Isua pian hma kum zanga velah khan Chinese mifing pakhat Confucius-a chuan, “Sorkar tha takin a hruaina hnuaiah chuan retheih hi thil zahthlak tak a ni a. Chutihlaiin, sorkar tha lo tak hnuaiah chuan hausak hi thil zahthlak a ni thung,” tiin a lo sawi a. Sorkar tha tak a awm chuan mitin tan hamthatna leh hausakna kawng a inhawng a, rethei taka awm bik a zahthlak zawk a. Sorkar tha lo hnuaiah chuan mipui zawkte dinhmun a chhiat avang leh mi tam berte an retheih avangin hausa bik nih a zahthlak, a chhan chu inrelbawlna (Governance) a that loh avangin hlemhletna a hluar a, mi hausa fal bikte pawh kut tling lo a sum la lut an ni chawk.

Tuna kan ram dinhmunah hian Confucius-a thusawi hi darthlalangah hmang ta ila, kan zinga mi hausate hausak dan hi a zahpuiawm nge a chhuanawm zawk? Mipui chanai eiru thin te, hlep ruk ching te, thamna la thin te, kut tling lo a sum la lut thinte chungah hremna lek a nih ngai loh chuan sorkar inrelbawlna chhe tak kan nei tihna a ni ngei ang.

Governance tha lo avanga kan tawrhna te, mimal leh hnam pum anga harsatna kan tawh phah nasat zia te hi kan chhut ngai lem lo maithei. Kan kawngpui chhiat chhan te, mirethei leh harsate an beh reng chhan te hi a bulah chuan governance chhiat vang a ni; dan bawhchhiatna hluar em em mai te, hlemhletna leh eirukna tai darh nasa em em mai te, sorkar sum enkawl (mipui sum) ruahman dan ang lo hman leh pelhe tam lutuk te, mipui vantlang nun him ta lo lutuk te hi inrelbawlna tha lo hrin chhuah a ni fo. Good governance hi kan ram hmasawnna atan leh kan hnam din chhuahna atan a pawimawh tak zet tih hi phat rual a ni lo.

Enge Good Governance chu ni ta ang? Dan mit atanga thlir chuan dikna tundin hi good governance bulpui chu a ni mai a, mi dikten an dikna chanvo an chang tur a ni a, mi dik lo chu eng ang dinhmuna ding pawh nise a phu tawka hrem tur a ni ang. Humhalh leh venhim ngai an awm chuan venhim tur an ni a, hnehchhiahna laka chhanchhuah ngai an awm chuan chhanchhuah tur an ni. Rethei zawkte khaichhuah a, eizawnna tha siamsak hi sorkar tha chuan a tum ber pakhat a ni a. Khua leh tuiten hamthatna leh chanvo hrang hrang an chan tur ang ang te an chang tur a ni a, induhsak bikna leh inthliarna a awm tur a ni lo ang.

Kawng danga sawi chuan inrelbawlna tha (Good governance) chu sorkar leh mipui inkungkaihna tha tak siam hi a ni a. Ram hruaitute leh sorkar hnathawk leh politician bawr vel chauh an thawhho a, anni bawr vel chauh an inkungkaih that chuan mipui an ngaihsak lo duh viau thin. Chuvangin, Good Governance chu sorkar (ram hruaitute leh sorkar hnathawkte) leh mipui thawhhona tha leh an inkungkaihna tha hi a ni.

Kum zabi liam ta (20-na) tawp dawn lamah khan khawvel politics kalphung a inthlak danglam nasa a, USSR leh USA te inepna na tak mai (‘cold war’ an tih) pawh a nep tial tial a, thilsiam chhuahna lam leh sumdawnna lamah hmasawnna a lo thleng a, ram hrang hrangten chu hmasawnna zar chu an zo a, sorkar hrang hrangte thawhhona/ inkungkaihna a tha tial tial bawk a. Chutiang karah chuan ram rethei zualho, a bikin Africa khawmualpuia ram thenkhat, sorkar inrelbawlna chhe lutuk vanga hmasawn hleithei lote buaipui dan tur World Bank-in a ngaihtuah ta a. Ram rethei leh hmasawnna kawnga hnufum ber berte hian an mamawh ber pakhat chu sorkar inrelbawlna tha, kalphung thar a ni tih ngaihdan a lo piang ta a. Chuta tang chuan ‘Good Governance’ hi a lo lar zui ta a ni. A bikin ram thanglaiten an hmasawnna beihpui thlakna hmanrua atan an hmang a, mithiamten an chawilar a, mipui tuipui zawng tak a lo ni bawk a, a lo darh zau ta zel a ni. Ram rethei zawk, harsatna chi hrang hrang tawk mek te, hlemhletna vanga tuar nasa tak te, politics buai vanga kal fuh hlei thei lote khai chhuahna tura hmanraw tha bera ngaih a ni a.

Good Governance ziarang langsar tak pakhat chu mawhphurh ngamna (Accountability) hi a ni a, thuneituten an tih dik lohah mawh an phur ngam tur a ni a, a tul chuan an insiam tha ngam tur a ni. Kawng chhiat chhan te, ei rawngbawlna gas harsat chhan te, tui leh electric supply that loh chhan te, zu leh ruihhlo vanga tawrhna leh thihna thleng tam lutuk te, eiruk hluar em em chhan te hi mipui emaw thil dang emaw puh ngawt loin ram hruai tura inpe ngamte (ram hruaitute) hian an mawhphurhnaah an inbel ngam tur a ni a. Hma an la mai tur a ni. Chutiang bawkin, langtlang sorkar (transparency) hi sorkar tha zia langsar tak a ni a. Puan hnuai thil a tam lutuk chuan thil a fel thei lo, 2005 a Right to Information Act hman a ni tak atang phei hi chuan mipui hian sorkar hmalakna hriat ve zel hi mipui chanvo (right) a ni tawh.

Mipui mamawh phuhru tura hmalak (Responsiveness) te, thlei bik awm lo a mitin huapa hmalakna (Equity & Inclusiveness) te, awmze nei leh tangkai taka hmalak (Effectiveness) te hi good governance ze pui pawimawh tak tak an ni a. Entirnan, Aizawl khawpuia bawlhhlawh paih dan tihdanglam vanga mipuiin harsatna an tawh te, sa man tihsan ngawt te, cable/digital TV bill an tisang uchuak te, dawrkaiten thil/bungraw man an chhiar to lutuk te hi thuneituten thlir liam mai mai loin awmze nei takin mipui tan hma an la tur a ni ang. Inrelbawlna tha (Good Governance) hnuaiah chuan dan a lal em em a, dan chunga leng an awm lo a, dan siamtute leh a lekkawhtute pawhin an bawhchhe ngawt tur a ni bik lo. Dan palzut leh bawhchhia chu eng anga lal pawhnise hrem mai tur a ni. Dan hmanga rorelna, dan lalna (Rule of law) hi kan mamawh khawp mai.

Good Governance chungchang sawi hian mi tam tak chuan duhthusam thil ang deuhah an ngai thin; mahse, kan ban phak leka hnaiah a awm si. Ram changkangho chauhin an neih tur bik a ni lo a, ram retheite hian an mamawh hlei hlei zawk. Kan ram hi siamthat kan duh tak tak a, hmasawnna leh hnam himna kalkawptir kan duh tak tak a, retheite lei rem rahtir a, dikna tun din te, hlemhletna tihreh te hi kan duh tak tak a nih chuan ram hruaitute hian huaisen takin hma an la mai tur a ni. MLA inthlan kan hmachhawn mek lai hian inrelbawlna tha te, kan hnam himna te leh hmasawnna him leh tlo min pe thei tur an awm hlauh a nih chuan bawh huk chi a ni ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?