Monthly Archives: July 2017

Man tlawm zawkin hep C vaccine pek tum

Aizawl: Shalom chuan YRG Care nen tangkawpin man tlawm zawka Hepatitis ‘C’ (HCV) te enkawl an tum a, August 10, 2017 atangin hmalak tan an tum.

Shalom thawktute hnen atanga Zalen thudawn danin HCV enkawl nan hian a tlem berah Mizoram Health Care Society chuan Rs, 42,000 vel an seng a; mahse, Shalom leh YRG Care, Chennai tangkawp chuan damdawi man zawng zawng leh thisen test na man nen vek Rs.20,000 velin pek theih an beisei tih an sawi a. Damdawi an hman/pek tur hi khawvel damdawi tha ber zinga mi, India rama Drugs Controller te pawhin an pawm a ni tiin treatment la te chu a hnu zela an awmdan thlengin enzui zel an tum niin an sawi.

Shalom Director Dr.Chawnglungmuana chuan damdawia inchiu thin (drugs addict) 846 an test zingah 742 (87.7%)-in HCV an vei tih a sawi a. “HCV thehdarhtu lianber chu drugs addict te an ni tih a chiang a, chuvangin vaccine hi kan pek theih chuan a kaidarh zel tur hi nasa takin kan ven theih a beiseiawm a ni,” a ti a. Tuna HCV vaccine an hman tur chuan kar 12 chhungin a tidam vek thei niin a sawi bawk. HCV inkaina chu thisen leh taksa atanga tuihnang chhuak ah a ni tiin, “HIV aiin HCV inkaitheihna hi a let 5 in a sang zawk a. Damdawia inchiu thinte pawh syringe inhmantawmloh mai a tawk lova, a chawhna, filter leh thil dang intawm atang pawha a kai theih avangin fimkhur a ngai hle a ni,” a ti bawk.

Ruahman dan chuan Shalom hian a tirah sum nei deuh hnenah hma la hmasain heta sum tlingkhawm hmang hian a rethei leh neilo zawkte enkawl chhunzawm zel an tum a. Inenkawlna tur sum hi tum khata petla theilo tan pawh installment a pek theih tura duan a ni.

MSACS chhinchhiah danin Mizoram pumah damdawia inchiu thin mi 8760 an awm a, heng zinga 4263 chu Aizawl khawpui a cheng an ni.

Facebooktwittergoogle_plusredditpinterestlinkedinmail

Mizoramah BPL 21%

Aizawl: Mizoram khawpui lian 8 a mipui awm zat atangin BPL 21.27% an awm a. Siaha khawpui ah population atanga chhutin BPL an tam ber.

Mizoram Statistical Handbook 2016 in a tarlan danin kum 2015-16 chhung khan Mizoram khawpui 8- Mamit, Siaha, Lawngtlai, Kolasib, Lunglei, Serchhip, Champhai leh Aizawl a BPL awm zawm zat chu 121,614 (2010 survey) a ni a. 2011 chhiarpuiah heng khawpui 8 ah hian mi 571770 an awm a, heng mipui zinga 21.27% chu BPL an nih thu Statistical Handbook thar ber hian a tarlang bawk.

Khawpui mihring zat a\anga chhutin Siaha khawpuiah BPL an tam ber a, mipui 25,110 atangin BPL member chu 7275 an awm a, hei hi mipui atanga chhutin 28.97% an ni, Mamit ah BPL an tlem ber thung a, mipui 14,898 awmin mipui zinga mi 2272 chu BPL an ni a, hei hi 15.25% a ni.

Facebooktwittergoogle_plusredditpinterestlinkedinmail

Larsap & minister

Aizawl: Nimin zing khan Mizoram Governor Lt. Gen. Nirbhay Sharma leh Union Minister of State for Consumer Affairs CR Chaudhary te chu Raj Bhavan-ah an inkawm a. Parliamentary Secretary TT Zothansanga, FCS&CA Department leh Food Corporation of India (FCI) hotuten an tawiawm a ni.

Larsap chuan Mizoram chu sawrkar inrelbawlnaah hmarchhak atanga a tha berte zing ami a nih thu sawiin, inkal pawhna kawngpui leh rel kawng sial mek te avanga ei leh bar kawnga hmasawnna tur tam tak a hmuh thu a sawi a ni. Hmarchhak mite nunphung leh hnam zia rang chu India ram hmun danga mite nen a inan loh thu sawiin, sawrkar laipui pawhin inhriatthiamna thui tak a neih tha a tih thu a lo hrilh a ni.

Facebooktwittergoogle_plusredditpinterestlinkedinmail

CBYMA-in thlawp

Aizawl: Chanmari Branch YMA chuan thuchhuah siamin tunlaia Media hrang hranga Tawngtai Bethel Camping Center, Chawnpui demna thu chhuak chu ngun takin an ngaihtuah a, Chanmari Branch YMA mai bakah Branch YMA hrang hrang ten tangkai takin an lo hmang tawh thin a. Chhungkua leh khawtlanga harsatna siam leh mahni tana thalo ruihhlo bawiha tang lo enkawlsaktu ten dem leh sawisel an hlawh chu pawi an ti tih sawiin he camp rawngbawlna chu an thlawp tlata, nasa zawk leh tangkai zawka khawtlang leh ram tana rawng an bawl zel theih nan duhsakna an hlan tih an sawi bawk.

Facebooktwittergoogle_plusredditpinterestlinkedinmail

Thisen pe

Nimin khan a mamawh apiangte hman turin TKP Coordination, Aizawl chuan Civil hospital a hman turin thisen unit 159 an pe, a petute mipa 124 leh hmeichhia 35 an ni. Nimin vek khan Phunchawng Branch KTP-in Synod Hospital tan unit 11 an pe, a petute mipa 9 leh hmeichhia 2 an ni.

Facebooktwittergoogle_plusredditpinterestlinkedinmail

The Week That Was (July 30, 2017)

Pisa kang
Ni 24.7.2017 (Thawhtanni) zing khawvar hma deuh khan Power &Electricity Department, Chief Electrical Inspectorate Office, Zuangtui chu a kang a, bungrua nuai 40 man bawrvel a kang chhia. Kangmei chhuah chhan tak hi chiang takin hriat a ni lova, electric kal sual leh electric short vanga kang ni lovin misual thiltih anih an ring a, Police ah FIR thehluh a ni.

Cong & MNF puh
ZNP President Lalduhoma chuan ni 24.7.2017 (Thawhtanni) khan an party office ah thu sawiin Chakma vulh liantu te chu Congress leh MNF Party te an ni a, Foreigner dap chhuah anih hma chuan Chakma zingah ZNP chuan Unit a din ve dawn lo tih a sawi.

SBI rawk
State Bank of India, Mission Veng Branch chu Thawhtan zan khan rawk a ni a, Bank a mimal pawisa Rs. 13,000/- bawrvel rukbo a ni.

MZP thlawp
Ni 25.7.2017 (Thawhlehni) khan NGO Co-ordination Committee chu Central YMA Office ah an thukhawm a, Mizoram Quota a MBBS leh BDS zir tur thlan chungchanga MZP hmalakna thlawpin a tul anga sawrkar hmalakna pawh en zui zel an tum tih an sawi.

Thukhawm
Ni 25.7.2017 (Thawhlehni) khan State Supervisory Board on Prenatal Conception and Prenatal Diagnostic Technology (PC&PNDT) chu Health Minister Lal Thanzara hovin Chief Minister’s Conference Hall ah an thukhawm.

Sawiho
Ni 25.7.2017 (Thawhlehni) khan School Education Minister H. Rohluna leh Public Health Engineering Department Minister Zodintluanga hovin Govt. Primary leh Middle School-te a tui harsatna an sawiho a ni.

Training nei
Mizoram Food Processing Research & Training Centre, RIPANS leh Food & Drugs Administration tangkawp buatsaihin Aizawl leh a chhehvel veng hrang hranga bekang uma eizawng mi 26-te tan ni 4 chhung awh tur bekang um training neih a ni.

Zofa chauh
Higher & Technical Education Minister R. Romawia chuan Mizoram quota-a Technical course zir tur thlanna ah Mizoram sawrkar chuan category-I ah ram neitu Zofate chauh a dah dawn tih ni 26.7.2017 (Nilaini) khan a sawi.

Thlirlet
Ni 26.7.2017 (Nilaini) khan PHE Department chuan an hnathawh thlirletna leh hmachhawp sawihona hun nihnih awh tur chu I&PR Auditorium ah an tan a, PHE Minister Zodintluanga leh Parliamentary Secretary Hmingdailova Khiangte ten an hmanpui.

Pungkhawm
Ni 26.7.2017 (Nilaini) khan Chawnpui veng a awm, Tawngtai Bethel Camping Centre bulah mi thenkhat pung khawmin lungawilohna an lan tir (Peaceful Demonstration) a, TBCC chu dan dik tak hnuaia a kal an phut thu leh an kallo a nih chuan khar a nih ngei an phut thu an au pui.

Hapta hmang
46 Assam Rifles leh Traffic Police Department thawhho na hnuaiah 26.07.2017 atanga 31.07.2017 chhung hian Aizawl ah Road Safety Week hman a ni dawn a, he hapta hi ni 26.7.2017 (Nilaini) khan Joseph Lalchhuana, IPS, DIG (NR) leh Brig. MS Moksha, SM, DIG 2 Sector Assam Rifles ten an hawng.

Hmanpui
Govt.T.Romana College chuan ni 26.7.2017 (Nilaini) khan Freshers’ Social leh Graduation Day chu Vanapa Hall-ah an hmang a, Home Minister R.Lalzirliana chu khuallian a ni.

MJA in ral
MJA Gen.Hqrs member te chuan ni 26.7.2017 (Nilaini) khan Lalthanzama, Editor, Sakeibaknei leh ex-MJA Vice President chu an chenna in Tuikual ah an ral.

CM in hawng
Ni 27.7.2017 (Ningani) khan New Secretariat Complex a Fisheries Directorate Building thar chu Chief Minister Lal Thanhawla’n a hawng a, Fisheries Minister Dr. BD Chakma chu khualzahawm a ni.

Lo zin
Union Minister of State Consumer Affairs Food & Public Distribution C.R. Chaudhary chuan ni 28.7.2017 (Zirtawpni) khan Aizawl lo thlengin State Guest House Aizawl-ah Mizoram sawrkar hotute a kawm.

Facebooktwittergoogle_plusredditpinterestlinkedinmail

Doctor ka zawhna (July 30, 2017)

Zawhna: Nu kum 50 tling ve tep tawh ka ni a, ka kawng hi 2002-ah leh 2014-ah GNRC, Guwahati-ah min zai tawh a, tunah in-check hi ka la hmabak reng a; mahse, ka la kal thei mai si lo va. Tunah hian ka kawng leh mawngtam bawr vel, ka hnungzangte, ka khup thleng mai hian a nain a kham em em reng mai a. Ka thutte hian vawn tur awm lo chuan ka tho thei mai lo va; tin, ka weight hi ka inzai zawh atangin ka gain nasa lutuk bawk a, damdawi ei lai tunah chuan ka nei lo. Chet vel hi ka harsat lutuk a, ka kun thei lo va, khum atanga thawh mai pawh a harsa em em a ni. Ka inzai hlim lai te kha chuan ka tha hle si a, engtianga tih chi nge ni ang, khawngaihin min lo pui la, ka lawm hle ang.

Chhanna: I insawiselna ang hi mi tam tak, ruh lam tisilawng, ruhtliak, ruh auh, hnungzang ruh/khup leh a dangte zai tawkin harsatna an neih thin a ni. A bik takin malpui ruhtliak te phei hi chu rei tak an che thei lova, chaw ei a lo tui duh phian bawk nen hian, inzai zawha weight gain (rih belh) hi an awm fur mai. Tuna i insawiselna tam ber hi chu taksa chet tlem vanga awm, rih belh bawk siin a rawn thlen a nih hmel a. Inzai zawh hian taksa leh tihrawl te a chet mumal lawk loh avangin hman loh vanga tha tawm, leh tha sawng te hial a awm thei a. Chu chuan ruh chuktuah te, hnungzang ruh te a tikhawng a, han chet leh mai dawn khan chung tha tawm te chuan a lo pawt khawng tawh thin si a, na neuh neuh hi an ngah ta thin a ni.
I kum ngaihtuah chuan leh, i rih belh dan i sawi hian blood sugar a san leh san loh hriat a tha hle mai a. Chu bakah chuan ruhseh, a bikin Rheumatoid Arthritis ang te i neih leh neih loh in-check thei bawk la. Chutiang tur chuan ruh lam doctor Orthopedic Surgeon te lo rawn ta la. A dawt leh ah chuan han chet nghal bawrh bawrh tum kha taksa in a ngeih loh theih avangin taksa chet tinuam leh awlsam turin Physiotherapist te lo rawn thei bawk la, physiotherapy enkawlna khawl hman te pawh a ngai mai thei bawk a. A dang lehah chuan i rit lutuk chu tinep tura hmalak a ngai leh bawk dawn ani. Rih belh lo tura tan i lak a ngai a, i rihna tihniam turin diet leh exercise ho te te i tih tan pawh a ngai ang. Chumi tur chuan Dietician te pawh i rawn a ngai dawn a. I hriat hmasak tur chu ngaiawh leh tur chuan hun i duh hle dawn a, hmanhmawh chi a ni lo tih hriat a tha. Hma i sawn mai lova i inhriat pawhin beidawng lovin an thurawn ang apiang che ti tang tang zel phawt mai rawh.
I zawhna hi remchangah lo la ta ila. Inzai, a bikin kan sawi tak ruh lam khawih ngai ang chi te hi, inzai zawh hnuah rihbelh (weight gain) laka inven a tul hle a. Chumi atan chuan a hnuaia kan tarlan te hi lo chhinchhiah thei ila, kan tangkaipui ka beisei:

1. Diet (Ei leh in) Fimkhur. Taksa chet a tlem avang leh kan ril chet a muan vangin kan thil ei apiang hi a in digest muang a, chu chuan thau a khawl duh hle. Kan chaw ei dan phung thlak danglam hi a remchang kher lo a nih pawhin tihdanglam hretin a ziaawm thei. Chumi atan chuan tukthuan leh zanriah te hi a chanveah sem la, tukthuan atan i ei thin zat chanve (chu aia tlem lam pawh chu a pawi lo) ei la, darkar hnih thum hnu velah a chanve dang chu ei leh la, chutiang chuan chaw puitling (whole meal) ni tho kha ni khatah vawi li vel i ei dawn tihna a ni.
A quality lamah hian buhfai chhum hi carbohydrate a sang viau mai a. Theih chuan buh tui leih style-a chhum te hi ei thei ila, hei hian calorie a ti hniam thei a. A dang leh ah chuan buhfai aiah Oats te ei zawk thei ila, chu chu a la tha lehzual. Atta ei a zia tho nachungin siam a buaithlak bakah chintawk neih loh chuan awmzia vak a awm lova, chu ai chuan Oats pawh hi a la zia zawk tho. Fiber tamna bean, thlai hring leh thei te ei tam a tha a, sa lamah chuan sangha lam hi ei tam ila a tha ber. Chaw ei hma lawka tui no khat han in te pawh hian chaw lakluh tam a veng a, muangchanga chaw ei hi a tha bawk, a chhan chu kan thluak hian kan puar leh puar loh hi chaw kan ei atanga min 20 velah a register chauh vang a ni.

2. Exercise lak. Exercise kan tih hian taksa hah khawp, thlan tla khawpa lak tur kan tihna a ni lo va, chu chu inzai zawh tirh lamah phei chuan a pawi thei zawk. Awmze neia taksa chettir ti ila a fuh zawk awm e. Rit chawi loh hram nise, mut hmuna ke leh ban/kut sawizawi te, muangchanga inchhunga han kal zeuh zeuh te hi a tangkai a, tihrawl a ti che a, thisen zamah thisen kal a ti tha bawk. A bak sawi tur awm nual mahse a sei lutuk loh nan duhtawk hrih phawt ang.

Facebooktwittergoogle_plusredditpinterestlinkedinmail

TBCC thil thleng atanga thil lang

Tawngtai Bethel Camping Centre ah thi an awm leh avangin tunhnai hian he hmun hian ngaihven a hlawhin inhnialna a ti tam hle a. Hun engnge maw chen chu TBCC hian social media ah sawi a hlawh tawh bawk a ni. Tunhnai khan electronic leh print media lamin bawhzuiin mipui ngaihven ber a ni mek a, he centre inenkawl dan chu duhlovin mipui an pungkhawm tawh bawk a ni.
Din a nih hnu reiloteah he centre hian sawi a kai tawh bawk a, camper te kutthlak leh nghaisak te a awm thin nia sawi a ni fo a, ei leh in a chhiain an tui tlan hnar pawh an hre mumal lova, centre atanga tlanchhuak te’n heng thu hi an sawi nasa zual a ni. He centre ruhrel hi a tha tawk lo hle nia sawi thin a ni bawk a, thawktu an tlema, camper te an in ek benga mutna pawh an indaih ngai mang lo niin a awmte’n an sawi fo bawk.

He hmun hi a nihna takah chuan ‘vawm khawm centre’ a ni ber a, chhungte’n an dahluh luih te awm bawk mah se tlawmngai pawl te’n an mi man te a bikin khawtlang tana mi hnawksak nia an hriatte dah luh nan an hmang bawk a. Hemi vang hian mi 800 dawn lai chu an awm deuh reng a ni. A chhan leh vang chu eng pawh nise he centre hian sawrkar-ah registration a tih duh loh avangin funding an hmu mumal lo hle bawk a, sum lut a awm loh na na na chuan inenkawlna mumal pek theih a ni ngai dawn lova, thawhchhuah nei silo puitling heti zat khung khawm ringawtna hmun chuan harsatna lian tak a hmachhawn reng hi thil mak a ni lo.

He Centre enkawltute hi fak loh rual an ni lova, chhungte leh khawtlang pawhin tihngaihna an hriat tawh loh ‘kan lo enkawl ang e’ ti thei hi mi tlem te an ni. Chutih rualin kan chen mekna khawvel mila thil tam tak tih a ngai fo thin tih hriat a tha a, sawrkarin dan leh hrai a neih te zawm a tul bakah, a hunlai ang zela kal a ngaih chang a awm thin bawk a ni. Hun engnge maw chen atang khan Mizoram hian ngawlvei leh zu vanga buaite enkawlna a nei tha tawh lo hle a, awmze nei leh changtlung zawka hetiang hmun hi kan neih theih nan tan lak thar a ngai a. A awmsa te pawhin ‘kan tih dan a ni lo’ ti ngawt lovin hmasawn tumna rilru pu sela mi tam takin an pui duh ang tih hi ring ngam bawk ila. Sawrkar chuan tunah hian Sakawrtuichhunah centre hawn tumin hma a la mek a, mahse hei hi chu a la rei dawn niin a lang a. Tun leh tuna kan mamawhna hi hriain beng chhia hmalak kan mamawh hle mai!

Facebooktwittergoogle_plusredditpinterestlinkedinmail

Ka Huang (July 30, 2017)

Primary – Pawl III chu ka zo ve ta mai a nih chu. Lushai Hills-a sikul sang ber Sikulpui, Pawl IV, V leh VI?awmna sikulah chuan ka lut ve ta a. Ka hriat sual loh chuan Pawl IV-ah section 3, Pawl V-ah section 2 leh Pawl rukah section 2, kan vaiin section 7 kan awm a nih chu. Sikul kawn atanga step chho te khi kan chhiar zing khawp a, rahbi 52 a neihte chu tun thleng hian la zuk hria ia! Zirtirtuin section then zat an daih lo niin ka hria, chuvangin, Headmaster leh Asst. Headmaster pawhin class an la ve deuh reng mai niin ka hria. Kei chu Lushai Hills-a Pawl III ekzamnaa pahnihna ni mah ila, Section C-ah ka awm, tuna Primary sikulah khian. Kan section zirtirtu chu Pu Vanlallawma a ni, zirtirtu zinga vaw na ber!

Vaw na ber ka tihna hian chhan tha te a nei. Kan pawl IV kum, 1940 chuan Pawl V leh Pawl VI?naupang lian zual thenkhat Tuikhuah liana Tuipu lawnglengah lung an lo thlak chiam mai a, a pil daih mai a, a titute chu an man chhuak a, 10 chuang lai an lo ni. Chu chu an ninhlei dan chu pawl thumah an then a, Class I chu Pu Vanlallawma vuak tur, Class II chu Pu Leta (Pautu Hmunleta) vuak tur, Class III chu Pu Lungmuana vuak turin hremna an pass a, talhfiak pawh Class I, II, III-in an then a, Headmaster pindana kalhhnan thap a ni. Chu a chian mai chu! Mahse, Pu V.L.Lawma chuan mi a vaw mai mai lo. |um khat pawh Siamliana leh Zathuamluaia hian Pu Lawma’n lecture min pek laiin (tlar hnung bera thu, Zathuamluaia chuan Siamliana samzai, pakhat te tea zai 10 a pawh zelah lehkhapuan phek khat hlawh tura a lo ni awm a. Pu Lawma chuan a man hlauh mai a, a bulah a ko a, a zawt a, an sawi ta a. Tichuan, pawl zawng zawng hmaah chuan a pawhtir ta a, a mal te tea pawt loin, zai 3/4-in a pawhtir bu lawp lawp mai a, a tawpah Siamliana chuan lehkhapuan phek 10 a la chawi leh ta nghal nia! Mi runluih dan hi ho tete a thiam riau. |um khat pawh hming lamnaah Lalthuama (tlangval uaih tawh) hian YES SIR a ti vak mai lah taka. U?Lawma chuan, “Yes Sir i châk hle mai, sikul zawl tawpah khuan sikulkawn hawi zawngin YES SIR vawi 50 zuk ti teh,” a tia, Nilai bazar ni a nia, lamliana kalin min hmu duh hle. Monitor ka nih avangin min ventir sia.

Sikul chawlhlawk hian, tuna Republic Avenue kan tihte hi sawrkhar reserve ngaw dur pui a ni. A thlang deuhah te phei chuan, eng hrui emaw rah zawng hian kan tlan nsa thin. Tiffin tihte hi vana rah ang a ni mai, veng hnai deuh chu chhun chawlhah kan hawng hma a, kan ei hman hram thin. Pawl IV chu tha te chuan ka pass veleh ta a. 1941 chuan Pawl V chu ka kai leh ta a, Section B-ah ka awm a, kan hotu chu U Lungmuana a ni, pa zaidam tak, Kuhvakhawr (khatih lai khan Tamul a awm lo, supari khawr vek a ni) hi erawh chu a heh hle. |um khat chu Section A-a an hotu U Leta chuan Kuhvakhawr ei hi saptawng lam tihartu a nia, a hrisel vak loh vakah sikul naupang tan chuan ei loh a that thu a sawi a. U Lungmuana chuan (a hriat phak tho a) ei a chak si avangin, “Keini thiam tawh tan chuan a pawi lo a,” tih pahin khawr khat chu a’n hmawm kauh a, kan nui tat tat mai.

Facebooktwittergoogle_plusredditpinterestlinkedinmail

Mizorama Chakmate hi

Chakmate hi Mizorama cheng hlun an ni lo a, Kumpinuin kan ram a awp hnu a lo pem lut chauh an ni a. Phalna neia lo lut leh an thlahte hi a lu nungin chhiar ila hnawksak tham an la ni kher lo ang. An lo luh dan leh an pun chak dan chhui chian hi chuan politician-te hi dem loh theih an ni lo, dik tak chuan min awptu Sapho ai khan kan ram hruaitu thenkhatte hi chuan kan hnam hi an hmangaih lo zawk emaw tih mai tur a ni.

Sapho kha chuan kan rama an lo luh an phal lo a, min chimbuai thei tur hnam dang lakah min hum him tha viau a, dan tha tak tak, vawiin thlenga kan inhumhimna la ni reng te hi min siamsak a. Chung dante chu khauh taka an lekkawh thin ang khan a ram neitu zawk hian kan lekkawh tha tawk lo a. Heti taka kan ram chhunga Chakma an lo tam ta em em mai te, an lo pawng ta em em mai te leh kan politician-ten an duhsak uchuak em em mai te hi Kumpinu hun laia kan rama lo awm sapho kha lo tho lehin rawn hmu ta se min hmusit viau maithei a ni.

British sorkar an haw a, India hnuaiah kan lut a, kan kutah thuneihna zau tak a lo awm a, kan hnam himna pawh kan kuta (A bikin ram hruaitu politician-te kuta) engemaw chen a awm hnu hian kan inveng him lo tial tial a nih hi. Sapho khan hnam rinawm leh rinawm lo an hre riau a, Mizote kha an ring tawk viau a, sipai atan an iai lo a, lehkhathiam hmasate pawh an phak ang tawkah an chhawr hreh lo thin. Chutihlaiin, chakmate hi chu an ring vak lo thung. Mizoramah Bawrhsap (Superintendent, Lushai Hills) phalna nei lo chu an lo luh khap tlat a ni a. “Chakma leh Tripura-ho (Tuikuk) te hi khua leh tui tha tha an ni lo hrim hrim a. An awm ve hian thubuai hla buai a tam phah a, police leh dan lekkawhtute an la indaih bawk si lo a,” tia an lo ziah te khan an rilru put hmang thui tak a hril awm e.

Tunhma chuan Mizo pasalthaten Chakmate leh Chittagong Hill Tracts a chengte hi an lo run fo tawh a, Mizote hi an hlau hle thin. Helai tlangramah hian hnam hrang hrang an cheng a, chung zingah chuan Chakmate hi a lian ber pawl an ni a. Mizote pawh hi helai ram (CHT) luah hmasatu zinga mi kan ni nghe nghe. Chittagong Hill Tracts hi Chakmaten an ram (Homeland) a an chhal reng thin a ni a. Arakan (Burma) atanga pem thlaa inbengbel an ni nghe nghe. Lal neiin helaiah hian ngel nghet takin an khawsa a. Vailen vawi khatna 1872-ah khan Chakma lalnu Kalindi Rani-i’n Mizoram run tura lokal sipaiho puakphur tur mi 500 a lo pe a. Chu chu hriat theih chin a Chakmaten Mizoram lelung an rah hmasak ber a ni. Mahse, Tlabung an thleng a, anmahni run thintu an hlauh em em Mizote an hmuh khan nuam an ti chiah lo aniang an haw leh ta vek a.

Chakmate hi lui kama cheng thin hnam an ni a. Mizote chu tlangpanga cheng kan ni thung a, kan chhim lam ram ruak, luipui chhuah phai ram zau tak tak an hmuh takah chuan chen nan an it thlu ngang a ni ang Kumpinu hnuaia Mizoram a awm tak atang khan a rukin an lo pem lut ta zel a. Phalna neia awm tlem te an awm laiin rawn lut ru a, inbengbel ta an awm nual. Indopui pahnihnaah khan sipai puakphur leh puitu zingah Chakmate pawh an tel a, an zingah hian Mizorama khawsa zui hlen ta pawh an awm. Engpawhnise, India independence hmaa Mizorama Chakma awmte hi an tam lo a, an thlahte nen pawh hnawksak em em tham an ni lo ang.

Kum 1995 chho atanga MZP-in Chakma foreigner chhiarpui a neih a, khua leh tui dik tak list a siam khan fimkhur takin a kalpui a. Chakma khaw hrang hrangah kalin citizen list a chuang lo, khua leh tui ni si te tan hun an hawng leh thin a. Kum 1952, 1956 leh 1993 Electoral Roll a chuang kim thlapte leh an thlahte chu India khua leh tui dik taka ngaih an ni a. Tichuan MZP-in chhiarpui a neiha khua leh tui dik taka insawi ngam lo Chakma 58,673 te chu foreigner a ngaiin hnawt chhuak turin Mizoram sorkarah an hming nen an theh lut a, sorkar laipuiah pawh an thlen bawk. Chutihlai chuan electoral roll-a foreigner ni a ngaihte thun belh leh teuh an nih avangin kum 1996-a MP inthlan pawh kha MZP chuan a boycott nghe nghe a ni. Kum 1995-ah foreigner 58,673 an awm a nih chuan, hetih lai vela Mizorama Chakma awm zat chu 80,000 vel niin anmahni chuan an sawi thin a, a let an tling tihna a nih chu. Zep nak emaw khatih laia MZP hmalakna vang khan mipui kan harh chhuak a, politician-te pawh an fimkhur phah ta hle a, thangtharten hnam hmangaihna rilru kan put nasat phah hle a nih kha.

Mizo District Council a CEM hmasa ber Pu Lalsawia khan, “District Council inthlan hmasa ber (1952) khan Mizo Union-in Chakma vote an neih ve theih nan Tlabung ramri hrul a, Chakma tam tak Electoral Roll-ah dah luh an ni a, chungho chuan Pu Tuikhurliana (MU candidate) an vote duhna turin Medhia Chakma pawh Nominated seat-ah dah luh a ni nghe nghe a,” tiin a ziak. Thil pawi tak mai chu 1948-a District Advisory Council inthlanna-ah khan Chakmate vote an lo neihtir ngawt kha a ni. Sapho kha chuan Mizo lalte khua leh tui dik takah an pawm duh meuh lo niin a lang, chhiah pawh an chawi tam tir bik a, Mizote chhiahhlawh ang deuhah an ngai a nih hmel. Mahse, India hnuaia kan luh hnu atangin politician-ten an ti dik lo ta zel a. Kum 1950 a India rama Scheduled Tribe list tihchhuahah pawh Chakma hi a lang lo a; mahse, district council kan lo nih hnuah 1956-a an tihchhuah lehah chuan a lo lang ta vang a ni.

Chakmate hi hnam khawngaihthlak ang reng tak an ni tih erawh hriat a tha. Chittagong Hill Tracts, an ram nghet a an chhal hi British haw dawn khan, Buddhist 98% lai an awm avangin India hnuaia awm tura ngaih a ni a. India independence lawmin August 15,1947 pawh khan Rangamati khawpuiah phei chuan India flag an tar a. Mahse, Pakistan hnuaiah a awm ta zawk a, Muslim-ho tihduhdahna leh sipai sorkar nekchepna karah hreawm takin an awm zui ta a. Bengali (Muslim) tam tak an chenna CHT tlangramah an inbeng bel a. Chung avang leh Kaptai tuikhuah lian avangin Chakma leh Hajong tam tak an raltlan a. Mahse, vanneihthlak takin khatih laia Mizo District Council hruaitute khan Mizorama awmtir an remti lo tlat a. Assam sorkarin Arunachal Pradesh-ah a thiar chho ta a. Mahse, anni hi chu refugee an nih avangin India khua leh tui dik tak an ni thei lo a, Mizorama mite hi chu a ruka lo pem lut an ni thung a, thuneituten vote bank atana an hman duh vanga hamthatna tinreng a an vur an ni a. Khua leh tui nihna an nei zung zung pawh hi a mawh lo e.

Kum 1995 khan Mizoram a Chakma VC leh YCA hruaitu mi 60 in Prime Minister hnenah UT dilna an theh lut a. Hemi hma leh a hnuah pawh hian Mizote hekna leh UT dilna hi vawi duai lo an thlen tawh thin a. Zirlai pawlte leh Mizo mipuiin kan helh hle a nih kha, khatih laia sorkarna chelhtu pawhin dem a hlawh hle a ni. Chutihlai vel tho chuan January 16,1995 khan Chakma pahnih – Mrs Snehadini Talukdar leh Mr. Subimal Chakma ten Rajya Sabha-ah a bika enkawl (UT) dilna bawk an thlen a. Kum 1997 khan Rajya Sabha Committee on Petition chuan an dilna hi an pawmsak a, Chakma autonomous district council huam chin tihzauh te leh duhsakna thil a rawt tak avangin Mizo mipui kan phu ta luih luih a. September 26,1997 khan Join Action Committee hmalaknain kawngzawh a ni a, resolution pass a ni a. Memorandum pawh vairam lamah thawn a ni bawk a. Mizo mipui duh dan hriain an rawtna hi tihhlawhtlin a ni ta lo a ni.

Chakmate hi an fing tawh khawp a, vai thiltithei deuh zingah duhsaktu an nei reng bawk a. District Council atanga UT a hlankai kan nih lai pawh khan Regional Council awm sa Pawi leh Lakher regional council chu Autonomous District Council a then a ni a, chumi rual chuan mak deuhin Chakma Autonomous District Council hi a lo piang tel ve ngawt tawh a. Mizoram hruaitute zingah phalna leh remtihna lo pe an awm thu pawh sawi a tam hle a. Tunhma kha chuan a mawhphurtua puh Mizoram hruaitu mi pathumte hi ‘Sazu mitdel pathum’ tia beih an nih thin kha. Kum 2003 kum tir lam pawh khan Delimitation Committee-in Chakmate leh Tuikukte duhsak zawnga MLA bial then a tum avangin mipui kan phu luai luai tawh a. Kha rawtna kha kaltlang ta sela chuan MLA bial 4 hi Chakma tlin ngei ngeina a ni dawn a, bial 1 ah Tuikuk an tling ngei ngei bawk ang. Mahse, mipui tangrualin kan hneh leh ta hlauh a nih kha.

Engpawhnise, Chakma chungchangah hian a tir atangin mawhphurtute chu politician-te an tih loh theih loh a. Mikhual anga dawngsawng loin fa angin an lo pawm a, an lo luh belh zel a, an lo pung zel a. Mihring inthlah chhawn dan piah lama nasain an lo pung tih hi zep rual a awm lo. Dan ang chuan 1952 hma lama India rama awmte leh an thlahte chauh khua leh tui an ni a. Indira leh Bangladesh president Majibur-a te inremna Indira-Majibur Pact anga 1972 hmaa India rama awmte khua leh tui dik taka anga an sawi thin hi chu Chakma/Hajong refugee te chungchang a ni zawk. Khua kan tlai lek lek tawh a, sorkar huaisen leh hnam hmangaih tak taktu ram hruaitu nei ila. CADC thiah tum tlat, foreigner hnawhchhuah tum tlat leh kan ram humhalh duh tlat neih a hun tak zet a ni.

Facebooktwittergoogle_plusredditpinterestlinkedinmail

Login

Lost your password?