Babulon saltanna leh Mizote sal tanna- R.Zomawia

“Setana tualzawlah Zofa Kristiante nuamtawlin hun kan hmang mek a, a dik emaw tiin keimahni ngaihdanin hun kan hmang a, Pathian duhdan pawh lekkawh zo lovin kan fate chhanchhuah hna pawh kan thawk thei ta meuh si lo, Balulon saltanna-a lut Israel fate kha tihdarhin an awm a, Pathian thinurna an chungah leihbuakin a awm tih kan hria… Keini Zofa kristian-te  pawh  tunah hian saltanna hmunah kan cheng mek tih kan in hria em le?”

Babulon hi engtihna nge? Babulon tih ngawt hi chu kan hre bel viau mai thei a, a hming chauh hria a, enge a nih tih erawh hre lem lo, hria anga lang si hi mi tam tak kan awm niin a lang. Rawngbawltu langsar tak takah te pawh a bulthut man lem lo kan tam tih hi dawt muhlum chu a ni lo mai thei e. ‘Babulon’ tih hming Bible bul atanga a tawp thleng hian a tha lam zawnga sawina a awm lo va, tehkhin thua sualna reng reng pawh ‘Babulon’ hi tehkhin zel a ni. Sawi thiam tan chuan ngaihnawm tham a awm a, babulon kan hriat dan ah te, ngaihdan thim them hi kan neih ve far avang hian sawifiah tak tak theih pawh a ni lem lo va, mithiam kan tihte zingah pawh chi hrang hrang an awm leh zel a, mahni pawl nger lam hi a tlangpuiin kan han sawi mawi duh tlangpui niin a lang.

‘Babulon’ tih hming rawn intanna tak chu Genesis bung 11 ah kan hmu a, Hebrai hovin ‘Bab-ilim’ an tih chu ‘Babel’ a ni. Grik hovin ‘Babulon’ an tih tak chu a ni. A awmzia chu ‘Pathian Kawngka’ tihna a ni. Nunna thing hmun ( Tin-tir ) an ti bawk thin. Mesopotamia khawpui pawimawh leh hmingthang tak niin Euphrates lui kama awm a ni a, Bagdad chhim lam mel 50 ( 80 kms ) a hlaah a awm.  Babulon khawpui hming behchhan hian a ram pawh  Babulon Lal ram tih a ni.Babulon hian hmingthatna reng a nei lo: Genesis ah  Babel in sang tak din a nih thu kan hmu a, a dintu pawh Nova thlahte zinga mi Nimrodan  niin a lang. Khawvel zawng zawnga chengte kha tawng hmun khat leh thu sawi dan hmun khat an ni vek a, chapona-in a nunah hmun a rawn chang a, “Khawpui siam ila, In sang a chhipin van tawng turin sa bawk ila, kan hming i ti thang ang u..” (Gen. 11:4). Babel in sang sak nan hian leirawhchan te an siam a, an sa ngei a, leirawhchan pawh an hmang ngei tih fiahna turin  hmanlai history chhuitu (archeologist)-te chuan Babulon phaizawl hmuna an laichhuahah hmuh a ni. Pathian-in a duh taka a siam mihringte chu an lo chapo a, an mahni siamtu el pha niin an in hria a, a siamtu lam ai mahin mahni an indah sang kha Pathianin a huat em em chu ni berin a lang.Babulon atangin sakhua-na suak, milem biakna a rawn piang: Hmeichhe thiltithei zet mai leh thawm na zet mai chu Nimroda nupui Semirami a ni. A thuneihna chu a zau hle a, mi zawng zawng chu a thuhnuaiah an awm vekah a ngai a, amah a in ngaih dan chu ‘Mother of God’ and ‘Queen of Heaven’ tih hial a ni. A fapa a hrin ‘Tammuz-a’ pawh mak danglam taka ngaih a nih hial kha.. An milem ziahna reng rengah a fapa a pawmlai thla te pawh tam tak a awm a ni. Babulon thuneihna hnuai atang hian milem biakna (Sakhua hrang hrang) lo chhuahna hmun niin chhui mite chuan an chhui chhuak tlangpui . Babulon atanga sakhua-na suak rawn darh ta hian Israel te pawh nasa takin a tibuai a nih kha (Ezekiela 8 :14-16).

Babulon lalram thiltithei tak chu a changin a tlusawp nuaih a, a changin tundin a ni leh thin a. Indona hmingthang tak Karkhemis indo B.C. 605-ah khan Aigupta chu hnehin a awm a, Nebukadnezzara chuan Babulon lal ram zau tak chu a awp ta a ni. Babulon hun lai hian Israel fate chu hmun thum-ah an darh a, Babulon, Juda ram leh Aigupta ah te an darh nuaih a ni. An mahni hmangaih em emtu Pathian chuan Israel chunga kut a thlakna hi a na thin hle a, khawvel hmun hrang hrangah te an darh a, hreawm nasa tak an tuar tih kan hre awm e.Engvanga Israel fate Babulon thuhnuai kun nge an nih? Juda lal ram a tlusawp tih kan hria a, Jerusalem pawh vawi tam tihchhhiat a ni thin a, lal chak tak takin Juda lal ram an rawn hneh thin a, Israel fate kha Pathian duh loh zawngin an awm thin a, Pathian huat zawng tak milem biakna te, mahni duhdan dah lal zawkna te khan hmun a chang lian lutuk a, thianghlimna an tla chham bawk a, Lalte rorel dan a dik tawk lo va, Pathian duhdan an hawisan a, Pathian a thinur a, Babulon Lal Nebukadnezzara a tichak ta a ni. An chanchin hi 2 Lalte, 2 Chronicles, Zawlnei Ezekiela, Jeremia-ah te a awm vek a ni. Jerusalem khawpui hi tihchhiat vek ni thin mah sela, tun dinin a awm leh thin a, Israel fate khawvel hmun hrang hrangah awm darh mah sela, Jerusalem an ngai em em a, an ngai hlu tlat a ni. Pathian ngeiin Jerusalem chu min biakna hmun atan Jerusalem hi ka thlang a, kumkhuaa min biakna hmun atan ka thlang a ti mauh si a ni.Babulon saltanna atangin…: Tihdarhin an awm a, mi ramah, ramdang mite rorelna hnuaiah an kun a, rilru rethei takin, nun chep takin mi ramah lunglengin hun an hmang thin a ni. Babulon lalna hnuaiah hian an rethei bik em em chuang lo. Tigris leh Euphrates lui kamah te an khawsa hlawm a ni. Lal Nebukadnezzae thlaktu Evil Merodak-a a rawn lal khan Juda mite chu a duhsak hle a, duhsakna hrang hrang an dawng a, dinhmun sang te pawh an chelh a ni. Sumdawnna lamah pawh an hausa a, an zalen a ni. Mahse, chu chuan an rilru lunglenna te a hnem reng reng lo, mi ramah chuan an khua a har tlat a ni. “Babulon lui kamahte, chutah kan thu a, a ni, kan tap thin,  Zion kan ngaihtuahin…” (Sam 137). Mi ramah te chuan dinhmun sang tak tak chelhin, hausakna ten vur mahse, mahni pianna hmun, Pathianin an ram atana a pek chu ngaiin hun an hmang thin a, lungleng takin lui kamah te tingtang nen hun an hmang thin tih a hriat theih a ni.Babulon salah kan tang ve mek em le?? Israel fate thendarha an awm khan nghawng tha lo tak tak tun thlengin a la awm reng a, mi ramah an awm a, hnamdang te nen an inneih pawlh a, chu chuan a hrin chu Israel dik tak leh dik lo (thlah pawlh) a ni. Tunge Israel/Juda? Heng zawng zawng hi a chhan bul ber chu Pathian duhdan zawngin hun an hmang lo va, Pathianin lal a a ruatte pawhin rorelna thain ro an rel lo a ni. Hremna a na hle mai. Keini pawh kan awm dante hi kan ngaihtuah ngai em le? Kan thlan lal te hian an lal thuthleng atangin Pathian duh dan zawngin ro an rel em? mahni hlawkna umin sum leh pai, thuneihna kan hmangsual em?   Chhungkua tinte hian Pathian duh dan aiin kan khawsak nawmna te kan ngai pawimawh zawk niin a lang. Milem kan be ve mek te hi a ni lo maw?  Khawvel changkanna, sum leh paia hausakna ai chuan Pathian duhdana kan awm mai hi kan tan nunna a va ni si em!! Saltanna thuk taka tang chhan chhuah tur kan va tam ve!!

Hremna kan chungah a vir mup mup tawh a; mahse, kan sim a kan inlamlet chuan hun a la tlai lo ve. Kan ram chu sualna-in tla a zar a, hawi-na lam apiang a thim chhah mup zel a, tute pawh chik takin han in en ila, kan nun chhungril tak tak hi lem chang kan ang ber hian a hriat thin. Takna kan tla chham em em a, duhamna-in keimahni theuhah hmun a chang a, a pawnlawi taka lan mawi tumna te, mite hmuh leh hriata rinawm ber anga lan tum te, khawtlanga lan sarh tumna thinlung te, min siamtu Pathian duhzawng a nun aiin keimahni duh dan kan ti lal thiam em em si a, kan thlan lal ten ro an rel danah kan lung a awi lo va, an lo tha bik em em si lo va, a thlangtute lah eng ruai kan ni bawk si lo, lung hi a zing mup mup mai zawng a nih hi a!. Kan duh zawng kan hap buan buan a, mahni tana hlawkna anih dawn phawt chuan midang chuan lo tuar mai mai mahsela, pawi kan ti der lo nia mawle! Tlawmngaihna a dal zo ta; mahse, a la tlai lo ve, Lalpa pasaltha mi eng emaw zat an la awm a lawm, kan sualna leh thatlohna te kan sim a, chu chu kan tlansan chuan kan Pathian hian min la ngaidam thei tih hi kan chiang tur a ni. Chutah zet chuan keimahni hmangin kan ram roreltu tur Lalpa tih mi, mi rinawm leh mi chak min la pe ngei ngei dawn a ni. Hawh u, i insangmar teh ang u khai. Khua a tlai tak tak hmain, Pathian duh dana kan nun a, hun kan hman phawt chuan engkim mai hi a rawn tha vek mai ang. Chapona kan neihte hi Pathian hmaah i paih bo vang van gang u khai. Mipui sum eiru a, lo intiliante kana wm a nih chuan Pathian hremna chu an chungah a la fu chat mai dawn a ni. Khawvel thil tak pawhin mahni thawh chhuah lova lo inla mi lian, lo inla hausa nih kha a va zahthlak em tih kan hriat a hun tawh e. Dik lo taka kan nun a awm pawhin zahna chang kan hre tawh bawk si lote hi siam that kan harna em em chu a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?