.

MSU hian state dangte khaikhinin Mizoram a cement hralhna chu a to uchuak nia hriain cement company te chu Rs. 360 aia to lova hralh turin an ngen a. An ngenna chungchang ngaihtuahho tur hian naktip Thawhlehni chawhnu dar 1 hian cement company aiawhte leh MSU hruaitute hi an inbe leh dawn a ni. Thudawn danin Mizoram ah cement zuar company 8 an awm mek a, heng zingah hian Star Cement chuan Rs. 360-in an hralh thei dawn nia thudawn a ni.

MSU chuan cement phur unload an phal loh chhan chu mipuiten man tlawm zawka an lei theihna tur a ni tiin an hmalakna thlawp turin mipui an ngen a, an hmalakna avanga harsatna tawk an awm a nih chuan lo hrethiam turin an ngen tih an sawi bawk.

Facebooktwittergoogle_plusredditpinterestlinkedinmail

Smart city thlan vangin lawm

Aizawl: UD&PA Minister Zodintluanga chuan Smart City atana Aizawl khawpui thlan a ni chu lawmawm a tih thu a sawi.

Nimin khan chenna inah chanchinbu mi thenkhatten an kawmnaah UD&PA Minister chuan he inelna atana Aizawl thlan a nih theihna chhan chu UD&PA Secretary Dr. C.Vanlalramsanga leh a thawhpui te bakah Directorate lama a thawpuite thawhrah liau liau a nih thu sawiin, Smart City thlan hmasa zawkah point khata tling lovin, tla chiah chiah in tum 2 lo awm tawh mah se tun tuma an tlinna chu Aizawl khawpui mai ni lo, Zoram mipui an lawm ngei a rin thu a sawi bawk. Zodintluanga chuan, “Smart city hnuaiah hian scheme hrang hrang Health Sector, khawpui cheimawina tur leh khawpui tihchangkanna tur tam tak a keng tel a, hengte hi sawrkarin tha taka hmanga mipuiten hma an lo sawn theihna atana hman theih ngei chu mipuite bakah sawrkar pawhin a duh dan a ni,” a ti bawk.

MPC Thalai pawhin thuchhuah siamin Smart City atana thlan zingah Aizawl a tel ve chu lawmawm an ti tak zet tih an sawi.

Facebooktwittergoogle_plusredditpinterestlinkedinmail

Ram vei pawl Mizoram Exodus Movement indin

Aizawl: Mizoram ah sawrkar tha a pian theihna tur leh a duh apiangte thawhhona tur huang Zoram Exodus Movement chu din a ni a, he pawlin a tum ber chu ‘sustainable developed Mizoram’ a ni.

Nimin chawhnu dar 1 khan Zoram Exodus Movement te hian Aizawl Press Club ah chanchinbumite an kawm a, an pawl chu chanchinbu leh TV atanga mipui ngaihdan an lakkhawm atanga lo piang a ni tih an sawi a. Mizoram ah sawrkar tha a din theih ang tih an ring tlat tih sawiin hemi atana hma lo latu tur steering committee dinin mawhphurhna lo la lawk turin mi 5- Rev.Dr. K.Thanzauva, K.Sapdanga, F.Rodingliana, B.Lalchhanzova leh Dr. Vanlalthlana te an ruat tih an sawi a. Zoram Exodus Movement chu Mizo nun zia nena inmil zawnga kalpui tum a ni tih sawiin movement uaptu atan tlawmngaia Val Upa chan chang turin mi 6- F.Lalremsiama, Lalfakzuala, Bualhranga, Lalliansawta, JH Pahlira leh Rev. Dr. K.Thanzauva te an ruat tih an sawi bawk. Zoram Exodus Movement bultantu te chuan kum 2018 Assembly inthlan hunah pawh sawrkar tha a pian theihna tura inthlan hmachhawn dan kawng an ngaihtuah dawn niin an sawi.

Press mite zawhna chhangin Zoram Exodus Movement hotute chuan an pawl chu Mizoram in kawng tha zawk a zawh theihna atana inzirtirna movement a ni a, an kal zel dan tur leh inthlan an chuh dawn leh dawnloh chu hunin a la hril dawn niin an sawi a. Political party ah tihbik leh hnualsuat an neilo nia sawiin Mizoram hmasawnna duhtu chu tupawh an thawhpui thei nia sawiin hetih lai hian tumah thawhpui tura sawm/biak an la nei lo tih an sawi. Zoram Exodus Movement hotute chuan Val Upa te chuan inthlan an chuh ve dawn lo nia sawiin an tum ber chu kum 2025 ah Mizoram chu ‘developed state a siam’ niin an sawi bawk.
Nimin Press mite kawmna hun hi Rev.Dr. K.Thanzauva chuan a kaihruai a ni.

Facebooktwittergoogle_plusredditpinterestlinkedinmail

Coaching atan Rs nuai 250 seng tawh

Aizawl: Mizoram Youth Commission (MYC) hotute atanga thudawn danin Mizoram sorkarin MYC kaltlanga IAS leh SSC coaching an kalpui mekah Rs nuai 250 an seng tawh.

MYC hotute chuan IAS (UPSC Civil Service) coaching bikah batch hnih an chhuah tawh thu sawiin mi 240 kal chhuak an awm tawh thu an sawi a. Staff Selection Commission (SSC) coaching bikah mi 650 in course zo tawhin a batch 4 na an nih tawh thu an sawi bawk. Mizoram Youth Commission hotute chuan a tirah Dinthar Primary School cheibawl nan Rs 16,17,900 an hman thu leh heng bakah VSAT license fee, furniture, khawl hrang hrangah te pawisa hman a nih thu an sawi bawk.

IAS leh SSC coaching atan batch thar lak tum mek a nih thu sawiin IAS bik atan mi 50 leh SSC ah mi 200 lak a nih dawn thu MYC hotute chuan an sawi a. IAS coaching hi Alternative Learning Systems (ALS), New Delhi in an kalpui a, zirlai te hian satellite hmangin Delhi ALS Centre a class lak lai mek chu live-a enin class an la thin a, SSC erawh chu a hmunah zirtirtute awmin class neih thin a nih thu an sawi. SSC leh IAS coaching-ah hian a nghet lovin chawkidar 1 leh enkawltu pakhat an awm thu MYC hotute chuan an sawi bawk.

Facebooktwittergoogle_plusredditpinterestlinkedinmail

Postal intuaithar

Aizawl: Nimin khan Mizoram postal region chuan Lal Thanhawla Auditorium-ah intuaitharna leh hnathawk thate chawimawina hun an hmang.

Celebration cum felicitation 2017 hi Posmaster General Pu T.Mang Min Thang, IPS chuan hmanpuiin fuihna thu a sawi a, Postal staff hna thawk thate hnenah lawmman a sem bawk. T.Mang Min Thang chuan Mizoram bikah hian kum kalta chhung khan speed post atang a pawisa an hlawh chhuah tawh chu vaibelchhe 3.8 a tlin tawh thu a sawi a, saving banking-ah vaibelchhe 4.6 an hmu tawh niin a sawi bawk.

Mizoram postal region ah hian Head Post Office pakhat, MDG-1, Sub Office 37 leh Branch office 350 awmin hetiang programme hi an vawi khat hmanna a ni.

Facebooktwittergoogle_plusredditpinterestlinkedinmail

PWD kawng enkawl km 6000+

Aizawl: Mizoram PWD te chuan tun dinhmunah kawng kilometres 6127-a thui enkawlin thawktu mi 1954 an awm mek.

Tun hnaia I&PR Department-in an tihchhuah Mizoram Today 2017 a tarlan danin Mizoram PWD in a enkawl kawng hi National Highway km 1465, state highway km 170, major district road km 601, district road km 978, village road km 1911, khawpui leh thingtlang khawchhung kawng km 705 leh Aizawl khawpui kawng km 297 te an ni.

National Highway km 1465 a thui hi Ministry of Road Transport & Highway sum hmanga enkawl a ni a, a bak zawng km 4662 hi state sum atanga enkawl a ni thung. A chunga tarlan kawng hrang hrangah hian lei (bridge) 124 a awm mek a, chung zinga 50 chu National Highway hnuaia mi a ni a, a dang zawng 74 hi State PWD hnuaia mi an ni.

A chunga tarlan kawng bakah hian Mizoram chhungah BRO enkawl kawng km 896, CPWD enkawl km 176 leh department dang enkawl kawng km 433 a awm mek a. PWD enkawl nena belhkhawmin Mizoramah kawng km 7632 a awm a ni. Mizoram zau zawng atanga chhuta kawng seizawng (road density) hi 36 kms per 100 sqkm a ni a, India ram pumpui road density chu 148 km per 100sqm km a ni.

Facebooktwittergoogle_plusredditpinterestlinkedinmail

Rs 10 thir khuahkhirh ni lo

Aizawl: State Bank of India (SBI) main branch hotute chuan Rs 10 thir chu pawisa dang ang bawka zalen taka hman tur a nih thu leh a lem a awm loh thu an sawi.

SBI hotute chuan Zalen zawhna chhangin Rs 10 thir chu zalen taka hman tura RBI thupek anga pekchhuah a nih thu sawiin dawng duh lo an awm thiang lo niin an sawi a. Rs 10 thir chu a lem a awm lo niin an sawi bawk. Thudawn danin Rs 10 thir chu mipuiten hman harsa an ti a, dawr tam tak dawng duh lo an awm a. Kohhran thenkhat chuan thawhlawm atana Rs 10 thir thawh lo turin Kohhran mipui te an hriattir bawk.

Rs 10 thir chu Rs 500 leh Rs 1000 note thi ta anga pawisa thi a ni ve lo tih sawiin SBI hotute chuan pawisa hman lai mek a ni a, bank ah pawh deposit theih vek a nih thu an sawi a. RBI a\anga thupek an dawn dan erawh chuan Rs 10 thir chu market a kal kual vel atana duan a nih avangin mipuiten bank a deposit lo thei ang bera an hman kual chu RBI duhdan a nih thu an sawi a; nimahsela, bank-ah deposit theih loh tia khap bur erawh a nih loh thu an sawi.

SBI hotute chuan Rs 10 thir lem a awm anga thu a than lai a awm tih sawiin Rs 10 thir hi a lem a awm lova, khawiah pawh hman theih a nih thu leh mipuiten an hmang duh a nih phawt chuan eng dawr mahin an lo hnar thian loh thu Zalen an hrilh bawk.

Facebooktwittergoogle_plusredditpinterestlinkedinmail

Login

Lost your password?