Aizawl bawlhhlawh Sawngbawlna

C. Dorema
Khasi Veng, Kulikawn

Hriselna tha kan neihna tur hian kan chenna leh keimahni ngei pawh kan fai leh thianghlim hi a pawimawh em em a, ram changkang apiang hi an fai emaw tih turin hetiang lamah hian tan an la thin a ni. Kum1994-a India rama hripui (plague) nasa tak leng intanna nia sawi Surat (Gujarat) khawpui kha, bawlhhlawh tawp an ngah lutuk vanga leng ni a hriat a ni a, tunah erawh chuan, Surat khawpui chu India rama khaw fai leh thianghlim ber tehnaah 5-na hial a lo ni ta a ni. Singapore khawpuite phei chu kum 1970 chho daih atang tawhin namen lovin an lo thianghlim tawh a, chung avang chuan khawtlang hriselna tehna pawimawh em em Infant Mortality Rate (IMR) leh Life expectancy lamah pawh khawvela hrisel leh dinhmun tha ber an lo ni thin a ni.

Aizawl khawpui bawlhhlawh chungchangah hian North-East khawpui tihchangkanna tura Govt. of India hmalakna, North Eastern Region Capital Cities Development Implementation Program (NERCCDIP) hnuaiah SIPMIU, Aizawl-in a thawh tur zingah chu lam chu ruahman tel a lo ni ta a.Chu hmalakna chu Solid Waste Resource Management an ti a, Mizo tawng chuan bawlhhlawh lakkhawma hman tangkai leh a bak mumal taka thehthang tihna a ni ber awm e. Chumi atan chuan ruahmanna lian tham tak siam a ni a. Hemi chungchangah hian enchhinna (Pilot project) thla ruk chhung zet chu Aizawl veng panga (5) – Laipuitlang, College Veng, Chawnpui, Nursery Veng leh Kanan Veng )-ah te hian Local Council theuhte nen tanghovin 2015-16 chhung khan neih a ni tawh a. Chu enchhinna hnaah chuan chhungkaw tin hnenah bawlhhlawh bawm chi hnih (2) pein bawlhhlawh tawih thei (Bio-degradable) leh tawih thei lo (Non-biodegradable) te thliar a, dah hrang tura hriattir leh zirtir an ni a. Chung bawlhhlawh chi hnih – a hranga dah chu motor hran ve vea phur chhuakin an dahna tur ruahmansak an ni a.

1. Bawlhhlawh tawih thei lo chu Tuirial kama dahna tur (dumping ground)-ah chhunkhawmna an buatsaih (resource centre)-ah daha thliar hran (segregated) a ni a. Chutianga bawlhhlawh thliar hran thil chi hrang hrang: lehkha, polythene, darthlalang keh nawi & plastic bottles, plastic nawi, thir, dar, etc. te chu a hmunah a lei duhtute hnenah hralh chhuah a ni a, chutiang chuan bawlhhlawh atangin sum siam theih ang ang siamin thehthang fel a ni. Tin, a bang la awmte chu sanitary landfill-ah chhung khawmin leivung nen chawhpawlha chil muk thin tur a ni a.

2. Bawlhhlawh tawih thei chu Lengpuia vermi compost (Changpat-ek-leitha) siamtu M/s Vermizo Society nen inbe remin an farm-ah bawlhhlawh tawih thei awm ang ang chu chhuntir an ni a, chung chu Changpat-ek-leith siamnaa a raw material-ah an lo hmang tangkai ta vek mai a ni.

Hetianga bawlhhlawh thliara lo dah hrang thei tur hian chhungkaw tin inzirtir leh thiamtir hna erawh hi chu a hautak deuh a nih pawhin kan tihhlawhtlin ngei a tul dawn a, chutiang atana kan inzirna turin SIPMIU-in bawlhhlawh bawm chi hnih – a tawih thei leh tawih thei lo dah hranna tur chhungkaw tina hman turin a sem tawh a nih kha.

Tunah hian Aizawl veng 83-ah hian hetianga kan bawlhhlawh tawih thei lo zawng zawng sawngbawlna tur resource centre leh sanitary landfill buatsaih a ni a; Resource Centre-ah hian bawlhlawh tawih thei lo chu a theih anga thliar hrangin a hralh chhuah theih zawng hralh chhuakin a bak chu Sanitary Landfill-ah hian dah fel a ni tawh dawn a ni. Tin, Sanitary Landfill hi henglaia kan la hmuh ngai loh leh mi thenkhat chuan a hming pawh kan la lam ngai loh a nih theih avangin chiangkuang deuha kan hriat thiam thaa hriatna avangin tawitein lo sawi dawn ila: Bawlhhlawh awm khawm hian hmun a luahin a rim a chhia a, hmun a titawp a ni mai lo va, bawlhhlawh awm khawm atang hian natna hrik leh mihring hriselna titha lo thei thil dang tam tak a lo insiam theih avangin ram changkangah chuan a thehthang dan tha neih hi an ngai pawimawh em em thin. Chuvang chuan khua a lo thang lian zel a, kan bawlhhlawh a lo pun zel hian a thehthang dan tur fel tak neih a ngai a. Chutiang chu chenna in hnaiah a dah tur a ni lo va, heng hmun atanga natna hri leh boruak tha lovin mite hriselna a tihchhiat lohna turin hmun fianrialah ngei dah tur a ni. Chutianga bawlhhlawh thehthangna chu tuna Sanitary Landfill kan tih chu a ni. Tunah hian AMC-in bawlhhlawh paih khawmna atana a hman mek leh a sira ram lei belhah hian Sanitary Landfill buatsaih a ni a. Tin, bawlhhlawh hralh chhuah bak sanitary landfill-a chhun khawmna tur hmun pawh hi uluk taka buatsaih tur a ni a. Bawlhhlawh tlingkhawm atanga a tui fir insiam (Leachate) hi thil hrisel lo (toxic) a nih avangin kan environment leh lei a tihchhiat theih avangin lei chhungrila a luh zel theih loh nana dangtu tur polythene phah tur a ni a; tin, luan khawmtira dawh khawm theihna turin a luanna (drain) fel tak pawh siam vek a ngai bawk. Tin, heng bawlhhlawh chhun khawmna hi kum 5 dan zela a thar buatsaih tura ruahman a ni. Chutiang chuan tuna Project hi kum 25 chhung hman a ni dawn a ni. Tichuan, leachate tling khawm chu uluk taka enkawl hnuah a thehthang dan tur dik takin thehthang thin tur a ni ang. He project hna kal lai ang hi kan la neih ngai loh thil a ni a, uluk tak leh fimkhur takin kalpui mek niin kum 2018 chhung hi chuan hman theiha peih ngei beisei a ni.

Hetianga kan khawpui then thianghlim a lo nih huna kan luikawr leh kan dai hnai luite a lo thianghlim lehna tur ringawt pawh hi a nghahhlelhawm hle mai. Kan dai hnai kawr leh luite a lo thianghlim leh chuan kan tu leh fate nen pawh chhungkaw intihhlimna hmun berah neih kan duh mai awm asin! PHED khan thingtlang khaw fai inelna (Nirmal gram Purashkar)-ah khan zirtirna leh recommend-na kha a kalpui thin a, khang khuate kha Govt. of India atanga rawn endikin a titha khuate kha lawmman pawisain an pe thin a, khatianga khaw fai lawmman dawng thingtlang khua 86 emaw lai kan nei tawh a nih kha. Khatiang inelna leh lawmman siam kha a hlawk khawp mai. Khatianga hma lak a nih khan malaria natna lam thlengin kan sawtpui nia hriat a ni. Khawpui fai, thianghlim leh hrisel inelna turin Swachh Survekshan 2017 buatsaih a lo ni leh ta a, hemi kawngah hian tlangram kan nih avangin kan hmun leh hmaite hian remchanna tak pawh a nei a, khawtlang leh ram tana inphal leh tlawmngaihna nena thil ti thin kan nihnate hi hetiang thilah hian a tan lakna kawngah kan sawtpui ngei ang. Aizawl hi India ramah hi chuan khawpui fai ber leh thianghlim ber ni tur pawhin kan lehkhathiamna leh changkanna hian a tlin hle ang tih hi ngaihtuah theih tak a ni. Chutianga rilru nen chuan kan chenna khua leh veng theuh hi buatsaih ila a va duhawm em ! Tuna Aizawla SIPMIU hmalaknaah hian mi tinin mahni inchhungah bawlhhlawh tawih thei leh tawih thei lo thliar hi tihtakzeta zirin kan tu leh fate leh kan awmpuite zawng zawng zirtirin kawhhmuh ila, chu chauh chu mipui lam mawhphurhna a ni a; a bak chu SIPMIU mawhphurhna a ni ang a; mipui hriselna pawh nasa takin a lo kang chho mai tawh dawn nia.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?