Assembly Election 2018 Thlirlawkna

  • Zosangliana (Zotea)
    Tuna Mizoram dinhmunah chuan political party tia chhiar tur chu Party 5 (panga) – Mizoram Pradesh Congress Committee (MPCC), Mizo National Front (MNF), Mizoram Peoples Conference (MPC), Zoram Nationalist Party (ZNP) leh Baratya Janata Party (BJP) te an ni a. Hetih lai hian Prism te chuan 2018 Mizoram Assembly Election-ah Candidate siam an tum thu kan hre bawk a. Zoram Peoples Movement (ZPM) chuan phungbawm sawmin Mizoram Assembly Election 2018-ah hian candidate siam an tum ve leh bawk a ni. Heng Mizoram Assembly Election 2018 kan hma lawka lo awm tura candidate vawrh chhuah tumte dinhmun ka thlir dan ziah ka tum a ni.Mizoram Pradesh Congress Committee (MPCC): Anni hi sorkarna chelh lai an ni a, MLA pawh Mizoram Constituency 40-ah MLA 34 nei lai an ni. An MLA ding laite hi an dintir leh vek dawn nge, hun rei tak Bhavan rinawm taka lo nghak, MLA ding laite aia fel lo bik miah lote hian MLA thenkhatte hi an chhawk ve tawh dawn em tih hi zawhna lian tak a ni awm e. Kum 10 lai Minister/Parliamentary Secretary leh MLA nihna lo chelh tawh an ni a, inchhawk tlan a tha e an tih pawhin thil âwm tak a ni ngei ang.

MPCC hi MLA 34 zet nei an ni a; amaherawhchu, kum 10 (sawm) zet sorkarna chelh tawh an ni a, thil tha tih tam tak an neih rualin mipui mimirte mamawh – inkalpawhna kawngpui chhe lutuk te, cooking gas harsa te, electric power mumal hleithei lo te, zirna school zirtirtu indaih lo te, doctor indaih lo lutuk te, Hindi, RMSA, SSA Teacher bântir vak vak te leh thil dang, Kristian state tia inchhalin zu a zuarte avang hian mipui vote eng emaw zat chu an hloh thei a. Department hrang hranga Muster Roll (MR) bân te, Party induhsak nana New Land Use Policy (NLUP) an hmang vak te, NLUP hlawhtlinpui an tlem hle site pawh hian sorkarna fawng vuan leh tur chuan harsatna an tawh phah ngei a rinawm thei awm e.

Mizo National Front (MNF): MNF hi kum 10 (sawm) lo sorkar tawh an ni a. Mipui tam berte hian sorkar ding tawhte hi an sorkar laia an hmalak tawh dan hi an thlir thin a. MNF a sorkar chhung khan mipui duhkhawp lohna chu a awm ngei a ni tih chu 2008, 2013 Assembly Election-ah paih a nih khan a tichiang hle awm e. Hetih rual hian thil chhinchhiah tlak leh ram rotling tam tak an thawh chhuah hi hmuh hmaih mai chi a ni lo vang.

Aizawl khawpui lailia Assam Rifles tawh chet thiang lo ang hiala kan ngaih thin insawnna tur Zemabawk Zokhawsang ramah a ruahman a, Khatla bul Assam Rifles ram zau tak la a, New Capital Complex siama Secretariat Building leh sorkar department building tam tak leh sawrkar hnathawk quarter chhungkaw zaruk chuang luah tur an din te, MNF sorkar lai kha chuan Zokhawsanga insawn tur Unit a chhuak tur indawt dan tur pawh an lo ruahman vek a. MPCC-in sorkarna 2008 Election a rawn chan veleh khan Assam Rifles Commandant-in, “Congress sawrkar hmasak hun laia Assam Rifles rama inhmun an lo inpek 103 lai chu an pass an surrender vek loh chuan kan insawn zui tawh lo vang,” a ti ta tlat a. Chuvanga Assam Rifles hi la chhuak lo chauh niin a lang.

Milenium Centre, Ch.Chhunga Bus Terminal, Ch. Saprawnga Truck Terminal, Refferal Hospital main Building leh Quaters te, Bawngkawn Durtlang Road Taxi pawh an tlan duh mang lohna siam that te, Mizoram University, Serlui ‘B’ Hydel Project, Aizawl khawpui hmun eng emaw zata Motor parking lot te, Luipui kam leh thingtlang kawngpui tur Bamboo Road te, sawi tur tam tak a awm ang. Kum 10 dan zelah Mizoram sorkar chelhtute hi an inthlak thin a. USA-in hman nia President an thlan khan, inthlan ni thleng Media (chanchinthar thehdarhtu) rintlak ber berte pawhin Democrat Candidate Hilary Clinton kha tling tur angin an ngai a ni. Mahse, Republican Candidate Donald Trump a tling daih si a ni.  A  chhan niawma thil chik mi thenkhatte chuan, “USA mipui, mi ril tam berte khan an lo tih thin term hnih dana inthlak kha tihdanglam an duh lo a ni ang,” an ti a ni. Khatiang deuh khan MNF hian sorkar a siam ve mai ang em?

Zoram People’s Movement (ZPM): ZPM hi Mizoten kan la hmelhriat loh, ruahtham loh pawl thar a ni a. Anmahni hi party tih hi an duh lem lo niin ka lo hria a. ZNP leh MPC hian an thawhpui dawn niawm tak a ni.  Engang chiahin nge candidate hi an siam dawn ka hre lo va. ZPM anga candidate an siam vek dawn a nih chuan ZPM hi recognise a la nih loh avangin Independent Candidate vek a ni dawn a. ZNP leh MPC te hian an party hming anga candidate siamin ZPM-in candidate-ah a ring nghalte pawhin an kal thei tho va.

Chutianga party hming anga candidate hminga an siama seat insem thuah harsatna an neih loh chuan sorkarna lo chang ta se, Candidate tling tam ber party kha Chief Minister atana pawm mai tur a ni ang a. Chief Minister post inchuh buai a ngai dawn lo a ni. ZPM anga Independence veka an chuh chuan Unit an la nei mumal si lo va, iptepui bânna pawh candidate tam tak tan zawn chawp a ngai dawn a, vote  a tla tha duh viau lo vang tih a hlauhawm thei ang.

Kum 1998 Citizen Common Front (CCF) khan Assembly Election-ah tho Assembly Constituency 35 lai an chuh a, an candidate-te pawh Mizo zinga pa hming tha an ni a. Hemi kum Member of Parliament (MP) Election-ah CCF Candidate Dr. H. Lallungmuana chu hneh taka thlantlin a lo ni tawh bawk a. Party awmsa Mizo National Front (Nationalist) leh Zoram Thar nen thawkho a ni ve bawk a, tlin pawh an in ring hle awm e. Mahse, vote chhiar a nih meuh chuan a chanve aia tamin an dahkham an chawi a. An Arte lukawn thak a nih kha. Tun tum MLA Election 2018-ah hian eng nge an an ang tih hi zawhna lian tak a ni awm e.

People Right to Information Society of Mizoram (PRISM): Anni hi corruption dotu langsar tak Mizoram mipuiin kan hriat lar em em an ni a. Mizo Peace Forum (MPF) kha ang awm hlein ka hria. MPF-in candidate kan siam ve nachhan bulpui ber chu Mizoram Remna leh Muanna zahawm (Peace with Honour) kha a ni a. PRISM pawh hian Mizorama corruption tihtlem tura Mizo mipuite zirtir an duh ni berin ka lo ngai a. Unit/Branch mumal pawh nei lova candidate siam ve ngawt chu, mipui tam berten min chhan dan chu, “In thusawi chu a tha, tang fat fat rawh u, tun tumah chuan inla tling zo dawn si lo va,” tih hi a ni. Thu tha tak tak sawi mah ila, mipuiin rorelna chelh pha tura min rin miau loh chuan vote a tam mawh khawp mai tih hi ka tawn hriat tawh atangin ka sawi a ni.

Mahse, ka rin ang ngawt hi chu an ni lo thei tho a. Tunlai Mizoram mipui kan fing tawh a rin phakbak hian sorkarna an la lo vang tih chu sawi ngam a ni lo.

Bharatya Janata Party (BJP): BJP hi hun rei ve tak, 1993 vel atang tawh khan Mizoram MLA Election-ah pawh thawm an nei tawh thin a. Mahse, inthlan zawh hian an thawm a reh leh mai thin a. Tun hnai central-a BJP-in sorkarna an chan atang khan intuaitharin hruaitute pawh an inthlak deuh chhen nghe nghe a.

Party indintharte an nih vei nen, an han inhnawtchhuak tih thawmte a ri thin a. An hriatu thar (President) hi mi thiam Professor lai a ni a. Mahse, party leh Education Institution kalphung hi a danglam hle a ni ang. Tlangkamah selna thu an mi leh sate atangin hriat tur a awm veleh zauh zauh thin hian an party than a tithu deuh em tih tur a awm leh thin.

Theihtawp chhuahin Mizoram chhunga Mizo hnahthhlak ni lo, Chakma leh Bru ho zingah zawrh an tla deuh niin a lang a. Tun anga hmasawnna an neih chhoh zel chuan awmze nei thamin minority lamah hian an awm thei ang tih hi an beiseina pawh niin a lang a ni. Central BJP lam hian sorkar chakna leh party thapuia puihna an dawn chuan hmasawn viau thei dinhmunah an ding thei a ni. 2018 Election-ah hian Congress party hian chakna chang ta lo sela, an pi leh pu Delhi lamah belh tur tha an awm tawh mumal lo bawk nen, national party lian belh hlawkna lo inzirtir tawh Congress member tam tak hian BJP hi an belh a rinawm thei viau awm e. Regional party aia national party duh zawk leh an rilruin a lo thanhnan tawhte tan chuan BJP bela sorkar zarzo theihna kawng an zawn hi a rinawm a. BJP hi party thangduang tak a lo ni lo vang tih hi sawi a harsa hle ang.

Amaherawhchu, BJP kal dan tlangpui thlir hian Hindu sakhaw chawi lenna lam a hawi em? tih hi zawhna lian tak a ni lo thei lo va. Kristian zaa za inti, Mizoram mipui hian an bawh viau lem lo mai thei bawk. 2018 inthlannaah hi chuan beiseina sang tak neihpui hi chu a harsa rih deuh chuan a lang a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?