Bail

‘Bail’ chu jail tang leh thubuai nei mekten an thubuai ngaihtuah chhunga an chhuah lailawk theihna hi a ni a, an chhuah lailawk chhunga court leh thuneitu lama an inlan leh lan loh chungchanga mawphurtu (surety) leh sum chawi (bail bond) a awm thin bawk. India rama dan bawhchhiatna thubuai kalpuina dan bupui ber, Code of Criminal Procedure, 1973 (CrPC)-in a sawite hi han sawi zau ila.

Bailable Offence: Bailable offence-ah hian thubuai neite bail-a an chhuah phalsak ngei ngei hi an dikna chanvo a ni. Thubuai hremna sang ber, kum 3 thleng hi a tlangpuiin bailable offence kan tihte a ni a, kum 3 thleng hremna thenkhat, non-bailable a awm bawk. CrPC Schedule 1-ah hian bailable offence leh non-bailable offence te chiang taka tarlan a ni.

Non-bailable offence: CrPC Section 437 leh 439 hnuaiah non-bailable offence-ah thubuai neiten court-ah bail an dil thin a, bail-a an chhuah leh chhuah loh chu court-in uluk taka a ngaihtuah hnuin bail-a chhuahna tur chhan tha tawk neia a hriatte chu bail-in a chhuah thin. Thubuai hremna nat dan azir te, a diltu hriselna leh chhungkaw dinhmun te, thubuai nei fo tawh emaw, thubuai a hmaa nei ngai lo a nihna te, adt. ngaihtuah chungin court-in thutlukna a siam thin. Bail dilna ngaihtuahtu court thutluknaah thubuai neite bail-a an chhuah leh chhuah loh chu a innghat tihna a nih chu.

Anticipatory Bail: An laka non-bailable thubuai ziah luhten police-ina an man huna bail-a an chhuahna theihna turin man an nih hmain CrPC section 438-in a sawi angin bail an dil lawk thei a, chu chu anticipatory bail an ti. Criminal case tlanglawn – rukruk, zu leh drugs kaihnawih, pawngsual, adt.-ah hian case ziah luh a nih atangin rang taka police-ten thubuai neitute an man thuai theih avangin anticipatory bail dil a ni ngai meuh lo a. Corruption case kan tih ang chi thubuaiah hian thubuai ziah luh a nih hnuin dan anga kalpui ngai tam tak a awm avangin thubuai neite man nghal mai rem lohna tam tak a awm thin a. Hetiangah hian thubuai an laka ziah luh a nih leh nakin lawka man mai theih an ni tih hriain an laka thubuai ziah luhten court-ah Anticipatory Bail hi an dil thin. Dilna thehluh atanga an chungchang court-in a ngaihtuah hma chu interim bail-a pek an ni thin bawk.

CrPC Section 167(2)(a): Hei hi chu thubuai ziah luh a nih atanga a investigation titu police/excise te mawhphurhna a ni ve thung. Investigation Officer-in a thubuai chhuina chu hun tiam chhungin a zawh a ngai thin a, chumi hun tiam chhunga court-a chargesheet/complaint sheet a thehlut hman lo a nih chuan court-in thubuai neite, an thubuai lian hle mah se, dan anga a chhuah ngei ngei a ngai thin. Kum 10 aia tlem loa hrem theih thubuai chu Investigation Officer-ten ni 90 chhungin an chhui zo tura tih an ni a, thubuai dang zawng chhui zawhna atan ni 60 an nei thung. Hemi hun chhunga an chhui zo lo a nih chuan thubuai nei (accused) chu danin a phut angin court-in bail-a a chhuah ngei ngei a ngai a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?