CADC dan anga thiah

Central YMA general conference chuan Chakma Autonomous District Council (CADC) lo din tawh chu dan anga thiah a nih theih nan hmalak ni se tiin thu an titlu a, hemi chungchang hi November thla chhung hian rel tura tih nia sawi a ni. Mizoram Chakmate chuan thuchhuah siamin CADC thiah tumna chu an dem hle a, 1972-ah Lai leh Mara ADC nen a ruala din an nih avangin Chakma thiah a nih chuan Lai leh Mara pawh chu thiah ve mai tum a nih an rin thu an tarlang bawk a ni. DMZP te chuan nimin mai khan Delhi lamah dan lova lo lutte duh lohna hun an huaihawt bawk a ni.

Chakma chungchang hi hun rei tak kan buaipui tawh a, medical lam zir chhunzawmnaah ram leilung fate nena chanvo inang neih duh lovin Mizo zirlaite chuan ram pum huapin lungawilohna an lo lantir tawh a. Tun tuma Chakma issue lo awm leh hi a daih rei ta ang reng a, political party-ten inpuhmawh tawn nan an hmang a. Tun hnaiah phei chuan Zoram People’s Movement chuan an mahni lo chu Chakma chungchang sawi thei an awm lo niin an sawi hial tawh a, party dangte chu a hun laia an tih tur ti lovah an ngai tih an sawi bawk a ni.

CADC awm zel dan turah ngaihdan a in ang lo hle a, a then chuan umchhuah vek mai an duh a, a thenin an awmna hmun chu theihtawpa develop-saka chimrala inawm pawlh tha an ti a. Hetihlai hian thekhat chuan 1950 hma lama awmte unau anga en mai a, a hnua mi zawng chu chhuah tir an duh bawk a ni.

Kan rama tlawmngai pawl lian berin CADC chu dan lo anga din nia ngaia dan anga thiah bawhzui a tumna hi thlir dan a inang lo thei viau dawnin a lang a. Mithiam leh thil chinchang hre deuhte chuan Autonomous Distirct Council din chu 6th Schedule ah tarlan a ni a, hemi a nih vang hian dan lo anga din ni theiin an ngai loa, a dintute zawkin nakin hun zel chhut chiang loin an din mai zawk niin an ngai a ni. Hetih lai hian thenkhat chuan dan behchhan nei; mahse, zawm tluantling si loa CADC hi din niin an sawi bawk a ni.

CYMA hmalak tumna hi an tarmit vuahsak chuan ram leh hnam humhalh duh vanga ti niin a ngaihsak theih a, chutih rualin a tak tak ram thlir chuan thil harsa tak tak tur a ni. Hemi a nih avang hian CYMA hian ngaihtuahna fim tak a hman a ngai dawn a, at so bulha tharum thawhna chawkchhuak thei reng a ni tih an hriat a pawimawh hle dawn a ni. Thu tih tluk a nih ang ngei hian ‘Dan anga’ CADC hi thiah tum a nihnaah pawh ‘dan lo’ a tel lohna turin tun atang hian inven chikima inven a pawimawh tawp tih hriat nawn pawh a tha ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?