BCA an la chak zel

MSL khelh tawh china hmuhnawm berah chal lo pawhin inkhel tawk berah an chal ngei tur inkhelah Zirtawp zan khan Zarkawt BCA chuan 65 – 63 in Tuikual South BC an hneh hram a, hun tawp dawnah Tuikual South-in an hun tha an bawhpelh a, chak thei dinhmunah an ding a, mahse, an hlawhtling zo ta lo.

He inkhelah hian Dawrpui Vengthar tlangval Dennis Lalmuanpuia kha Tuikual South lamin an chelh lo deuh thin a, an rinrawl Vanchuanpuia’n ni dang a pha lo deuh bawk a, chak theihna hun tha bawhpelhtu captain F.Zodinthara tan ngaihtuahna a kal thui khawp ang. Semi final an thleng phak lo a nih phei chuan a uihawm leh zual ang.

Tuikual South hian 2nd quarter an khel chhe hle a, kha kha an tuar a tih theih. BCA an phak lo fe hman kha a ni a, mahse 4th quarter-ah an fightback a pui hle. Free-throw an hmuhte kha thun zel se se chak thei an ni a, an duh ang engmah a thleng zo ta lo a ni. Rakesh an mamawh zia a lang a, an lalut leh thei emaw, amah ang tluka tha player dang an chawlut a nih loh chuan MSL hmasa berah an beiseiawm em em ta lo. Vawi 3 an khel tawh a, vawi 1 chiah an la chak. Rinkai TBL an hneh lo tawh a, team tha dang BCA lakah an pawng hman viau naa fiahna an paltlang zo leh ta lo a ni.

Zarkawt BCA an fakawm a, second half-a Tukual South-in nasa taka an beihletnaah an buai ve tep chu a nih kha. Anni hi Khatla TBL-in an er tham ber tura ngaih an ni ta a, hriam zawk leh khawng leh zuala an khelh chhoh erawh a ngai dawn a ni. Vawi 3 khel tawhin an la chakfai vek a, Khatla TBL nen hetah hian an intluk mek!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?