Chawhchawrawi

Tun tum chu thil pakhat chauh thlur bing loin thil chi hrang hrang chawhchawrawi kual teh ang. Kar hmasa khan thil man to chungchang kha sawi belh chakawm tak tak a la awm nual. Two-wheeler taxi tunhnaia sorkarin a tlantir hi khawpui chhung kawngpui chepah chuan a tangkai phian a, a fuh khawp mai. Mahse, sorkarin chuan man (fare/rate) a siam anga tlan lo an tam khawp mai, thuneitute hian chhui chiang se a tha khawp ang. Cable TV in fee te hi nikum khan Rs. 200 atangin Rs. 400-ah an tisang dawrh a, chuti teh thut a an tisang chung chuan hmalatu tura ngaih consumer union lamin thawm an nei lem hlei lo a.

Thil man hi a awm tawk deuh chu a awm a ni. Bus/taxi/maxi cab fare te, lirthei dang hman man te hi (hmun dang nena khaikhin chuan) a to mah mah a ni. Mi harsa zawkte tana rit tur thil hi sorkarin a vei viau tura ngaih a ni a. Mahse, keini ah hi chuan a ni lem lo. Private clinic a doctor rawn man te, private hospital a inenkawlna man te, private school fee te pawh hi khuahkhirh deuh chu a ngai a ni. Hetiang zela kan kal chuan mistiri ni khat hlawh Rs. 1000 a nih hun tur te, vawksa Kg 1 Rs. 500 a nih hun tur te hi a hla miah lo ang. Sorkar inrelbawlna tha hnuaiah chuan hetiang mai mai hi chuan kan kal lo tawpin a rinawm.

Karnataka MLA inthlan (12 May, 2018) zawhah kumina MLA inthlan hnuhnung ber tur kum tawp lamah kan nei dawn a. Political party hrang hrang an inbuatsaih tan a, tualto party pali (MNF, MPC, ZNP leh PRISM) leh national party pahnih INC leh BJP ten tan la tan tak tak ta. Tuna a lan dan chuan ZPM thlazar hnuaiah MPC leh ZNP bakah pawl thenkhat an tangrual dawn a; MNF hian Municipal inthlan atang khan mal din an tum ngei niin a lang a, tun thlengin party dang thawhpui an tum thawm hriat a la awm lo. Chutihlaiin, BJP thlazar hnuaia din hmarchhak tualto party inchhunkhawmna NEDA ah chuan an president a phusa viau thung. Chuvangin, eng ang paw’n sawi fiah tum mahse BJP nen an inzawm lo tih ngawt theih an ni lo ang. Chumai a ni lo a, tun hnai lawk a, CADC inthlan tur campaign a banner pakhat ‘MNF Party Promise you A Vibrant CADC and A Vibrant Chakma Nation’ in social media lamah sawi a hlawh hle bawk.

Congress party hi nikum lam atang khan an che a phet chho ngun ta khawp mai. Politics thil a beihna avang ni lo sorkar hian chet buaina leh mualphona, mipui dem hlawhna an tawk zing khawp mai. Nikum kum tir lam atangin sorkar laiin NIAS chungchanga buaina a tawk a, Chakma zirlai an duhsak vangin zirlai rualin hma an la a, police kut tuar pawh an awm teuh a, YMA General Conference pawhin CADC thiah a nih theih nan hmalak an rel hial a, kawng chhia avangin harsatna namen lo a thleng a. Chutiang karah chuan hlawh bi thar (7th pay ti mai ila) hman phutin sorkar hnathawk an nuar a, CAG report-ah Lottery chungchang thil fel lo te, NLUP hlawhchham dan te a lo lang a, district thar ngiat a nawr tawk an awm bawk. Kuminah pawh Bairabi Zophaia MZP ten Chawlhbuk sak vangin Assam police an inrawlh a, zirlai rual huaisen takte kut an thlak a, silaiin an kap hial a, ram hmangaihtu thalaite thlavang hauh ngam lo Mizoram sorkar a mualpho hle a nih kha. Lei chim, kawng chhia, CM vengtute tharum thawhna te, NLUP chungchang te, budget nawi tak pharh a nih chungchang te pawh sawi tur a awm.

Mahse, Mizoramah na na na hi chuan party lian pahnih MNF leh Congress hi an inphun nghet tawh sa lutuk a, khaw tin leh veng tinah party lian ber an ni ve ve zel a. Zep thu a cheng lo, party dangte hi chu tih tham an awm lo, unit pawh an neih lohna khua leh veng a tam khawp mai. Chuvangin, party lian pahnih han khing thla meuh tur hi chuan tun atanga thapui thawh a an chet a ngai ang. Party lian pahnih vaw chhe khawp movement lian tham a chhuak lo a nih phei chuan sorkar leh tur chu a tu emaw zawk zawk hi an ni leh mai dawnin a lang. Engpawhnise, hun a la awm a, politics boruak a la inlumlet thei a, thil tam tak a la thleng hman a, mipui sukthlek pawh a la inthlak dawrh thei tho a ni.

NLUP chungchang hi han sawi leh ta ila, dik tak chuan NLUP chungchangah hian Mizo mipuite ngaihdan a inang lo, mi tam berin a hlawhchham an tih laiin rorel lai party mite chuan a hlawhchham lo an ti tlat thung, an zinga thenkhat chuan an sawisel bawrh bawrh tho. Buh thar zat atang te, thlai dang thar chhuah zat atang te, vawk sa leh bawng sa a kan dinhmun atang te hian kum 6 chhung khan NLUP hi a hlawhtlin leh tlin loh a hriat theih ang. Industries lama NLUP hmalakna te hi a hlawhtling tak tak em? Kumin hian Sawhthing chingtuten a hralhnaah harsatna an tawk leh mek a. State danga lo neitute chu nise an phur khawm anga CM bungalow kawtah emaw khawpui lun laiah emaw an paih darh ngei ang. NLUP hian thlai thar chhuah deh ralna kawngah hmalakna a nei chau hle a ni tihna pawh a ni thei ang. Thil siamna lamah hmasawnna a chau rih si a, lo neitu thawkrim tlem te tal hi chuan an thawhrim rah hi tel ve se a duhawm hle ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?