Aizawl; Mizoram Presbyterian Kohhran hnuaia thalai pawl, Kristian Thalai Pawl chuan Zirtawpni zan atang khan Pastor Bial Conference an hmang mek hlawm a, zanin hian an tiak ang.

Bial hrang hranga Bial KTP Conference hman mekah hian a tan zan, Zirtawpni zan khan palai lawmna leh report inkhawm neih a ni a, nimin nilengin khan Rorel inkhawm neih a ni a, nizanah Pathian Biak inkhawm neih a ni bawk.


Vawiin hian chawhma, chawhnu leh zanah Bial Conference hi neih chhunzawm a ni dawn a. Bial thenkhatah chuan chawhnuah hian Bialtu Pastor-in Lalpa Zanriah Sakramen a theh ang.


Bial Conference hman dan tur hi Bial Committee-in anmahni bial theuh ngaihtuahin a remchan dan anga hman thin a ni a, bial hrang hrangin conference an hman dan pawh a inang vek lem lo va, Bial thenkhatah thupui thlan bik neiin speaker-ten an sawi thin a, bial thenkhatah chuan thupui thlan bik pawh nei lovin bial hruaituten an insawi chhawk thin bawk.


Bial KTP Conference-a Rorel Inkhawmah hian bial chhunga KTP hmalakna tur thil bakah ram puma kalpui tur, KTP Rorel Inkhawma chhawp chhuah theih tur ang chite rel a ni thin a. Heng an relte hi Central KTP-ah thehlutin anni hian Rorel Inkhawma chhawp chhuah tur chin a thliar leh thin a. Kumin KTP Rorel Inkhawm hi Tuikual North Kohhranin March 1-3 chhung hian a thleng ang.


Bial KTP Conference hmanpui hian Central KTP hruaitute chu an feh chhuak a, anni bakah hian Synod Office atangin Upa Lalrinmuana, Superintendent chu Hmuntha Bialah leh Rev. Dr. C. Chawnghmingliana, SL&PB Editor chu Kawrthah Bialah a kal bawk.

&&&&&&

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.