Monthly Archives: August 2017

Airport hnathawk & gold smuggler inthurual?

Khualzinte bungrua an enfiahna x-ray an ennawn lehnaah engmah hmuh a ni lo va, CCTV hmantlak a tlem, a mumal lo rei tawh

Aizawl: Mizoram Police te chuan Lengpui airport atanga rangkachak tawlhruk a nih dan chu uluk takin an chhui mek a, he chanchin buatsaih lai thleng hi chuan man an la nei lo. Thudawnna dangin a tarlan dan chuan Lengpui Airport-a hnathawk tam zawk chu tunah hian rinhlelh kai an ni a. Hnuchhuinaa tangkai tur tak CCTV pawh hmantlak mumal a awm lo bawk.
August 3, 2017 khan Aizawl atanga chhuak Jet airways passenger Zonunsanga (27) kut atangin Directorate of Revenue Intelligence (DRI) te chuan Kolkata airport-ah rangkachak kg. 9.96 an man a, a kengtu hi thu zawhfiah atan an kawl nghal a. DRI te hian Zonunsanga hi Kolkata airport terminal atanga a chhuak tur, step a kal lai chu tidingin a bag an enfiahnaah rangkachak hi an hmu niin thudawnna rintlak tak chuan a sawi a. ‘DRI te hrilh rutu an awm tihna a ni a, mi thahnemngaiin rangkachak hi man duh hrim hrim nise Mizoram chhungah pawh a report theih a, state pawna report a nih danah hian smuggler te inkara boruak chhia rah chhuah a ni thei a ni,’ tiin thulakna chuan a sawi bawk a ni.

Rangkachak tawlhruk chungchang hi Zalen chuan a theih ang angin mi a kawm kual a, Zonunsanga hian hemi ni (3.8.2017) hian bungraw dang nei lovin ‘bag ah’ (hand baggage) chauh a nei a, Lengpui airport-a khualzinte bungrua enfiah (x-ray)-naah pawh rangkachak hi hmuh a ni lo a, a hnua hemi nia khualzinte bungrua an enfiahna x-ray an enawn lehnaah pawh hmuh a nih loh avangin airport-a thawktute nen inthuruala rangkachak hi tawlhruk a nih rinna a lian hle. Rangkachak tlang hi scanner-ah chuan lang chiang tak tura ngaih a ni a, hmaih theih nia ngaih a ni meuh lo.

Lengpui airport a closed circuit television (CCTV) hi a chhiat avangin eng emaw thilsual ti duh tan pawh tihruk a remchang hle a, CCTV hi tha nise chuan rangkachak petu leh an lakluh dan pawh chiang deuha hriat theih a nih a rinawm hle. Zonunsanga hian airport a thawktute thurualpui a neih ngei a rinawm a, Security duty nge, loader nge airline hnathawkte tih hriat thiam a har hle.
Zonunsanga inpuanna (statement) hi Mizoram Police chuan DRI te hi an dil a, Nilaini khan IGP (Intelligence) chuan lehkha a ziak a, an chhanna nghah mek a ni. Thudawn danin Zonunsanga hi judicial custody-ah a awm tawh avangin thil awm dan zawt chiang turin tunkar chho hian Mizoram Police te chuan Kolkata pan an tum.

Zalen-in a chhuinaah chuan December 14, 2015 zana Zampuimanga thlan bula rangkachak phurtu motor suam a nih tuma hming lang, Lalhmingthangi w/o Zokhuma, Bawngkawn Lunglei road leh Zonunsanga te hi thlawhna ticket la dun, PNR Number pawh inang an ni a. Hemi ni pawh hian thlawhna pakhat ah hian an chuang dun a, Zonunsanga hi Kolkata-ah hian a chhuk a, Lalhmingthangi erawh Dehra Dun lamah a tlang a ni.

Dan naranin passenger te hi thlawhna atanga an chhuk hnuah chuan anmahni leh an bungruate enfiah a ni ngai tawh lo va, hetia DRI lamin an lo dap chat danah hian report tha tak an dawng tihna a ni a, rangkachak tawlhtu lam intihthiam lohna nghawng zel a ni theia ngaih a ni.

Zalen thudawn danin March 25, 2017 (Inrinni) pawh khan Lengpui Airport-ah hian rangkachak ni ngeia hriat kg. 25 vel chu Kolkata lam pan tur thlawhna ah phurh tum a ni a; mahse, rinhlelh a nih vangin kir leh a ni. Thudawn danin Jet Airways a thlawk tur passenger-te bungrua chu enfiah niin enfiah lai hian engmah thil dik lo hmuh a ni lo a. Mahse check-in counter-ah hian a rih lutuk avangin rinhlelh a ni a, ennawn leh tura tih a nih laiin bag neitu hian ‘motor part a ni a, ken in phal loh chuan ka dah let leh mai ang,’ tiin a bungrua hi a lalet leh niin an sawi a. A thil laklet hi polythene duma infun, thil sakhat a ni a, rangkachak ni ngeia rin a ni. Hetia finfiah pawh awm lova bag laklettir a ni hian mak tih a hlawh hle.

Zalen thudawn danin March 25, 2017 a baggage an rinhlelh te hi Samuel Zoremsanga hminga booked a ni tiin, a pa hi Lengpui Airport Security-a kum eng emaw zat lo duty tawh Mizoram Police Inspector niin a tarlang a, baggage la let lehtu pawh hi Samuel Zoremsanga pa, Police Inspector hi niin chanchinbu pakhat chuan a tarlang bawk.

Lengpui airport-a venhimna uluk leh khauh zawka kenkawh dan tur chungchang hi Zirtawpni khan IGP leh Police hotu lianten an enfiah a, hmalak dan tur an sawiho nghal.

Facebooktwittergoogle_plusredditpinterestlinkedinmail

FEATURE : Lakhuihthei

Lakhuihthei hi Mizoram ah tunhma atanga lo chin thin ni mah se hralh tham han thar sawitur an tlem hle a, a ching chhun te pawhin tlem te te an chin bakah tih tak taka a hmun siam an tam loh avangin Mizoram tharchhuah hmuh tur a tam tawk lo thin hle a. Kan hmuh leh ei ber pawh Assam leh thenawm state dang atanga kan chawkluhte an ni a, tunah erawh bazar mai ni lovin Aizawl khawpui hmun remchang laiah an zuar ta suau suau mai.

Hun eng emaw chen Mizoramin kan ei ber thin chu Lakhipur lakhuihthei a ni a, a thlum that bawk avangin a lar thin hle a ni. Mahse May/June velah chauh kan hmu thei thin a, a rah hun chhung a rei loh avangin a lei duh tan pawh harsatna a awm thin a nih kha. Mahse tunah erawh chuan Mizoram kuthnathawktute an harh thar a, lakhuihtheiah chuan kan eikhawp kan tharchhuah mai bakah state danga thawnchhuah tur thlengin a awm thei ta. Chumai ni lovin Mizoram lakhuihthei hi a thlum tui em em mai a, tunhma lama thur deuh thin pawh tunah chuan a thlum tui em em tawh mai a ni.

Aizawl vela an zawrh lakhuihthei hi a tlangpuiin Serchhip leh Lunglei district a chin te an ni a, Aizawl district huam chhungah pawh ching eng emaw zat an awm bawk. Kuthnathawktute tharchhuah hi a kharchhawng ten leiin lirthei hmangin Aizawl an panpui a, khawi emaw kawngsir rem lai laiah te an zuar thin. Lakhuihthei zuar thin pakhat chuan pick up emaw hire in lakhuihthei chu an khar a, Aizawl khawpui kawngsir hmun remchang laiah riakin chhun lamah an motor-ah chuan an zuar mai thin niin a sawi a. Lirthei a tawt thin avangin ngaimawh pawh an hlawh thin nia sawiin inzawrhna hmun tha nei thei se a duh hle tih a sawi bawk.

Zalen palaiin a kawmnaah lakhuihthei zuar/kharchhawng nu pakhat chuan lakhuihthei chu an lawh hma atangin an hauh lawk thin niin a sawi a. Hetianga kharchhawng hi Aizawl ah chuan mi 4/5 vel an awm nia sawiin anmahni chuan an zuar nghal a; mahse, kharchhawng thenkhat erawh chuan a zuar hnenah an pe mai a ti a. A tlangpuiin Mizoram lakhuihthei chu thlum ve viau mahse Lakhipur erawh a tluk lo deuh niin a sawi bawk.

Mi thiamte chuan lakhuihthei hi South America a an chin tan niin an sawi a, Christopher Columbus khan America atangin Europe lamah hawnin an ching pung ta nia hriat a ni. Lakhuihthei hi thei hrisel tak a ni a, a thlum tui em em mai bakah damdawi lamah pawh hman­­­­­­ tangkai a niin asthma leh zunthlum ten a ngeih bakah vitamin C a tam hle niin mi thiamte chuan an sawi bawk.

Facebooktwittergoogle_plusredditpinterestlinkedinmail

Silencer tidanglam 340+ man tawh

Aizawl: Traffic SP, Aizawl chuan two-wheeler khuchhuahna siam danglam chu kum li chhungin 343 an man a ni tawh niin Zalen a hrilh a, hemi bakah hian lirthei chungchanga dan zawm tha turin mipuite a chah.

Aizawl Traffic SP C. Lalthanmawia chuan two-wheeler khuchhuahna siam danglam chu kum li chhungin 343 a nih thu a sawi a. Heng siam danglam an man te hi danin a phal baka ring a nih avangin man a ni a, dan chuan 80dB aia ring a phal loh thu a sawi bawk. Two wheeler khuchhuahna man te hi kum 2014-ah 75, 2015-ah 145, 2016-ah 100 leh 2017 record hnuhnung berah 23 a ni a. Motor Vehicle Act-a section 190 na hmangin Rs 1000 chawi tir thin an ni. Traffic SP chuan Police mi leh sa pawh an bike khuchhuahna lo siam danglam an awm thin thu leh hotu lian lam atanga hemi chungchanga hmalak a nih dawn thu a sawi bawk.
Aizawl Traffic SP chuan lirthei khu chhuahna tihdanglam bakah hian Traffic dan hrim hrim mipuite chu zawm tha turin a chah a. Tunlaiin kum tling lova lirthei khalh an tam thu leh heng lirthei khalhtirtu, a motor neitute hi dan ina a phalsak loh an motor an khalhtir avangin hrem theih an nih thu a sawi a, thla thum lung in tan emaw Rs 1000 chawitir theih an nih thu a sawi bawk.
C. Lalthanmawia chuan Transport Department hmalaknaa Garage nei tura mipuite hun pek mek November 30, 2017 a tawp tur pawh hemi hnua garage nei lote chunga na taka action lakna tur ngaihtuah mek a nih thu a sawi.

Facebooktwittergoogle_plusredditpinterestlinkedinmail

Hawla’n Khatla veng kawng zauh theih dan en

Aizawl: Chief Minister Lal Thanhawla chuan nimin zing khan Local Council anga in dang thar Khatla East Local Council huam chhung tlawhin vengchhung kawngdung zauh theih dan turte Khatla East khawtlang hruaitu ten an lo enpui.

Khatla East khawtlang hruaitute a kawmnaah Chief Minister chuan Kumpinu sawrkarin a awp lai atang daih tawh a khawpui thangzel tur ruahmanna tha a awm loh avangin Aizawl khawpui chu felfai tawk lo tih a sawi a. Mipui mamawhna avang leh a pawimawh em avangin kawngpui tihlen ngaite chu sawrkarin a tahtawlin a chei tha mek zel tih a sawi.

Chief Minister chuan tlangram khawpui dangte aiin Aizawl khawchhunga kawngpui te chu a te bik lo tih sawiin, “Lirthei lei dawna garage neia inchhal, lirthei neih hnu a luhlul chhuah a kawngpui a an lirthei dah leh mai thin te hi an hnawksak tak zet a. Kawng kan siam len poh leh hengho tan hian lirthei dahna kan siam hnem a ni mai awm e a tih theih a. Khawtlang mipuiten mi dang tana kawhmawh bawla kawngpui ticheptute hi kan ngaih theih loh a hun tawh a. Thenawmte leh vantlang ram nek rana insak chin sim te, kawngpui dung te vawn fai, zah leh humhalh te hi veng tin leh a chhunga cheng khua leh tuiten kan intih hmuh a hun tawh a ni,” a ti.

Facebooktwittergoogle_plusredditpinterestlinkedinmail

Saitualah I-Day bandh dawn

Aizawl: Nimina Saitual District Implementing Committee thukhawm chuan sawrkara an thilphut tihhlawhtlin a nih loh avangin August 15, 2017 (Thawhlehni) hian Saitualah total bandh neih nise an ti.

Saitual District Implementing Committee hi nimin chhun khan BRC Hall-ah an chairman Rohmingliana hovin an thukhawm a, August 12, 2017 hmaa Saitual chu District-a puang tura a ngenna sawrkarin a tihhlawhtlin loh avangin naktip Thawhlehni (15.8.2017) zing dar 5 atanga tlai dar 5 inkar chhung hian Saitual town area chhungah bandh neih nise an ti a. Hemi hun chhung hian Saitual paltlang tur lirthei pawh dan vek an rel. SDIC chuan bandh an neih dawn vanga harsatna tawkte hriatthiam an ngen tih an sawi. KDIDC bultuma Total Bandh neih tur hi zinglam dar 5:00 atanga tlai lam dar 5:00 thleng a ni dawn a. Boruak duhawm lo a thlen lohna turin khualzinte leh lirthei khalhtute chu Bandh neih chhungin Saitual tlan tlang tum lo turin an ngen a ni.

Khawzawl pawhin a taka District hnathawhtir tura August ni 12,2017 thleng sawrkar an nghah chhunga engmah hmalakna a awm loh avangin Thawhtanni 5AM-5PM chhung hian total bandh an nei ang.

Facebooktwittergoogle_plusredditpinterestlinkedinmail

I Day parade tur 95 hnawl

Aizawl: Naktip India Independence day lawmna parade-a tel tur zinga mi 95 te chu an fit lo nia Doctor ten an hriat avangin tel lo turin an ti.

Aizawla Independence day parade-a tel tur hian school 14 leh NCC contingent 3 thlan an ni a, parade a tel turte hriselna hi Aizawl Civil Hospital Doctor te chuan an enfiah a, mi 760 an endik zingah hian mi 95 te chu an hriselna a tha tawk lo nia hriain tel ve an remti lo a ni.

Aizawl Civil Hospital thawktute hnen atanga thudawn danin parade tur an hnawl te hi a tlangpuiin rit lutuk, BP sang leh hniam, luhai nei, pum tha lo, thisen nei tlem te an ni.

Kumin Aizawla I-day lawmnaah hian band party 4-te nen chhiar telin parade contingent 28 an awm dawn a. Parade final rehearsal hi naktuk Thawhtanni zing dar 9 hian Lammualah neih a ni ang.

Facebooktwittergoogle_plusredditpinterestlinkedinmail

HIV vei naupang disadvantage group-ah dah

Aizawl: Supreme Court chuan HIV vei naupangte chu Right to Education dan hnuaiah ‘disadvantaged group’ a dah turin state sorkar te chu hriattirna a pe a, Mizoram sorkar pawhin hma a la mek.

Zalen thudawn danin Supreme Court chuan April thla khan he hriattirna hi a tichhuak a. Hei hi India danpuiin naupangten zirna a thlawnin an dawng ngei ngei tur a ni tih baka duhsak lehzual tur group te an ni a. A thlawna zirna an neih ngei ngeina tura nasa taka puitu tur anih thu thudawnna chuan a sawi. He thupek bawhzuitu Mizoram State Aids Control Society (MSACS) chuan Education Department lamah order tichhuak turin ngenna lehkha an pek tawh thu Zalen an hrilh a, hmalak zel anih thu an sawi bawk.

The Right of Children to Free & Compulsory Education Act of 2009 hnuaiah hian ‘disadvantaged group’ te hi thil hrang hrang behchhanin siam an ni thin a. Hnam, khawtlang nun, tawng, awmna hmun, gender leh a dangte hmangin dah an ni thin a ni.

Thudawnna in a tarlan danin India ram hrang hranga sikul hotute leh zirlai dangte atangin HIV vei naupangte hian diriamna leh tiduhdahna an tawk nasa hle a, heng tihduhdahna tuarte tana beitute nawrna avanga Supreme Court in he thupek hi siam a nih thu tarlan a ni bawk. NACO record in a tarlan danin naupang kum 15 hnuailam HIV vei zat hi India ram puma he natna vei awm zat atanga zaa 7 an ni.

Facebooktwittergoogle_plusredditpinterestlinkedinmail

Buhfai kg 1 Re 1: BJP

Aizawl: BJP Mizoram Pradesh President Dr. JV Hluna chuan, “Kan sawrkar hunah Mizoram mipui zawng zawng hnen ah Buhfai KG ah cheng khatin kan sem vek dawn a ni,” a ti.

Nimina BJP Aizawl District ten khawpui chhunga BJP Unit hruaitute tana infuihtharna hun an neihah he thu hi sawiin Dr. JV Hluna chuan, “BJP chuan buh leh bal a intodelh, kawng tha, tui thianghlim, power leh industry lian din kawngah chak takin hma kan la dawn a, Mizo thalaite hnenah sawrkar hna nilo, sector dang atangin mi nuai hnih hna kan pe ang,” a ti bawk.

District Vice President MC Awia pawhin, “Congress hian Mizoram BJP lian zel tur hi hlau in dawt hmangin nasa takin an bei a, Kristianna nena inrem lo ang hialin a chhuah a. Mahse, ram pawna awm kan Missionary te hnen atanga report kan dawn danin BJP hi Kristiante humhimtu niin BJP sawrkarna hnuaiah chuan a nuam in a zalen an ti zawk a ni,” a ti.

Facebooktwittergoogle_plusredditpinterestlinkedinmail

Manipur MZP kum 65 na

Aizawl: Nimin khan MZP Headquarter, Manipur chuan an kum 65 tlin lawmna leh zirlaite hnenah meritorious award semna hun Chienkawnpang YMA Community Hall, Churachandpur ah an nei.

He huna khuallian Manipur Agriculture Minister V.Hangkhanlian chuan, “Mizoram kan kal chuan Lusei tawng kan hman a ngai a, tawng avanga unau kan nihna hi a bo chuang lo a. Manipur Zofate hian Mizoram sawrkar leh mipui ten min puih thin na hi kan theihnghilh dawn lo a, Manipur zofa te aiawhin lawmthu ka sawi tak meuh a ni,” a ti.

He hun hmanpuitu dang MZP Gen. Secy. L.Ramdinliana Renthlei chuan, “Engtik niah emaw chuan hmun hrang hranga Zofate hi rorelna pakhat hnuaiah kan la awm khawm dawn a, kan awmna hmun theuhah ram leh hnam rilru pu tlat chungin rinawm taka kan awm a ngai a, tawng a inan loh avanga unau hmel kan inhai thin hi MZP chuan pawi a ti a, rilru zau tak pu chung leh induhsak tawn tak chunga kan awmho a ngai takzet a ni,” a ti.

Facebooktwittergoogle_plusredditpinterestlinkedinmail

Thosi seh vang thluaka khawsik lut; Jap Encephalitis lakah beihpui thlak

Aizawl: Health & Family Welfare Department (H&FWD) chuan thenawm state te a hri leng mek Japanese Encephalitis laka invenna turin hma a la mek.

Department lam hotute atanga thudawn danin tunah hian Manipur lama Japanese encephalitis a len nasat avangin Manipur hnaih lamah hma lak a nih thu Zalen an hrilh a. Japanese encephalitis chu thosi seh atanga kai theih a nih thu department lam hotute chuan an sawi a, hemi vang hian Manipur hnaih lam khaw hrang hrangah inralrin a ngaih thu leh department lam hnathawktute pawh an inrin theihnan hma lak a nih thu an sawi bawk.

Thosi piantir loh chu a inven dan tha ber a nih rih thu department hotute chuan an sawi a. Thosi pian theihna tur tui tling te leh thil hrang hrang tihbona turin khaw hrang hranga Sub-Centre ah hnathawh dan tur ruahman a nih dawn thu leh sum pawh ngaihtuah a nih thu an sawi bawk. Thosi pian loh nan hian nasa zawkin hmun hrang hrangah DDT kah mek anih thu an sawi bawk.

H&FWD hotute chuan Mizoramah an hriat theih chinah vei hmuh chhuah an la nih loh thu an sawi a. Central lamah vaccine dil a nih thu leh vei pakhat mah hriat an la nih loh avanga an rawn pekchhuah theih loh thu an sawi bawk. Japanese encephalitis hi malaria ang deuh a thosi seh atanga kai theih natna a ni a, a natna lo lan chhuah hun hi ni 5-15 chhungin a ni a. Luak, lu na, khawsik leh chet vel hrehawmten a lang chhuak a, thluak lamah hnathawkin nikhaw hre lo hiala awm theihna a ni a, ngaihthah chuan thihna hial a thlen thei niin thudawnna chuan a tarlang. Tunah hian he natna hi thenawm state Assam leh Manipur-ah te a leng mek a ni.

Facebooktwittergoogle_plusredditpinterestlinkedinmail

Login

Lost your password?