Aizawl Smart City leh Assam Rifles

– Zosangliana (Zotea)

Kan chenna ram, “Kan Zotlang ram nuam hi chhawrpial rûn i iang e” tia kan awih khawpui ber Aizawl khawpui chêp lutuk vanga motor leh kea kal pawh kan kal hleihtheih lohna chu. Vanneihthlak takin India ram khawpui Smart City a cheitur zingah telh tur ani hi a lawmawm ngawt mai. Engang chiahinnge a ruahman tute hian an duan dawn ka hre ve lo va.

Aizawl khawtleng zauh belh danturte chu awm tursaah lo ngai ta ila. Aizawl khawpui laili a Assam Rifles la awm tlat te hi engtinnge kan tih dawn? tihte hi ka lo engto ve hle a ni.

Mizoram State puitling kan nih ni, 20th February, 1987-a Chief Minister nihna chelhtu Pu Laldenga khan Aizawl hmun laili a Assam Rifles awm chu indona pawh lo chhuak se Sipai Civil chenna laili a an inkhuar tlat chu fel theiin a hre lo va. Chhan dang tam takte avangin Aizawl khawpui daifem, Râlvenbûk atana thazet mai Zokhawsang (Zemabawk ramah) sawn chhuah nise tiin hma a la ta a. Chutia Zokhawsang ram Assam Rifles te Râlvenbûk atana hman alo nihdawn tak avang chuan Zokhawsanga ram neitute hnenah zângnadawmna (Compensation) pawh cheng nuai tam tak sen a ni. Assam Rifles Commandant leh Aizawl Deputy Commissioner Pu Dengchhuana ten ram inthlengna chu an ziak fel ta bawk a ni.

Aizawl Sipai Lammual pawh chu chei thain, Lammual sir tawn mipui thutna tur dawhsan (Gallery) te pawh siam ani ta a. Khatih hunlai kha chuan rualawh a phuhru ve hle a ni. He dawhsan siamtu hi Pu Liantlinga, Aizawl lal Pu Hrawva fapa a ni nghe nghe a ni. Kan football khelh ve lai 1980 bawr vel kha chuan kan ‘Chhass’ ve tleirawl malmum ve tak takte khan inkhel enturin khelmual hmun rem laiah Hmar Arsi, Romei, Tawrbawm chanchinbute kha thutphah atan an humlut thin kha a ni a. ‘Gallery’ kan neita kha chu kan lawmtlang hlein ka hria.

BEISEINA ATANGA BEIDAWNNA: Pu Laldenga sawrkar kha kum khat leh a chanve chauh a ding si a. Kum 1989-ah Pu Lalthanhawla sawrkar a rawn dingta thunga. An sawkar tirh chuan Assam Rifles te sawn chhuah ngei annih tur thu leh theihtawp a chhuah dawn tia vantlang hma a a thusawite chuan thla a timuang hle a. Khatihlai kha Central-a Congress sawrkar a ni bawk a, a nawr pawh a nawrna hle turin kan ngai theuh niin a lang. Mahse, hun a lo kal chho zel a, Assam Rifles te insawn thu chu a rikhât ta hle a, sawrkar lam atangin thu thar engmah a hriat tur a awm bawk si lo va. Assembly House-ah zawhna, “Assam Rifles te Aizawl khawpui laili atang insawn chhuahna turah hian engtia hmalak nge a nih?” tih Chief Minister-in a chhana, “Khawpui atanga sipai hmun sawn chhuak ta an awm ka hre ngai lo” tihte chu chanchinbuah an rawn chhuah ta uai uai mai a. Keini football lo khel ve thinte chuan Aizawl sipai Lammual mawlh mai khi kan lo hisap ve nasa mai a. Assam Rifles ho an chhuah chuan inkhelhna hmun laili si kan nei ve dawn tia kan lo suangtuah ve thinna te chuan beiseina thlawn mai an chang leh ta a ni.
BEISEINA THAR CHU: Kum 1998 a rawn her chhuak a. M.N.F sawrkar Pu Zoramthanga hruai a rawn ding a. Assam Rifle te insawnna turin hma an la ta nghal a, an insawnna tur ram zim deuhva an hriat avangin 2006 khan an zauh belh leh ta a. Certificate Land Lease Memo No. DLL. 62 of 2006, 524 Hec-3915, 24 Bighas chu Assam Rifles hnenah hlanfel an ni ta a ni.
Assam Rifles ram Khatlaa miah chuan New Secreteriat building, Department hrang hrang building leh quarter tam tak sak zui a ni ta bawk a ni. Zokhawsang rama Assam Rifles te chuan insawnna tur pawh Ministry of Home Affairs Government of India chuan an chenna insakna tur leh tul dang atan Rs 1,45,17,30,000 chu March 12, 2008 khan a rawn pe ta a ni. He ruahmanna hi 2011 a zawh a, Assam Rifles te insawn fel vek tura tih a ni.

ENGATINGE ASSAM RIFLES TE AN INSAWN VEK LOH? Kum 2008, July atangin Assam Rifles te chu Zokhawsangah an insawn tan ta a. Unit insawn tur indawt dan tur pawh an siam fel tawh a. Mahse, Mizoram sawrkar a inthlakin 2009-ah chuan Pu Lalthanhawla hruai Congress an rawn sawrkar ta a. Assam Rifles te an insawn zel tura kan ngaih lain, thu danglam tak a rawn piang ta a. Assam Rifles Commandant-in, “Congress sawrkar hmasa hunlaia Assam Rifles ram chhunga inhmun anlo inpek zawng zawng kha an rawn pek kir (surrender) vek lo chuan kan chhuak zui dawnlo” a ti tih thawm alo rita a. Vawiin ni thleng hian Assam Rifles te chu an chhuak zui ta lo a ni.

ENGTIN NGE NI ZEL DAWN? Pu Zoramthanga sawrkar a dinlai khan tuna Assam Rifles te la awmna, Aizawl sipai Lammual leh a chhehvel chei dan tur, Mathur & Copre Associates Pvt Ltd ten cheng vaibelchhe thum sengin anlo plan tawh a. Khang zulzui deuh khan Aizawl Smart City tur duang tute hian ruahman ta se, Ministry of Home Affairs Government of India thupek, ”Assam Rifles-te Zokhawsanga insawn tur” tihkha ala nungreng lawm ni? Aizawl Smart City Organising Committee leh State sawrkar pawh hian engtinnge hma a lak dawn tiin ka lo râlthlir ve a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?