Bru lakkir leh kalchilha roll ennawn chungchang

 

Tunhnaiah Bru hruai kir dan tur tharthawh leh niin Damchera-ah hma la tura tihte an thukhawm a, hetah hian Bru lam chuan an thil phutte chu a hlawhtlin loh chuan kir an tum tehchiam lo nia thudawn a ni a, an thil phutte tih hlawhtlin an ngiat tlat bawk a ni. Hetih lai hian Election Commission of India chuan electoral roll Bru te camp a kalchilha ennawn turin a rawn hriattir a.  NGO tangkhawm te’n an duhloh leh an do mek chu an hriat loh laiin kalpui a lo ni miah miah tawh a ni.

Bru laklet leh electoral roll-a thun chungchang hi kan khal rei ta hle a, tha leh zung, sum leh pai pawh a hek ta hle mai.  Bru lokir hmasate thil dawn leh lo kir turte Central-in pek a tiam a inthlauh lutuk vangin a kir tawhte a aia tam an phut. Kum 20 chhungin thlem chitin renga thlem an ni a, hemi chhung hian tlemte chauh an lo kira a tam zawk chu camp parukah an la awm zel a ni. Vawi tam tak a tlawlh hnuah an lo kir hnai dawn emaw tih laiin chhuanlam thar a awm zel mai hian ngaih a ti tha lo lo hle a, kir duh tak takna thinlung hi an pu tak tak lo emaw tih mai tur a ni ta hial e. An harsatna hriaiin Central leh State sawrkar tangrual pawhin ei leh bar thlengin a thlawnin a enkawl phah a ni a.

Tun tuma thil khawlohna bul pakhat nia lang chu Central-in Bru lokir turte thil pek a tiam a tam rahchhuah kal zel a tih ngam a. Bru kir tawhten hetiang hi duh ve lehin a tawpah chuan camp-a awm Bru thlengin an inthurual lo leh ta vek niin a lang a ni. Eng pawh nise, hmanni lawka a tlawlh hnua tun tuma Bru laklet hi August 14 atanga tanin September 30-ah zawhfel tura ruahman a ni leh a, tun tuma a tlawlh leh a nih chuan Bru-te hian Zorama lokir hi an duh tak tak niah a ngaih theih tawh awm e. Central, Mizoram leh Tripura official te inhmuhkhawmnaa tel ve Bru camp aiawh leh Mizoram Bru Displayed People Forum (MBDPF) aiawhten a hlawhtlin an ring lo tih an la sawi cheu hi a thanatthlak hle mai a. Bru-te hian an thil phut hnuhnawh te hi Mizorama cheng mek tam zawkin an nei pha lo tih an hriat nawn a ngai khawp mai.

Hetiang hi kan dinhmun a nih mek laiin ECI lamin Bru camp-a roll ennawn a lo zuk nei leh pawh hi Mizo mipuite inpalzamna a tih theih a. Kan ram NGO zawng zawng inthurualin an duh loh thu hi Central ah pawh thlen a ni tawh thin a. Chuti chung pawh a ramchhunga lo let duh lo Bru te zawk ngai pawimawha, a ramluahtute zawk au aw ECI-in a ngaithla tha duh lo hi chu hriatthiam a har ta hle mai.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?