Condom hmang rawh, Pai zak suh tih hi – Rev. Darchungnunga

Vanduaithlak takin kan ramah HIV/AIDS-in min luhkhunga, tunah chuan kan ram hmelma lian a tling ta. A beilet turin Mizoram State Aids Control Society (MSACS) din a ni a. An inpein an bei nasaa, a lawmawm hle a ni. An tan lakna hmanraw zingalar ber chu condom niin a lang. Condom hmang tura infuih leh a hman tur supply lamah tan an la hle bawk. Condom tihzalen a, hmang tura ualau taka infuih sauh sauh reng hi tha lo chin leh that loh dan zâwngte a awm thei em, engtia tih nge tha ang tih lamah ngaihtuahna i han hmang teh ang u.

Research bei miten kan ramah HIV/AIDS a darh chakzia te, kan ram leh hnam tan râlpui a tlin tawhzia te an rawn ziak tawh thin a. A lo darh dan ber pawh boruaka hri leng lam ni lovin inkai chhawn a nihzia te, inkai chhawn theihna chi hrang hrangah pawh mipat hmeichhiatna (sex) hmanna atanga inkai chhawn a tamzia te an sawi thin a. Hengte hi thu dik vekah ngaiin kan sawi tumah lut nghal mai ila.

Tunah chuan condom hmang tura infuihna thu ziak a tam hneh ta hle mai. Mualpho thlak zawnga ngaih phei chuan hnam mualphona tiin a puh theih hial awm e. Chi hrang hranga ziaka thehdarh bakah tunlaia mi lar, mite ngaihsan hlawh tak hmangin T.V-ah an advertise a, an chhuah ngun bawk a, a lar hneh ta hle mai. Kan ram nun bawlhhlawhna avangin HIV/AIDS natna laka inven hi kan tihmakmawh a ni miau si.

Amaherawhchu, hetiang zâwng hian a ngaihtuah theih: Sex lam thlahlela umtuten condom an paia, an hman dawn phawt chuan, thil sual ti turah inngai lovin, kan ram hmangaiha, chhûn zâna thawkrimte thurâwn ang thlapa thil ti turah an inngai theiin a rinawm. A chhan chu, HIV/AIDS natna kai loh nan invenna tura pawimawh dang engmah sawi tel lovin – Condom hmang rawh, pai zak suh tih lam ngawr ngawr hi ziaka theh darhin kan tilar hneh ta em em tlat a lawm. Mahse, kan Bible zirtirna hi chuan, nupa kar ni lova sex hman hi condom a tel avang mai chuan thil thaah a pawm lêk lo vang le!

Thuthlung Hluiah sex dik lo taka hmangtute chunga Pathian thikthu chhiatzia leh a hremna natzia te, Thuthlung Tharin sex dik lo taka hman chîng mi hurte dinhmun chhiatzia a sawi ang te pawh huamin a venna lam MSACS hian bei se, ti ngawt dawn ila, MSACS-te hian Bible base-a zirtirna lam chu kan hmalakna tur (perview) a ni lova, kohhran hma lakna tur a ni a, keini chuan HIV/AIDS control lam hna hi kan thawk bik a ni an lo ti daih mai ang em? Tuna a lan danah chuan, HIV/AIDS beihletna hna hi mipat hmeichhiatna (sex)-a kan inhman dan tur Pathian Thu-in min zirtir dan nen en mila nun pumpui thatpui tur, taksa lam leh thlarau lam huama beih a ngai ni. Ama hma zawn zîmtea uar taka kalpui chuan side effect hlauhawm tak a awm thei dawnin a ngaih theih. Condom pai tur leh hmang tura uar taka kan inzirtirna hian mahni nupui/pasal ni lote nena sex hman dun hi ram mipuite rilruah hian a zalen ta deuhva ngaihna leh, condom hman chu AIDS venna a nih bakah naupai mualpho hlauhawm laka himna a lo ni thei dawn bawk nen, he inkawhhmuh thil hi a tum berah tawp mai lovin, hnam pawikhawih khawpin a luangliam nasa hle ang tih a hlauhawm khawp mai. Kan ram leh hnam hi Pathian duh loh zawng anga sex thu-ah tawp taka kan kal deuh deuh a nih ngat chuan, kanhmabakah hian chhiatna chi hrang hrang pawi tak tak a tam khawp ang. HIV/AIDS pawh chung zinga chi khat chu a ni ang. He lam hi chu kan sawi zau hman rih lovah ngai ila.

Rawtna: HIV/AIDS dona beihpui hi MSACS-te tihtur chang ni lovin, zau zawkin, sawrkar leh kohhrante pawhin tih tak taka, huam zau zawka beih ni sela. AIDS natna kan mal beih a, ama zâwnah zîmtea chak taka kan kalpui chuan, a hmanraw tha takin side effect tha lo tak a hring thei ngei dawnin a lang si a. Doctor thiam takin dam lo damdawi a chawhin, side effect nei thei chi chu, side effect awm thei vênnate nen a ziak thlap thin angin, kan hmanraw hmanin side effect pawi tak a neih lohna tura vênnate nen zau zawk leh famkim zawka beih a ngai a ni.

Condom hmang tura infuihna kan thehdarh nasa thei ang bawk hian sex hman dik loh hi Pathian huatzawng tak leh pawi nasa tak thlen thei reng leh thlen tawh thin a nihzia te, mahni nupui/pasal ni lo laka sex hman hi sual a nihzia sawi zet hnuah hmang tho tur tan chuan condom hman ngei ngei a tulzia theihtawpa inzirtir ni se.
Tin, MSACS hian condom an sem tur zawng zawng hi anmahni’n order se, a tuamnaah an duh ang ziak se emaw, condom an sem tur zawng zawng hi a tuamna thlakin thu ziak tha tak awmin tuam ni se. Hetiang lam hawi hian ziak ni se. Mahni nupui/pasal ni lo laka sex hman hi sual a ni. Hmang tho tur chuan AIDS laka him nan condom hman tur a ni, tiin.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?