Bru vanga home secretary hekna chungchang

Mizoramina IAS chhuanvawra kan neih  leh Home Principal Secretary chelhtu, Lalnunmawia Chuaungo chu  chief electoral officer SB Shashank chuan Election Commission of India hnenah election hmachhawn mekah harsatna thlentu tiin a hek a, ECI chuan thu tichhuakin home secretary hi a rawn chawlhtir tawh a. Hetih lai hian Joint NGO chuan CEO chu Mizoram chhuahsan turin an ngen bawk a ni.

Election lam hian Tripura relief camp-a Bru awm khua leh tui diktak  te chu roll revision ah hian thun an tum a. Mizoram sawrkar chuan lo kirte chauh thun nise a ti bawk a. CEO chuan Home Secretary chu Tripura-a  relief camp roll revision-ah hian harsatna a thlen niin a ziak a, central  armed police force chah luh dal tumtuah a puh bawk a ni.

Hetianga thu a kal mek lai hian YMA, MHIP, MUP, MZP leh MSU te intel khawm Joint NGO Coordination Committee chuan inthlan lo awm tur chu CEO hoa hmachhawn an ngamawm loha ngaiin November ni 5 hmain Mizoram chhuahsan turin an ngen a. CEO chuan inthlan muanawm neihpui a tum lo niah an ngai bawk a ni.

Relief camp-a Bru awmte electoral roll chungchang hi Zoramin a khelna a rei tawh hle a, Bru issue hian boruak tha lo a siam zing ta khawp a, tunah phei chuan Mizo IAS tlangvalin a tawrh phah ta hial a ni a, a pawi hle mai. Tun thil thleng hi ‘bureaucrat-te inkara indona thleng’ niin ngaihdan nei pawl an awm a, eng pawh nise a nghawng hi hnam thil a nih avang in Mizo mipuite hian ngaimawh a tul hle a ni. An duhthu ngeia Mizoram chhuahsan Bru te hi vawi engngemaw zah thlem haw tum an ni chung pawhin a tam zawk chu an lo kir duh chuang lo a ni a. NGO te’n a lokir duh chauhte vote thlaktir an ngiat laia pawn lam atanga vote thlaktir tum talh hi thil kawnghmang lo tawp a ni ngei ang.

CEO tan pawh central lam duh dan anga hma a lak ngaih chang a awm thei ang. Mahse, ram ralmuang takah hian heti zat sipai chah luh hi thil tul ber a ni em? tihte pawh zawhna awm thei a ni a. A chet dan hian mipui a barakhaih avangin thu awmzia zawh chian tum chanchinbumite a hmu duh miah lote hi a mak angreng hle  bawk a ni. Hetih lai hian Home Secretary pawhin Mizoram tana theihtawp chhuahin hma a la a, a hma hun thlenga tawrh phah thei dinhmunah a ding ta a ni a. Zoram mipuite hian ram tana mi huaisen hi mal dintir chi a ni lo tih hriat a tha ang a. Joint NGO pawhin thiam takin hma an la turah ngai ila, tangrual pawlte kalna apianga kal hi Mizo mipuite tih tur niin a lang.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?