Monthly Archives: October 2017

Zaipawl inelna sangah Mizo Cardinal Choir in Gold 3 la; Zaipawl bung tharah Mizo zaipawl

October ni 21-28 chhung khan Sri Lanka khawpui Colombo-ah zaipawl khawmpui lian Asia Pacific Choir Games and Grand Prix of Nations a awm a, Asia leh Pacific huap zaipawl intihsiakah Mizo Cardinal Choir te chuan lawmman sang ber Gold Diploma pahnih an dawng.
He zaipawl khawmpuia zaipawl intihsiakah hian category hrang hrang a awm a, October ni 26 khan Mizo Cardinal Choir te hi Vocal Ensemble category intihsiakah an tel a, chutah chuan Gold Diploma an dawng a ni.

October ni 27-ah khan category hrang hranga gold diploma dawng chinte chu an inel leh a, chutah pawh chuan Mizo zaipawl Mizo Cardinal Choir hian gold diploma an dawng leh.

Category hrang hranga a sang berte inelna ‘champions competition’-ah hian gold diploma an dawn bakah champions competition-a a tha falte chu October ni 27 zan khan an inel leh a, hei hi Grand Prix an tih chu a ni. A tawp zan October ni 28 zanah result puan a ni leh a, hetah hian Mizo Cardinal Choir te chuan gold dawng lehin, champion ah puan an ni. Zaipawl intihsiakna sangah a lo berah gold diploma pahnih Mizo Cardinal Choir te’n Mizoram an rawn thlen dawn tih a chian hnuah, ropui leh zualin Gold pathum an rawn hawn thei ta zawk anih chu.

Mizo Cardinal Choir te hian Colombo khawpuiah hian lawm an hlawh hle a, an telna category-a an intihsiak hma hian hmun hrang hrangah an lo zaitir tawh.

October ni 21 leh 22 zanah khan Sri Lanka prime minister chenna ina Gala Concert-ah an zai a, zan hmasa hi programme awm sa niin, a tuk zan programme-ah tel lo mah se an zai nawntir leh hial. Ni 24 khan Nelumpokuna Mahinda Rajapaksha Theatre-ah Frienship Concert-ah an zai leh bawk.

Zaipawl dang chu an telna tur category-a intihsiak a awm dawnah Colombo-ah hian an kal mai a, Mizo Cardinal Choir te pawh an tel tumna, October ni 26-a intihsiaka tel tura kal ve mai tur an nih laiin a huaihawttute’n a hmaa an zai tur thu hrilhin thleng hma turin an hrilh a, a awmzia pawh hre lovin thuawih takin an thawkchhuak ve ta mawp mai a ni. A huaihawttute hian youtube lamah Mizo Cardinal Choir zai an lo hmuhin thil danga zaitir an tum a lo ni a, an intihsiak hmain programme pawimawh pathumah an zai ta a ni.

Ram hrang hrang 17 atangin zaipawl 77 an tel a, chu’ng zinga a sang ber thleng thei Mizo Cardinal Choir zarah Mizoram zaipawlin zaipawl lamah bung thar a kai a, zaipawl lama tuite tan chanchin lawmawm a tling ang. Khawvel zaipawl larte pawh hetiang atanga hriat hlawh an ni fo a, Shillong Chamber Choir pawh hi khawvel huap intihsiaka gold diploma lo dawng tawh an ni.

Mizo Cardinal Choir hi Mizo zaipawl dangte nen an zai dan a dang daih tia sawi ngam a ni a, sap hla an sak phei chuan an hmel hmu lova ngaithlate tan sap zaipawl emaw tih tur an ni. Mizoram pawnah zai tura sawmna an hmu awl lo a, mahse professional an nih loh avangin, hna hrang hrang thawk an nih avangin an sawmna dawnte hi an tihlawhtling thei lo fo zawk. Aizawl veng hrang hranga mi an ni a, an tan hla zir leh zin a harsa thin chungin hmun hrang hrangah an zai tawh a, Mizoram pawnah pawh an lo zai tawh thin. Kohhran emaw pawl ngelnghet emaw ta an nih ve loh avangin harsatna pawh an tawk a, harsatna karah khawvel ram dang mit hmuhah Zofate an tihmingtha ta a ni.

Mizo Cardinal Choir member-te chuan an phu loh dinhmuna an din thu leh Pathian malsawmna liau liau a nih thu an sawi a, Mizoram nena sik leh sa lama inang lo zet mai Colombo khawpuiah harsatna an tawh thu, hritlang leh aw chhangin a tihbuai thu, tawngtai bak tih theih nei lova an awm thu te an sawi. An tana lo tawngtai thinte leh anmahni lo tantute chunga an lawm thu an sawi.

Facebooktwittergoogle_plusredditpinterestlinkedinmail

Exclusive interview : Avora records

Single video emaw, track emaw an la neih hmain vawi khat chu an performance ka hmu fuh tawh a, khatih lai khan rimawi chhepchher kimchang nen a ni lo hlauh a ‘Unplugged’ tia an sawi ang chi chauh kha a ni. Mahse, khati chung khan an vocalist vocal chord class dangdai tak mai te, an guitarist-in a rawn mawi danglam tak maia a rawn ‘twist’ vel te kha ngaihthlak an nuam a, instrument kimchang nena an zai ngaihthlak chaknain min khah tir a ni ber a. Khata tang khan band namai lo an nihzia ka lo hre tawh a, Mizo music industry-ah bung thar min kai tir ngei pawh rinna leh beiseinain ka khat a. An laka beiseina sang tak min neihtir chu an ti hlawhchham lo chiang kher mai. India rama ‘Battle of the Bands’ ngaihhlut hlawh leh lawmman pawh thatna ber zing a mi, India ram rock band 100 chuang fein intihsiak hmachhawn tuma an ‘demo’ an thehluhna, a tha zual chauh an thlan chhuah hnuah intihsiakna stage luahlum phak tura an thlan hnua — Sennheiser Top 50 Season 3 — a pakhatna ni a, India ram champion he band ropui, India rama Mizo te ti hmingthatu nena an band chanchin te, an tum ram te, an hlawhtlinna leh aw… an music style te sawia titina hun kan neih theih avangin kan lawm hle a ni. Hei le! THALAI KHAWVEL leh AVORA RECORDS chu…

aaaa

Q. Engtin nge Avora Records a lo pian dan? Engtika din nge? Band members?
Kum 2012 atang khan Mama leh Khos-a te thian dun chuan hla ziakin Mama studio-ah an record ve nawk nawk thin a. An thian hnai te an sawm belh ve zel bawk a. Kum 2013 nipui lai vel khan official takin Avora Records chu a lo ding ta a ni.
Member te chu Stephen Rualzakhuma Hnamte (Vocalist), Lalremruata Renthlei (Guitarist), Lalkhawsiama Hmar (Guitarist), H. Lalchhuankima (Bass), Lalsangzuala (Drums) leh Vanlalmuanpuia Ralte (Producer & Manager) te kan ni.

Q. Music play ho turin eng hian nge ‘inspire’ che u?
Kan naupan lai atang hian band neih hi chu kan dream a ni vekin ka hria — keini ho hi chu. Kan music duhzawng a in an loh changte pawh a awm ve thin a; mahse, kan inkawmngeih em avang hian kan in ‘man’ ni berin kan hria.

Q. Avora Records hi eng nge a awmzia?
‘Avora’ hi chu Vanlalmuanpuia pa, R. Lalrosanga (Marova) — February ni 14, 2008-a min boral san ta hriatreng na’n a hming chawia kan phuah a ni.
Pa Marova hming atanga ‘Avora’ alo pian chhuah dan hi chu chhiartute ngaihtuah zui atan kan dah mai ang!

Q. Music in play ho hmasak ber atangin engtiang chiahin nge in music a ‘evolve’?
Kan indin tirh kha chuan indie rock leh punk lam kan awn deuh a; mahse, competition te kan han play chhoh tak tak atang khan jazz leh pop rawngkai lam hi kan khawih hnem ta zawk.

Q. Band anga in ‘biggest challenge’ chu eng hi nge ni ang? Chu chona chu engtiang chiahin nge in hmachhawn?
Kan hriat vek angin Mizoram music industry hi a la lianlo ve em a. A bik takin band tan hian dinchhuah a harsa lehzual niin kan hria. Keini aia band thiam leh hmasa te paw’n an harsatna tawh lian ber chu band a kal zel na’na hlawkna hmuhchhuah hi a ni.
Tin, midang in an la play loh music thar chhawpchhuah kan tum avang hian, keimahni paw’n tan kan la nasa em em a ni. Khawvel a changkan ve zel angin Mizoram pawnah ‘opportunity’ pawh a tam chho ve zel a. Kan theih anga tam zin chhuah a hming chher ve zel kan tum a ni.

Q. Tu nge in hla te phuah? In hla tam zawk hian ‘theme’ emaw, ‘topics’ emaw, eng nge a tum ber? In lyrics te hi in tawnhriat (experience) behchhana remkhawm a ni em?
Band kan nih angin hla pakhat hi mimal phuah a tih tawp theihloh a. Kan zavai hian kan part theuh kan compose a, jam room-ah kan luhpui a, a tul angin kan insiam that sak leh thin. Hla tin hian awmze hran theuh an neih avangin theme leh topic khat umzui bik kan nei lemlo.

Aw, tawnhriat behchhana kan phuah anni tlangpui.

Q. Engtik lai pawhin music hi digital platform a nih tawh chuan zalen taka kal pawh phalsak (freely accessible) a ni thin. Hemi chungchangah eng nge in ngaihdan?
Independent artist kan la nih hrih avang hian, kan music te hi a free a ngaihthlak theiha a awm hi kan tan chuan harsatna a awm hrih lo. Artist te tan, kan art a free a chhawpchhuah reng hi kan support chuanglo a. Kan phu tawk ang lawmman hmuh let hi chu a ngai ngei ngei kan ti.

Q. Rock band tan tunlai electronic dance music (EDM) khawvela survive turin eng nge pawimawh ber nia in hriat?
Keini chuan eng genre pawh kan respect em em a. Music ngaihthlakloh bik em em kan nei hranlo. Eng music-ah pawh inzirna tur a awm vek tih hi kan hmuhdan a ni a. Survive tur chuan khawvel music ruala ‘evolve’ ve zel a ngai kan ti.

Q. Band music business-ah hian ‘internet’ hi eng nge in ngaihdan?
Internet hi publicity leh marketing atan a pawimawh kan ti em em a. Kan in nghahna ber a ni.

Q. Lyrics or music?
50/50

Q. In band hian khawi lam kawng nge in pan dawn? Hmingthanna leh hausakna in zawng em?
Kan theih tawp kan chhuah ang a, hmingthanna leh hausakna hi chu Pathian kutah kan dah.

Q. Engtin nge in music hi insawifiah?
Keimahni chuan kan music hi kan sawifiah thiam chiahlo a. Amaherawhchu, music critic kan tawn tawh te chuan Jazz-Pop Fusion band min ti thin.

Q. Eng competition-ah te nge in tel tawh? Eng-tikah?
MZU Vibrio Beat Contest 2017 leh Sennheiser Top 50 Season 3 ah te kan tel tawh a. Pathian zarah pakhatna kan ni ve ve a ni.

Q. Mizo live band platform bikah hian eng hi nge kan hmasawnna tur nia in hriat?
Mizoramah hian music tui tak tak kan tam a, kan tanrual a kan in support tawn a ngai em em a. Organiser leh band te pawh inhriatthiamna nena kan thawh ho hi a pawimawh.

Q. In hmalamah ruahmanna?
Tunah chuan album tihchhuah hi kan ngaih pawimawh ber a ni hrih.

Q. Any last words?
YouTube, Facebook leh Instagram ah ‘Avora Records’ tihin min rawn zawng tawp ula, kan inkawm dawn nia.

Facebooktwittergoogle_plusredditpinterestlinkedinmail

Feature : Kum 18 hnuai lam mutpui thiang lo

Kar kalta Nilaini mai khan Supreme Court chuan thutlukna siam tharin mipain a nupui kum 18 hnuai lam chu mutpui ta se, a nupui ngei ni mah se chu pa chu dan bawhchhia a ni.

Dan dinglaiah chuan innei an nih phawt chuan mipat hmeichhiatna hman hi a khuahkhirh lem lo a. Indian Penal Code Section 375-ah chuan kum 18 tling lo hmeichhia mutpui chu pawngsual niin innei an nih erawh chuan kum 15 a tlin tawh chuan pawngsual anga kaltir a ni lo ve thung.

Hei hi NGO pakhat Independent Thought chuan duh lovin court ah hian an pu lut a. An hnathawh zarah hian court sang ber Supreme Court chuan dan siamthain kar kalta khan thutlukna a siam ta rup mai. Supreme Court thutlukna hian India rama hmingthang em em naupang kumtlinglo inneihna (child marriage) a titlem tura ngaih a ni.

Aizawl Civil Hospital-a hmeichhe lam doctor Dr. Zosangpuii chuan kum 18 tling lova pasal neite hian nau an pai pawhin taksa leh rilru a la puitlin loh avangin an tan a tha lo niin a Zalen a hrilh a.

Dr. Zosangpuii chuan kum 18 tling lo nau paiah chuan nau chhiat theihna a sang a, thla kim lova nau hrin te, Hb hniam te a tam bik niin a sawi bawk.

Aizawl District Court-a advocate hnathawk mekte pawhin Zalen zawhna chhangin complain a awm chuan court sang berin thutlukna a siam chu an hmang nghal dawn niin an sawi a. He dan hnuaia complain duh tur chuan dan bawhchhiatna a thlen atanga kum 1 chhungin complain an thehlut thei dawn a ni.

Zichianna atanga thudawn danin India ramah tleirawl laia nau pai thihpui an tam em em mai a. Supreme Court thu tlukna hi India ram hmeichhiate himna atana hmalakna tha tak niin a lang.

Facebooktwittergoogle_plusredditpinterestlinkedinmail

2016 – nau piang 22497, thi 6422; Kum 10 chhunga nau piang tlem ber

Aizawl: Nikum 2016 chhung khan Mizoramah naupiang 22497 an awm a, mitthi 6422 an awm bawk a. Kum 2016 hi kum 10 kalta chhunga naupiang an tlem ber kum a ni.

Economics & Statistics Department in ‘Annual Report registration of Births & Deaths Mizoram, 2016’ an tih chhuah atanga a lan danin nikum chhunga nau piang 22497 zinga 8604 hi thingtlang (rural) a piang an niin a dang 13893 hi khawpui (urban) a piang an ni thung. Khawpuia piang an tam chhan hi damdawi in lian leh changtlung zawk pan nasat vang a ni. Kum 2016 hi kum 10 kalta 2007 atanga chhutin naupiang an tlem ber tum a ni a, naupiang zingah hian mipa tam zawkin 11456 chu mipa an ni a, hmeichhia 11041 an awm.

District 8 zingah Aizawl district chu nau piang tamna ber a ni a, nausen 9514 piangin Serchhip district-ah a tlem ber a, 772 an piang a ni. Aizawl district-a piang an tam chhan hi damdawi in a tam vang nia thudawn a ni. Kum 2016 chhung hian nausen thihna 285 a awm a, nau thi saa piang 122 awmin birth rate hi 20.50 (mi 1000 zela naupiang zat) a ni a, thihna rate hi 5.85 niin kumdang aiin nausen thihna hi nasa takin a tlahniam a ni. Nausen thihna (infant mortality rate) hi kum 2016 chhungin Mizoramah 285 awmin hei hi mi 1000 zela chhutin 12.66 a ni a, kum hmasa lam aiin nasa takin a tlahnim a ni. Nausen thihna (IMR) hi Saiha district ah sang berin nausen 1000 zela 26.04 chu an thi anga chhut a ni a, Aizawl district chu hniam berin 5.78 an thi anga chhut a ni.

Economics & Statistics Department thawktute chuan Mizoram pumah Registrars of Births & Deaths hi mi 832 an nei mek nia sawiin heng atanga data an lakkhawm te chu uluk taka an enfiah hnuah report hi an siam thin niin Zalen an hrilh a. An report siam chu a dik thawkhat hle turah an ngai nia sawiin Central a chhinchhiahnaah pawh Mizoram chu 100% report lut angin a chhinchhiah niin an sawi bawk.

Facebooktwittergoogle_plusredditpinterestlinkedinmail

Police lak tur 33% hmeichhe tan

Aizawl: Director General of Police, Thiang hlima Pachuau chuan police laknaah Ministry of Women & Child Development in State zawng zawng a lo ngen tawh tihhlawhtlin nan post ruak zaa 33 chu hmeichhe tan dah a nih thu Zalen a hrilh.

Thianghlima Pachuau, DGP chuan Mizoram Police-ah hmeichhia an la tlem hle tih sawiin hmeichhiate hi police-ah an mamawh hle niin a sawi a. Police lakthar turah pawh hian zaa 33 chu hmeichhe tan dah a nih dawn thu sawiin merit ah an ti tha anih phawt chuan zaa 33 aia tam pawh an tling thei a ni tiin Zalen a hrilh. Hetih lai hian he reservation hi unarmed ah chauh tih theih a ni dawn niin a sawi a, armed branch-ah hian hmeichhia laktheih a la nih loh avangin unarmed post bikah 33% chu hmeichhe tan dah a ni dawn niin a sawi.

MHIP President Saipuii chuan police laknaa hmeichhiate tana hmun ruak dah a ni chu lawmawm an tih thu a sawi a. “Sonia Gandhi lo zin te pawh khan a hranpaa hmeichhe battalion neih a nih theih nan kan lo ngen tawh a, tuna hmalakna pawh hi tha kan ti hle a ni,” tiin Zalen a hrilh.

Mizoram Police chuan tunah hian Police Constable post 425 (armed-350, un-armed-75) lakna a kalpui mek a. Tunah hian medical test leh physical test neih mek a ni a, heta tlingte hian written test leh personal interview an nei leh ang. Hmeichhe tana dah chu unarmed post 75-ah hian a ni ang a, post 24 vel tihna a ni dawn a ni.

Facebooktwittergoogle_plusredditpinterestlinkedinmail

Cancer sawiho

Aizawl: Nimin khan Hotel Regency Conference Hall-ah ni hnih awh Cancer natna chungchang inrawnkhawmna leh sawihona 12th Annual Conference of the Association of Radiation Oncologists of India, North East Chapter neih a ni.

Khawmpui hmanpuitu Health Minister Lal Thanzara chuan, “Cancer natna enkawl leh zirchianna ah hma kan sawn viau chung hian cancer dona kawngah kan hmabak a la ko hle a, kan taksa hrisel leh fimkhur zawka kan vawn hian natna dona kawngah min pui thei a. Tun hma ngaihtuah chuan cancer natna thlen dan leh enkawlna chungchangah mipui pawh kan bengvar tawh zawk a ni,” a ti. Minister chuan Mizoram State Cancer Institute chu sawrkar laipui tanpuinain khum 100 awm theihna tur Comprehensive Cancer Care Centre-ah hlankai tum mek a nih thu leh khawl thar Linear Accelerator (LINAC) leh CT Scanner lei tum anih thu a sawi bawk.

He hunah hian ram pum huapin cancer doctor thiamte an tel bawk a ni.

Facebooktwittergoogle_plusredditpinterestlinkedinmail

Dan loa lut duh lohna lantir

Aizawl: Nimin khan New Delhi-a Vasant Vihar-ah Delhi Mizo Zirlai Pawl (DMZP) huaihawtin India ram chhunga dan loa lo pemluh duh lohna ‘Demonstration Against Illegal Immigration in India’ hman a ni a, mi 500 chuang an pungkhawm.

DMZP huaihawtah hian resolution siam niin Central leh State sorkar chu dan lova pem lutte zirchiang tur team siam tur leh he team hian dan lova pemluhna thlen chhan te, a nghawng te zirchiangin a chinfel dan pawh ngun taka an zirchian chuan nasa takin dan lova pem luh tihtawpna kawngah kawngro a sut tur thu tarlan a ni.

State sorkar tin te chu State, District, Sub-Division leh village level ah ram mi chhinchhiahna felfai taka vawng tur te, BSF bakah Central sorkar chu ramria check post leh watch tower vengtute awmna tur siam tura an phut thu an tarlang bawk a. Eng hnam mah do bik an nei lo tih sawiin hetih rual hian ramri a dan anga lo awm tawh hnam hrang hrangte chu tangrual tura an duh thu resolution chuan a tarlang bawk.

Delhi MZP President Lalhminghlua chuan hun tluang taka an hman theih thu Zalen a hrilh a, thusawitute pawhin thu an sawi that thu leh mi 500 chuang an kalkhawm thu a sawi bawk a, Ronald Sapa Tlau (MP), Vanlalruata (CYMA President), RB Lalmalsawma (MSU president), Prof Joy Pachuau (JNU) te bakah Supreme Court leh Arunachal Pradesh atanga zirlai hruaituten thu an sawi bawk.

Facebooktwittergoogle_plusredditpinterestlinkedinmail

Tlan loh nia tlan lirthei 684 man tawh : Traffic

Aizawl: Coordination Committee on Traffic Management-in October 2017 atanga lirthei intlanchhawk tura ruahmanna an siam hnuah mahni tlanchhuahloh nia tlan lirthei 684 man a ni tawh.

Traffic hotute hnen atanga Zalen thudawn danin dan bawhchhe zingah hian two wheeler an tam ber a, heng dan bawhchhiate hi pawisa chawitirin an hawtir leh thin niin an sawi. Lirthei intlanchhawk chu awmzia nei nia sawiin Traffic thawktute chuan, “Traffic jam chu la awm tho mah se ni dang angin a jam nghet lo va, ni dangah chuan darkar 2-te a jam thin a; mahse, tunah chuan nasa takin a ziaawm a ni,” an ti.

Traffic thawktute chuan intlanchhawkin a huam ve loh dak sem, damdawi in thawk leh eng emaw pawimawh zual bikte chu an hrethiam thin niin an sawi bawk.

Coordination Committee on Traffic Management hi an chairman Home Minister R.Lalzirliana hovin Chief Secretary Conference hall-ah thukhawm chuan ni motor number 1-a tawp te chu ni 31 a awmin an din ngai lo turin thu a titlu bawk a ni.

Facebooktwittergoogle_plusredditpinterestlinkedinmail

AMRUT hnuaiah tuilakna thlak tum

Aizawl: Atal Mission for Rejuvenation and Urban Transformation (AMRUT) hnuaiah Aizawl tui lakna Greater Aizawl Water Supply Scheme Phase I, November 1988 atanga hman tan tawh chu a thlak vek tum a ni a. Filter house pawh siam that a, duty room leh WT room zawng zawng a thara sak that vek bakah nitina tui pump thin pawh litre nuai 80 velah tih chhoh tum a ni.
AMRUT hnuaiah vek hian Aizawl khawpuia tuihawk luankawr mumal lo siam thatna atan vaibelchhe 57 ruahman a ni a, tunah hian nuai 238.9 man thawh zawh tawh a ni a, a bak hi pawisa thlen leh huna thawh zawm tura ruahmansa a ni bawk.

Thudawn danin AMRUT in a tum ber chu khawpui a cheng mipuiten tui thianghlim an neih bakah ek leh thli te thianghlim taka sawngbawl a, tuihawk luankawr tha neih, boruak thianghlim neih, mipui veivahna him leh tha siam te a ni. AMRUT hnuaiah hian Septic Tank tha tawk lo leh soak pit mumal loh vanga rimchhia tihreh tuma hmalak a niin DRDO Scientist te hmuh chhuah Bio Digester Technology chu hman tangkai thuai tum a ni bawk.

Facebooktwittergoogle_plusredditpinterestlinkedinmail

Gas harsatnain zia lam pan beisei

Aizawl: Food, Civil Supply & Consumer Affairs hotute chuan tunlai gas harsatna chu a ziaawm thuai an beisei tih an sawi.

Zalen palaiin a biaknaah FCS&CA hotute chuan tuna harsatna thleng chu IOC lamin October thla tira harsatna an tawh zawk avang leh a hnua puja chawlhin a chhunzawm vang a ni tih an sawi a. Tunah chuan a ni telin gas lo thleng chu a ziaawm tawh nia sawiin hun reilo teah a ziaawm turah an ngai tih an sawi bawk. Mi thenkhatten gas phurhman a tlawm vanga a phurtu truck-te an tlan tha duhlo nia an sawi chungchangah FCS&CA hotute chuan Mualkhang atanga phur chhuakah harsatna tlem chu a awm nia sawiin, hei hi tuna harsatna chhan erawh a ni lo niin an sawi. Gas hi Ningani leh Zirtawpni pawh khan bur 3000 chuang ve ve a lo thleng tih an sawi bawk.

Tun dinhmunah Mizoram pumah gas agent 41 an awm mek a, hengte hi RGGLV 16 leh agent pangngai 25 te an ni.

Facebooktwittergoogle_plusredditpinterestlinkedinmail

Login

Lost your password?