Aizawl; Mizorama Chanchintha pulut hmasa bertu, Welsh Presbyterian Missionary, Rev. William Williams-an March 20, 1891-a Aizawl a lo thlen hnua Pathian thu a sawi hmasak berna Bungkawna CID tlangah Chanchintha a puan darhna hriat rengna lung phun chu Zirtawpni khan Bungkawn bialtu Pastor, Lalchhuanmawia’n a hawng.

Hawnna inkhawm hi Bungkawn Kohhran Vice Chairman, Upa Lalhuapzauva’n a kaihruai a, hetah hian Rev. William Williams-an Pathian thu hril tura Mizoram a lo thlen dan leh Aizawla a cham chhunga a thil tih dante Bungkawn Kohhran Secretary, Upa Lalrikhuma Sailovin a sawi.

Welsh Presbyterian Missionary, Khasi rama Shella khuaa awm, Rev. Williams hian kum 1890 khan Syhlet-a awm Rev. Pengwern Jones a tlawh a, hemi tum hian British sorkar laka hel vanga Mizo lal Syhlet lung ina tangte an hmu fuh a, heng mite atang hian Mizoram chanchin hria-in Pathian thu hril hna thawh nan Mizoram tlawh a duh a, Lushai Hills tlawha kal phalna British sorkar atanga a dil chu phalsak a nih hnuah chawlhkar ruk chhung Mizoram tlawha kal turin a awmna hmun Shella atangin February 18, 1891-ah Lushai Hills, tuna Mizoram ni ta panin a chhuak a, March 15, 1891 khan Mualvum kaia Kutbul luichhuah a thleng a, hetah hian naupang rual a hmuhte hnenah Isua chanchin sawiin, Bible milemte a sem a, March 20, 1891-ah Aizawl lutin British sorkarin lal atana ruat, Dokhama hnenah a thleng a, lal Dokhama in dinna tuna Bungkawn CID tlang tia hriatah hian luhkapui atangin chanchintha a hril thin a, he hmunah hian a thiante pathum nen thla khat dawn lai an cham dawn hnuah April 17, 1891-ah Aizawl chhuahsanin Khasi rama an awmna Shella lam an pan leh a ni.

Rev. Williams-an Mizorama Pathian thu a hril hmasak berna Bungkawn CID tlanga hriatreng lung phun hi feet 6-a sang, feet 3 leh a chanvea hlai, granite-a siam, thira hung a ni a, he hriatreng lung phun nan hian Bungkawn Presbyterian Kohhran chuan Rs. 2,82,515/- an seng.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.