Monthly Archives: June 2017

Tar pension dawng thei lo hnenah vbc 1.48 pe -CAG

Aizawl: CAG report tihchhuah thar chuan Social Welfare Department-in Tar pension dawng theilo tur te hnenah pension an pek avangin vaibelchhe 1.48 an seng thlawn niin a tarlang a, hetih lai hian Social Welfare Minister PC Lalthanliana chuan Supreme Court thupek anga kal an ni tih a sawi.

CAG report tarlan danin kum 2011-2015 chhung khan District Social Welfare Office, Aizawl East chuan tar pension dawng theilo te pension an pek avang hian vaibelchhe 1.48 chu thil tul lo takah an hmangral niin a tar lang a. Indira Gandhi National Old Age Pension Scheme hnuaiah tar pension dawng/la theite chu BPL chhungkua an ni ngei tur an niin an pension pawisa hi sawrkar laipuiin thla khatah Rs. 200 rawn pein a bak Rs. 200 chu Mizoram sawrkarin a pek tur a ni a.

Mahse DSWO hian BPL mi 3356 leh a dawng thei lo tur (BPL nilo) mi 804 te pension a lo pek avang hian kum 2011-2015 chhung hian vaibelchhe 1.48 chu hmanral niin a tar lang.

Hetih lai hian SWD Minister PC Lalthanliana chuan Zirtawpni kalta khan Congress Bhavan-ah thu sawiin CAG report hi a sawifiah a, “Tar Pension hi NSAP hnuaia kalpui niin 1995 atang khan mi retheite tanpuina tura duan a ni a. Mi harsa leh chhungte chawmtu nei lo tan a duan a niin kum 2007 khan Indira Gandhi National Old Age Pension Scheme tiin a hming an rawn thlak a, hetah hian BPL chhungkuaa mi chauh dawng tura tih niin kum 2011-ah kum bithliah rawn tidanglamin kum 60 chin chauh dawng thei tura rawn tih a ni a. A dawng thei tur hi BPL tih a ni na a, a Guide Lines leh Supreme Court hian WP No 196 of 2001 ah chuan a phu ngei te BPL List a an awm loh pawhin Tar Pension atanga telh loh hi a phal lo a ni,” a ti.

Facebooktwittergoogle_plusredditpinterestlinkedinmail

Thisen pe

Nimin khan Sairang Pastor bial KTP chuan a mamawh apiangte hman turin Synod Hospital Durtlang tann thisen unit 28 an pe, a petute mipa 26 leh hmeichhia 2. Nimin vek khan Mizo Chelsea Supporter’s Club-in 2016-17 English Premier League champion lawm nan Aizawl Civil Hospital-ah thisen unit 24 an pe, a petute mipa 21 leh hmeichhia 3 an ni.

Facebooktwittergoogle_plusredditpinterestlinkedinmail

Lo zin tum

Union Sports Minister Vijay Goel chuan June ni 26&27,2017 hian Mizoram a rawn tlawh dawn a, a cham chhungin mi pawimawh hrang hrangte a hmun dawn bakah Press mite a kawm bawk ang.

Facebooktwittergoogle_plusredditpinterestlinkedinmail

Workshop

Amway India chuan June ni 27,2017 chawhma dar 11 hian 3rd MAP Complex, Mualpui ah Mizoram Police te tan healthy living workshop an buatsaih dawn a, he workshop hi DGP Thianghlima Pachuau in a hawng ang.

Facebooktwittergoogle_plusredditpinterestlinkedinmail

Excise-in man

Aizawl: Mizoram Excise & Narcotics Department chuan Zirtawp tlai khan Champhai ah heroin gram 212.6 leh a neitu nia puh an man.

END te chuan Lalpekhlui (23) d/o Thanliana, Tahan, Myanmar tuna Champhai Kanan venga khawsa mek nia inchhal chu an man a. Lalpekhlui hi NDPS Act, 1985 tlawhchhanin thubuai siamsak a ni. Excise te hian June ni 20,2017 zan dar 7:30 khan Tlangsam leh Tiau kawngpuiah Myanmar Beer (Dagon Beer) Can 1560 (Case 65) leh a neitu nia puh Chawngchhuana (52) s/o Thangura (L), Champhai Vengthlang nia inchhal chuan man bawk. Heng Foreign beer an man hi Local Market rate-ah Rs 1,87,200 hu a ni.

Facebooktwittergoogle_plusredditpinterestlinkedinmail

The Week That Was (June 25, 2017)

Ruihhlo man
Ni 18.6.2017 (Pathianni) khan Myanmar atanga lakluh Brown Sugar hawng 34 chu Aizawl panpui tum anih laiin Champhai Khankawn Police Check Gate-ah man a ni a. Ruihhlo neitu a puh mi 2 man anih bakah a phurhna lirthei (Gypsy) pawh man tel a ni.

Meeting nei
Ni 19.6.2017 (Thawhtanni) khan Chief Minister Lal Thanhawla, President Mizoram State Olympic Association ni bawk kaihhruaina hnuaiah Synod Conference Hall-ah Mizoram State Olympic Association, Executive Meeting an nei.

Rate bithliah
Ni 19.6.2017 (Thawhtanni) khan Mizo Students Union Gen. Hqrs. hruaitute chuan an pisa ah chanchinbumite an kawm a, ni 19.6.2017 (Thawhlehni) atanga Cement bag khat Rs. 360 a zuar turin Company hrang hrangte an hriattir a, hma an la nghal bawk.
Dawng
Rural Development Department chuan scheme pahnih SPMRM leh IAY/PMAY hnuaiah ni 19.6.2017 (Thawhtanni) khan chawimawina a dawng.

Tlangzarh
Ni 19.6.2017 (Thawhtanni) khan PC Muanthanga lehkhabu ziah, ‘Lung rem hrang hrang’ tih chu Rev.Lalramliana Pachuau chuan Aizawl Press Club-ah a tlangzarh.

CM in hawng
Hmarchhak bial huap, thla khat awh tur 1st North East India Boxing Coaching Camp chu ni 19.6.2017 (Thawhtanni) khan Synod Conference Hall ah Chief Minister Lal Thanhawla chuan a hawng.

Himna zir
Fire & Emergency Service leh Directorate of Health Services ?angkawp chuan ni 19.6.2017 (Thawhtanni) khan Aizawl SP conference hall-ah Aizawl khawpuia damdawiin 15-te tan damdawiin chhunga kângmei a chhuah palha hmalak dan tur zirna an nei.

Rel
Thawhlehni kalta (20.6.2017) tlai khan Chief Minister’s Conference Hall-ah Health Minister Lal Thanzara hovin Mizoram Institute of Medical Education & Research (MIMER) chungchanga sawrkar hmalakna te thlir ho.

Vehbur khawn rel
June 19, 2017 (Thawhtan) zana Central YMA Executive Committee meeting chuan tunhnai ruahsur nasa vanga chhiatna tuarte tan vehbûr khawn nise an ti

SEDP zir
MNF Gen. Hqrs. hnuaia Programme and Policy huaihawtin ni 21.6.2017 (Nilaini) khan Journalist te tan “Socio Economic Development Policy (SEDP) chungchang zirchianna I&PR Conference hall-ah neih a ni.

Sawiho
Ni 21.6.2017 (Nilaini) khan Chief Minister Lal Thanhawla hovin Lengpui Airport enkawlna chungchang sawiin Cabinet Room ah meeting neih a ni.

Tlangzarh
New Economic Development Policy hnuaia sawrkarin ruihtheihthil laka thalaite an fihlim theihna tura ruahmanna thar “Project Himna – MADAT (Mizoram Against Drugs, Alcohol and Tobacco)” a duan chu ni 21.6.2017 (Nilaini) khan Chief Minister in I&PR Auditorium-ah a tlangzarh.

Pungkhawm
Gorkha Janmukti Morcha Mizoram State Committee te huaihawt in 21.6.2017 (Nilaini) zing khan Aizawl Mahatma Ghandhi lim bulah State hran pek phuta sawrkar laipui kar nan an pung khawm.

Meeting
Ni 22.6.2017 (Ningani) khan MNF National Executive Emergency meeting chu Vanapa Hall-ah neih a ni a, member 235 an tel a ni.

MoU ziak
New Economic Development Policy (NEDP) hnuaia kalpui tur Mizoram Entrepreneur te inelna tur ‘Business Plan Competition’ leh ‘Entrepreneur Summit’ neih tur chungchangah Mizoram State Entrepreneurship Development Monitoring Committee (MEDMOC) leh IIMCIP, Kolkata te chuan ni 22.6.2017 (Ningani) khan thawhhona thuthlung (MoU) an ziak.

Hawng
Ni 22.6.2017 (Ningani) khan Chief Minister Lal Thanhawla chuan Serchhip-a District Research Officer office building cheng nuai 60 senga sak a hawng.

HIV dona thar
Ni 22.6.2017 (Ningani) khan Health & Family Welfare Minister Lal Thanzara chuan Mizoram State AIDS Control Society (MSACS) hnuaia HIV/AIDS dona kawnga hmalakna thar ‘Test and Treat Strategy’ chu Aijal Club-ah a hawngin hman nghal a ni.
&&&&&

Facebooktwittergoogle_plusredditpinterestlinkedinmail

Intihhmuh tlak PUC Finishing School

A vawi 4-na atan Pachhunga University College chuan Finishing School chu zirlaite te thla dawn an neih pui hnuah kar hmasa lam khan an zo fel a. He hun hi final semester zirlai te tana buatsaih thin a ni a, a tum ber chu classroom pawna thiamna pek a ni a, chumi thiamna chuan an hmalam hun hneh taka an hmachhawn an beisei pui a ni.

PUC Finishing School ah hian class hrang hrang 26 neihpui niin life skills, Mizo nihphung hlutna, interview skills, cooking, self defense, communication skills, human rights class, art, financial management, first aid, disaster management, fitness and nutrition te chu a langsar zual te an ni. Finishing school ah hian zirlaite’n eng emaw zah an chawi a, a bak senso chu College pawisa atangin tum sak an ni thung. Hmun dangah phei chuan hetiang course kal tur hian zirlaite’n cheng Nuai tam tak an seng fo thin a ni. Vawi 4 lai hetiang ang hun lo buatsaih thei tawh PUC Principal leh a thawhpuite hi an fakawm hle a ni.

India rama zirna system hrim hrim hian a fawmkim lo hle nia ngaih a ni fo thin a, educationist te’n zirna tluantling an sawi fo thin ‘kil tina zirlai thantir’ tih nen phei chuan inhlat chang a tam thei awm e. India rama zirna In lian leh hming thang te hi a nihna takah sumdawng lian ta deuh vek a ni a, a bikin politician thil ti thei tak tak te an tam hle a. Heng ho rual rilruah hian zirlaite zirna tluantling pek a awm tehchiam lova, sumdawnna lian tak a nih avangin zirlai ngawr ngawr an pawng nek a, ‘marking’ chu a tehfung lian ber a ni hial tawh a ni. State changkang zawk te hemi lamah hian nasa taka an tlan avangin keini a hnufual zawk te chuan an tih dan kan entawn lo thei lova, sikul leh college te chu zirlaiah deuh chauh kan intlansiak emaw tih mai tur a ni ta a ni.
Zirlaite an zirlai thiam tir hi kan sel tihna ni lovin zirlaite hian an zirlai an zawh hnu, ‘nun’ an hmachhawn hun tur hi kan zirna In te hian an ngaihtuah thlenpui a va han ngai tawh em! Classroom chhunga an thiamthil te hi chu hna hmuh emaw eizawnna atana bul tanna hmanrua a ni a. An hun tam zawk an hmanna tur ‘nun classroom’ lam hian tunai hian ngaih pawimawh hlawh thei se a duhawm hle mai. A nihna takah chuan zirlaibu chhunga awm lo hmachhawn hian mihring hian a nun tam zawk a hmang a ni zawk a ni.

Tuna PUC in Finishing School a buatsaih ang hi college dangteah pawh kang kai thei sela zirlai tam takin nun an hmachhawn huna an tana thil tangkai tam tak an zirna hun a ni si a. Sawrkar lam pawh hian beng chhiin PUC in an kalpui mek ang programme hi ram puma college zirlai te tan zau zawka theh dan ngaihtuah se a tha khawp ang.

Facebooktwittergoogle_plusredditpinterestlinkedinmail

Doctor ka zawhna (June 25, 2017)

Zawhna: Ka pu, nu kum 50 mi ka ni a, ka thi a hul dawn tan niin ka hria a, ka buaina zawk chu ka zun hi ani. A chhuak sek a, han zung ila, tlem te te in ka zung a, zun a chhuah lah hian insum hleih theih loh tur ang khawp hian a chhuak leh lawi sia. Ni khatah hian vawi 10 dawn lai te ka zun a chhuak mai thin a, mi zinga awm a hrehawm khawp mai. Ka inentir ve tawh a, damdawi te pawh ka ei nual tawh a, mahse a reh thei tak tak lo. Min puih theih chuan ka lawm hle ang.

Chhanna: Zun kawng buaina hi kum a han tam deuh hian, a bikin hmeichhiaah phei chuan thi hul dawn hnaih te, thi hul hnuah te pawh, a awm duh zual hle mai a. Mipa bikah chuan kum 50 pelh hnu hian phing hnuaia thal chi khat Prostate Gland thang vang hian zun buai a awm duh viau bawk. I rawn insawiselna ang hi Irritable Bladder emaw Overactive Bladder tite pawhin an sawi thin. A ninawm duh viau in a rinawm bawk. Engpawh nise, a chhan ni thei tur awm ang te han sawi dawn ta ila.

A hmasa berah chuan zun kawng, a bikin phing (bladder) in zun a lo khawl dan leh zun chhuak hre tura thazam in a control dan hi felfai takin a inruahman a. Thazam lam fel lo Neuropathy eng emaw ber avang hian zun chhuah hun hma in phing tihrawl te hi a lo sangmar thei thin a, chu chuan zun tlem awmah pawh zun chhuak feeling (sensation) a rawn siam ta mai thin a ni.

Neuropathy awm chhan zingah hian Zunthlum (Diabetes) hi a common khawp mai a; chuvangin, Blood Sugar test lo tihtir la, zunthlum i neih leh neih loh confirm phawt ta la a tha hle. Stroke emaw kawngruh fel lo vanga thazam tha lo (slipped disc, sciatica etc) tih ang chi-ah te pawh hian a awm fo bawk.

A dang lehah chuan thi hul (menopause) tan leh hul tawh hnu hian hmeichhe hormone pawimawh tak mai Estrogen insiam hi a lo tlem duai ta thin a. Estrogen hi thi neih leh a kaihhnawih hrang hrang atana taksa control-tu pawimawh tak a ni a. Chubakah chuan phing leh a bul hnai tihrawl hnathawh danah pawh hian a inrawlh thuk viau mai. Phing atanga zun rawn chhuahna pipe ‘Urethra’ hi tihrawlin mumal taka a control a ni a, Estrogen hniam hian chung tihrawl te chu a tizawi a, zun chhuak ip thei tura tihrawl tangmar tur a chak tawk ta lo thin a ni.

A dang lehah chuan hmeichhiain nau an neih hian an serh leh chhul bawr a tihrawl (Pelvic Muscles) ho hi a lo zawi tial tial thin a, fa nei tamah phei chuan a awm duh zual. Chumi avang chuan hemi zun chhuak in-control thei tura tihrawl tangmar tur hi a lo chau ta a, zun chhuah hun te, zung tura han san te hi a mumal thei ta lo thin a ni. Hemi avang hian nau neih hnuah hian Pelvic Floor Exercise (kap bawr tihrawl exer lak dan) te pawh nu nau nei te chu an zirtir thin reng a ni.

A chhan dang la awm theite chu zun kawng infection vang te, damdawi ei side effect vang te leh ek khal (Constipation) vang te ani thei bawk. Zunkawng infection (UTI) tia kan hriat fo hian zun in ang chi a siam thin a, enkawl dam loh chuan a benvawn (Chronic UTI) ve thei a, chu chuan hetiang harsatna hi a siam thei ani. Zun test atangin infection awm leh awm loh chu a hriat ve theih ang; Zun culture te pawh a tul thei bawk. Damdawi thenkhat, BP sang damdawi te, mutna damdawi thenkhat te, Depression enkawlna damdawi te, allergy damdawi thenkhat te hian hetiang harsatna hi a thlen thei bawk. Ek khal avang hian a awm duh viau mai a, ek khal hi thi hul hian a thlen ve fo bawk a ni.

Engpawhnise, investigation eng eng te nge i tih tawh i sawi lo va. A pawimawh tur ho chu Blood Sugar, Urine R/E and Culture, Ultrasound te a ni a. Hengte hi lo tihtir ta la, a chhan ber pawh a hriat theih a rinawm. A lo normal vek a nih chuan thi hul kaihhnawih a ni thei a, Hormone Replacement therapy ang te pawh i mamawh thei bawk. Surgeon Doctor inentir phawt la, chumi hnuah fel lohna an hmuh lem loh chuan Gyne Doctor lo inentir leh ta la, i harsatna neih hi a chhan an hriat chhuah a, an enkawl ziaawm theih ngei che ka beisei.

Facebooktwittergoogle_plusredditpinterestlinkedinmail

Ka Huang (June 25, 2017)

Hmeichhiaah pawh hmeichhe zakthei pawl nia ka hriat, kan nu, Zahmingthangi chu, kan fa tê ber kal thei tawng tawng nen Shillong-ah, ka chhuah dan tur ngaihtuahin, Pachûka, Accountant General Office-a thawk a rawn zui a. Chief Secretary, K.N.Kidwai, ICS kha parole-a ka chhuah theihna tur a lo dil chu niin… thu a chhuah hmain mi rawn hmu turin Nowgong-ah chuan a lo chhuk bawk a, rei lo deuh hnua parole-a ka chhuah mai theih tur min rawn hrilh a. Shillong-ah K’u Sena (P.S.Chawngthu) hnenah a chho leh ta mai a.

A hnu lawk chuan ni 30 parole order chu ka dawng ve ta a, Shillong-ah chuan ka chho ve ta a. Ka tih hmasak ber chu Chief Secy. K.N.Kidwaia hmuh a ni. MNF pawh ni hlei lo, Office-a ka thawk lai man kha ka ni bawk a, HEK ka nih hi a chiang ka ti mai a, chuvang chuan thin hi a rim a, awm a tawt ut ut reng mai a ni. Chuvang chuan kan nu ka hruai a, “Ka vin lutuk dawn chuan ka malpuiah min kheuh zel ang che,” tiin ka hrilh lawk diam a ni.

Min man ngawt dan chu ka han hrilh malh malh a (St. Anthony’s High School-a kum 1943-a Pawl 7 pass chauh ka ni na a, a thin a rim em avangin zah leh tawng chu ka bosal hneh hle mai!). Ka thiam/thiam loh ang ang chuan ka chanchin chu ka hrilh a, chutih lai chuan, “Office pawisa bo chu engzat nge?” a rawn ti phut mai a. Ka hre lo, March ni 4 zingah ka nupui fanaute nen Aizawl chhim lam panin kan chhuak a, kan Office chu hmar lamah a nia, ka hre lo tiin ka chhang a, ka chhunzawm leh a. Zawhna ngai nawk chu min zawt leh phut mai a, “Ka hre lo ka tih tawh kha,” tiin ka chhang leh a, ka chanchin bawk chu ka chhunzawm leh mai a. Zawhna ngai, “Office pawisa bo chu engzat maw?” ti bawkin min zawt leh a, ka chawngthu thinin a tuar lo a niang, ring, vin tawkin, “I told you that,” ka’n ti hman chauh a, a ring a niang, kan nu chuan ka malpuiah min kheuh tawk mai a, ka aw pawh chu ka tizuai leh ta a ni.

Chuta tang chuan ni tin deuhthaw hian Chief Secretary chu ka ve hmu ve a, min chhuah turin ka dil ngar ngar mai a. Chutih chhung chuan parole hun, ni 30 kha a lo ral a, extend ka dil a, min phalsak avang chuan Jaiaw Laitdom lamah pindan pakhat Rs. 25/- p.m-in kan luah ve ta a. Hna atanga suspend ka nih avangin Rs. 300/- subsistence allowance chauh ka dawng a, chu chuan mi 6, ka fate 4 nen kan khawsa a ni. Kanghmun lal thin, Pu Lalbuanga kha Shillong-ah a awm ve bawk a, kan pawng inchemchhe kawp ta phian a. Guwahati kawng lam ngaw dur karah khuan, Ankhate, Thingthupui leh eng eng emaw hnan nem ei chi kan zawng a, Shillong Mizohoin min khawngaih leisak thin a; tin, chakai (Aikam) kan khawrh thin a, Khasi bakthakho khuan an ei ngai lo a lo ni awm e. A tam phian a; mahse, ‘Khirh tham’ kan tih ang hi a awm mang lo, kawi tiat hi a ni tlangpui. Chakai chu 7 Rs. 1/-in kan hralh bawk thin, Shillong Mizoho khan min khawngaih a, min leisak ziah thin.

Tum khat chu parole extension application chu an phal ta lo mai. Ka thin hi a rim em em khawp a. Kan chhungin, a zing office-ah kan kal a, a pisa lang thei tur phulah ka dah sauh sauh a, Kidwaia chu a lo lut ta ngei a. “Khai le, ka parole extension application i turn down ta si a le,” tih pahin ka chhungte chu ka kawk a, “Khing khi i lo enkawl dawn nia, kei chu Nowgong jail-ah siam sa asin ka ei ang. Ka nupui fanau khi i lo enkawl dawn nia,” ka ti tawp mai a, min en vung vung a, “Mr. Chhuanlian, ka extend leh ang, thlamuang takin lo han haw rawh,” min tih phah a ni.

Chief Secretary ka biak a, mak tak taka min zawh phut phut a, Office hal te, kan cash bo te min zawh leh thin avang chuan eng dang ni loin kan office chhung ngei atanga hek ka nih hi ka ring nghet tlat ta bawk a. Chubakah, Shillong-ah chuan CID lam? SP kan chawngthu eksenpui, Rokunga kha a awm lai a lo ni bawk a, ka interview a, CS min zawh thinte kha ka hrilh leuh a. Office lamte leh eng eng report te zawng chhuak tuin ka ngen a. Min hrilh tha duh lo na a, Office haltu leh Pawisa bo chungchanga mawhphurtu lamah min puh a ni tih chu a sawi thawi dan atangin ka man thei. Chief Secy. kha ka inrin loh laia min zawh leh phut thin dante kha ka ngaihtuah chhuak a. Tin, kha tih laia police ruk (CID/CBI) Purkaystha khan min lo chhuiin a rukin min lo veh nasa thin tih a hnuah ka hre lehm kan chakai zawrh te kha a lo hre vek mai a lo ni!

Ka tan dan kha Office-a ka thawk lai min hnuk chhuak ka tih tawh kha. Office mi ngei min hek a ni tih hi chiang tawlh tawlhin ka hria. Kan Head Clerk, C.H.Liana kha MNF-in a chabi an chhuhsak a, lehkha pawh kha Civil Surgeon Bora hnenah a pe ngei tih pawh ka hria. Tin, kei chu LDA satliah Establishment lam khawihtu mai ka ni. Chu chu min hektu hian a hre vek tih hi ka ringhlel lo. Office chhunga Office hnathawk ngei hek, kei leh kan Head Clerk C.H.Liana chu kan ni tih hi ka chiang tell telh mai a ni. Tunah chuan min hektu(te) an thi zo tawh bawk a, — CID Purkayastha pawh khan – a report-naah, “An rethei em mai, pawisa hi a lak ka ring lo, ram hnim hnah leh chakai te a zuar a ni,” ti tein report a thehlut a ni awm e.

Tunah chuan khang hun kha kum 50 chuang liam ta thil a ni. An heka te, C.H.Liana leh kei chu Pathian zarah kan la dam a nih hi. He thil, ka tan dan hi Pathian chuan a hre kiau ang, a theihnghilh lo ang. Min hektu min hek dan pawh kha a hre kiau ang. Judgement Day-ah kan la sawi tlang ang chu ka ti mai.

Kum 3 chhung ka service min han chhiarsak duh lote kha, mihring tak pawhin ka tuar nasa. Khatia innocent-a min chhuah a nih kha chuan ka suspension period kha chhiar lehin ‘ Honourably’-in min la lut leh ni se chu, Office Superintendent-te chu ka kai ve hman tur. MIN CHHIARSAK DUH SI LO A. Mahse, hei min hektu(te) chuan he lei hi an(a) chhuahsan ta! Pathianin a la suspend ve ngeiin ka ring tlat a ni. Tawk se, ka thinrim hi a reh mawh hle a ni, DAWT-a inhek vanga ka nihna tur zawng zawng ka ni phak lo a ni.

Facebooktwittergoogle_plusredditpinterestlinkedinmail

Thil 3 – Smart City, GST & Remna Ni, Smart City-ah Aizawl a tel ve

Zirtawpni khan M Venkaiah Naidu, Urban Development Minister chuan a hmaa lo puan tawh sa bak smart city 30 dang a puan belh leh a, chung zingah chuan Aizawl pawh a tel ve hlauh mai a, a lawmawm hle a ni. Prime minister Modi-a hian India ram chhung hmun hrang hranga khawpui thlan chhuah 100 te thuam that a, tihchangkanna tur ‘Smart City Mission/Vision’ a lo puang tawh a. Smart city a tel tum hian khawpui hrang hrangte tehfung hrang hrang hmangin an inel a. Tun tuma smart city 30 puan thar zingah hian hmarchhak bial atangin Aizawl bakah Gangtok a tel ve nghe nghe.

A hma hian smart city a puan khawpui 60 an lo awm tawh a, tuna puan tharte nen khawpui thlan bik hi 90 an tling ta a, 10 puan tur a la awm a, chuta tel tum a inel zingah chuan hmarchhak atangin Itanagar, imphal leh Shillong te an tel bawk. Sorkar laipui sum hmanga khawpui 100 thuam that leh tihchangkan tur zinga Aizawl thlan a ni hi thil lawmawm tak a ni a, inelna hmanga thlan zinga a tel hi a ropui khawp mai. Mahse, inelna tehfung chauh hmanga thlan erawh an ni kher lo tih a hriat, politics thil vanga thlan te leh hnawlte an awm niin a lang.

Smart city thlan chhuah zinga Aizawla tel ve theihna atan hian khawpui enkawlna lama mawhphurtu UD&PA te, a changtu minister-te fak an phu khawp mai. Cheng vaibelchhe 500, sorkar laipui atangin dawn a ni anga, chumi hmang chuan Aizawl khawpui chei that a, thuam that a, tihchangkan a ni dawn a ni. Department lamin ruahmanna an thehluh zingah chuan Aizawl khawpui chep lutuk tihthawlna tur kawng hrang hrang te, lirthei dahna tur (Multi-level parking) te, Trauma Centre (Rikrum thila enkawlna damdawi in) dinna tur te leh a dang te a tel a. Hmalatute an fakawm hle a, an hmalaknaa zarah cheng vaibelchhe 500 hmang hian Aizawl hmel a danglamin, a changkang (Smart) sawt turah ngai ila, a tha ang e.

GST kar tawp atangin: Tunkar tawp hian thla a thar dawn a, Inrinni (July 1) atangin India ramin chhiah lak dan thar Goods & Services Tax (GST) a hmang tan dawn a, sorkar laipui a inpeih tawh a, state sorkarte pawh an inpuahchah nasa hle a ni. Nikum lamah khan GST awmzia leh a kalphung hi kan lo ziak tawh a, tun tumah hian a behbawm thil thenkhat ziak leh ila a tha ang e. Sorkar laipui leh state sorkarin chhiah (Indirect tax) an khawn hrang hrangte a tawp vek anga, GST hian a thlak dawn a ni. Chumi awmzia chu Indirect Tax hrang hrang sorkar laipui leh state sorkarin sumdawngte hnena a khawn (CENVAT & VAT) te, sorkar laipuiin ram chhunga thilsiam chhuah atanga a khawn (Excise duty) te, chung thilsiam chhuah hmanna lam atanga chhiah lak te, ram pawn atanga lak luh thilte hi GST ah khung vek a ni tawh dawn a, chhiah khawn dan pawh a dang tawh dawn bawk.
He chhiah thar (GST) thatna langsar tak an sawi chu thilsiam chhuah (bungrua, thawmhnaw, etc.) atang te hian chhiah (VAT) hi chawi nawn chawi nawn thin a ni a, a siam chhuaktuin a pe a, a hlawm a latuten (warehouse/wholesaler) an pe leh a, dawra zuartuten an pe leh a. Chhiah pek chhawng zel hi thil manah chhiar tel a ni a, a man a to phah a, a tawpa tuartu ber chu a leitu a ni. Chutianga chhiah pek nawn tlut tlut chu GST ah hian a bo tawh anga, an lo pek nawn tawhte kha a rulh leh theih dawn a, thil man pawh a tlawm phah tura ngaih a ni.

Hmannia GST Council-ah khan chhiah bi (tax rate) hrang hrang an siam fel a, GST hman a nih huna harsatna awm thei tur te sut kianna tur an ngaihtuah a, mipui nawlpuiin an mamawh thil hrang hrang man a to phah lohna turin ruahmanna pawh an siam a.
State sorkar pawh a inpuahchah mek a, chhiah thar lak hunah hian kan buai phah lo turah ngai ila. Chutih rualin sumdawngte tan chuan thil buaithlak eng eng emaw a awm belh dawn tih a chiang a, dawr te deuhte pawh an inpuahchah lawk a ngai dawn a ni. Kan ramah hian thil man to chungchangah hian dawrkaite hi dem an awl khawp mai, kan thenawm state aia thil an zuar to bik lutuk te, chhiah tihtlem chang pawha thil man a tlahniam ngai lo te, MRP aia sanga thil thenkhat an zuar thin te hi thuneituten ngaihven thin se a tha khawp ang. GST hman tan hunah pawh hian hmun danga thil man leh helaia thil man a inthlau lo turah ngai ila, chhiah lak tihtlem a nih chuan a man a tlawm ve turah ngai ila.

Remna Ni a lo thleng leh dawn ta: Rambuai lai khan remna leh muanna dilin kohhranho an tawngtai thin a, zirlai rualten nasa takin hma an la a, political party-ten auhla atan an hmang a, mipui pawhin 1984 khan remna leh muanna thlen thei tur bera an ngaih an thlang tling a. Mahse, politics thil mak deuh deuh a thleng thin a, remna a thlen a beiseiawm deuh a, a hnuah a beiseiawm lo leh a, politician-te an inpuh kual vel karah mipui an hmanhmawh tial tial a, zirlai rualten an nawr na zel bawk a. MLA inthlan atanga kum hnihna 1986 June 30 khan MNF leh India sorkarin Inremna Thuthlung chu an ziak ta nge nge a, kum 20 chhung zet rambuai chu a lo tawp ta.

Remna leh muanna a thlen theihna tura thawhhlawk bera insawite hian anmahni an inhmuh dan an sawi a ni a, dawt sawia puh chi an ni lo ang. Politician-te thusawi hi chu chik taka ngaihtuah zui phawt loh chuan pawm nghak ngawt a fuh lo thin. Dik tak chuan rambuai kha mipuiin an ning tawh em a, chuvangin remna thlen thei tura insawi leh hmala ngei tur intiam ngamte kha an thlang a ni ber a. An thlan tlinten mipuia an intiamna ang an tihhlawhtling ve thung a nih chuan an inrul tawk chiah tihna a ni ang. Remna a thlenna tura beitu hi an tam hle a, rambuai tirh atanga hmala nghal te an awm a, kohhran hruaitute, zirlai pawl hruaitute, politician-te zingah sum leh hun tam tak senga beitu, tha leh zung nasa taka seng an awm nual mai. Chuvangin, mimala thawhhlawk bika insawi ai chuan hnam pum thawh rah angin sawi ni zawk se, pawm a nuam ber ang.

Engpawhnise, kum 20 chhung rambuaia kan awm chhan kha India sorkarin Mizote min awp dan leh min enkawl danah thalai rualte an lungawi lo a, pi leh pu atanga awp beh ni ngai lo hnam kan nih avangin kan hnam chanvo Zalenna sual chhuak turin huaisen takin an bei a ni a. Chuvangin, mahni hnam zalenna tura beitute hi (an hlawhtling emaw hlawhtling lo emaw) tute mahin an hmusit ngai lo a, an chawimawh zawk thin. Hnam pasalthate hmusit leh diriam chingte hi Mizo an nih pawhin thinlung lamah hnam hmelma rilru pu an ni tal ang. Hnam dang history-ah pawh zalenna sualtute an hlawhtling vek bik lo a, hlawhtlin beiseiawm miah loa huaisen taka sualtute hlei hlei hian ngaihsan an hlawh thin. India-in a awp hnam hrang hrang zingah hian hian mahni chanvo (zalenna) sual ngam hi tlem te an ni a, chung zingah chuan Mizote kan tel hi inchhuanna tham a ni a, hnam dangte pawhin min ngaihsan phah viau zawk.

Mipui duh dana Remna a lo thleng leh thei kha thil lawmawm tak a ni a, Pathian hnathawh liau liau a ni. Chuvangin, Remna Ni champha lo thleng turah pawh hian politics thila inchirhtheh a, na tak taka inbeih nan hmang loin, Mizo mipui tanrualna vanga remna lo thleng a ni tih te hre thar ila. Thangkhat lian zet rambuai hnua remna leh muanna hlut zia te, zalenna sual vanga hnam hmangaihna thinlung kan put phah zia te, hnam pasalthate inpekna ropui zia te ngaihtuah thar ila. Remna vawng nung zel tur leh hnam hmangaihna thinlung pu thar zel turin inpe thar bawk ila a tha awm e.

Facebooktwittergoogle_plusredditpinterestlinkedinmail

Login

Lost your password?