APRIL ATANGIN POWER man 5 paise-in pung Dawn

Aizawl: Joint Electricity Regulatory Commission for Manipur & Mizoram chuan April 1, 2018 atanga hman tan turin power hman man chu unit khat paise 5-in a tisang a, chawhrualin unit khat hman man hi Rs. 4.67 a ni tawh ang. Tariff sanna hi chawhrualin 5.90% a ni.

Manipur leh Mizorama êng chhit man bithliahtu, JERC chuan February 23, 2018 khan êng chhit man chungchanga Power & Electricity Department rawtna leh mipui sawiselna awm ang angte chu public hearing neiin an ngaithla a. P&E department rawtna unit khat Rs. 4.87 chu Rs. 4.67-ah a tihhniamsak a, tuna hman mek hi unit khat Rs. 4.61 a ni a, tariff thar nemnghehna order hi March 12, 2018 khan tihchhuah a ni.

Kumthar (financial year) 2018-19 chhunga consumer-ten electric an hman zat tura beisei chu 388.30 million unit a ni a, heta tang hian revenue vaibelchhe 181.52 hmuh beisei a ni. Mizoramin a hman bak phai lama hralh theih 27.49 mu atanga revenue hmuh beisei vaibelchhe 27.49 nen power hralhna atanga sum (revenue) hmuh beisei chu vaibelchhe 209.01 a ni.

Kumin financial year chhung hian consumer-ten power 371.66 mu kan hmang tura beisei a ni a, heta tang hian revenue vaibelchhe 167.70 hmuh beisei a ni a. Hman bak phai lama hralh tura beisei 150.94 mu atangin revenue vaibelchhe 29.89 hmuh beisei a ni a; tichuan, kumina power hralhna atanga revenue hmuh beisei zawng zawng chu vaibelchhe 197.59 a ni.

Tun dinhmunah Mizoram sawrkar chuan mipuiten êng an hmuh theih nan power unit 1 chu Rs. 7.92-in a lei a, mipui hnenah unit khat Rs. 4.67-in a pechhuak leh dawn a, sawrkar chuan unit khat zelah Rs.3.25 zel consumer-te a tumsak dawn a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?