Assam nena ramri buai hi

Hun rei tawh tak atang khan Mizoram leh Assam chuan kan ramri nia hriat dan chungchangah ngaihdan leh hriat dan inang lo kan neih avangin buaina kan nei a. Mi thiam thenkhat chuan Assam (Cachar) leh Mizoram ramri hi kum 1867 vel atangin a buai tan tawh niin an sawi a, a chhan ber chu ram kan inchuh vang a ni.

Mizoram hi khawchhak leh chhim lamah Myanmar chu kan ramri niin khuavang ramri kham ang maiin Tiau lui chuan ramri fel tak a siam a. Khawthlang lamah lah nise lui lian tak Khawthlangtuipui avangin Bangladesh nen harsatna kan nei lo va. Chutiang zelin state thenawmah pawh Tripura leh Manipur nen chuan harsatna kan nei lo bawk a, hetih lai hian Assam nen erawh a khât tawkin kan buai deuh reng thung.

Assam nena kan buaina chungchangah hian keini Mizoram lam chuan Suakpuilala leh Cachar bawrhsap Edgar ten kum 1875 ‘The Inner Line on the Southern Frontier of the District Cachar’ an lo siam kha kan tanchhan a, Assam lam hian kum 1933-a British sawrkarin an siam, ‘Inner Line Regulation’ kha an tanchhan ve thung. Engpawhnise state pahnihte hian kan tanchhan ve ve hi chaktir kan tum chuan engtikah mah inremna hi a awm thei dawn lo va, kan buai kumkhua dawn tihna a ni thei ang.

Mizoram mipuite pawh hian tuna kan ram china kan ngaih inner line forest ram square mile 509-a zau hi neih vek kan tum a nih a rinawm loh a, tum pawh ni ta ila Assam lam hian engti kawng mahin a remti dawn lo tih a hriat a; chuvangin, lungawina chin kan neih a ngai ang. Tun hnaia state pahnih aiawhten inner line forest chhunga dan lova insak an enfiahnaah pawh Bairabi (Zophai) lamah chuan dan lova Assam lamin in an sak eng emaw zat an hmu chhuak a, hengte hi tan chhanah hmangin na zawka Asam nawrna hmanrua atan hman ni thei se a tha hle ang.

Engpawh nise, ramri buaina hi tharum hmanga chinfel chi a ni lo va, dawhkan khat kila inremna hmanga chinfel chi a nih avangin sawrkar pawhin a ngaihthah lo va, nasa lehzual zawka a vei a ngai ta hle mai. Tarlan tawh angin ramri chungchangah hi chuan kan ram nia hriat chin te, kan ramri a pawm chin te, a tul a nih chuan kan tawlh thui theih dan thlengin rilruah inhuamna a awm thei ang a. Chumi hmang chuan insawi rem dan awm thei se a duhawm hle mai, chuti a nih loh chuan kan tu leh fate thlengin an la buai dawn chauh tihna a ni. Ramri chungchang hi thil buaithlak tak mai leh ngun taka ngaihtuahna sen ngai anih avangin politics thila hamthatna lak emaw inpuhmawh nana hman chi a ni lo va, mipuite tanrualna tur leh thluak fim tak hmanga chinfel chi a ni zawk. Chuvangin, tuna ramri chungchanga kan thil tawn mek hi sawrkar bengharhtu ni se, a chinfel dan hi zawng hram teh se.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?