Chapchar Kut ah hnam inpumkhatna

Kan pipute hun lai atanga Kut kan neih zinga ropui ber leh an uar ber mai thin Chapchar Kut chu tunkar maiah hmang turin kan inbuatsaih mek a. Pi leh pute khan Kut chi hrang hrang an nei nain Chapchar kut hi an hmang uar ber a, ei leh in tha ber ber nen hlim takin an hmang thin a ni.

Mizoram ah pawh hun engemaw chen atang khan sawrkar bultumin Chapchar Kut hi hman a ni a. Tunhnai deuhah sawrkar, Art & Culture chu a bultumtu ni mahse a huaihawt hna chu Central YMA ten an buaipui a, hei hi thil finthlak tak niin a lang. YMA in a buaipui atang hian Mizo chindan hrang hrang phochhuahna leh hnam inpumkhatna kawngah hmasawnna nasa tak a awm chho a, hei hi thil lawmawm tak a ni.

Kumin Chapchar kut ah pawh hian khuallian atan Myanmar lama kan zohnahthlak pui, Chin Hills Chief Minister Salan Lian Luai chu sawm a niin lo tel ngei pawh a tum a. Hei hian Myanmar lama kan unau zo hnahthlak te nen inpawhna leh inkawmngeihna tha zawk a thlen ngei beisei ang.

Zep nak emaw hun engemaw chhung kha chu Mizoram a cheng te hian hmundanga kan unaute hi ‘Khawdang Sial en in kan en tlat thin’ a, mahse tunhnai atangin hnama harhtharna ‘Nationalism’ lamah kan harh thar a. Unau kan nihzia te, inzawmkhawm a tulzia te hriain mi thahnemngaite hnathawh a lang chho zel a, thalaite leh zirlaiten chhawmnung chho zelin vawiin ah chuan insuihkhawmna kawng kan hawi thei ta reng mai. Chutih rual erawh chuan Mizoram a chengte hian nu leh pa chan kan chan thiam a, huikhawm kawngah hmalatu ah kan tan thiam a pawimawh ang.

Tun tuma Chapchar kut kan hman tur pawh hi hlimhlawp leh hua huau ah a ral mai ang tih a hlauhawm a. He Kut hi Mizote kan insuihkhawm lehna tura hmalak bul tanna atan te, khawvel hriata Mizo culture phochhuah nan te tangkai taka hman i tum ang u.
======

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?