Beihrual kum 100-na hmang tan

Aizawl; Mizorama Kohhran hrang hrangten September thla an hman thin, ‘Beirual Thla’ chu nizan atang khan hman tan a ni a, kumin hi Beihrual kum 100-na a ni nghe nghe.

 

Mizoram Kohhran lian ber, Mizoram Presbyterian Kohhran chuan kum 2016 Synod Inkhawmpuia hriatrengna siama hlâwk zâwka hman dân ngaihtuah ni se tia a rel chu Synod Executive Committee-in bawhzuiin ruahmanna siam tûrin Officers’ Meeting kutah dah a ni a, anni ruahmanna siam ang hian hman a ni dawn a. Hei bakah hian Beihrual tan zân, nizana Kohhran inkhawma chhiar chhuah tûr, ‘Beihrual chanchin’ pawh Kohhran tinah a thawn chhua a, chhiar chhuah a ni.

 

Mizoram Baptist Kohhran pawhin kum kum danga an hman thin angin nizan atang khan Beihrual hi an hmang tan a. Kum danga kan tih thin dan ang bawkin Beirual thuzir hi thla chawhnu lam, September 21 atanga zir tan turin an buatsaih a. Kumin Beihrual thupui atan hian ‘Pathian ram’ tih thu mi hrang hrang ziak an zir ang.

 

Thla chawhma lam, September 1 – 20 chhung hian Tualchhung Kohhran hrang hrangin anmahni remchan dan angin – crusade, camping, house fellowship, house church leh home visit programme-a hman a ni dawn a ni.

 

Beihrual hi Mizorama harhna \um hnihna a lo thlena kum hnih emaw lai a awh hnu lama chin chhuah a ni a. He harhna thlen hnuah hian Kohhran a ngui a, mi tam tak an hnungtawlh a, thawhlâwm pawh a tlakhniam nasat avangin Tirhkoh tirh chhuahte pawh an hlawh tur ang hmu lovin a aia tlemin an chhuak hial a. Hemi intihchak thar leh nan hian kum 1918-a Champhai Hmunhmêltha khuaa Presbytery Inkhâwmpui chuan kum tin September thlaa Beihrual neih a rêl tlu a. Heta tang hian tûn thlengin a kal ta zêl a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?