CADC inthlan zawh politics leh MLA inthlan

Nikum kum tawp lama BJP parliamentary party meeting-ah khan prime minister Narendra Modi-a hian state 19-ah BJP leh an thawhpuiten thuneihna an chan thu a sawi a, Indira Gandhi kaihhruaina hnuai congress party-in state 18 a sorkarna an chan lai kha an lehpelh tak thu a sawi a. An thawhrim vang leh tih tak zet a congress sorkarna nuai bo vek tura an beihna avanga hmasawn an nih thu a sawi a, a hnuk te pawlh a ulh deuh nghe nghe. Kum 2014 atanga BJP rawn invawrh chhohna atan hian hming langsar tak, thawk rim em em mai mi pahnih an awm a, prime minister Narendra Modi leh an president Amit Shah te hi an ni. Amit Shah hian BJP MP-ho hmaah, “Modi-a hian zing dar 2 te hian min rawn be fo a, zing dar 6-ah te min rawn be chhunzawm leh nghal thin a. Engtik lai hian nge a mutthilh thin tih hi ka hrethiam lo,” a ti nghe nghe.

Heti taka thawkrim hruaitu pahnih an neih avang hian kum 2014 hnu lama inthlanah an chak chho ta pur pur reng a ni. Mahse, an tum ber India rama congress nuai bo (congress free India) a nih avang te pawh aniang, state assembly inthlan hrang hrangah hian an chet dan fel fai lo zet zet sawi tur a awm nual a. Hmanni lawk a hmarchhak state pathum inthlanah te khan sum leh pai an vawrh nasa a, therhlo-ilo an tawktarh nasa viau bawk an tih kha. An tum dan ni bera lang chu kum 2022 a New India a sawi fo thlentir tur hian India rama BJP filawr taka sorkartir hi a nih hmel, chumi atan chuan inthlan awm reng rengah hian sorkar hrim hrim an tum bur a ni berin a lang. State thenkhatah MLA an neih mang lohna (leh an neih sa lohna)-ah pawh BJP sorkar an dintir thei a, chumai a ni lo a, inthlan zawh tawh hnuah sorkar siamnaa tel an tum avangin politics boruak an chawk danglam nasa hle bawk.

Tunah hian India ram state 22-ah BJP telna sorkar a ding mek a, kum 2014 a Modi-a a sorkar tirh kha chuan BJP sorkarna state 7 chiah a awm a, tunah hian BJP mal sorkarna leh chief minister an neihna state 13 a awm thung. Engpawhnise, vairam lamah BJP leh Modi-a thlipui a tleh na viau a, hmarchhak state-ah pawh a siper a rawn thleng ve a, BJP sorkarna state a awm ta fur a nih hi. Mizoramah lotus par ve thei tak ang maw?

Kumin kum tawp lamah MLA inthlan kan hmachhawn mek laiin inthlan tenau Chakma Autonomous District Council inthlan inthlan result chu kar kal ta khan puan a ni a. Rin lawk ang deuhin MDC bial 19 inthlannaah BJP in MDC 5 lai an nei a. Party malah chuan MNF in seat 8 lain MDC an ngah ber a, INC in seat 6 an la thung. Inthlan result puan a nih hnuah hian boruak a kal pangngai chho ang a, rin lawk ang deuhin MDC ngah ber MNF leh an thurualpui theih ber tura ngaih BJP te hi an thawkho ang a, sorkar an siam mai tura ngaih a ni a. Chutiang deuh chuan MNF president leh BJP president-te tawngkamah pawh a lang a nih khan.

Mahse, congress party hotu lawk thenkhat Chawngteah an cham zui a, a tukah boruak a inlum let thut a. Sorkar inring tak MNF chu zan khat thil thuah an hawihil titih ta der mai a. Mak tak maiin congress leh BJP thawkhoin sorkar an siam dawn tih thawm a lo awm zui a. Chutiang chuan boruak a kal chho a. Party hrang hrangten an mi leh sa MDC tharte Aizawl lamah an ko phei a, CADC sorkar thar lo piang tur kan nghak thup mai a nih hi. Tun ang, MLA inthlan dawn hnai tawh a khawvel pum huap pawha party inhal ber congress leh BJP an tangdun thei a, sorkar an siam thei a nih ngat chuan a mak dawn em asin. Chutiang a thleng a nih chuan a chhan thil pahnih pathum a awm thei ang.

Pakhatnaah chuan Chakmate hi hnam rinawm lo tak nia an sawi hi a lo ni tihna a ni thei ang a, an thlan tharte hian (a bikin BJP-in congress an thawhpui chuan) party-ah an rinawm lo hle tihna a ni ang. BJP leh congress party intawm sorkar a lo ding a nih chuan a eng party zawk zawk pawh hian an hlawkpui thei a; mahse, rei lo teah an chhiatpui thei ve ve tho bawk. BJP hian an lem zo thei a, congress pawh hian an lem zo thei bawk. MLA inthlan hunah congress tan sakhaw tih bik nei party tia BJP beih chiam a rem tawh lo mai thei bawk.

MLA inthlan kum a inthlan dang tesep awm hi MLA inthlan hlimthla angin an sawi fo thin a. Chutiang zawng chuan CADC inthlan result hi chu a ngaih theih loh mai thei a. Chakma an nia, an rilru put hmang leh Mizote rilru put hmang a inang lo a, an sorkar hmasa huna sum chingpen nia sawi zozaite pawh kha inthlan result-ah hian a lang pawh a ni thei. Mahse, inthlan zawh hnu thil thleng erawh hi chu kumin kum tawp lama Mizoram MLA inthlan zawh hlimthla a ni ve thei tlat.

Kum tawp lamah hian party hrang hrang an inbeihna karah hian a mala sorkar thei awm lo se, inthlan lai aiin inthlan result puan hnuah (CADC ang hian) politics a inlumlet kual thei tlat. Chutiang a nih chuan sum leh therhlo a leng vel ang a, tunhma lama Mizoram political history-a vawi khat chauh la thleng tih theih MLA inleia sorkar siam (Horse-trading) te hi a thleng leh thei. Hetianga, sorkar tum em em vanga a dika dawk thlu lo a, a mawi leh thianghlim lam ngaihtuah lek lo a vai ram vela an thil kalpui ang a thlen ve loh hram beisei ila. Hnam rinawm kan nihna hi ram hruaitute leh ram hruaitu nih tumte hian vawng tak tak se a duhawm hle ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?