Monthly Archives: September 2017

Feature : MLA inthlan sawn hnai dawn em?

India hi inthlang ram nghet, khawvela Democracy ram lian ber a ni a. British atanga a indan hnuah tum engemaw zat inthlanpui lo nei tawhin mipui aiawha thlan ten ram rorelna an kalpui thin. Khawvel ram tam tak leh India thenawm ramahte sipaiin mipui thlan lal sawrkar paih thlain ro an rel thin a; mahse, India erawh democracy a nihna a ngheh tlat avangin hetiang hi a la tawng lo thung.

India chu mipui ten an aiawh tur an thlanna ‘Democrary’ ram a nih ang ngeiin a hunbi ah aiawh tur MP/MLA leh a dangte thlan thin a ni a. Lok Sabha MP mai bakah State leh Union Territory ten an aiawha roreltu tur MLA an thlannaah senso a tam thin em avangin sawrkar laipui pawhin senso hautak lo zawng deuha kalpui dan a ngaihtuah thar a. Hei vang hian nakum kumtawp maia Mizoram MLA General Election pawh hi a hun takah kan nei dawn nge Election Commission of India hian a pawttawiin a pawtsei ang tih chu mi thiamten an inrinsiak mek a ni.

MLA 40 awmna Mizoram Legislative Assembly hi dan pangngai ang chuan ni 15.12.2018 a tawp tur a ni a, chuti anih chuan dan pangngai ang chuan 2018 October emaw November velah chuan inthlanpui neih a ngai dawn tihna a ni. Kumin kumtawp leh nakkum ah hian Mizoram tiamin state 8 inthlang tur an awm a, hengte hi Chhattisgarh, Karnataka, Madhya Pradesh, Meghalaya, Mizoram, Nagaland, Rajasthan leh Tripura te niin a then hi kumtir lama inthlang tur an niin state thenkhat erawh kumtawp lam a inthlang tur an ni thung. Hetih lai hian Lok Sabha term dinglai hi ni 03.06.2019 a tawp tur a ni a, dan pangngai ang chuan inthlanna hi April/May 2019 vela neih tur a ni.
Hei hi thil awmdan a nih avangin sawrkar laipuiin inthlan senso chungchang zirchiang tura a din committee chuan Parliament leh State Assembly chu hun hrang hranga inthlang lovin a ruala inthlan nise tiin rawtna a siam a. An rawtna hi Election Commission of India leh sawrkar laipui pawhin tha a ti hle nia thudawn a ni.

Chuti a nih chuan nakkum kumtira inthlang tur te hi tlema an term pawtseiin kumtawp lama inthlang turte pawh an term pawttawiin April/May velah inthlan hi buatsaih thut a ni lo vang tih sawi theih a ni lo va. Hei mai ni lovin Lok Sabha inthlanpui pawh BJP hian an hmingthat lai chuhin kum 2019-ah inthlang lovin 2018-a inthlan mai hi an hnial lo niin mi thil chikmi te chuan an sawi bawk. Hetih lai hian mi thahnem tak chuan a ruala inthlan neih (simulteneous election) chu democracy palzutna a ni tiin an duhlo hle thung.

Mizoram inthlanpui sawnhnaih tur nia thuthang chungchang hi Zalen chuan Election Department a Joint Chief Electoral Officer Zorammuana chu a zawtfiah a, Jt.CEO chuan a ruala inthlanpui neih theih chu a huho deuh chuan neihtir thin ni mah se Mizoram inthlanpui chungchangah chuan engmah thuthar an la hre lo niin a sawi. Kalphung pangngai ah chuan rorellai party/Chief Ministe- in a rawt a nih loh chuan MLA election hi sawn hnaih emaw sawn hlat a ni ngai lo a ni.

Facebooktwittergoogle_plusredditpinterestlinkedinmail

Flag hal vangin mi 7 man

Aizawl: India laka saltang chhuah tur nia insawi mi 7 te chu India hnam puanzar an hal avangin nimin zing dar 2 vel khan Sialsuk Police ten an man a, nimin vek khan Lunglei jail-ah dahluh nghal an ni.

Zalen-in Addl. SP, Lunglei hnen atanga thu a dawn danin Ningani (21.9.2017) kalta khan heng mi 7 te hian Lunglei Venglai traffic point bulah India flag leh vai pathian lim an hal a, hetia an chet chhan hi India laka Mizote saltanna chu China rallian hmangin chhan a ni dawn nia an ngaih vang a ni. Flag an hal tih Police ten an hriat veleh an umzui nghal a, nimin zing dar 2 khan an riahna Samlukhai atangin Sialsuk Police ten manin nimin vek khan Lunglei ah phurh nghal an ni.

Flag haltute
1. Lalrinawma (21) s/o R.Dinliana, Samlukhai
2. Lalhruaitluanga (18) s/o Lalzuithanga, Serchhip
3. Vanlalfela (21) s/o Lalhmingsanga, Bualpui V
4. Rodingliana (23) s/o Vanlalzama, Bualpui V
5. C.Lalrammuankima (23) s/o C.Lalthanzauva, Bualpui V
6. Zohmingmawia (22) s/o Vanlalsiama, Bualpui V
7. Lalruattluanga (29) s/o Zachungnunga, Samlukhai

Facebooktwittergoogle_plusredditpinterestlinkedinmail

Rul chuk hlum (?) la vui lo

Aizawl: Tunkar Nilaini (20.9.2017) a rulin a chuk Lalramdina (26) s/o Donchorai, Darlak khua chu a la thi lo nia a chhungten an hriat avangin nimin tlai thleng khan vui lovin la enkawl mek a ni.

Darlak atanga thudawn danin Lalramdina hi an feh haw Rulngan nia hriatin a chuk a, Mamit Hospital panpui nghal a ni a. Nimahsela kawng chanve vel an thlen pui laiin nikhua a hre lo tan a, Mamit Hospital an thlen meuh chuan doctor te’n an chhan hman ta lo va, rul chuk chu a thihpui niin an sawi. Mahse Lalramdina hi a thi lo nia hriain ramhmul damdawi hmanga rul chuk enkawl thiam chuan an enkawl a, nimin kha chuan a enkawltu chu a beidawng tawh a, mahse mi thenkhat ten a mar a la awm nia an hriat vangin he chanchin buatsaih lai thleng hi chuan vui a la ni lo.
Darlak khua hian Health sub-centre an nei a, mahse rul chuk enkawlna tur hmanrua a awm lo. Hei vang hian rul chuk emaw rannung seh an awm anih chuan an khua atanga enkawlna hmun hnai ber Mamit Hospital an pan mai a ngai a ni. Darlak YMA Secretary C. Lalthlamuana chuan an khaw sub-centre ah rul chuk leh rannung seh ang chi enkawlna turin an khaw sub-centre-in hmanrua a nei tha tawk lo niin a sawi a. Hei vang hian damdawi awm thatna hmun Mamit an panpui mai ta niin Zalen a hrilh.

Health Minister chuan rul chuk leh rannung seh avanga boral an awm thin chu a ngaimawh vangin tibo turin ta a la niin Health Department hotute chuan Zalen an hrilh a. Hemi titawp tur leh a rang thei ang bera thingtlang lam mite pawhin enkawlna an dawn theih nan Hospital zawng zawng bakah Primary Health Centre leh Sub-Centre zawng zawngah rul chuk leh rannung seh enkawlna tur hi dah vek a nih theih nan hmalak mek a ni a, hmun thenkhatah erawh harsatna avangin a la awm kim thei lo niin an sawi bawk.

Aizawl Civil Hospital casualty-a thawkte chuan rul chuk case chu a awm ve zeuh zeuh reng niin an sawi a. He hmuna doctor duty pakhat chuan rul chuk chu a rul azir te, a tur chak dan a zir te in enkawl dan chi hrang hrang a awm niin a sawi a. “Rul chuk avanga casualty rawn pan te chu an thisen enfiah turin thisen lakchhuah sak an ni a. Dam tha pangngai chu reilote ah an thisen a khang thin a, rul tur an hua a nih chuan a khang thei lo thin a, hetiang anih chuan an mamawh tawk tur anti-venom injection kan pe mai thin,” tiin a sawi a, inenkawlna rawn la vat te chuan an thihpui lo tlangpui niin a sawi. Hmanrua a awm chuan rul chuk hi tihdam leh enkawl dam theih a ni a. Sawrkar hmalakna kal zelah Hospital zawng zawng leh PHC te, health sub-centre-ah te he damdawi hi dah vek a ni dawn niin thuneituten an sawi bawk.

Facebooktwittergoogle_plusredditpinterestlinkedinmail

BPL tlahniam, 18 % BPL

Aizawl: Economics & Statistics Department in baseline survey hmanga mi rethei zat chhiarpui Below Poverty Line an neih ah Mizoram mihring zinga 18.31% chu BPL an ni a, hei hi a hma lama lo hman thin aiin nasa takin a tlahniam.
Mizoram sawrkar hnuaiah FCS&CA, Health, RD, UD&PA department te chuan BPL list hrang hrang an nei a, sawrkar department in list hrang hrang an nei hi a tha lova hriain Planning & Programme Implementation Department chuan state, district leh khaw hrang hranga BPL thlangtu committee a din a. Committee-in uluk taka an enfiah hnuah chhungkaw 5139 (18.31%) chu BPL turin an thlang ta a ni. Health Department chuan Economics & Statistics Department-in BPL list an siam thar hi nakkum atangin hman tan a ni dawn tih Zalen an hrilh a, tuna Health Care atan BPL list (RSBY) an neih mek pawh nasa takin a tlem dawn niin an sawi bawk.

Planning Secretary Dr. C.Vanlalramsanga chuan Mizoramah BPL survey hrim hrim tih a la ni lo nia sawiin, “Eng emaw thiltih dawnah sawrkar laipuiin BPL thlan tur zat te a rawn siam chawp thin a. Mahse a zat dik tak (actual figure) kan neih loh avangin sawrkar chuan a zat dik tak neih tha a ti a. Chuvangin, survey nei ngeiin kan thlang ta a ni,” a ti. Department hrang hrang ten tuna BPL list siamthar chu an ring dawn em tih Zalen zawhna chhangin, “Sawrkar thutlukna tur a ni a, keini chuan an ring turah kan ngai,” tiin kan palai a hrilh bawk.

Economics & Statistics Department thawktute hnen atanga Zalen thudawn danin khua/veng hrang hrangah hian Local/Village Council kaihhruaina in baseline survey hi neih a ni a. Khawpui ah chuan thla khata Rs. 2100 lalut tling lo leh thingtlangah chuan thla khata Rs. 1800 lalut tlinglo te chauh thlan an ni a. Heng bakah hian motor, computer, fridge, washing machine, dawr nghet leh leilet hmun nghet neite chu thlan an ni lo bawk. Survey hi nikum 2016 chhung khan neih a niin tunhnai khan an thil hmuhchhuah hi tarchhuah a ni a, a duh tan sawiselna hun hawn mek a ni. Economics & Statistics Department thawktute chuan tun tuma survey an neih chu a dik thawkhat hle turah an ngai tih sawiin tun hma lam chuan political party ten inthunna remchangah an hman thin avangin a dik tawk lo thin niin an sawi bawk.

Baseline survey atanga a lan danin a mihring cheng zat atanga chhutin Mamit district-ah BPL an tam ber a, Aizawl-ah an tlem ber thung.

Facebooktwittergoogle_plusredditpinterestlinkedinmail

Sele vanga compensation pe thei lo

Aizawl: Mizoram chhimlam Lungzarhtum leh a chhehvela bawng neitute chuan sele vanga an bawnghnute an sawr theihloh avangin sawrkarah zangnadawmna an dil a, mahse sawrkar lam chuan pek theih a ni lo tih an sawi.

Zalen palaiin a biakna ah PCCF Rosiama Vanchhawng chuan an dan hman mekah hetianga zangnadawmna inpek theih dan hi a awm lo nia sawiin DC lamah thlen chi ani zawk tih a sawi. Sele in mi a tihbuai leh a hlauhawm avangin hnawhbo dan a awm em tih zawhna chhangin PCCF chuan, “Hmalak a har a, DFO Lawngtlai leh LADC thuneitu ten lo ngaihtuah se kan ti a. A awmna hi Lai Autonomous District Council huamchhung a nih avangin an kuta awm deuh a nih avangin direct taka kan tih a rem lo a. Hmalak dan tur kan ngaihtuah zel ang,” a ti.

PCCF Rosiama Vanchhawng chuan Lungzarhtuma sele chu India ram hmun danga sele nen a inang lo niin a sawi a. “Mi thiamten a thlalak an han enchianin sele nen a danglam deuh a. Ramhnuaia hun rei tak lo awm tawh sial a ni thei mai em tiin mi thiam thenkhat chuan an ngai,” a ti bawk.

Lungzarhtum a sele hi bawng rual zingah a awm avangin leh khaw chhungah te a rawn luh thin avangin mipui an ralkhel thin hle a. Kawnga kal lirthei pawh tum hnih a bei tawh bawk. Sele hi bawngrual zingah hian awm reng lovin ni 4/5 te a rawl bo a, hemi hnu hian a rawn inlar leh thin niin an sawi.

Facebooktwittergoogle_plusredditpinterestlinkedinmail

Kuminah NCC-in hmalak tum

Aizawl: National Cadet Corps (NCC) chuan kumin chhungin Lungleia NCC Batallion din, NCC Academy Tuirial a din leh NCC Air Wing Tuirial a din tumin hma an la mek a, tihhlawhtlin ngei an beisei.

Zirtawpni kalta tlai khan India hmarchhak biala National Cadet Corps (NCC) hotulu ber, Maj. Gen. Raju Chauhan leh a thawhpuite chuan Chief Minister Lal Thanhawla chu a bangla-ah kawmin an hmalakna te an sawipui a. An inkawmnaah hian NCC hotupa, General Chauhan chuan hmarchhak bialah Mizo thalaiten NCC an phurpui ber nia sawiin, reilote ah an la hlawkpui ber a beisei thu leh Mizo thalai te chu duhsak an phu niin a sawi. General Chauhan chuan Mizoram District dangah leh ramri hrula thingtlang khaw lian deuhah te NCC hmalakpuiah Chief Minister chu ngenin NCC chu sipai tan tumte tan chauh a nih loh thu leh mi puitling zawka thalaite chherna hmanraw tha tak a nih thu a sawi a ni. NCC Air Wing a hman atan hian thlawhna pali a awm tawh a; thlawhna khalh dan zirna Flight Simulator pawh a dahna hmun remchang zawn mek a ni.

Facebooktwittergoogle_plusredditpinterestlinkedinmail

Damna chang an tam

Aizawl: UPC NE India Bawngkawn kohhrana Evan. Dr. Lalsawivela rawngbawlna atangin mi 901 in damna an chang tawh.

Evan. Dr. Lalsawivela hian August 22, 2017 atang khan Bawngkawn Brigade area-ah rawngbawlna a nei a, Zirtawpni September 22,2017 thleng khan chawplehchilha damna chang mi 901 an awm a, dam zel inbeisei 186 an awm bawk.

Damlo pantute hi chawhma dar 10-a sermon tan hmaa inziak tura tih an nih laiin zing dar 5 atanga chang an awm nual zel a, ni tin mi 40 vel a khawih hman laiin mi 200 chuang an inziak ni tin thin a ni.

Damna chang zingah hian heng hi an tel –
Tawngtheilo bengchhet – 60
Bengngawng – 277
Mitdel -3
Spinal cord chhia – 18
Nerve tha lo – 130
Cancer – 26
Stroke – 14
Sermon atanga dam – 26

Facebooktwittergoogle_plusredditpinterestlinkedinmail

FCS&CA-in buhfai thawn

Aizawl: Food, Civil Supplies & Consumer Affairs department chuan kawngchhia vanga buhfai harsatna hmunah te an thawn mek niin an sawi.

Zalen palaiin FCS&CA thawktute hnen atanga thu a dawn danin Ningani atang khan Tanhril FCI kudam atangin Mamit ta tur buhfai hi an thawn a, Zuangtui kudam atanga phur turin carrying contractor te pawh an ngen niin an sawi. Hei bakah Champhai lam pawh a theih ang angin an thawn nia sawiin tun dinhmunah chuan buhfai harsatna avanga mangang lutuk an awm an hriatloh thu sawiin duhkhawp awm lo mah se harsatna chu a ziaawm chho zel turah an ngai tih an sawi.

Facebooktwittergoogle_plusredditpinterestlinkedinmail

Ranvulh duat turin Zira’n ngen

Aizawl: Home Minister R. Lalzirliana chuan, “Ran vulhte uluk taka enkawl leh khawtlang tana hrisel zawk tur leh hnawksak lova vulh hi ran vulhtu te mawhphurhna a ni,” a ti.

Nimin Pachhunga University College basketball court-a MS Bajaj Motorcycle Dog Show a hawnnaah he thu hi sawiin Home Minister chuan Mizote chu ran vulh uar hnam kan ni tiin Dog show chu ui phochhuahna mai ni lovin ui vulh dan changkang, hrisel zawk leh khawtlang tana hnawksak lova ran vulh kawnga inkaihhruaina hun tha a ni, a ti a. “Ran vulhtuten kan rante mi dang tan hlauhawm an ni thei tih hriain uluk taka enkawl a, hri hlauhawm an pai lohna tura a hun taka chiutir thin tur a ni,” a ti bawk. Pu R. Lalzirliana chuan ran talh tur phurh khawm danah leh sawngbawl danah hrehawm lutuk tuar lo tura tih theih nise a duh thu a sawi a. Ran chunga nunrawng taka chet emaw sawisak te chu bansan a hun tawh thu leh dan hmanga hrem theih anih thu a sawi bawk a ni.

Home Minister chuan ran vulhtute chu rante an len chhuah puiin an ek thiarna tur keng tel tura chahin mahni ngaihnat zawng kan tihna kawngah mitmei inventawnsak leh thenawm khawveng zah thiam a pawimawh a ti a. Mi dang tana hnawksak nih hi mahni ‘rights’ sawi vunga midangte ‘rights’ palzutna a nih thu leh ‘rights’ hian ‘duty’ a keng tel zel a ni tih hriat a pawimawh thu a sawi bawk a ni.

MS Bajaj Dog Show-ah hian ui 70 telin breed 17 show a ni a. Category hrang hrangah inelna neih niin Category tinah lawmman pakhatna atanga parukna thleng siam a ni.

Facebooktwittergoogle_plusredditpinterestlinkedinmail

Chhiatna lakah inpeih a ngai -Larsap

Aizawl: Mizoram Larsap Lt. Gen. Nirbhay Sharma chuan, “Sik leh sa inthlak bakah khuarel chhiatna laka kan inpeih reng a ngai a ni,” a ti.

Sustainable Mountain Development Summit kharna hun Zirtawpni a Mizoram University-a neih a hmanpuinaah he thu hi sawiin Governor Lt. Gen. Nirbhay Sharma chuan SMDS VI thupui, ‘Climate Change and Sustainable Mountain Cities’ chu thil pawimawh tak leh khawvel pawhin a buaipui em em a ni, a ti a. Arctic leh Antarctica rama vurte chanchin tarlan a ni fo a, hetih laiin Himalaya tlangte erawh ngaihthah a ni thin nia sawiin khawvel mihring 30% chawmtu a nih angin, khawvel lum chho zelah hma lak vat a nih loh chuan kum 2035-a a tuiral hman vek tur thu a sawi a ni.

Lt. Gen. Nirbhay Sharma chuan Disaster Plan mumal tak leh disaster audit te neih tul a tih thu a sawi a. “Hmasawnna tlo nei tur chuan kan khawvel tichhe lo tawka leilung hausakna kan hman thiam a ngai a. Heng hmalaknate hi sawrkar tih atan bik dah lo ila, mipuite inlungrual taka kan tel ve a ngai a ni,” a ti bawk.

Khualzahawm Jitendra Chaudhury, MP Lok Sabha, Tripura East pawhin sik leh sa inthlak chungchang hi khawvelin a buaipui tanna hi kum 25 kalta vel chauh a ni, a ti a. “Sik leh sa chungchang hi mi thiamte zir bik tur a ni lo va, mi tin min nghawng avangin kan zirchian a, kan tanrual a pawimawh a ni,” a ti.

IMI President Alemtemshi Jamir, IAS (Retd.) leh Amita Prasad, IAS, Addl. Secretary, MoEFCC ten thu tawi sawina hun an hmang a. Uttarkhand atanga AVANI Team hnenah R.S. Tolia Award hlan a ni. Prof. Lalnuntluanga, Vice President, MSDF-in lawmthu sawiin he inkhawm hi a khar a ni.

Facebooktwittergoogle_plusredditpinterestlinkedinmail

Login

Lost your password?