Buhfai hmuh belh phurh chungchang

Rajya Sabha MP Ronald Sapa Tlau chuan an hmalakna sawiin Mizoram chuan buhfai a dawn mek chu a dawn belhchhah dawn niin a sawi a, thla tin metric ton 7000 lai Food Corporation of India atangin buhfai hmuh belh a nih theih tur thu a sawi a. Hei hian fur chhiat lai pawhin buhfaia kan ram dinhmun chu nasa takin a pui dawn nia ngaih a ni. Buhfai hetiang zat phurlut tur chuan motor lian ke 12 nei chi 130-150 velin chhum lo chat lovin thla tin an thiar luh a ngai dawn a, hna hautak tak tur a ni a, zau taka ngaihtuahna sen thiam a pawimawh khawp ang.

Phai atanga buhfai phur lut tur hian tualchhung truck neitu leh driver te chuan state pawn motor lian hman an phal lo niin sawrkar department hotute chuan an sawi bawk a ni. Chutih laiin tuna buhfai metric ton 7000 zet thla tin phur tur hian Mizoram chhunga truck neitute chuan motor lian ke 12 nei chi hi an ngah tawk lova, lirthei lian dang an neih pawhin phurh luh ngai zah hi an tlin chuang lo nia sawi a ni bawk a ni.

Buhfai phurh chungchang hi ngunthluk taka ngaihtuah a ngai khawp a, truck neitute dinhmun zuk thlirpui chuan hmun dang atanga an hna chhuh theihna a nih avangin pawn lam lirthei lian te Mizoram chhunga buhfai phurh an phal lo pawh hi a awm viau a ni.

Kan ram hi ei leh bara kan intodelh loh zia chu hriatsa a ni a, kan kham khawp buh thar chhuak thei dinhmunah tak ngial pawh kan la ding lova, pawn lam atanga chawk luh ring kan la tam zawk a ni. Hemi a nih avang hian khua in min bumro phei chuan kawng a lo chhia a, phurh thlen loh a hlauhawma, a dahthatna hmun ‘godown’ a buhfai tam lam sawi rik chuan a tu a mai pawh hian kan beng kan tun hru lo thei lova. Khuarel chhiatna liantham thleng phei sela chu intam chhuah thei dinhmunah kan din theih mai a rinawm rum rum thin a ni. Hetiang hi kan dinhmun dik tak a nih avangin tuna FCI atanga buhfai phurh luh chungchangah pawh truck neitute hian rilru zau zawk an put a pawimawh hle mai.

Kan chanpual buhfai hi hmunpui atanga zuk phurh chhuah thin a nih loh chuan dah reng a ni dawn lo va, kan chân mai dawn tihna a ni. Hemi a nih avang hian sawrkar lam pawhin a phur thei a piang rawih mai a duh a rinawm hle a, a awmna chin pawh a awm ang. Eng pawh nise truck nei tute lam hian buhfai lak belh tur an phurh theih bak hi chu mipui mamawhna hriatsakin sawrkar kutah dah mai sela a tha ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?