Comedian Search zo ta, fiamthu thiam ber Chhuansanga

ZIPRO LPS Comedian Search chu Zirtawpni zan khan an zo a, contestant 100 vel zingah Lalchhuansanga chu pakhatna a ni.

 

Final hi kum dang ang bawkin zan hnih an ti a, a thawh khatna chu Inrinni hmasa khan an ti a, chumi hnuah tun Zirtawpni zan khan an chhunzawm a, chumi zan hniha contestant-te dinhmun atang leh youtube lama ‘liker’ an hmuh dan atangtein result an siam ta a ni.

 

Lalchhuansanga hi Lengpui tlangval, Republic Veng-a khawsa a ni a, pahnihna chu Keifang tlangval Ramngaihzuala niin, New Chalrang tlangval Lalbiaktluanga, Zonuam-a cheng chu pathumna a ni.

 

Top 5-a langte final zan hnihah hian an inel a, Lalkhawngaiha, Meidum leh Lianchhunga (LC-a), Dinthar te’n lawmman an dawng ta lo a ni. Anni pahnih pawh hi mi lawm hlawh tak an ni a, mi tam takin lawmman dawng tura an beisei khawpa chetha an ni. Mahse final zan hnihah hian Lalkhawngaiha leh Lianchhunga te hian zan dang an pha lo a, lawmman an dawng pha ve ta lo niin a lang.

 

Final thawh khatnaa fiamthu an inthawhsiak hnuah a thawh hnihnaah hian fiamthu an inthawhsiak leh a, chumi zawhah thupui pawtin an pawh fuh an sawi leh a, an thupui pawhfuh an sawi hian an sawi ngaihnawm tlang. Sawi nuihzatthlak deuh bik an awm a, mahse a sawi nuihzatthlak lo deuhte pawhin an sawi ngaihnawm tho tiin a sawi theih awm e.

 

Pakhatna Lalchhuansanga hi a chetha mar a, First Round atangin round tinah a chetha. Pahnihna Ramngaihzuala pawh hi a chetha mar khawp mai a, mi lawm hlawh tak a ni. Mahse final thawh khatna kha amah rau rauvah a chetthat loh ber tum niin a lang a, kha kha result siamnaah a tel si a, kha khan a pawt hniam ta a nih a rinawm. Pathumna Lalbiaktluanga pawh hi mi lawm hlawh tak a ni a, judge-te’n thil sawi thiam tia an fak thin a ni a, fiamthu nuihzatthlak vak lo pawh nuihzatthlak taka sawi thei a ni.

 

Kumin hi Comedian Search vawi 11-na a ni a, kum dang ang bawkin thlirtute’n an lawm a, an hlimpui. Contestant-teah han tha filawr an awm lo tiin a sawi theih a, an inrual tlang hle. Judge-te pawhin result siam a huphurhawm thu hi an sawi thin.

 

Tawngkam thar a awm leh nual a, ‘A pui chu!’ tih te, ‘Ka peih lo nasa a ni,’ tih te chu kumina Comedian Search tawngkam lar a ni awm e.

Host Daisy Zorammawii kaihhruaiin H Rotluanga (Mapuia), Mafaa Hauhnar leh Lalhruaitluanga Chawngte te’n an endik a, comedian Lalchhanhima zan khat a thu bawk. Mipuite ngainat Stephen Auhmun chu a hman loh avangin zan khat chauh a inlan thei a, ani inlan loh chungchang pawh hi an tan hma atangin fiamthu ‘material’ tha takah a chang.

“Kan show tlawm tak lo ngaihlu der thinte chungah kan lawm tak meuh a. A huaihawttute hi mi ropui kan ni lo tih hre turin kan ngen duh a, kan tlin tawk hi a sang lo ang, ngaidam chunga he show hi en a tul chang te pawh a awm ang. Thlirtute hriatthiamna kan dil e,” chief organiser Mapuia chuan a ti.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?