AMAZING GRACE : Hmeichhe Mizo Idol hmasa ber

Youth Icon lamah a ‘ber’ nihna hauh pha chiah lo mah se; Mizo Idol ah erawh an hlawhtling chiang khawp mai. Kolasib khawpui chuan ropui takin hmeichhe Mizo Idol hmasa ber an kawl ta ran mai a. Inrinni khan GRACE LALCHHANHIMI chu a chawr chhuahna hmunah Lal angin a haw a, Kolasib-ah ropui takin a hmuahna hun hman a ni. Mizo Idol atana thlan chhuah, Idol-a duhtawk ngaha rimawi khawvela biru zui ta vang vang ho hnung a zui dawn nge? Grace-i hi Zo rimawi khawvelah kan hmu chhunzawm zel dawn le? 
gra

Kar kalta Zirtawp zan khan Mizo Idol result puan a nih hmain, judge pathum – Rebecca Saimawii, Rinzauva leh Robin-a te chuan Lalhlumawii leh Grace Lalchhanhimi te thian dun chu fuihin, duhsakna an hlan liam liam bawk a. Chumi hnuah Mizo Idol thar chu puan a ni.

Kar khat dawn khawpui pahnih – Hnahthial leh Kolasib te’n Mizo Idol hmeichhe hmasa ber kawl tuma an inum hnuah, Kolasib lamin vanneihna an chang ta zawk a. Lalhlumawii aiin Grace Lalchhanhimi chuan thiam zawk chan changin, Chanmari YMA Hall-ah Grace-i hi Mizo Idol atan thlan a nih thu Mizo Idol host Zonuni chuan a puang a. Stage-ah lawm avangin Grace-i a insum zo lo! Chumi hnuah Mizo Idol trophy chu Lalthuthaa chuan a hlan zui a ni.
Contestant 610 zingah a tawp khar a, Mizo Idol ni thei ve ve tura thlan chhuah pahnihte hian vote lamah pawh an inthlau lutuk lem lo. Grace-i hian a thiannu Bitei hi vote hmuh tam lamah a um char char a tih theih awm e. Vote tla zawng zawng hriat hma, kar kalta Ningani zan dar 6:30 china SMS vote-ah pawh a phak lo. Hemi tum hian Lalhlumawii hian vote 35511 hmuin, Grace-i hian vote 34996 a hmu ve thung. An inthlauhna pawh a tlem hle.

Tun tum Mizo Idol-ah hian judge thuneihna leh SMS thiltihtheihna kalphung thlak danglam a ni a. Judge-in thuneihna 60% an neih laiin, SMS voting hian 40% thuneihna a nei ve thung a. Hei hi Grace-i hian a vanneih pui niin a lang.

SMS vote lamah Hnahthial nula zaithiam Lalhlumawii chuan rorelin, a thuhnuaiah a thiannu Grace-i a dah a. A tawp thlengin Grace-i hi Hlumawii thuhnuaiah a kun deuh chawt a ni ber.

SMS voting hun hawn tantirh atanga February ni 20, 2014 (Ningani) zan dar 6:30 china an vote hmuh dan pawh a inthlau lutuk lem lova, Hlumawii chuan hma hruaiin, vote 35511 a hmu a, Grace-i hian vote 34996 a hmu ve thung. Vote hi result puan ni, Zirtawpni chhun dar 12 thleng chauh hawn a ni a. Hemi chinah pawh Hnahthial ‘constituency’ lamin hma an hruai!

Vote thlak theih hun khar a nih hnuah pawh Grace-i aiin Hlumawii (Bitei) hian vote a hmu tha zawk a. An pahniha vote an hmuh zawng zawng belhkhawm chu 118522 a tling. He’ng vote tla zawng zawng zinga vote 59813 chu Bitei chuan changin, Grace-i’n vote 56907 a hmu ve thung. Vote thi pawh 1802 a tling hial.

Hnahthial nula Hlumawii hian vote hmu sang zawk mah se, judge te’n an thuneihna hmangin thutlukna an siam a, Grace-i chuan vanneih pui zawkin hmeichhe Mizo Idol hmasa ber a nih phah ta a. Mahse, judge te’n thutlukna awlsam tak an siam bik hauh lo mai. Hun rei tak chhung thutlukna siam turin ngaihtuahna an seng a ni.

Grace Lalchhanhimi hian Zonet Cable TV Pvt Ltd atangin Rs. 1,00,000/- (Rs 52,000/- + Rs 4000/- in 12 equal instalments) a dawn bakah, Mahindra Rodeo a dawng bawk a. Pahnihna ni ta Lalhlumawii pawhin Rs. 50,000/- dawngin, pathumna Lancy chuan Rs. 25,000/- a dawng ve thung a ni.

BIANGBIAKA

Mizo Idol nih i inring em?
Ka inring lo! Ka thiannu Bitei hi a zaithiam a, vote a hmu sang zawk bawk nen pahnihna turin ka indah char char a. Chubakah, top 10 ah pawh ka inhlankai phak ka inring lo kha a nia.

Mizo Idol i nih chu puan a nih khan, i rilrua awm hmasa ber engnge?
Ka lawm lutuk a, Pathian vang chauh ania. Hriselna tha min petu Pathian chungah lawmthu ka sawi mawlh mawlh mai.

Engtinnge kal zel i tum?
Ka hre lo, engtinnge ka awm zel dawn pawh ka la hre lo. Tunah rih chuan ka theih ang angin ka zai anga, music video te ka siam anga, lehkha zir pawh ka chawlhsan ka tum chuang lo.

Mizo Idol i nihna chhan min hrilh thei em?
Hei hi mi paw’n min zawt nasa a. Vote-ah ka thiannu ka tluk lo nasat avangin mak pawh ka inti. Mahse, judge-te hnen atangin comment pawh ka dawng nasa a. Rebecca-i pawhin, ‘Engkim i sa thiam a, i variety a…’ min ti a. Hetiang vangte pawh a ni a. Chubakah, Pathian khawngaihna vangte pawh a nia.

grac

Zai chawlhsanin lehkha zir chhumzawm?
Zai aiin lehkha zir thlang zawk dawn lo e. Zir chung paw’n a theih tho alawm. BA ka zo tawh a, MA te hi IGNOU velah ka zawm anga, lehkha zir chu chawlhsan ka tum chuang lo. Tun hi ka bul tanna tur chauh a nia.

Eng hla lam nge i awn dawn?
Mizo Idol intihsiakna kan neih lai khan, lengzem kha vawikhat ka sa ve, ‘Lalrimenthangi’ tih kha a nia, hei hi judge min thlan sak a nih vangin ka sa a. Lenglawng leh gospel bak hi chu sak tumna em em ka nei rih lo. Pathian fakin ka zai anga, love song tak hi chu ka sak chiah ka inring lem lo.

Mizo Idol hmeichhe hmasa ber i ni ta a…?
Hmeichhia zinga Mizo Idol hmasa ber ka ni ta a, ka lawm rual rualin hei hian mawhphurhna tam tak a keng telah ka ngai. Mizoram hmun hrang hranga ka hmeichhe puite ai awh tur niin ka inhria a, chuvangin mite entawn tlakin awm ka tum ang. Hmeichhe Idol hmasa ber ka ni hi ka phu lo.

eng

RINZAUVA : Hlumawii hi Biak In leh kohhran programme hi a platform tur niin ka hria. Grace-i hi Biak In chauh loah pawh a pawn lamah a chet that chhoh ka beisei a. Round 6-na vel thleng kha chuan Bitei hian hma a hruai a, hla thlan chungchang avangin Grace-i hi a rawn invawrh nasa viau a. Bitei hian a pha loin ka hria. Tum dang Idol aiin tun tum Idol hi ka beisei a sang. A chhan chu hmeichhia te hi chuan music video siam neuh neuh te an ti peih a, a hmaa Idol mipa te ai chuan hlawhtling deuh turah ka ngai.

REBECCA : Hmeichhia te a nihna hrim hrimah pawh ka phur. Tun tum chu mipa aiin hmeichhia kan nei tha zawk a, mipa te hian an tluk lo. Ka sawi fo tawha, mahni inti lar thiam, zai lamah pawh hmasawnna nei zawnga insiam rem a, mi hla sak lar sa, hla hlui sa ringawt lo kan mamawhin ka hria a. Hla hlui saa lar tum hi a fuh chiahin ka ring lo. Grace-i gospel leh lenglawng a sak pawhin a insiamrem thei a, 70s zanah te pawh khan kan hmuin ka hria a, chuvangin Grace-i hian advantage a nei tha zawkin ka hria. Hlumawii pawh hi mi fel, nunze mawi tak a nei a, a chanchin hi ka la zawt lo nain a awmdan velah pawh a hriat theih mai. Mahse, Grace-i ai chuan stage-a awm laia mipui nena inzawmna a nei chhe zawk a, skills ah pawh a pha chiah lo em aw chu ka ti.

ROBIN-A : Singing technique velah Grace-i hi Hlumawii hian a pha chiah lo niin ka hria a. Hlumawii hian nei ve tho mahse chei kir velah te hian a tluk chiah lo a. Gospel ah khan tha mah se, Grace-i hian hla dangah a khum avangin a phu zawkin ka hria a, kal zelna turah pawh hmabak a nei zawkin a lang. Grace-i lakah hian ka beisei a sang. A chhan chu top 20 kan thleng a, servive tumin a bei a, lenglawngah a rawn lut a, a ability a rawn lang chiah a, mipui sakhawknaah te Pathian hla te sa sea platform kha a dik thei lo a. Conservative deuh hi awm mah se, a platform a zirin Grace-i hi a insiamrem theih zawk avangin a servive thei turah ka ngai. GA beiseiawm khawp mai, hmeichhia a vawikhatna ania, mipa ho hi tun tum chu an tha tlat lo hmeichhia aiin, hmeichhe pathumte hian mipa aiin an phu zawk bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?