Monthly Archives: August 2017

Feature : Heroin hluar, a man tlahniam

Mizoram ah ruihhlo vangin thalai mi engemaw zat in nunna an chan tawh a. Heng ruihhlo zingah hian tunlaia an buaipui ber leh ruihhlo ti thinte pawhin an tih nasat ber chu Heroin niin an sawi a. Drugs ti thinte hian damdawi ei chi leh in chi engemaw zat ti bawk mahse heroin nen hian an chawhpawlh tlangpui niin an sawi.

Mizoram Excise & Narcotics Department chhinchhiah danin August ni 16,2017 thleng khan Mizoram ah damdawi hmansual vanga thi 49 an awm tawh a. Hengte hi mipa 39 leh hmeichhia 10 an ni a, an thihpui tam ber chu heroin niin heroin vanga thi hi 20 an ni a, a dang hi heroin leh damdawi dang tihpawlhte an ni. Mizoram Excise & Narcotics chhinchhiah dan chuan kum 1984 atang khan damdawi hmansual vangin mi 1451 an thi tawh a ni.

Central YMA in ruihhlo do tura a din SRS Convener Lalsailova chuan tunlaiin ruihhlo chu Aizawl ai mahin thingtlang lam khawpui ah a hluar thar nia a hriat thu Zalen a hrilh a. Aizawl ah chuan ching thar engemaw zat awm bawk mahse khawpui lian dangah a ching thar an pung nia sawiin hei hian HIV inkaidarh kawngah pawh nasa takin a tih hluar phah nia a hriat thu a sawi bawk. Lalsailova chuan heroin chu tunhma chuan mi hausa deuh ten an ti thin nia sawiin tunhnaiah erawh chuan mirethei zawkte pawhin an ti nasa hle tih a sawi a. Hun engemaw chen lo nghei a, ti thar leh te chu an taksa zawh tawk an hriatloh avangin an OD hma bik nia an hriat thu a sawi bawk.

Heroin a hluar nia a lanna chu tunhma deuh a hawng khat Rs. 55,000 ni thin kha tunlai hian Aizawl ah hawng khat Rs. 35,000 te a ni a. Heti tak maia heroin a tam chhan hi India pawisa thih dawn khan Myanmar atanga rawn tawlh thin ten pawisa thleng na an neih ve loh avangin an pawisa kawl chu heroin leinan an hmang ta vak a, chu chu hun engemaw chen atang khan Mizoram ah an rawn tlawh thla niin an sawi. Heroin hluar nia sawi chungchangah hian Excise officer pakhat chuan, “A hluar tih dawn chuan a dik thei tho a, mahse tunhma a damdawi ti ho inchiuna thin proxyvon leh parvon kha a awm tawhloh avangin khang ti thin kha heroin lamah hian an kal a, a hluar ta niin a lang,” a ti.

Mizorama damdawiin lian ber leh pantu ngah ber Aizawl Civil hospital thawktute pawhin heroin a hluar hle nia an hriat thu an sawi a. Zan tin deuh thawh over dose (OD) vanga an hnen pan an awm nia sawiin a tlangpuiin an hnen rawn thlengte chu an chhan hman zel tih an sawi a. OD vanga pantu hi a chang chuan zan khatah mi 2 te an awm nia sawiin OD vanga pantu hi a tlangpuiin mipa ni mahse hmeichhia pawh engemaw zat an awm niin an sawi bawk. Damdawi dawr nghak nu pakhat chuan ruihhlo ti thin, inchiuna tur ‘syringe’ zawng an tam thei hle nia sawiin a bikin TBCC atanga mi engemaw zat an chhuah hnuah an tam zual nia a hriat thu a sawi bawk.

Tunhma chuan Mizoram a damdawi ti thin ten an ruih nasat ber leh inchiuna atan pawha an hman nasat ber chu Proxyvon/Parvon spas a ni thin a. He damdawi vang hian chhinchhiah theih chinah mi 1167 an thi hman a, mahse he damdawiin hi sawrkar laipuiin siamchhuah a phal tawh loh avangin ruihhlo ti thinte hi Heroin lamah hian an insawn ta niin an sawi.

Drugs a inchiu thin pakhat chuan heroin a inchiu thin zinga OD an tam chhan chu a quality a inan loh thin vang nia a hriat thu a sawi a. Quality tha lo deuh ti thin kha quality tha deuh a tih leh khan a dose nen a inmil ta lo a, a OD phah ta thin niin a sawi ve bawk.

Facebooktwittergoogle_plusredditpinterestlinkedinmail

Grape chingtute inchhungkhawm

Aizawl: Hun rei tak chhung Hnahlan khuaa grape chingtute chu pawl (society) pahnih awm thin chu pawl khatah an in chhungkhawm.

Hnahlan grape chingtute hi hun engemaw chen chu society pahnihin an awm a, hei hian sawrkar lama tanpuina dawn kawngah leh thil dang dangah harsatna a siam thin a. Ni 30.7.2016-a Society pahnih, Hnahlan Grape Grower Society leh Hnahlan Grape Farming & Processing Cooperative Society Ltd., a hruaitu te’n inzawmkhawmna tura hma an lak tawh chu tluang taka kal tlangpui zel a nih hnuah, ni 25.8.2017 (Zirtawpni) khan Society pahnihte chuan Inremna Thuthlung (MoU) point 6 chu lungrual taka pawm tlangin hming an sign a, inremna saui an tan. He Inremna Thuthlung hi Court hriatpuina lehkha ziak nen tihfel a ni ang. Kum tam tak remna siam thei loa an awm hnua remna chawhlui kila, kut thinga chibai an inbuk thei ta hi Hnahlan khuaa grape chingtute tan thil chhinchhiah tlak leh hriat reng tlak a nih ngei a beiseiawm.

Society pahnih inzawmkhawm hming atan hian ‘Hnahlan Grape Grower & Processing Society’ tih a ni ang a. Society thar hming hi Official a sawrkara a in register hma chu a tul dan a zirin Society pahnih Registration a khawi emaw zawk zawk hmangin Company, sawrkar, etc., te an dawr thin ang.

Hnahlan Grape Grower & Processing Society hruaitu atan heng mite hi ruat an ni.
Chairman : C. Vanlalhriata
Sr Vice Chairman : CL Thianga
Vice Chairman : Vanlalngaia leh
Zemlianzuala
General Secretary : F. Laltlankima
Joint Secretary : ZK Liana
Information Secretary : Zirliantluanga leh C. Hrangkamlova
Treasurer : Hratchuailova
Fin Secy : PC Phairosiama

Hnahlan khuaa grape chingtute hian an thlai thar hralhnaah harsatna nasa tak an tawk mek a. MLPC Act hman a nih hnu hian an wine siam chhuah Zawlaidi chu a hralhna a awm tawh lo tluk a ni. Vanneihthlaktakin Ministry of Agriculture and Farmers Welfare chuan an hloh cheng vaibelchhe thum vel (3 crore) Market Intervention Scheme (MIS) hmangin rulhsak dawn a. Tun atanga rei loteah grape chingtute hnen a thlen beisei a ni.

National Cooperative Development Corporation (NCDC) nen tangrualin winery changkang leh lian zawk din tuma hmalak tan mek a ni a. Wine quality tha tak siam chhuak a, hmun danga wine siam chhuah te el pha tura ruahmanna siam a ni. Grape variety tha zawk hlawhtling taka ching puitling thei turin Indian Agricultural Research Institute (IARI) nen thawhhona neih tum mek a ni bawk.

Facebooktwittergoogle_plusredditpinterestlinkedinmail

Bial 40 ah candidate 40 neih kan tum : PRISM

Zohnahthlak chauh Prism in phochhuah tum bawk

Aizawl: Nimin khan PRISM chuan Aizawl Press Club-ah thuthar lakhawmtute kawmin kum 2018 Mizoram Assembly inthlanpui ah mal din an tum thu leh Assembly bial 40 ah candidate 40 neih an tum thu an sawi.

PRISM President Vanlalruata chuan kum 10 chuang ram leh hnam tana siamthat tur an rawt thin te leh corruption a awm tawh loh nana an hmalakna in rah tha chhuah mahse, sorkar apiang nawr tu ni lova sorkar siamtu an nih a tul zawk tawh thu a sawi a. Assembly bial 40 ah candidate 40 neih an tum thu leh Party dang nena thawhhona engmah an la neih loh thu a sawi a. An candidate zawng zawng chu zohnahthlak vek an nih dawn thu a sawi bawk.

Kristianna a tha bik a ni tih lantira Pathian chawimawi tur te, Zohnahthlak te inpumkhat na tur te, hna neilo awmlohna tur te, ramri, sakhua leh hnam dikna leh chanvo humhim tur te in an thawh dawn thu PRISM chuan an tarlang a. PRISM MLA Election Manifesto chu August 1, 2017 khan an tlangzarh tawh thu sawiin Vanlalruata chuan hetah hian huaisen chungchuang taka hmalak a ngaih dawn thu a sawi a. Assam enkawl lai Innerline Reserved Forest laklet te, hmang tangkai si lova ram zau pui pui neite ram chhuhsak te, eiruk hmangte man leh an eiruk sa chhuhsak leh thil dang pawimawh tak tak a awm thu a tarlang bawk.

Eirukna laka fihlim ngei tur Minister leh MLA an duh tih sawiin PRISM President chuan an sorkara Minister leh MLA nih chakawm loh rawk khawpin Minister, MLA leh adangte hlawh leh facility tihtlem tum a nih thu a sawi a, kum tin an thil neih puanzar a nih dawn thu a sawi. Sport Association vela hruaitu an nih theih dawn loh thu te sawiin MLA te’n an bial ah office an neih dawn thu an sawi a. Heng bak hi thil tam tak awmin ram hmangaihtu tan erawh chuan thil chakawm tak a nih thu a sawi bawk.

PRISM chuan unit hrang hrang neih chu mipuiin an duh lo nia an hriat thu leh neih an tum loh thu an sawi a. State chhunga an branch 400 bawr vel pawh thiah vek an tum thu sawiin Vanlalruata chuan Congress leh BJP constitution ah pawh unit hi a awm lo a, Mizoramah hian an uar mai mai niin a sawi bawk. PRISM chuan mipui huapzo sorkar tak tak neih an duh thu sawiin mipuiah candidate an zawn mek thu an sawi a. Mahni ropuina leh hamthatna tur ni lova ram leh hnam dinchhuahna tura in candidate ngam te lo penchhuak tura an sawm thu an sawi bawk.

Facebooktwittergoogle_plusredditpinterestlinkedinmail

MNF, MPC & ZNP in Chakma candidate nei dawn lo; BJP leh Congress party la ngawi

Aizawl: Mizoram a tualto party pathum MNF, MPC leh ZNP te chuan nakum MLA inthlanpui ah Chakma candidate neih an tumloh thu an puang chiang tawh a, hetih lai nian national party BJP leh Congress (INC) te erawh an la ngawi thung.

Zalen palaiin nakum MLA inthlanpui ah Chakma candidate neih an tum leh tumloh chungchang a zawhna chhangin BJP Mizoram Pradesh President Dr. JV Hluna chuan, “Mizoram khawi bialah pawh a tling awm ber kan candidate ang,” a ti a. Chakma candidate chungchang bikah chuan kum 1 chuang a la awm avangin ngawih an chuh hrih tih a sawi. Tunhnaia NGO Coordination Committee in Chakma candidate chungchanga inhmuhkhawm an koh tuma an party an tel ve loh chhan chu ‘A hriat loh vang’ niin a sawi a. “Meeting pawimawhin Guwahati ka kal haw ni chiah ah meeting kha neih a ni a. Kan Secretary ten min hrilhloh bakah ‘a thu a sensitive em a, President thu lo chuan tel chi a ni lo’ an tih vangin an tel lo mai a ni,” a ti.

Congress General Secretary i/c NGO K.Lalnunmawia chuan Chakma candidate neih chungchang chu an party in an la rel lo niin Zalen a hrilh a. “Kan party President a remchan veleh kan rel ang,” a ti. MPCC General Secretary C.Chawngkunga pawhin an party chu National party anih avangin thutawp neitu chu Delhi lam an ni tiin Chakma candidate chungchang chu an la sawiho lo hrim hrim niin Zalen a hrilh bawk. MNF President Zoramthanga chuan Thawhtanni khan an party office, Hnam Run-ah thu sawiin an party chuan Chakma candidate an nei dawnlo tih a sawi nawn leh a ni.

Facebooktwittergoogle_plusredditpinterestlinkedinmail

Mi 1697 kutthlak an ni tawh -MPCC

Aizawl: Rorellai MPCC chuan thuchhuah siamin Mizoram sawrkar chuan kum 2009 atanga June, 2017 thlengin a hnathawkte lakah eirukna (corruption) avang leh thil dang avangin mi 1697 kut a thlak a, CSS (CCA) Rules, 1965 angin heng a hnathawkte lakah hian Disciplinary Action a la a ni, an ti.

Nimina thuchhuah an siamah MPCC chuan RTI Act hnuaiah mimal nun inhumhim sak a tul avang leh Supreme Court pawhin hemi chungchangah hian a judgement order a siam avangin mimal chungah hremna a lekkawh te hming chu puanzar khap tlat a ni, an ti. PRISM hovin RTI hmanga Vigilance Department kal tlanga zawhna an siam pawh mimal hming tarlan dan in a phalloh avang in hrilh an nilo niin an sawi.

Facebooktwittergoogle_plusredditpinterestlinkedinmail

All India Service cadre kal phung Centre in tidanglam

Aizawl: Sorkar laipui chuan All India Service pathum Indian Administrative Service (IAS), Indian Police Service (IPS) leh Indian Forest Service (IFS) tlingte hnathawhna hmun tur siamrem dan tidanglam in cadre policy thar a duang.

Sorkar laipui chuan IAS, IPS leh IFS te cadre neih dan \hin chu tidanglamin cadre policy thar a duang a. Cadre Policy tharah hian officer tling thar te chuan an awmna tur state te te a thlang tawh lovin zone angin an thlang tawh dawn a. Tuna cadre 26 awm mek chu zone 5 ah personnel ministry chuan a then.

Mizoram chu Zone 1-na ah State lian thenkhat te nen an awm ho dawn a. Zalen thudawn danin he policy duan a nih chhan chu officer te India ram hmun hrang hrangah an thawh kual tamna tur a ni a, ram chhung sorkarah inpumkhatna hmanrua a nih dawn thu thuneitute chuan an tarlang bawk. Civil Service exam beitute chuan zone angin an awmna hmun tur an thlan tawh dawn thu leh kumin atanga he policy hi hman tan nghal a nih dawn thu thudawnna chuan a tarlang bawk.

Zone a then dan hi Zone 1-na ah AGMUT (Arunachal Pradesh-Goa-Mizoram and Union Territories), Jammu & Kashmir, Himachal Pradesh, Uttarkhand, Punjab, Rajasthan leh Haryana an ni a. Zone 2-na ah Uttar Pradesh, Bihar, Jharkhand leh Odisha, Zone 3-na ah Gujarat, Maharashtra, Madhya Pradesh leh Chhattisgarh, Zone 4-na ah West Bengal, Sikkim, Assam-Meghalaya, Manipur, Tripura leh Nagaland an ni a. Zone hnuhnung ber Zone 5-na ah hian Telangana, Andhra Pradesh, Karnataka, Tamil Nadu leh Kerala te an awm ve thung a ni.

Facebooktwittergoogle_plusredditpinterestlinkedinmail

Mamawh aia tam Sub-Centre, PHC leh CHC Mizoramin nei

Aizawl: Rural Health Statistics 2016 atanga a lan danin Mizoramah mamawh zat aia tam Sub-Centre, Primary Health Centre (PHC) leh Community Health Centre (CHC) a awm.

Mizoramah hian healthcare facility Sub-Centre 370, PHC-57 leh CHC 9 a awm mek a. A vaiin healthcare facility 436 a awm tihna a ni. Heng bakah hian sub-divisional hospital 3 leh district hospital 8 a awm bawk niin heng record te hi March 31, 2016 thleng a record neih te an ni.

Mizoramah hian thingtlang (rural) population chu 525,435 a ni a. Mihring cheng zat atanga thlirin sub-centre 172, PHC 25 leh CHC 6 mamawh a ni a. Hei vang hian Mizoramah chuan healthcare facility indaih lohna a awm lova, centre tinah mamawh bak (surplus) a awm thung a ni. Mizorama sub-centre te chuan sq km 55.39 zel an tuam a, PHC in sq km 359.54 zel leh CHC in sq km 2277.11 zel a tuam anga chhut a ni.

Health Care in a tuam danin Mizoram pum zau zawng sq km 21,081 chu tribal area a ni a. Urban area chu sq km 587 a ni. Mizoram pumah hian thingtlang khua 830 a awm bawk. Ram pum thlirin public sector hnuaiah health facility 187,771 a awm a. Sub-Centre 155,069, PHC 25354 leh CHC 5510 a awm a, sub-divisional hospital 1065 awmin district hospital 773 a awm a, heng te hian rural population a tuam hneh lo hle a ni.

Facebooktwittergoogle_plusredditpinterestlinkedinmail

MNF in Furpui feh chhuah an hmang zel

Aizawl: MNF Party in ‘Furpui Fehchhuah’ programme a neih kal zelah nimin zing khan Aizawl South-II MNF Block leh MNYF Headquarters huaihawtin ITI Veng-ah hun hman a ni a, MNF Thalai President Er. Lalrinawma, MLA leh hruaitu dangte’n thu an sawi a ni.

Er. Lalrinawma chuan, “MNF kan sawrkar hunah chuan mawhphurhna la ngam sawrkar din kan tum,” a ti a. “NIAS-a Mizo zirlai tirh chungchangah te a changtu te’n ‘kan mawh a ni lo’ an ti a, a department changtuin mawh a lak lohvin tu mawh nge ni ta ang?” a ti. “Mizoram hmun hrang hrangah zirtirtu indaih lohna a nasa a, hmun thenkhatah zirtirtu an tam leh em em si. Hei hi transfer & posting rules mumal kan neih loh vang a ni a, kan sawrkar hunah chuan hei hi mumal taka kalpui kan tum dawn a ni,” a ti bawk.

Facebooktwittergoogle_plusredditpinterestlinkedinmail

Swachh Bharat Mission intihsiakna ah Aizawl District dinhmun a tha

Aizawl: Swachh Bharat Mission hnuaia Ministry of Drinking Water & Sanitation in ramchhunga district hrang hrangte tana intihsiakna a buatsaih District Performance, Sustainability & Transparency ranking a buatsaih ah Aizawl District dinhmun a tha hle.

District Performance, Sustainability & Transparency ranking ah hian Aizawl District chu he thu buatsaih a nih lai hian 3-na ah a awm a. District hrang hrang te’n Swachh Bharat an kalpui danah hian tehfung pathum – hnathawh that zawng (Performance), hna kal tluan zawng (Sustainability) leh hna a langtlang em tih tehna (Transparency) te hman a ni a.

District hrang hrang te dinhmun hi an hnathawh dan milin a danglam reng a. October 2, 2017 hian result puan a ni dawn a ni. Intihsiakna hi State leh district hrang hrang te’n faina lamah leh bawlhlawh sawngbawlna lam kawnga nasa taka hma an sawn theih nana duan a nih thu Ministry of Drinking Water & Sanitation chuan a tarlang a ni.

Mizoram chhungah chuan Top 100 ah District pathum langin Aizawl bakah Kolasib chu 60-na niin Champhai chu 90-na a ni bawk a ni.

Facebooktwittergoogle_plusredditpinterestlinkedinmail

Serchhip-ah ZEM din

Aizawl: Nimin zing khan Serchhip ah Party zawm bik nei lo ram vei rual inhmukhawm te chuan Zoram Exodus Movement (ZEM) an din a, hruaitu thar an inruat nghal.

Serchhip a patling 30 chuang zet te chu July ni 6, 2016 khan tualchhung chanchinbumite leh Aizawl lam atanga Zoram Exodus Movement(ZEM) hruaitu lawk te nen Serchhip Khawtetlang a Tourist Lodge ah inhmukhawmin hemi tum hian Serchhip a Zoram Exodus Movement(ZEM) din hi an lo sawiho tawh a, hemi tum hian hma lo la turin Convener ah mi 3 Kapliana Pachuau, Lalawmpuia Renthlei leh Jery Lalrintluanga te ruat an ni a, an ni hian Serchhip khawchhunga Prominent Citizen hrang hrang te kawm kualinnimin zingkar khan an inhmukhawm a, hruaitu tur mumal takin an inruat fel ta a ni.

Zoram Exodus Movement, Serchhip hruaitu tharte chu President ah Upa K.Chawiliana niin Vice President ah Upa Lalchhara leh Lalbiakliana te an ni a, Secretary ah Kapliana Pachuau niin Treasurer ah Lalawmpuia Renthlei a ni.

Facebooktwittergoogle_plusredditpinterestlinkedinmail

Login

Lost your password?