BRU RALTLAN? LAKLET CHUNG CHANGAH INKAWMHONA?

Aizawl: Tripura a awm mek Bru te Mizoram a an lo kir leh dan tur chungchanga inkawmhona chu Zirtawpni khan Home Ministry hotute kaihhruaina in Bru camp hrang hrangah neih a ni.

Inkawmhona hun hi Ministry of Home Affairs Adviser (NE)M.K Singla chuan kaihruaiin Mizoram sawrkar Home Department Addl. Secretary Lalbiakzama bakah sawrkar lam atangin Mamit, Lunglei, Kolasib leh North Tripura District thuneitute bakah Mizorama tlawmngai pawl lian ber YMA Assistant Secretary Peter Chhakchhuak, Mizoram Bru Displaced People Forum ( MBDPF) hotute leh Bru Coordination Committee chairman Elvis Chorky te an tel a ni.

Refugee Camp-a Reang (Bru) awm mekte hi Mizoram District 3, Mamit, Kolasib leh Lunglei District chhunga khaw hrang hranga lak kir tura ruahman a ni a. Central sawrkar atanga tanpuina an dawn tur ang angte pawh ruahman tawh niin Mizorama let chhungkuate hian central atangin in sak tanpuina Rs. 1,30,000/- leh Financial Assistance Rs 5,000/- kum hnih chhung thlatin an pek dawn bakah buhfai a thlawnin kum hnih chhung an dawng dawn bawk a ni.

Reang (Bru) raltlante hi kum 2016 khan Mizoram mi leh sa dik tak an nih leh nih loh tichiang turin Camp 6, Kaskau, Khakchangpara, Hamsapara, Asapara, Naisingpara, Hazacherra-ah te enfiahna neih a lo ni tawh a ni.

Chung identification tih tawh chhungkua, rawn let duh ngei turte chu enfiah nawn leh tur niin hemi a kir leh duh tak tak turte chu Mizorama hruai haw an ni dawn a ni. Bru lokir te hi Mamit District khaw 48-ah leh Kolasib District khaw 10 bakah Lunglei District khaw 4-ah te dah an ni dawn a ni.  Bru Mizorama lokirte tan hian an kirna tur Village Council-te chuan in hmun leh huan thlai an siamna tur ram an pe dawn a. Heng bakah hian tanpuina hrang hrang Job Card, Ration Card siamsak an nih dawn bakah NLUP pawh ngaihtuahsak an ni dawn a ni.

Zalen thudawn danin Tripura a awm mek Bru te hi March thla hian hruaikir leh tum an ni a, kum 2016 November thla khan a hmunah kal chilha enfiah an lo ni tawh a, hemi tuma an chhinchhiah dan chuan Mizoram mi dik tak chu puitling 18,116 leh naupang 7,518 an ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?