CADC inthlan result boruak

Chakma Autonomous District Council inthlan result-ah eng party mahin Sawrkarna an lak theih mai loh avang leh sawrkarna siam tura Congress leh MNF party te thawm chuan Zoram pum a chiah hneh hrih hle a, tunlai titi lian ber a ni mek a ni.

Inthlan result puan a nih khan a mala sawrkarna siam thei an awm loh avangin BJP leh MNF tangkawp chuan sawrkarna an siam ngei rin a ni a. A in thial chho zel a Congress leh BJP te chu thawhho tumin tangrual pawlte thlengin din duhna a awm ta a. Principle inan loh avanga party thawk dun thei lo nia khawvelin a hriatte an thawkho dawna a lan hman avangin national media te’n an ngaihvena an chhuah chuai chuai hman a ni. Party insawifiah dan thlirin Chakma mipui lamin party bil sawrkarna chu an duh tawh loh avangin ram pum huapa inhal tak party pahnihte chu thawhho inhuam nia sawi a ni. Hetih lai hian MNF lam chuan sawrkarna an siam thei tawh nia insawiin Governor an hmu ve leh tawh bawk a ni.

Council member tura thlan BJP 5 te zingah inlungrual lohna lian tak a awm nia sawi a ni a, Congress a ticket hmuloh vang chauha BJP a dingte an awm vangin MNF  thawhpui duh lo thenkhat an awma, a thenin MNF chu seat la hnem ber a nih avangin thawhpui awm an ti bawk a. Tunkar chhung ringawt pawh khan thu a chiri nasa hle a, zan hnih khat lekah dinhmun an inleh thal thawk thawk kha a ni a ni a.

Tun tum CADC thawnthu hrang hrang a nei a, a pawimawh ber zawka chu a thlirtu mipuite rilruah engnge awm tih hi a ni ber ang. Kumin tawp lamah MLA inthlan kan hmachhawn mai dawn a, ruling party Congress chu term hnih a zawna sawrkarna chelh tawh an nih avangin Eptu lam pawhin an theih na apiangah ­­tan an khawh a, chutiang bawkin party dang te pawhin theih tawp an chhuah bawk a ni. Mipui rilrua awm ni bera lang chu CADC inthlan result puan zawha party te khawsak dan kha a ni ber a, engtik lai maha thawkho thei lo inhal tak te’n Mizo Kristian ‘sentiment’ thlir lek lova party pakhat sawrkarna siampui tum ngawr ngawra a dum a var an thlu lo khan dem a hlawh ber awm e. Tuna a lan dan chuan chuan Lal na an chan dawn dawn phawt chuan pawisak kan nei mang tawh lo niin a lang a, party din chhan bul thut kan kalsan thui ta mah mah ti ila a sual thui lo tawp ang.

Eng pawh nise mipui lam hian inthlan zawha party te khawsak dan hi chhin chhiah ila, kan chunga rorel tur thlan hunah rilru mumal tak kan put a pawimawh khawp ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?