Monthly Archives: July 2017

Feature : Video conference-in training

Aizawl Deputy Commissioner hmalaknain sawrkar school zirtirtu ten English subject tha zawka an zirtir theih dan tur chu English Learning Foundation (ELF), Chennai te nen thawk hovin zirhona neih a ni.

Sarva Shiksha Abhiyan (SSA) hotute a\anga thudawn danin English Learning Foundation nena thawhhona chu sawrkar school-a English subject zirtirtuten English zirtirna chu tha lehzuala an neih theihna tur a ni a. He thawhhona hi Aizawl DC hmalakna a nih thu leh sum mamawh ang pawh Aizawl DC-in a ngaihtuah dawn niin an sawi bawk.

He hmalakna bul tan nan hian Aizawl DC Office Video Conference Room-ah Aizawl District chhunga school 10 atanga English zirtirtute leh ELF te chuan school naupangte dinhmun zirchian dan tur chu July 5, 2017 khan video conference hmangin an zir hmasa a, hemi hnuah hian naupang te dinhmun endikna (assessment) chu neih a ni.

Assessment neihna lehkha te hi ELF, Chennai-a thawn tura peih tawh niin Aizawl DC Office-ah thawn theih maiin a awm tawh a ni.

Thudawn danin assessment neihna te hi thawn a nih hunah ELF, Chennai te hian an zirchiang ang a, naupangte mamawh ang tawk chiaha English zirtir an nih theih nan zirtirtute chu video conference hmangin naupangte an zirtir dan tur an rawn zirtir leh dawn a ni.

Aizawl DC office-a thawktute atanga thudawn danin he hmalakna hi DC-in sawrkar school a tlawh thin atanga rawn irhchhuak a ni a, English zirna tha zawk an mamawh nia a hriat avangin DC hian bul a tan a ni. Zirtirtute pawh an phur thu leh thil tangkai tak a nih an rin thu Aizawl DC-a thawktute chuan an sawi bawk.

Facebooktwittergoogle_plusredditpinterestlinkedinmail

Aizawl khawpui 98% lai a him lo

Aizawl: GeoHazards International-in Aizawl khawpui a zirchianna ah Aizawl khawpui hmun 98% chu a him tawk lo tih an sawi.

Aizawl leilung awmdan zirchianna ah hian Aizawl chu category 4 ah then a niin low, moderate, high leh very high zone ah te then a ni a. Hmun hima ngaih (low zone) hi 2% chauh awmin a dang hi lirnghing engemaw thleng palh ta se min thei/hlauhawm ah ngaih a ni. A tlangpuiin Aizawl chu hmun hlauhawm deuh vek nia ngaih a ni.

Aizawl Municipal Corporation thawktuten Zalen an hrilh danin tuna GeoHazards International report leh AMC Site Development Regulation chu kaikawpin hman thuai an tum a. He dan hi hman anih hun chuan ram leilung awm dan uluk taka zirchian hnuah leh a hlauhawm leh hlauhawm loh finfiah anih hnuah chauh in sak phalna pekchhuah a ni tawh ang.

Aizawl khawpui zirchianna hi AMC, Lettis Consultants International leh GeoHazards International tangkawpte siam a ni.

Facebooktwittergoogle_plusredditpinterestlinkedinmail

Smart city thawk tur buaipui mek

Aizawl: Smart City atana Aizawl khawpui thlan anih hnuah a chei hna thawktu tur Company thlan tur a ni a, thil buaipui ngaite UD&PA Department lamin an buaipui mek.

Zalen palaiin a biaknaah UD&PA Secretary Dr. C.Vanlalramsanga chuan Aizawl khawpui chei hna thawk tak tak turin company thlan a ngai tih a sawi a, hemi atana thil tulte buaipui mek a niin peihfel thuai tum a ni tih a sawi.

Smart city atan Aizawl thlan a nih tak avang hian vaibelchhe 500 hmangin khawpui chei hna hi thawh a ni dawn a, a thawh khatna atan cheng vaibelchhe 200 in hna tan phawt a ni ang. Aizawl khawpui chei dan tur ‘master plan’ hi peihfel a ni tawh a ni.

Facebooktwittergoogle_plusredditpinterestlinkedinmail

Aadhaar-Ration card 45% thlunzawm tawh

Aizawl: Food Civil Supplies & Consumer Affairs (FCS&CA) hotute atanga thudawn danin Ration Card leh Aadhaar thlunzawmna hna kal zelah Mizoram chhunga ration card zaa 45.56 thlunzawm tawh a ni.

FCS&CA hotute chuan Aadhaar leh Ration Card thlunzawm hna (Aadhaar seeding) chu chak taka kalpui tur chuan mipuiin chak taka Aadhaar-a an in-enroll a ngaih thu Zalen an hrilh a. Aadhaar enrollment hna thawktu General Administration Department (GAD)-in duhthusama an thawh chak theih loh avangin Aadhaar seeding chu chak takin an kalpui hleithei lo niin an sawi.

Aadhaar leh Ration Card thlunzawm dan report (Aadhaar Seeding Report) atanga a lan danin Mizoram pumah Ration Card 265,170 a awm a, hemi zinga 120,819 chu thlunzawm tawh niin thlunzawm loh hi 144,351 a la awm a ni. Mizoram puma Ration Card-a hming chuang zat hi mi 1,281,291 an ni a, heng zinga Aadhaar-a ziah luh tawh hi mi 414,581 niin mi 866,710 chu ziah luh an la ni lo a, ziah luh tawh zat hi za zela 32.36 a ni.

FCS&CA hotute chuan Aahaar mipuiin an neih chuan khaihlak lovin an ziah luh zung zung thin thu an sawi a, Aadhaar ber siam chak a nih chuan chak takin thlunzawm hna an thawh theih thu an sawi bawk. Aadhaar nena thlunzawm hna hi Mizoram puma zawh a nih hunah Ration Card a Aadhaar hman tak tak a nih theih nan NIC lamin a hlawmin validation an ti dawn niin FCS&CA hotute chuan an sawi bawk.

Facebooktwittergoogle_plusredditpinterestlinkedinmail

President thlanna atan inpeih

Aizawl: Naktuk July ni 17, 2017-a India President thlanna neih turah Mizoram Legislative Assembly chuan ruahmanna engkim an peih tawh.

Assembly thawktute hnen atanga Zalen thudawn danin President thlanna tura ballot box chuan ni 13.7.2017 (Ningani) khan Aizawl lo thlengin Assembly strong room-ah dah a ni a, naktuk vote thlak dawnah lakchhuah a ni ang. President thlan/vote thlak hi zing dar 10 atanga tlai dar 5 inkar chhungin neih a ni dawn a, Assembly Committee room-ah vote thlak a ni ang. Ballot box hi Thawhlehni hian New Delhi panpui nghal a ni dawn a ni.

Zalen thudawn danin tun tum President election-ah hian damlohna avangin AH&Vety Minister C.Ngunlianchunga leh Lunglei HPC Vice Chairman S.Laldingliana te chuan vote an thlak thei dawn lo a, midang chu thei lo tur an awm lo nia hriat a ni.

Zalen zawhna chhangin MNF Treasurer Vanlalzawma chuan President atan hian MNF&MPC MLA te chuan NDA candidate Ram Nath Kovind an vote dawn niin a sawi.

Facebooktwittergoogle_plusredditpinterestlinkedinmail

NECS VAT awlna lehkha tichhuak

Aizawl: Taxation department chuan July 11, 2017 khan NECS-in VAT an awlna tur hriattirna lehkha hmangin a tichhuak niin kan thulakna chuan a tarlang.

Notification tarlan danin North East Consultancy Services (NECS) in kum 2016-2017 chhunga VAT an awl tur zat hi Rs. 1,26,63,418 a ni tih tarlan a ni a. Chhiah awl a nihna chhan hi Mizo thalaite tan football hmasawnna an thawh nasat vang tih a tarlang bawk a ni.

Mizoram sawr-karin NECS te VAT a awl hi Mizoram hmun hrang hrang 19 a an hnathawhnaah a ni a. Project amount belhkhawm hi Rs. 116,96,68,310 niin bill amount chu Rs. 48,45,24,463 a ni.

Facebooktwittergoogle_plusredditpinterestlinkedinmail

Tuikual South-in kum 30-na lawm

Aizawl: Tuikual South khawtlang chuan nimin Inrinni khan an veng kum 30 tlin “Pearl jubilee” chu Lal Thanhawla auditorium-ah an lawm a, tlaiah jubilee lawmnan khawtlang huapin ruai an theh.

Nimin jubilee lawmna hun hi Chalrosanga, Organising Committee chairman-in a kaihruai a, khuallian PHE Minister Zodintluanga chuan, “Tuikual khawtlang inlungrualna avangin Tuikual in nasa takin hma a sawn a, hei hi hruaitu hmasate vision neih that vang a ni,” a ti. Zodintluanga chuan UT building thin chu mipui tan tangkai zawka hman tum a ni tih a sawi bawk.

Khual zahawm bialtu MLA Lalruatkima pawhin Tuikual khawtlang tanrualna fakawm a tih thu a sawi a. “Tunlaiah insawisel kan uar ta lutuk hi a pawi a, insawisel lovin kan thatna lama infak thiam kan zir a ngai a ni,” a ti bawk.

Tuikual South khawtlang hian ni 10.7.2017 (Thawhtanni) atang khan jubilee hi lawm tanin Thawhtanni khan Jubilee lungphun hawnna leh souvenir tlangzarhna an nei a. Thawhlehni khan jubilee puala in sak thar chu hawn a nih bakah a thlawna inentirna ‘free clinic’ neih a ni a. Nilaini khan chhungkaw pual hun hman a niin Ninganiah ‘Hlim zan’ hman a ni a, Zirtawp zan khan concert neih a ni bawk.

Tuikual veng hi kum 1963 khan Dawrpui veng atangin an indang a, kum 1987 khan North leh South-ah inthenin kum 1989-ah YMA an indang a ni.

Facebooktwittergoogle_plusredditpinterestlinkedinmail

Hmun 3-ah lei min

Aizawl: Nizan hmasaa ruahsur vangin hriattheih chinah Aizawl veng pathum Luangmual, Republic Veng leh Tuithiangah leimin vangin harsatna a thleng.

Luangmual YMA hruaitute hnen atanga thudawn danin nimin zingkar khan an thlanmual chu a min a, leimin hian thlan pasarih minpuiin nimin vek khan hnatlangin ruang phawrh leh phum \hat hna chu an thawk leh nghal a ni. Leimin chhan hi tun hnaia thlanmual tan tlanga kawng an sial, hlauhawm pha lo tura an ngaih chhak a nih thu leh ruah sur nasa vang anih an rin thu an sawi bawk.

Nimin vek khan Tuithiang Veng, Bethlehem bazar kawngah chirh a tawlh leh bawk a, he chirh tawlh hi zingkara thleng a nih thu leh zingkar veka hnatlangin an then fai leh thu Tuithiang YMA hruaitute chuan Zalen an hrilh. Nimin zingkar khan Republic Veng, College kawngah pawh leiminin Maruti Van leh scooty 2 a min pui a, mi tlawmmngaite’n lirthei te hi lachhuakin PWD lamin a thenfai hna an thawk nia thudawn a ni.

Facebooktwittergoogle_plusredditpinterestlinkedinmail

Garage neih nana hun pek tlem tawh : Transport Dept

Aizawl: Home Minister chairman-na hnuaia din Coordination Committee on Traffic Management in lirthei neite a dahna (garage) nei vek tura a tih angin a hlawhtlin nan Transport department chuan hma an la mek a. October 2010 hnulamah chuan lirthei neitute chu garage ah dah vek tawh tura hriattir an ni.

Zalen zawhna chhangin Transport Director R.Remmawia chuan, “NEDP hnuaiah Aizawl Traffic Jam Free kalpui tura min tih angin department lam chuan kan kalpui mek a, mipui lam pawhin kan hmalakna min thlawp tha niin kan hria a, kan lawm hle a ni,” a ti. Transport Director chuan lirthei neitu ten an garage ah an lirthei number an tar zel a ngai tawh dawn nia sawiin November 2017 atang chuan sawrkar thuchhuak chu a tul anga kenkawh an tum dawn tih a sawi a. Aizawl khawpui kawngsirah parking awm lovin dropping zone siam chu an duh dan a ni tih a sawi bawk.

Lirthei in register thar ten garage an nei ngei em tih endiktu atana ruat Transport department hnuaia Enforcement staff te pawhin a theih ang angin garage endik hna an thawk tih an sawi a. Enforcement hnuaiah staff 12 chauh an awm nia sawiin hmun hrang hrangah duty a ngaih ve bakah Aizawl ah ringawt pawh nitin lirthei 50 vel chawhrualin register thar an awm ziah avangin a hautak hle tih Zalen an hrilh a. Mahse heti chung hian mipui lamin dan an zawm tha hle nia an hriat thu an sawi.

Aizawl veng pakhata Local Council Chairman chuan lirthei register dawnin a form ah sawrkar lamin Local Council ten garage an nei ngei em tih an hriatpuina an lo ziahsak a ngai tih sawiin hei hi tha a ti hle niin Zalen a hrilh a. “Garage neite chu an nei ngei tih ka lo ziahsak a; mahse, mi thenkhat, garage nei mumallo chunga lehkha min ziahtir tum te pawh an awm a, mahse ka ziak duh lo a. An neih tak tak hunah chauh lokal thin turin ka ti thin a ni,” a ti.

Lirthei neitu pakhat chuan sawrkar in garage nei vek tura ruahmana a siam chu a thlawp tlat tih Zalen a hrilh a. “Aizawl hi tlangram khawpui dangte ngaihtuah chuan a kawng hi te chhe lutuk a ni lo a; mahse kawng awl lai turah lirthei kan hung tlat zel hian a tichep a. Hetia lirthei neiten kan dah bo vek theih chuan kea kalte leh lirthei khalhtute tan hlei hlei hian a nuam zawk dawn a ni,” a ti bawk.

Facebooktwittergoogle_plusredditpinterestlinkedinmail

Media hmanga sualna lakah mipui inven ngai : Cyber Br.

Aizawl: Mizoram Police Cyber Crime Branch hotute chuan media leh a kaihhnawih hrang hrang hmanga sualna laka fimkhur a ngaih thu Zalen an hrilh.

Police hotute chuan phone call hmanga mi bum ching an awm thu sawiin heng mi sualte hian an va biaka te chu an ATM card a expire dawn thu leh a tihnun nana ATM number leh Bank account number a rang lama thawn turin an hriattir thin a, hei hi pawi khawih nana an hman thin thu an sawi. Cyber Crime hotute chuan hetiang phone hmanga mipuite va biak hi bank lamin an tih ngai loh thu leh mipuiten lo zawm loh tur a nih loh thu an sawi. Pawisa chungchang hrim hrima phone call chu a dik loh tlangpui thu an sawi bawk.

Cyber Crime hotute chuan mahni bank account hralh thin an awm tih sawiin, mi thenkhatin thil hre lo zawk te bumin account an hawn tir a, chu account chu man tam deuha an leisak thin thu an sawi a. Heng account leisaktu te hian dan kalha thil tih nana an hman thin thu leh pawikhawih nan te an hman thin thu an sawi a. Police-in a chhui a, an chhuichhuahna chu account neitu mi mawl tete an lo nih leh thin thu an sawi a, hei hi mipuiten an hriat a ngaih thu an sawi bawk.

Social Media hman kawnga fimkhur a ngaih thu pawh sawiin Cyber Crime hotute chuan social media hrang hranga mi nihna (thlalak, hming leh adangte) hmanga fake account siam chu report a awm chuan IT Act kalh a nih avangin an man hmak hmak dawn thu an sawi a. Tunlaia lar tak social media hmanga inkahna group leh site hrang hrangte pawh an kaha te’n complain an thehluh chuan action lak vek theih a nih thu leh fimkhur a ngaih thu an sawi bawk.

Facebooktwittergoogle_plusredditpinterestlinkedinmail

Login

Lost your password?