Doctor Ka Zawhna

Zawhna: Ka pu, tleirawl kum 17 mi ka ni a, ka hmai hi sin tetein a bawl reng zel a, a reh tih hi a awm ngai lo. Chuan ka hnung pawh hi lian deuh deuhin a bawl reng bawk a , a na thei em em bawk si. Khawngaih takin ka damdawi tur min hrilh thei ang em le? Min puih theih chuan ka lawm ngawt ang.

Chhanna: I han sawi hmang atang chuan hmaibawl/arngeng ‘Acne’ (Pimples) an tih ang chi hi i nei a nih hmel viau. Heng ang bawl hi taksa dangah pawh a awm fo a, a bikin hnungzangah, banbul leh darah te a awm duh zual. Acne chu eng vanga awm ber nge? Kan vun timawmtu tuihnang/thlan (sebum) hi a siamtu Gland tam tak chu vunah hian a awm a. A rawn chhuahna tur hi kaw tereuh tete (pores) a awm bawk a. Chung pores-te chu thlan a tam lutuk hian a lo inhnawhping thin a, a chhungah hrik (a bikin bacteria) a lo awm hman chuan chhuak thei si lovin a tang a, a inthlahpung a, chu chuan vung a rawn siam a, hmaibawl kan tih ang chu a rawn thlen ta thin a ni.

Tleirawl hunlai hian taksaah hormones chi khat Androgens hi a rawn tam ta thin a, he hormones hian kan vun a thlan siamtu glands-te tithangin thlan a rawn insiam tam ta vak thin a. Hmai enkawl fai tawk loh emaw, thlan ngah hrim hrim vang te pawhin kan sawi Acne hi a rawn thlen awlsam ta bik thin a ni. Tleirawl zawng zawngin an nei vek kher lo va, a vannei zual chu hmaibawl nei mang miah lova awm te pawh an awm ve fo tho. A vanduai zual chu heng Acne-te hi a pung hluai a, hmuh hrehawm khawpin a rawn tam thei thung. A nasa zual deuhah phei chuan blackheads an tih mai, a bul dum lai a insiam a, hmai a timawi lo zual hle thei bawk.

A awm tawh laklawh chuan tihreh mai a har viau thin a. Tin, hmeichhiaah phei chuan hormones buai vangin a awm fo thin; a bikin chibawm fel lo Polycystic Ovaries vangtein a awm nasa zual thei bawk. Chuvang chuan a chhan hriat nan Ultrasound tihte pawh a tul thin. Engpawhnise, a la nei lo emaw nei tawh buaipui viaute tan a hnuaia tihdan tur kan tarlan te hi zawm theih nise, arngeng lakah emaw a awm tawh tan pawh a zual loh nan leh enkawl dam a awl nan a tangkai thei ang.

Pakhatnaah chuan hmai enkawl fai leh uluk a pawimawh hle. Ni khatah vawi hnih tal phih fai ni se; mahse, hmai phih ngun lutuk hi a tha lo thei a, chu bakah chuan sahbawn hman fimkhur a tha, phuan duh lutuk ang chi te hi hmai tan a him lo va, facewash pangngai deuhte hman ni zawk se. Hmai phih hian kut hmawrin dim taka phih tur a ni a, nawhfe ang chi reng reng hman loh a tha. Phih zawhah Ser (Limbu) tui a han chul thuakte pawh a tangkai fo. Phih zawhah hian towel-a hruk ro loh tur a ni a, deh ro zawk tur ani. Tin, towel pawh hman hnu chu hman nawn loh ni thei se. A dang lehah chuan sam/lu suk dan a pawimawh leh bawk. Lu phut nasa hian hmaibawl an nei duh khawp a, chutiang a nih kher loh pawhin lusukna tui thli hi hmai chiahtir loh a tha khawp.

Hmai phih zawhah hian moisturizer hman ni thei se, hmai ro lutuk a dah hi a him lo va, chutiang laka ven nan chuan moisturizer mawm lutuk chi lo deuh eng emaw tal hman nise a tha hle bawk. Makeup hman kawngah a tlem thei ang hman a tha hle; a bik takin Oil-Free makeup lam chi hman theih nise. Hmai cream hman ah hian sun protection (UV rays laka ven nan) awm tel hman theih a tha hle. Nisa hnuaia chhuah a tul fo phei chuan SPF sang lam (>30) awm tel hman hi duhthusam ani bawk. Hnungzangah pawh hetiang cream hi hman tel a tha viau.

Ei leh in chungchang pawh fimkhur tel a tha. Mawm lutuk, thlum lutuk lam chi chu insum theih nise. Thei leh thlai hring ei tam a tangkai viau. A dang lehah chuan taksa emaw rilru hah (Stress) hian a siam belhchhah duh viau mai a, zan men rei te a haw viau bawk. Taksa tih hahchawlh thiam a pawimawh a, mut tam te a tangkai hle a ni. A enkawlna damdawi turah chuan doctor-in hmaichhanah a en che a nih loh chuan inchawh loh a tha ber. Hmelhriat tu emawin a ngeih ang kha hman ve ngawt loh bawk tur, kan in ng lo. Chuvangin skin doctor lo in entir ve hrim hrim la, i hmai/hnung bawl dan te chu an lo enchiang anga, antibiotic ei tel a ngai em tih te an enchiang anga, i harsatna hi an puih theih ngei che ka beisei.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?