Monthly Archives: July 2017

‘PURAE’ HMELTHAR HLIM HLIMI

Company hrang hrangin an hmingthanna leh hmelthatna te hmangin an thil siamte faksaktu an ruai fo a. Mizo mi larte pawh tualchhung leh ram pawn lamah mi dawr emaw, an thilsiamte emaw faksakin an inruai ve fur tawh. Hei tunah pawh gospel singer Hlim Hlimi chu ‘Purae’ company chuan an kutchhuakte fak sak turin an ruai.

cbafcfd0-e89f-4cf3-ba49-8b9a21f0bbd5

Nikum tawp lam daih tawh atangin Hlim Hlimi leh ‘Purae’ te chuan inbiakna an nei tawh a. Purae company chuan tunhnaiah launch thar an neih chu gospel singer chuan a rawn fak sak tan ta. Purae hian an hmanni lawk khan an kutchhuak thar ‘natural handmade soap’ chi thum — Winter Care, Acne Control leh Bamboo Charcoal — an launch thar a ni.

Hlim Hlimi chuan, “Nikum Coffee Night bawr velah khan, an launch hma khan min be lawk tawh hrim hrim a. Krismas lai nih vang khan ‘Winter Care’ min pe a, ka hmang a, hmai sensitive lutuk ka nih vangin ka hmai mil turin an siam ka ti mai. Ke ngeih tawp,” tiin a sawi a. “Summer a ni chiah a, a dang min pe leh a, ka vun mil tur ang zelin min pe,” tiin a sawi bawk.

Purae hian Hlim Hlimi tan liau liau, a hming chuangin an customise thei a. Chutih rual erawh chuan, customise soap hi chu an la launch lo a. Chumai bakah, Purae hian home production ang chauhin an la tan hrih niin Hlim Hlimi chuan a sawi a ni.

Facebooktwittergoogle_plusredditpinterestlinkedinmail

MIZORAM-A MUSIC VIDEO SEI BER TUR ‘PUC VARIOUS ARTISTS’ HLA PEIH DAWN HNAI?

Pachhunga University College various artist music video chu peih fel thawkhat a ni ta. An music video thar tur hi ‘Zoram Rohlu PUC’ tih a ni a, tunah hian tlangzarh lohna chiahin a dal ta. Mizo kutchhuak music video zinga rei ber tur a nih hmel.

PUC Various Artist tia an sawi zingah hian tunlai zaithiam lar tak tak, he’ng — Youth Icon star Duhsaki te, tunlai gospel singer zinga hriat hlawh ber pawl Hlimhlimi, Rebecca Zorintluangi, Awmawmi, Cindy Lalthanpuii, Wendy, Sangtei Khawlhring, Vanlalnunpuia, F. Lalremruata, R. Lalhmingmawia, Saiawmpuia leh Lalhruaitluanga — te an inlan dawn a ni.

Music video hi thawnthu (plot/story) neia siam a ni a. Shooting pawh kar hnih dawn lai hun an seng a, chan chhung a reiin mihring leh hmanrua pawi an mamawh tam hle. PUC-a Assistant Professor ni a, he video director ni bawk Dr. Malsawmdawngliana chuan, “A hautakin a budhet pawh a tlem lo hle dawn,” tiin a sawi a, engzatnge a budget lam tur erawh a sawi lang lo thung.

“Zoram Rohlu PUC” music video-ah hian story-line hmuhnawm tak neia siam a ni kan tih tawh kha. College hostel-a awm thingtlang tlangvalin khawpui leh college nun inzir chawp, che chhe ve thei tak leh khawpui nula pakhat intawn dan chungchang hmuh tur a awm dawn a. A changtupa leh changtunu te lem chang tur hian a duh leh hmeltha nazawng an thlang lem lo, college zirlai zingah audition kaltlanga thlan chhuah ngat an ni!

Mizo music video te hi minute 5 bawr vela rei an ni tlangpui a. Hriat theih chinah Mizo music video rei ber chu Lalremruata hla hit zet mai, tunhnaia David Lalzawmliana’n a rawn tuaithar — A Thlawn Mai Maw — kha Mizo music video siam zingah chuan a rei ber a nih loh pawhin a dawttu tal a nih ngei a rinawm. ‘A Thlawn Mai Maw’ music video kha minute 8 vel bawra sei a ni a. He music video hi PUC Various Artist music video hian a rei lamah a rawn khum dawn a. ‘Zoram Rohlu PUC’ music video hi minute 12 zeta sei tur a ni.

‘Zoram Rohlu PUC’ tih hla hi PUC Assistant Professor — H. Laldinmawia — phuah a ni a. A thluk hi Manase Saphmingthanga leh BZa te siam niin, track hi Lal K Sailo kutchhuak a ni a, audio recording hi Kings & Prophets Recording Studio-ah recording tih a ni a. Music video hi Leitlang Pictures kuthnu a ni ve thung ang.

Facebooktwittergoogle_plusredditpinterestlinkedinmail

Feature : Demonetisation hlawkpui em?

Central sorkar in Supreme Court-a a thehluhah sum hmuhna hriat loh (undisclosed income) chu kum thum 2014 atanga 2017 chhungin Rs. vaibelchhe 71,941 a nih thu July 23, 2017 khan tarlan a ni.

Demonetisation hian sum heng zawn chhuahnaah hian sorkar a pui a ni thei ang em? Mahse, kum thum chhung a nih avangin a \hen a zar chauh a pui thei ang.

Sorkar chuan ngun taka Income tax department leh hmun hrang hranga uluk taka a chhui hnuah hengte hi hmuh chhuah niin a lang.

Sorkar tarlan danin demonetisation kalpui a nih chiah thla thum chhung (November 2016 atanga January 2017) chhung khan chak takin Income Tax department hnuaiah enforcement hna kalpui nghal a ni a. Zawnchhuahna hna 1100 leh verification 5100 neih a ni a, hemi chhung hian Rs. vaibelchhe 610, a cash in Rs. vaibelchhe 513 laklet a ni a, lak let loh hi Rs. vaibelchhe 5400 a awm ngeia ngaih a nih thu sorkar chuan an tarlang bawk.

Heng baka hmuhlet chu tlereuh ang zawngin a ni a, Rs. vaibelchhe 97 man hmuh let a ni. Moneycontrol.com-in a tarlan danin dan loa rangkachak tawlhruk hi India ramah kum tin tonne 100 a ni a, heta an hmuhchhuah chu zaa 0.003 chauh a ni!
Hemi awmzia chu demonetisation avanga sum dik lo hmuhchhuah hi Income Tax lamin demonetisation tel lova an zawn chhuah aiin a tam zawk a. Demonetisation chhunga sum dik lo a awm ngei a ni tih hmuhchhuah Rs. vaibelchhe 5400 hi sorkar in hemi piah lama an hnathawh a zara hriat chhuah Rs. vaibelchhe 71,941 nena tehkhin chuan a tlem hle a ni.

Demonetisation avanga mipui te leh sorkar lam hotute buaina zawng zawng hi demonetisation atanga hmuhchhuah nena tehkhin hi chuan a man lo hle niin a lang a. Hmalam hun thlir ila, nghawng tha tak a nei chho turah ngai chhin phawt ang.

Facebooktwittergoogle_plusredditpinterestlinkedinmail

CYMA-in a hmunah an tlawh; Insiamthat kan tum: TBCC

Aizawl: Tunlaia sawi hlawh tak Tawngtai Bethel Camping Centre chu nimin khan Central YMA hruaitute chuan an tlawh a. An tlakchham leh mamawhte thlirin chhawmdawl leh tih changtlun dan tur an en.

Central YMA Vice President Vanlalruata chuan tunhnaia TBCC a thihna thleng leh sawiselna hrang hrang a awm avangin CEC thukhawm chuan Centre hi tlawh a, tha zawka kalpui dan a awm em tih zirchian nise an tih anga TBCC chu tlawh an ni tih a sawi a. An thil hmuhdan chu CEC ah an la sawiho leh dawn niin a sawi bawk.

Zalen palaiin TTBC hotupa a kawmnaah TT Zohmingthanga chuan tunhnaia thil thleng avangin fimkhur taka thil kalpui an tum tih a sawi a. “Camper te tisa leh thlarau a boruak zangkhai an neih theihnan hmalak kan tum a. Mipui atanga sawiselna awmte pawh tihbo tumin theihtawp kan chhuah dawn a ni,” a ti a. Tunhnaia camp atanga inlachhuak zingah mi thenkhatin luh leh an dil nia sawiin mah se tun dinhmunah chuan an admit ngam hrihlo tih a sawi bawk. Camper thenkhatte Zalen palaiin a biaknaah chhuak an tam avangin an phili hle tih sawiin mahse an tana tha zawk tur nia an hriat vangin an la awm niin an sawi.

TBCC-a awmte hi zu vanga dahluh chu thla 10 leh damdawi vanga lut chu thla 12 an awm thin a, hei hi a rei lutuk nia hriain mi thenkhat chuan an sawi sel a. Psychiatrist Doctor pakhat chuan, “Zu emaw drugs hnathawh tihreh (detox) nan chuan ni 10 atanga thla 1 vel hi a tawk turah kan ngai a. Physical care an pe lo a nih phei chuan heti chen chen enkawl a ngaihna awm ka hre lo a ni,” a ti. Hemi chungchangah hian TBCC enkawltu TT Zohmingthanga chuan, “Pathian atanga ka dawn anga ti ka ni a, a rei leh rei loh lamah chuan home danga thla 3 chauh course-ah pawh tlanchhuak chu an awm tho a ni,” a ti.

Home din turin sawrkarah in register a ngai em tih zawhna chhangin Social Welfare thawktute chuan ruihhlo hmangsual (substance abuse) te enkawlna tur Home dinna turin dan mumal tak sawrkarin a nei hrihlo nia sawiin buaipui mek a ni tih an sawi.

TBCC a naupang awm te chu lakchhuah vek an tum tih Child Welfare Committee thawktute chuan Zalen an hrilh a. “Hetiang home a naupang dah hi phal a ni lo a, nikum lamah pawh kan lo warning tawh a, an ti leh a nih chuan dan angin kan kal a ngai tawh ang,” an ti. Thudawn danin TBCC-ah hian napang mipa 9 leh hmeichhia 3 an awm a, heng te hi LIFECODE Centre, Zemabawk Lungbial ah dah tum an ni. CWC hian Zirtawpni khan naupang chhungte kawmin hmalak dan tur an sawipui tawh a, naktuk Thawhtanniah an kawm hmabakte an kawm leh ang.

Nimina Zalen palaiin Tawngtai Bethel Camping Centre a tlawh lai thleng hian camp atanga inlachhuak 350 an awm tawh a, tunah hian camp ah hmeichhia 91 leh mipa 412, an vaiin 503 an la awm mek.

Facebooktwittergoogle_plusredditpinterestlinkedinmail

TZP-in zirlai thar lawm

Aizawl: Nimin khan I&PR Auditorium-ah Tuipuiral Zirlai Pawl ten an member Aizawla lehkha zira awm tharte lawmna hun an buatsaih a, he hun hmanpuitu School Education Minister H. Rohluna chuan, “Mahni awm chhan ngaihtuah lova hun khawhral hian zirna lamah min pawt hniam fo thin,” a ti.

Minister chuan zirlai kalkhawmte chu an awm chhan ber inzawt fova, zirna sang zawk beiseina leh hmasawn duh vang ani tih hre reng turin a chah bakah East-Tuipui bialtu MLA T.Sangkunga pawhin SSA, Bank, Railway leh UPSC leh Mizoram sawrkar ah kumtin hna eng emaw zah lak thin niin thawkrim peihte tan chuan hna awm thu a sawi bawk.

Tuipuiral Zirlai Pawl Freshers Social-ah hian chawimawina sem a ni a, bial tihmingthatu chawimawina Lalhunmawia, Bungzung khua Chhaktiang Lelte winner hnenah leh CS Ramsangliani Dungtlang khua National level hockey player hnenah an hlan a. Heng bakah hian UG leh PG result-a TZP member topper 9-te hnenah chawimawina an hlan bawk a ni.

Facebooktwittergoogle_plusredditpinterestlinkedinmail

Paracetamol P 500 hlauhawm loh: HFWD

Aizawl: Health & Family Welfare hotute chuan tunlaia social media-a thang mek Paracetamol P-500 chu a hlauhawm loh thu leh mipui tana chiaina tur a awm loh thu Zalen an hrilh.

Thudawn danin Paracetamol P-500 ah hian virus chi khat, Machupo Virus a awm niin thu thehdarh a ni a. He virus hi khawvela virus zinga hlauhawm ber pawla ngaih a nih thu leh ei chuan thihna hial a thlen theih thu te, tihdamna a awm loh thu tein a thang kual mek a. Hei hi thu dik lo a nih thu leh thla thum kal ta vel khan mipui tana chiai na tur a awm loh thu te pawh tihchhuah a lo nih tawh thu Food & Drug lam hotute chuan an sawi.

He thuthang hi ramchhunga media hrang hrang pawhin a lem a nih thu an ziak tawh a. Mi thiamte chuan India ram chhungah Machupo virus a awm an la hriat loh thu an sawi bawk. Aizawla damdawi zuarte chuan Paracetamol P-500 chu Aizawl chhunga hralh tam a nih loh thu leh zawrh chu an zawrh ve thin thu Zalen an hrilh bawk.

Facebooktwittergoogle_plusredditpinterestlinkedinmail

SHALOM-in gender sawihona

Aizawl: Hotel Regency Conference Hall-ah SHALOM buatsaihin Gender Issues sawihona neih a ni.

He program hi YRG Care, Chennai hmalakna niin an Research Coordinator Mr A.K.Krishnan chuan kalkhawm te chu Gender chungchang, a bikin Homosexuality (mahni anpui kawp te) sawihawnna hun hmangin sawm bik pawl hrang hrang aiawh te chuan an thlir dan an sawi bawk a ni.

July ni 27 a sawi honaah hian Dr. Chawng -lungmuana, Director, SHALOM chuan he program buatsaih chhan sawiin mahni anpui kawp te hi kan khawtlangah an awm chung hian enhranna leh thinhrikna a la nasat avangin an mamawh service an dawn that theih loh thu a sawi. ‘Hei hian natna tha lo tak tak, a bikin HIV lakah an derthawn phah a, hetiang lama harsatna nei te hi enkawl emaw pui thei tura NGO te kan inbuatsaih thiam a a ngai hle,’ tiin Dr. Chawnga chuan a sawi a. Kan hnam zia leh sakhuana atang pawha dawnsawn dan tur mumal zawk ruahman a tul thu a tarlang bawk a ni.

Facebooktwittergoogle_plusredditpinterestlinkedinmail

Hotel & Restaurant te’n service charge an la tur a ni lo : MCA&PD

Aizawl: Ministry of Consumer Affairs, Food & Public Distribution (MCA&PD) chuan restaurant leh hotel-in service charge an lak thin chu dan kalh a nih thu leh lak theih a nih loh thu guideline a siam.

MCA&PD thu chhuakin a tarlan danin service charge lak thin chungchangah hian mipui a\angin complain tam tak a lut a. Restaurant leh hotel a an thil eina bill-a service charge pek tel tur inziak thin chu restaurant menu ah a inziak tel lo va, eitur manah a tel loh thu leh tax a nih si loh avangin mipuite tana pek tur a nihna a awm lo a, Consumer Protection Act, 1986 hnuaiah chuan unfair trade a chhiar a nih thu leh dan kalh a nih thu an tarlang.

Food, Civil Supplies & Consumer Affairs Department, Mizoram lam hotute chuan thupek central atanga an la dawn loh thu leh an dawn veleh a \ul anga hmalak an tum thu Zalen an hrilh.

MCA&PD chuan eitur man tarlan sa ah chuan service charge a huam thu a tarlang a, service charge emaw tip pek chu customer duhthlanna a nih thu leh tun atanga service charge khawn luih a nih reng reng chuan mipui te chu consumer forum ah kal turin thuchhuah chuan a hriattir bawk.

Service charge hi service tax nen a inang lova, GST nen inkaihhnawihna a nei lo bawk a ni.

Facebooktwittergoogle_plusredditpinterestlinkedinmail

AMC dawhkan inpho nan hmang

Aizawl: Aizawl Municipal Corporation (AMC) chuan Tuikual South Local Council huam chhung, Horticulture leh Agriculture Directorate building kawt vela Inrinnia inzuar thin te tan kalphung thar a ruahman angin nimin atang khan an inzawrhna tur dawhkan thar chu an hmang tan.

Tuikual South Inrinni Bazara thu thin te hi AMC in a chhinchhiah dan chuan mi 148 an ni a. Heng mi te hi AMC chuan kum khat chhung atan License hi pein a register a, ID siamsak vek an nih bakah an thil zawrh dahna tur dawhkan pawh pek an ni.

He vending zone siam tharah hian mi pakhatin ni khatah Rs. 50 zel fee an pe thin ang a. He fee hi Tuikual South Local Council in an khawn thin dawn a, fee khawn atanga Rs. 20 /- hi Tuikual South LC hian AMC-ah a chhung lut thin dawn a ni.

Dawhkan pakhat (1) hi Rs 3000 man vel a ni.

Facebooktwittergoogle_plusredditpinterestlinkedinmail

IT Act tlawhchhanin 70; Harhfim laia social media khawih a fuh ber

Aizawl: Kum 9 chhungin Mizoram police chuan IT Act hmangin thubuai 80 an ziak lut tawh a, hei hi June 2017 thleng a ni.
2009- May 2017 thleng khan IT Act hmang hian thubuai 74 ziahluh a ni a, May-June inkar khan 6 dang ziahluh belh leh niin kan thulakna chuan a sawi a ni.

Police record-a a lan dan chuan kum 9 chhunga IT Act thubuai ziahluh tam ber kum chu 2014 kha niin 24 ziah luh a ni a, 2016 khan 12 ziahluh niin kum dangah chuan 10 an tling ngai lo a ni.

“A tir lamah khan mipui lamin awareness kan neih loh vangin social media intihbuaina leh IT kaihhnawih thubuai angte chu report lem lohin a kal liam mai thin a. Awareness nasa taka neih a nih hnuah miin report thehluh theih tih an hre tan taa, hemi vang ngawr ngawr chu ka ti ngam lova mahse 2014 khan awareness a that avangin report pawh hi a tam a ni thei a. Tunah chuan awaress a tha thawkhat tawh a, social media a thu dah thuah thubuai neih theih a ni tih kan hre tlangpui tawh a, hemi vang hian a hmangtu lam pawh an fimkhur chhova report pawh a tlahniam a ni thei bawk a ni,” tiin IT analyst pakhat chuan Zalen a hrilh a ni.

“Miin social media hmangin mi pawi a sawi a, chumi chu belchiang lem lovin copy-paste ngawt kan ching hle a, danah chuan a post-tu leh a thehdarhtu kha danglamna a awm tehchiam lova, an him phah lo,” tiin Ukil pakhat chuan a sawi bawk a. “Mi vengva awm taka ka ngaih talbuai an awm leh nawlh thin a, tlai lam luhai nei tan luhai hnua social media khawih vak loh hi a him berin ka hriaa, invenna pawimawh takah ka ngai a ni,” a ti bawk.

IT Act kaihhnawih thubuai mahse IPC a ziahluh a awm nual bawk a, ziahluh zinga tam ber chu Facebook kaihhnawih thubuai a ni bawk a ni.

Facebooktwittergoogle_plusredditpinterestlinkedinmail

Login

Lost your password?