BSI Aizawl-in Ruby Jubilee lawm mekBSI Aizawl-in Ruby Jubilee lawm mek

Aizawl; Bible Society of India (BSI) Aizawl Auxiliary chuan an din atanga kum 40 an tlinna, Ruby Jubilee chu vawiin atang khan Mission Veng Kohhran Biak Inpuiah an lawm mek a, lawmna programme hrang hrang buatsaihin Pathianni zan thleng a awh ang.

Zirtawpni chawhma khan Mission Veng Kohhran Hall-ah Ruby Jubilee Exhibition tan a ni a, exhibition hi Auxiliary President hlui Rev. C.Ronghinga’n a hawng a. Exhibition-ah hian BSI Aizawl Auxiliary leh Mission Veng Branch KTP tangkawpin thil chi hrang hrang 177 an pho chhuah zingah kuta Bible bu pum ziah chhuah, Bible edition hrang hrang hrang, naupang Bible, Bible for Children, Bible tawng thei, Zosap missionary-te bungraw hlui, BSI Aizawl Auxiliary award dawn, BESY Melody leh BESY Choir audio album hrang hrang, thlalak, thuziak hlui, lehkhabu leh Bible commentary hlui te a tel.

Zirtawpni zan khan Biak Inpui-ah ruby Jubilee Service neih a ni dawn a, inkhawm bânah jubilee lawm nan sky lantern 40 chhuah a ni ang.

Nimin chawhma dar 11:00 hian jubilee lawmna chi khat atan Bible House thlang sira GAD quarters thinah Bible House thar tur sakna lungphûm chu Chief Minister Lal Thanhawla’n a phûm dawn a; chawhnuah Pi Zaii Hall, Synod Conference Centre-ah Auxiliary Annual Meeting neih a ni ang a, tlaiah jubilee lawmna zanriah an kilho ang.

Nizanah thalai pualin jubilee lawmna hun hi hman a ni dawn a. Jubilee lawm nan hian Aizawl Auxiliary hnuaia Youth Committee chuan April 30, khan Aizawlah two wheeler Jubilee ride an lo huaihawt tawh a, mi thahnem tak an tel nghe nghe a ni.

Vawiin hian a lawmna inkhawm nilengin Biak Inpuiah hman a ni dawn bawk a. BSI Aizawl Auxiliary ruby Jubilee lawmna hi BSI hmunpuia General Secretary rev. Dr. M.Mani Chacko; Karnataka Auxiliary Secretary rev. Dr. Vasant renick; Shillong Auxiliary Secretary Rev. P.Dhakar; Dimapur Auxiliary Secretary rev. Dr. Z.K.rochill leh Shillong Auxiliary Standing Choir ten an hmanpui.

Bible Society of India hi Mizoramah chuan December 8, 1957 khan Lungleiah lunglei Branch tiin din a ni a, December 11, 1957-ah Dawrpui Presbyterian Kohhran Biak Inah Aizawl Branch din leh a ni a. June 1, 1978-ah Aizawl chu Associate Auxiliary-ah hlan kai niin February 25, 1983-ah Auxiliary puitlingah hlan kai a ni a; Associate Auxiliary-a hlan kai ni, June 1 chu BSI Aizawl Auxiliary din niah pawm a ni ta a ni.&&&&

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?