Chawngheiin MURA nuar zel

Aizawl: Mizoram Underground Returnees Association (MURA) chu June 7, 2018 atang khan Mizoram Pradesh Congress Committee (MPCC) nena an lo inrem tawhna tihhlawhtlin phutin an office, Tuikual South-ah chawngheiin nawrh an chhunzawm zel.

MURA member 18 vel chuan Tuikual South-a an office-ah chawngheiin an nuar a. MPCC leh MURA hian November 13, 2018 khan inremna lo sign tawhin he inremnaah hian MNF underground returnee-ten hamthatna an neih theihna tur tihhlawhtling turin an lo intiam tawh a. Inremnaah hian returnee-te tan ram pek tur, an in sakna senso tur sum pek, an fate sorkar hna pek, returnee-te contract hna pek, development hnathawh hrang hranga hamthatna dawntir ve leh sawrkar tanpuina hmanga housing loan pe chhuaktu zinga MURA member dah ve tih a awm a ni.

MURA President Lalthuama chuan Congress party-in an thil tiamte an la tihlawhtling lo tih sawiin an nawrh chhungin Congress party mi leh sa emaw, medical team emaw takngial pawh an la tir lo niin a sawi a. “Kan hriselna dinhmun a tha lo em em a, kan member-te hi kum 70 chuangte an ni hlawm tawh a, kum 60 chung lam deuh vek kan ni,” tiin Lalthuama chuan nuar mekte dinhmun a sawi a, Congress-in an intiamna an tihhlawhtlin hma chu nawrh chhunzawm zel an tum niin a sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?